Setiembre

Dios Jesusta poderta gorgan lapan problemacunata ushacächinanpaj. Imaycata ruraptinchipis waquin problemacunataga alchayta manami camäpacunchichu. Jesús ichanga milagruncunawan chayta rurargan. Pay munayniyoj car imayca mana alicunata, juchata, gueshyacunata y wanuytapis ushacächinanpaj camäpacunmi (Mat. 9:1-6; Rom. 5:12, 18, 19). Milagruncunaga tantiachimanchi “tucuy gueshyawan” nacaycajcunata alchachiyta y wanushgacunatapis cawarachimuyta puedishganta (Mat. 4:23; Juan 11:43, 44). Jina poderyojpis caycan shucucuy wayrata chawächinanpaj y supaycunatapis vencinanpaj (Mar. 4:37-39; Luc. 8:2). Jesús chay lapanta rurananpaj Jehová poderta goshganpita musyarga, ¿manachu shacyächimanchi? Jinamanpis seguro caycashwan Diospa Gobiernuncho imayca bendiciuncuna rasunpa cananpaj. Pachacho caycar Jesús milagrucunata rurashganga tantiachimanchi Diospa Gobiernunchona mandamuptin imayca milagrucunata rurananpaj lapan Pachacho. w23.04 3 parr. 5-7

Jatun congregaciuncho caycaptiquega, capaz munashgayquino achca cuti parlacaramuyta puedinquichu. Chayno captenga, yarpashcanquichi manana maquiquita jogarinayquipaj. Ichanga ama guelanaychu. Juc comentariupitapis mastaraj preparacunquiman. Chaynopa galanan parrafucunacho comentayta mana puedirga, gatejnincunacho ruranqui. Wilacamoj revistapita yachacunapaj captenga yarpachacuy imano cada parrafucuna tincun yachacushgayqui temawan. Chayta rurar musyanquipaj imata yapapänayquipaj. Chaypitapis sasa temacunapita wilacushgan parrafucunata preparacunquiman comentanayquipaj. Chaycunata tantiachicunapaj sasa captinmi walcajlami maquinta jogarenga parlacamunanpaj. Ichanga ¿imataraj ruranquiman mana acrashuptiqui comentanayquipaj? Reunión manaraj galaycuptin chay estudiuta pushaj hermanuwan parlapay maygan parrafuta contestashgayquita munashgayquipita. w23.04 21, 22 parr. 9, 10

Josega ali runa cargan, Jehovapa consejuncunata ali shongulanwan chasquicojmi. Juc cuticho imata rurananpaj quimsa cuti Jehová nergan y Josega jucla cäsucurgan (Mat. 1:20; 2:13-15, 19-21). Jehovata cäsucushganraycumi Josega warmin Mariata ali cuidargan. Chaychari Mariaga runanta masraj respetargan y cuyarganpis. Casado olgu captiquega, Josenomi ruranquiman, Bibliacho ashinquiman consejucunata familiayquita cuidanayquipaj. Diospa consejuncunata cäsucushgayquega ricacämungami y chayga mayraj yanapäshunqui warmiquitapis masraj cuyanayquipaj. Ali calpachacuptiquega imapis raquichishunquichu majayquipita. 20 watacunanona casada caycaj Vanuatu marcapita juc cristiana cayno nin: “Imata decidinanpäpis Jehovapa consejuncunataraj runalä ashiptenga masraj respetaycö. Alapa yarpachacönachu, ima decidishgancunamanpis yäracöna”. w23.05 21 parr. 5

Babiloniapita cutipäcamoj judiucunaga Diospa “santu runakunami” capäcunan cargan (Deut. 7:6). Chayno captinpis paycunaga calpachacunanrämi cargan Jehová munashganno cawapäcunanpaj. Maychicaj judiucunaga Babiloniachomi yurergan, chaymi babiloniucunanona waquin judiucunaga yarpaytapis cawaytapis galaycärergan. Nehemiaspis pasaypa almiracorgan judiucunapa wamrancuna hebreo rimayta mana yachashganpita (Deut. 6:6, 7; Neh. 13:23, 24). Diospa Palabranga hebreo rimaychomi guelgaraycargan. Chauraga, ¿imanoparaj Diosta cuyanman y yachacunman hebreo rimayta mana yacharga? (Esd. 10:3, 44). Chaypäga, judiucuna cambiucunata rurananpaj calpachacärinanrämi cargan y más fácil canman Israel naciunchona cawaycar, chaychoga ichic ichiclapa Jehová Diosta yapay adurayta galaycärishga cargan (Neh. 8:8, 9). w23.05 15 parr. 6-7

Imata ruranapaj ganasninchipis calpanchipis caycaptenga öraga yarpashganchinoga camacangachu. ¿Manachu ilajpita imacunapis pasamanchi y imata ruranapaj aunicushganchitapis cumplinchinachu? Aumi, chaynomi öraga (Ecl. 9:11). Jinamanpis ¿manachu problemacuna cashganraycu öraga calpaynaj caycar laquishgala ricacunchi? Aumi (Prov. 24:10). Y juchasapa cashganchiraycu Diosta sirviycashganchicho pantarpis pantarishunchi (Rom. 7:23). Y mana chaylachu, öraga pasaypa uticashgami ricacunchi (Mat. 26:43). ¿Chaycunapa pasarga imaraj yanapaycalämäshun? Ichic pantashganchilapitaga ama nishunchu ‘puedënachu’. Bibliaga wilacunmi imayca problemacunapa pasanapaj, ichanga clarumi wilacun imaycatapis venciyta puedishganchita. Imayca problemacunapa pasaptinchi guepaman mana cuticurga, chaycho ricacämunga Jehovata amatar cuyashganchita. Mayraj Taytalanchi Jehová cushicun payta mastaraj sirvinapaj calpachacuptinchi. w23.05 30 parr. 14, 15

Canan wichan achca pogushga cristianucunaga mozularaj caycar precursorno sirvir galaycurgan. Gampis precursor captiquega, yachacunqui waquincunawan imano arunayquipaj y guellayniquitapis shumaj aypächinayquipaj (Filip. 4:11-13). Chaymi alichi canman canan precursor auxiliarno galaycunayquipaj. Achcajmi chayta rurashganpita canan precursor regularno, localcunata sharcachiycho o Betelchopis yanapacurcaycan. Lapan hermanucuna calpachacunmanmi congregaciuncho ancianuno yanapacunanpaj. Biblia nin pipis chayno yanapacuyta munarga “alitami yarparkaykan” (1 Tim. 3:1). Puntataga juc hermano siervo ministerial cananpaj calpachacunman. Siervo ministerialcunaga ancianucunatami tucuynopa yanapan. Paycunaga humilde cashpan yäracoj masincunata cuyacuywan yanapan y cushi cushila predicapäcun. w23.12 28 parr. 14-16

Josías mozularaj caycaptin Jehovata ashirgan. Diosninta shumaj reguiyta munargan y voluntänintapis rurayta. Paypäga manami facilchu cargan rey cananpaj; chay wichan runacunaga luta dioscunatami adurapäcoj. Chaymi valiente canman cargan rasunpa caj aduraciunta defendinanpaj. ¡Y chaytami rurargan! Casi 20 watayojla caycaptin, Judá marcacho luta dioscunata adurananpaj imaycacunata ushacächir galaycurgan (2 Crón. 34:1, 2). Gampis mozularaj caycarga, Josiasno Jehovata ashinquiman. Chaytaga ruranqui Bibliata leir y Jehová imano cashganpita yachacur. Chayga yanapäshunqui bautizacunayquipaj. ¿Cayga imanotaj yanapäshunqui cawayniquicho? Luke 14 watayojla caycar bautizacurgan, y cayno wilacun: “Cananga imapitapis más puntata Jehovata sirviyta y payta cushichiyta munä” (Mar. 12:30). Chayta rurarga imayca bendiciuncunatami tarinquipaj. w23.09 11 parr. 12, 13

Tesalónica congregaciunta apóstol Pablo cartacamuptin, chay congregaciunga chaylaraj camacächishga cargan. Chaura ancianucunaga mushojlaraj car pantacurganchi, chayno captinpis paycunata respetanan cargan. Jatun nacay galaycunanpäna caycaptin, capaz ima wilacuycunatapis sucursalpita o Jehovapa testiguncunata pushajcunapita chasquishunnachu. Chaymi alapa ali caycan cananlapitana congregaciunninchicho caycaj ancianucunata respetar cuyanapaj. Ama gongashunchu Jesús paycunawan gatirajnincunata pushaycashganta. Chaymi ima captinpis camaricushgala caycashwan y ancianucuna pantashgancunalamanga yarparäcushwanchu. Imanomi juc casco soldadupa umanta chapaycun, chaynolami ima shuyarashganchega yarpayninchita cay munducho imaycacunapita chapaycalämanchi (Filip. 3:8). Jina shuyarashganchi cajman yarparga yanapämanchi ima pasaptinpis mana yarpachacuycarla y jaucala caycänapaj. w23.06 11, 12 parr. 11, 12

“Mana tantiyakuq” warmi nishganta wiyajcunaga shumaj yarpachacärinman nishganta chasquipäcunanpaj o manapis. Proverbios librucho “mana tantiyakuq” warmiga nin: “Suwakuy yakuqa masmi mishkin” (Prov. 9:17). ¿Ima ninantaj chayga? Juc runa warminwan casaracur ishcan punucäriptin o cacäriptenga Jehovapa ricaynincho ali carcaycan. Bibliachoga chaytami tincuchin chuya pucyupita yacuta upuycashgantano (Prov. 5:15-18). Ichanga pipis Diospa leyninta mana cäsucur jucwan jucwan cacäriptenga, tincuchin ‘suwakuy yakuta’ upuycashgantano. Chayno clase runacunaga pacapaylapa chayta ruran y juchancunata pacaycur öraga ali tucärin cushish cawacuycashganta. Pero chayno yarparga quiquincuna engañacuycan, Jehovaga lapantami ricaycan. Chaymi mana munanchichu imapis Jehovapita raquicächimänanchipaj, chayga pasaypa laquicuypämi canman (1 Cor. 6:9, 10). w23.06 22 parr. 7-9

¿Imataraj ruranquiman oraciunniquicuna shongupita manana captin o predicaciunman yargurpis manami cushicunquinachu? Ama yarpaychu Jehovapa espiritun gamwan manana caycashganta. Öraga juchasapa cashpanchi chayno ricacunchi. Chaymi Diosta cushi cushila sirvinayquipaj ganasniqui manana captenga, yarpachacuy apóstol Pabluman. Payga Jesusno rurayta munarpis öraga pishipashga o ganasninpis manami carganchu alicunata rurananpaj. Pablo öraga guelanaycarpis calpachacurganrämi Diospita yachachicunanpaj. Chauraga juchasapa cashpayqui imalapis guelanächishuptiquega ama laquicuychu. Chaypa trucanga valurcharcunayqui mana munaycarpis alicunata ruranayquipaj. Chayta rurashpayquega alipämi canga y quiquiquitami yanapäshunqui (1 Cor. 9:16). w24.03 11, 12 parr. 12, 13

Hermanunchicunapaj cuyayninchega ricacanga paycunawan amigo captinchi (2 Cor. 6:11-13) Achca congregaciuncunacho hermanunchicunaga jucnin jucninpis jucnomi caycan. Chaura lapancunata masraj cuyaycunapäga ali cashganman yarpachacunanchi. Jehová hermanunchicunata ricashganno noganchipis ricacuptinchi, paycunata rasunpa cuyanacushganchita ricächishun. Jatun nacay wichanchoga alapa ali canga hermanunchicunata cuyanapaj. ¿Imanotaj Jehová chapaycalämäshun jatun nacay galaycuptin? Babilonia marca ushacächishga cananpaj captin, Jehová cayno nergan sirvejnincunata salvacärinanpaj: ‘[Ruri] wayikikunaman yaykur punkuykikunata wichqakamuy [...] rabyaynï pasashqanyaq pakarpäkuy’ (Is. 26:20). Chaynolachi noganchipis ruraycushwan jatun nacay galaycuptin. w23.07 6, 7 parr. 14-16

Alichi canman cayman yarpachacuptiqui: “¿Imano runa cashgätataj waquincuna yarpapäcun? ¿Quiquiläpa yarpaynïlatachu waquincunapa naupancho valichë? ¿Waquincuna parlapämaycaptinpis upaj tucöchu? ¿Imaypis munashgänolachu imatapis rurayta munä? ¿O cushi cushilachu waquincuna ima nishgantapis ali shonguläwan chasquicö?”. Quiquilanchiman mana yarpachacuycarga, Jehovawan Jesús rurashgannolami ruraycäshun. Caway vidanchicho imacunapis pasaptenga ali cajcunaman yarpachacuycarla caycashwan. Öraga ilajpita ima gueshyawanpis nacar galaycushwan o tiyashganchi marcanchichopis micuyta tarinapaj sasa ticracurinman. Chaycunapa pasarga, ¿laquesalawan caycarchuraj imapäpis camäpacushunnachu? (Ecl. 9:11). Diosta ima cargulawanpis sirviycaptinchi ‘caycho mana yanapacunquinachu’ nimaptinchega, öraga waquincunapaj sasa imachi ticracurinman. Mana guelanäcurinapaj ima yanapämänanchipaj chuscu caycan: 1) ima pasamaptinchipis valurcharcushun, 2) shamoj tiempucho imata tarinapaj cajman yarpachacushwan, 3) ali cajcunalaman yarpachacushwan y 4) waquincunata imano yanapänapaj cajmanpis yarpachacushwan. w23.07 21, 22 parr. 7, 8

Jovinlaraj caycaptinmi, Danieltaga caru marcapa babiloniucuna esclavutano apacärergan. Babiloniachona caycar Daniel mozuga ‘runa ricashallanpaga’ “cuyayllapaj camarajlla, sänu” cargan, ayluncunapis rico imachi cargan (1 Sam. 16:7). Chayraycushi Babiloniacho acrapäcurgan reypa palaciuncho sirvinanpaj (Dan. 1:3, 4, 6). Jehovaga Danielta cuyargan cäsucoj ali shongu mozu cashganraycumi. Chayga rasunpami cargan, chay wichanpäga 20 watayoj imachi Daniel caycargan, y Noepitawan Jobpita Jehová parlaptenga Danielpitapis nergan ali yäracoj cashganta (Gén. 5:32; 6:9, 10; Job 42:16, 17; Ezeq. 14:14). Wanushgancamami Danieltaga Jehová cuyargan, payga lapan cawayninchomi mana yamacaypa Jehovata sirvirgan (Dan. 10:11, 19). w23.08 2 parr. 1, 2

Juc wasita rantiyta munarga, capaz quiquiqui shumaj ricayta munanqui chay wasi imano sharcachishga cashganta. Chaynolami rurashwan Bibliata leishganchi horapis. Biblia wilacushganta shumaj yachacunapäga janalan janalanpaga ama leicachärishwanchu. Chayta rurarga Bibliapa más alinnin caj yachachicuycunata manami shumaj musyashunchu (Heb. 5:12). Imanomi juc wasita shumaj ricapanchiraj rantinapaj, chaynolami Bibliapita yachacurpis, yachachicuynincuna jucnin jucninwan tincuchishwan. Imaman yäracunanchipäga manami jinaylapitachu canman, sinoga shumaj tantiarcunanchiraj imanir chayman yäracunanchi. Diospa Palabran ima ayca wilacushganta shumaj yachacurcunapäga, pacaraycajno yachachicuycunata ashinanchi. Apóstol Pabluga cristianucunata consejargan empeñuwan Diospa Palabranpita yachacurga “tantiyacunquipaj [...] may anchumi, may carumi, may rurimi, may altumi” cashganta. Chayta rurar yäracuyninga “shumaq sapitsashqa yörano y ali cimientushqa wayino” canman cargan (Efes. 3:14-19). Noganchipis chayta rurashwanmi. w23.10 18 parr. 1-3

Alichi canman unay Diospa sirvejnincuna pacienciacoj cashganpita yachacunayquipaj. Bibliachoga runacuna chayno cashganpita wilacun. Davidga mozularaj caycar acrashga cargan rey cananpaj, ichanga achca watacunataraj shuyarargan mandacur galaycunanpaj. Simeonwan Anapis Jehovata mana cachaypa sirvipäcurgan Mesías yurircur chayamunancama (Luc. 2:25, 36-38). Chayno runacunapita yachacur tapucuy: “¿Imataj payta yanapargan pacienciacoj cananpaj? ¿Ima alicunataj chasquergan pacienciacoj cashganpita? ¿Imanotaj payno cäman?” nir. Jina mana pacienciacoj caj runacunapitapis yachacunquimanmi (1 Sam. 13:8-14). Chayno rurarga tapucuy: “¿Imanirtaj chay runaga mana pacienciacoj cargan? ¿Ima mana alicunamantaj chayargan pacienciacoj mana cashganpita?”. w23.08 25 parr. 15

Apóstol Pedrutaga imapis Jehovapita raquichirganchu. Juc cuticho Jesús yachachicushganta waquin discipuluncuna mana tantiaycur payta jaguiriycur aywacärergan, Pedro ichanga mana (Juan 6:68). Payga waquincunapa naupancho Jesusta nergan: “Nishqaykikunaqa mana ushakaq kawayta taripäkunäpaqmi kaykan”. Jesusga musyargan Pedruwan waquin apostulcuna payta cacharinanpaj. Chayno captinpis Jesusga wilacurgan Pedro valurcharcur yapay payta gatiränanpaj (Luc. 22:31, 32). Jesusga tantiarganmi alita rurayta munaptinchipis ‘quiquinchicunalapitaga manami camäpacushunchu’ (Mar. 14:38). Chaymi Pedro niegashga captinpis, Jesusga jinala payta cuyaycargan. Y cawarircamur Pedruta yuripargan (Mar. 16:7; Luc. 24:34; 1 Cor. 15:5). Chayta ricar Pedrutaga yanaparganchi laquicuycarpis guelanashga mana caycänanpaj. w23.09 22 parr. 9, 10

Chaura pipis Diosman yäracur juchancunapita arrepenticuptin, Jehovaga alita ruraj runatanona rican y pantashgantaga yarparannachu (Sal. 32:1, 2). Abrahán, David y waquincunapis Diospa ricaynincho alita ruraj runacuna captinpis, paycunaga jinala juchasapa capäcurgan. Chayno captinpis ali yäracoj runacuna cashganraycu, Jehovaga alita ruraj runacunatano ricargan (Efes. 2:12). Chaymi romano cristianucunata apóstol Pablo cartacushgancho nergan Jehovapa amigun canapäga payman yäracunanchiraj. Noganchipis chayta ruraptinchega Jehová ali ricamäshun, Abrahanta y Davidta ricashganno. w23.12 3 parr. 6, 7

Lapanchimi altarcho sacrificiucunata churajno Jehovata goycushwan, chaytaga ruranchi lapan tiempunchiwan, calpanchiwan y imaycanchicunawanpis Diospa Gobiernunta yanapacuptinchi. Chauraga imapitapis masraj Jehovalata aduranapaj calpachacurga, cushicuypämi canga. Apóstol Pablo yarpächin caycunata jinala ruraycar siguipäcunapaj: Jehovata mañacärinapaj, imaman yäracushganchipita waquincunata parlapänapaj, hermanucunawan juntacarcur shacyächinacärinapaj masraj Jehovapa junajnin caylachona caycaptin (Heb. 10:22-25). Apocalipsis librupa ushanancho Jehovapa angelninga ishcay cuti nin: “¡Tayta Diosta adorayga!”. Chaynoga nimanchi mana gonganapaj (Apoc. 19:10; 22:9). Aumi, ama gongashunchu Jehovapa templun nirajpita shumajta yachacushganchipita, paylata sirvishganchega imapitapis más alimi caycan. w23.10 29 parr. 17, 18

Lapanchimi cay mandatuta cäsucuyta munanchi: “Juknintsi juknintsipis kuyanakushun”. Pero Jesusga nergan canan wichan imayca mana alicuna miraptin runacunaga “mana kuyanakunqanatsu” (Mat. 24:12). Chaywanga manami niycarganchu discipuluncuna manana cuyanacunanpaj. Pero cuidacunanchimi Diosta mana cuyaj runacunano mana canapaj. Chaymi canan cay tapucuyman yarpachacushun: ¿imalapis caycanchuraj musyanapaj hermanunchicunata alapa cuyaycashganchita o manapis? Ricärishun. Pilapis jagayächimashganchi hora imata rurashganchichomi musyacanga rasunpa cuyacoj cashganchi o manapis (2 Cor. 8:8). Apóstol Pedruga nergan: “Imano karpis lapan shonquykiwan kuyanakäriy. Rasunpa kuyakuq runaqa imaykata ruraptinpis perdonanmi” (1 Ped. 4:8). Chaura hermanunchicuna pantarcuptin o contranchicho imalatapis ruraptin cuyanapaj sasa captinpis, jinalami cuyashun. w23.11 10, 11 parr. 12, 13

Congregaciunpita acrashga hermanucunalata cuyaptinchega, Jesús nishganta rasunpa manami cäsucuycanchichu. Öraga capaz waquincunalawan más amigo cayta munashwanmi, Jesuspis waquin discipuluncunalawan más amigo cargan (Juan 13:23; 20:2). Chayno captinpis apóstol Pedruga yarpächimanchi familianchita cuyashganchino hermanunchicunatapis cuyanapaj, chaymi cayno nimanchi: “Yärakuq mayikikunawan kuyanakärinki” (1 Ped. 2:17). Pedruga consejargan “lapan shonquykiwan kuyanakäriy” nir (1 Ped. 1:22). Chaywanga niycämanchi waquincunata cuyayta mana munarpis cuyananchipaj calpachacunanchi. ¿Imataraj ruranquiman maygan yäracoj masiqui rabianächishuptiqui? Payta cuyanayquipaj trucanga capaz chaynola cutichiyta munanquiman. Ichanga Jehovaga manami munanchu chayta ruranapaj, Jesuspis Pedruta chayta yachachergan (Juan 18:10, 11). Pedruga cayno escribergan: “Runa mayiki chikishuptikipis ama chikipäkuytsu. Ashlishuptikipis ama ashlipäkuytsu.” Sinoga “bendicionta chaskinanpaq Tayta Diosta manakärinki” (1 Ped. 3:9). Shongupita cuyacoj captiquega jinala paycunata cuyanquimi. w23.09 28, 29 parr. 9-11

Alapa almiraypämi imano wamracuna rasla winan y ilajpita cuentata gocuptinchega jovinna o jipashna caycan. Pero espiritual cajcho pogunapäga manami jinaylapitachu caycan (1 Cor. 13:11; Heb. 6:1). Pogushga cristianuman ticrananchipäga Jehovawan amistäninchita sinchiyächishun, espiritunwan yanapämänanchipaj mañacushwan, yachacushwan imalatapis rurayta y preparacushwan shamoj tiempucho más cargucunacho yanapacunapaj (Prov. 1:5). Jehovami olgutapis warmitapis camashga (Gén. 1:27). Chayno captinpis olguwan warmiga manami igualchu caycan. Runataga más calpayojta camashga y ruraynincunapis jucno jucnomi. Chaymi cada uno ruraynincunata cumplishganchomi ricacan olgupis warmipis imano cashganta y tucuy habilidänincunatapis (Gén. 2:18). w23.12 18 parr. 1, 2

¿Jesusga munarganchuraj lapan runacuna Taytanta jutinpa gayananta? Au, munarganmi. Pero chay tiempucho waquin pushacoj religiosucunaga costumbrincunaraycu manami munapäcojchu runacuna Diosta jutinpa gayapäcunanta, paycunaga yarpapäcurgan Diospa jutin alapa sagrado cashganta. Ichanga Jesusga manami permitirganchu chay wichancho caycaj costumbricuna michänanpaj runacuna Diosta jutinpa alabapäcunanta. Juc cuticho Geraseno marcapita juc runa endemoniado caycajta Jesús aliyächergan. Chayta ricajcunaga alapa manchacushpan Jesusta nergan chay marcapita aywacunanpaj (Mar. 5:16, 17). Pero Jesusga munargan chay marcacho lapan runacuna Diospa jutinta musyapäcunanpaj. Chaymi manaraj aywacurmi aliyächishgan runata nergan waquincunata wilapänanpaj Jehová payraycu rurashganta (Mar. 5:19). Reyninchi Jesusga munaycunmi noganchipis lapan runacunata Diospa jutinta yachachinapaj y imano cashgantapis (Mat. 24:14; 28:20). Chaynopa Jesuspa shongunta cushichishun. w24.02 10 parr. 10

Jehovapa marcancho caycarga alapa cushicuypämi. Cay ushanan tiempucho imayca mana alicuna miraycaptinpis, Jehovapa marcanchoga juc familianomi caycanchi (Sal. 133:1). Jehovapa consejuncunaga yanapämanchi familianchiwan cushishga cawacunapaj (Efes. 5:33–6:1). Jina yachaytapis gomanchi mana ali yarpashganchicunata trucachinapaj y cushishga goyänapaj. Chayno captinpis, lapanchi calpachacunanchirämi Jehovata mana cachaypa sirviycänapaj. ¿Imanir? Capaz waquincuna ima parlashgan o rurashganpis laquichimashwan. Jina quiquinchipis cutin cutin pantarcuptinchi o ima juchatapis rurar guelanäcurishwanmi. Pero Jehovata sirviycarla caycäshun 1) pilapis ofendimaptinchi, 2) majanchi o warminchi laquichimaptinchi y 3) pantashganchipita mana valejno ricacuptinchi. w24.03 14 parr. 1, 2

Ricashcanquichi waquin hermanucuna decidishganta Jehovata sirvishgancho mastaraj rurananpaj. Waquincunaga Diospita yachachicojcunapa escuelanman aywargan y juccunaga juc marcaman aywacärergan yanapacoj. ¿Gampis paycunano rurayta munanquimanchuraj? ¡Chayno captenga alimi canman! Jehovapa sirvejnincunaga imaypis calpachacuycan Diosta sirvishgancho masta rurananpaj (Hech. 16:9). Canan chaycunata rurayta mana puedirga, ama yarpaychu waquincuna gampita más välishganta. Jehovapa ricayninchoga más ali caycan imatapis aguantashganchimi (Mat. 10:22). Cayta ama gongaychu: Jehovaga alapami cushicun gam puedishgayquimanno lapan rurashgayquicunata ricar. Chaynopa bautizacushgayquipitana Jesusta imaypis gatiraycanqui (Sal. 26:1). w24.03 10 parr. 11

Taytalanchi Jehovaga aunimanchi perdunamänanchipaj arrepenticuptinchi (Sal. 86:5). Chauraga lapan shongunchiwan arrepenticushgana carga, yarpaylapis ama yarpashwannachu “¿Jehová perdunamashgachuraj?” nir. Ama gongashunchu Diosninchi ali shongu, tantiacoj cashganta y payga puedishganchilata ruranapaj mañamanchi. Chaymi achcata o ichiclata voluntäpita rurarga, payga cushicunmi. Lapan calpanwan unay Jehovata sirvej runacunaman yarpäshun. Apóstol Pabluga achca watacunapa mana yamacaypa may chaypa Diospita yachachicurgan y congregaciuncunatapis camacächergan. Pero carcelchona caycaptin chaycunata rurayta mana puedirgannachu. Chaura, ¿nishwanchuraj Jehová paywan cushishga manana caycashganta? Manami. Pabluga puedishganlata ruraycargan y Jehovaga lapan rurashgancunata bendecirgan (Hech. 28:30, 31). Noganchipis öraga lapan yarpashganchita rurayta puedishunchu, pero Jehovaga ricaycanmi ali shongulanchiwan rurashganchita. w24.03 27 parr. 7, 9

Jesusga manami shimilapitachu discipuluncunata nergan mañacunanpaj. Paypis Taytanpita runacunata yachachir imaypis mañacoj. Achca runa gatirpaptinpis o imayca ruraynincunawan caycaptinpis tiempunta camacächergan mañacunanpaj (Mar. 6:31, 45, 46). Öraga chaca chacala sharcoj Papäninwan parlananpaj. Juc cutichomi waraytaraj mañacurgan discipuluncunata acrananpaj (Luc. 6:12, 13). Manaraj wanur chacaychopis Jehovata cutin cutinmi mañacurgan, payga musyarganmi ichiclacho rurananpaj caycashganga alapa sasa cananpaj cashganta (Mat. 26:39, 42, 44). Jesús rurashganga yachachimanchi imayca ruraycunawan caycarpis tiempunchita jorgushwan Jehovata mañacunapaj. Jesús rurashganno camacächishwan imay y ayca cuti mañacunapaj, chaypäga capaz tuta tutala sharcushwan y manaraj mañacur punurpis aywashwanchu. Chaynopa valuranchi Jehovawan parlanapaj camacächishganta. w23.05 3 parr. 4, 5

Bibliachoga nin Jehová paycunata alapa cuyashpan espiritunta cachamurgan. Chaymi alapa cushicunchi cielupaj acrashgacunata Jehová cuyashganta musyar. Quiquincunapis musyapäcun Jehová paycunata amatar cuyashganta (Jud. 1). Jucnin jucnincunapis apóstol Juan nishganno nipäcun: “¡Tayta Dios pasaypami kuyamantsi! ‘Wamräkunami karkaykanki’ nimantsi” (1 Juan 3:1). Chaura, ¿cielupaj acrashgacunalatachuraj Jehová cuyan? Manami, payga lapan sirvejnincunatami cuyamanchi. Jehová amatar cuyamashpanchi cuyashga wamranta cachamurgan noganchiraycu wanunanpaj. Paynoga manami pipis cuyamanchichu (Juan 3:16; Rom. 5:8). w24.01 28 parr. 9, 10

Jana textucho nimanchi ima masta David rurargan mana manchacunanpaj. Pay yarpachacurgan shamoj tiempucho payraycu imataj Jehová rurananpaj. Musyarganmi Jehová imapitapis salvananpaj. Jehová aunishga cargan David Israelcho rey cananpaj, chaymi yäracurgan imapitapis chapänanpaj (1 Sam. 16:1, 13). Jina Davidga musyarganmi Jehová imatapis auniptin cumplishganta. Jehovaga manami aunimashganchichu canan wichan problemanchicunata ilacächinanpaj. Pero canan imayca mana alicunapa pasaycarpis ama gongashwanchu Jehová aunimanchi mushoj Pachacho chay lapancunata ushacächinanpaj (Is. 25:7-9). Pay alapa poderyoj captin wanushgacunata cawarachimunga, gueshyaycajcunata aliyächenga y chiquimajninchicunatapis ushacächenga (1 Juan 4:4). w24.01 6 parr. 12, 13

Yarpänanchi Jehovalata sirvinapaj aunishganchiman. Yarpanquichi ichic ichiclapa Jehovapita yachacur, payta Taytayquitano ricar, jina respetar cuyaytapis galaycushcanqui. Chaypitapis payman yäracur juchayquicunapita arrepenticushcanqui y Jehová chiquishgan ruraycunataga rurayta jaguishcanquinami. Jehová perdunashushgayquita ricaycurga cushicushcanquichi (Sal. 32:2). Nircur lapan reuniuncunaman aywanayquipaj y yachacushgayquipita waquincunata parlapänayquipaj calpachacushcanquimi. Cananga bautizashgana cristiano caycar cawayman apaj nänicho caycanqui y chaypita yargucuyta manami munanquichu (Mat. 7:13, 14). Imaypis mana cachaypa Jehovalata sirviy, y listo caycay lapan mandamientuncunata cäsucunayquipaj. w23.07 17 parr. 14; 19 parr. 19

Diospa voluntäninta ruranapaj aunishganchiman yarpachacurga calpatami tarishun ima juchamanpis mana tuninapaj. Tantiarinapaj, ¿alichuraj caycanman casado cajcunawan asipaylapa miluycachir parlapaptinchi? ¡Manami! Jehovata sirvinapaj aunishganchicho, payta nishcanchi chaycunata mana ruranapaj. Chauraga puntalapitana shongunchicho ima mana ali munaycunapis mana captenga, imapis mana cangachu juchaman chayachimänanchipaj. Fiyu runacuna mana alicunata rurashgancunapita witicunanchi (Prov. 4:14, 15). Jesusga imaypis decidido caycargan Taytanta cushichinanpaj y noganchipis payno rurayta munanchi. Chaymi imaypis decidido caycänanchi Dios chiquishgancunata mana ruranapaj (Mat. 4:10; Juan 8:29). Tucuy problemacunapa y tentaciuncunapa pasarga, imaypis decidido caycashwan Jesusta gatiränapaj. Diosninchi Jehová aunimanchi yanapämänanchipaj. w24.03 9, 10 parr. 8-10