Octubre

¿Imaylapis sasachu cargan cäsucunayquipaj? Öraga Davidpaj sasa captin Jehovapa yanapacuynintaraj ashirgan. Pay Jehovata cuyaptinpis öraga facilchu cashga cäsucoj cananpaj, y noganchitapis chayno pasamashwanchi. ¿Imanir? Juchasapa runacuna canchi. Jina Satanás imaypis imaycata ruraycan Jehovapa contrancho churacänapaj (2 Cor. 11:3). Y canan wichan runacunaga Jehovata cäsucärinchu; paycunaga “Tayta Diosta mana cäsukur” cawapäcun (Efes. 2:2). Chaymi juchasapa cashganchiraycu y Satanaspa maquincho caycaj mana cäsucoj runacuna imaycata ruraptin, imaycanopa calpachacunanchirämi Jehovata y autoridäyoj runacunatapis cäsucunapaj. w23.10 6 parr. 1

Jesús cay milagruta rurashganpita yachacunchi ñanpu shongu o humilde canapaj. Payga manami ali tucurganchu yacuta vinuman ticrachishganpita. Aumi, payga manami imaypis ali tucojchu rurashganpita. Chaypa trucan humilde cashpanmi Taytanta imaypis alabargan (Juan 5:19, 30; 8:28). Noganchipis Jesusno captinchega humilde cashun y rurashganchicunapita manami ali tucushunchu. Waquincuna alabamänanchipaj ama ashishwanchu, sinoga Diosninchi Jehovata alabananchipaj ashishwan (Jer. 9:23, 24). Calpachacushun imaypis Jehovalata alabanapaj. Pay mana yanapämaptinchega imatapis rurayta puedinchichu (1 Cor. 1:26-31). Pipis humilde cashpan waquincunata yanapashganpita, manami ashinchu runacuna alabananta. Chaypa trucan masga yarpan Jehová lapanta ricashganta y rurashgancunatapis valurashganta (Mateo 6:2-4 textuwan tincuchiy; Heb. 13:16). Jehovaga alapami cushicun calpachacuptinchi Jesusno humilde canapaj (1 Ped. 5:6). w23.04 4 parr. 9; 5 parr. 11, 12

Jehová yanapaptinmi apóstol Pabluga cristianucunata shacyächergan waquincunaman yarpachacunanpaj. ¿Imanotaj cay consejuta cäsucushwan reuniuncho caycar? Yarpachacushun waquincunapis comentayta munashganta. Cayta tantiarcunapaj cayman yarpachacushun. ¿Manachu amiguyquicunawan parlapacuptiquega manami gamlachu parlanqui sinoga paycunapis parlananpaj jaguirinquimi? Chaynolami reuniuncunachopis lapancuna parlacaramunanpaj munanchi. Chauraga hermanunchicunata shacyächinchi reuniuncunacho comentamunanpaj jaguiriptinchi (1 Cor. 10:24). Comentariunchicuna tacshala captenga tiempo cangami waquin hermanucunapis comentamunanpaj. Jina comentariunchicunachoga manami imaycapitaraj parlashwanchu. Parrafucho lapan wilacushganta parlacamuptiquega waquincunapaj canganachu imapita parlananpaj. w23.04 22, 23 parr. 11-13

Caway vidanchicho imacunapis pasamaptinchi Diospita yachachicuytaga ama jaguishunchu, calpachacuycäshunla. Predicaciunchoga manami pitapis tantiachishwanchu noganchino creir jucla galaycunanpaj. Öraga achca creenciayoj y may chay runacunawanmi tincunchi. Apóstol Pabluman yarpaptinchega yanapämashwanmi. Payga may chaypita runacunawan tincurga shumajmi Diospita yachachej. Paytami Jesús nombrargan may chaypa Diospa ali wilacuyninta apananpaj, y chaynomi cargan (Rom. 11:13). Pabluga Diospita parlapargan judiucunata, griegucunata, yachajcunata mana yachajcunata, carguyoj cajcunata carguyoj mana cajcunatapis. Chaychi Pabluga nergan runacunapa shongunman chayananraycu, “llapantapis chayno rurä” y Diospa “alli willacuyninta willacunä-raycu” (1 Cor. 9:19-22). Pitapis yachachinanpäga cuentataraj gocoj maypita cashganta y ima creenciacunayoj cashgantapis. ¿Imatataj chaypita yachacunchi? Predicaciunman aywar Diospita ali shongulanwan pipis chasquicunanpäga ali yarpachacur-raj parlapashwan, ‘maypitaraj pay, ima creenciayojraj pay’ nir. w23.07 23 parr. 11, 12

Pipis jucla mana rabiacuptenga nishwanchu débil runa cashganta. Imapis sasaman ticracuriptin jucla mana rabiacunapäga calpachacunanchirämi. Y chaypäga Jehovapa espiritun yanapämanchimi (Gál. 5:22, 23). Pipis juc chúcaro cawalluta manshuman ticrachiptenga, manami ninanchu chay cawallu calpaynaj o débil cashganta. Chaypa trucan manshuna caycarpis jinala calpayoj caycan. Chaynolami geniunta controlaj runapis alapa sinchi cashganta ricächicun. Y chayno cananpäga manami quiquinchicunalapitachu caycan, sinoga Jehovapa yanapacuyninwanrämi geniunchita controlayta puedishun. Chaymi achca Testigucuna geniunta controlashpan piwanpis rimanacuyman manami chayapäcunchu, chayta ricar waquincunaga Testigucunata respetar galaycärin (2 Tim. 2:24, 25). w23.09 15 parr. 3

Juc visiuncho apóstol Juan ricargan 24 ancianucuna cielucho Jehovata aduraycashganta. Paycunaga Diosta alabapäcuycargan y reconöcirgan paylami munayniyoj cashganta ‘alabashga, respetashga y adurashga’ cananpaj (Apoc. 4:10, 11). Angelcunapis Jehovata cuyar respetapäcun y alabapäcun. Cielucho caycashpan paycunaga Jehovata shumaj reguipäcun. Lapan rurashgancunata ricaycur musyapäcun Jehová imano cashganta, chaymi lapancuna paylata alabapäcun (Job 38:4-7). Noganchipis mañacuyninchicho Jehovata alabashwanmi. Chaytaga ruranchi paypita imata gustamashganchita y imanir respetashganchitapis niptinchi. Bibliata leir y leishganchiman yarpachacurga shumaj tantiarcushwan imata Jehovapita gustamashganchita (Job 37:23; Rom. 11:33). Nircur mañacushganchicho Jehovata wilapashwan imano cashganman yarpachacushganchipita. Jina Jehovataga alabashwanmi quiquinchita y lapan hermanunchicunatapis yanapamashganchipita (1 Sam. 2:1, 2). w23.05 3, 4 parr. 6, 7

1919 watacho, Jatuncaray Babiloniaga Diospa marcanta manana pantachergannachu. Chay watacho tantiaj y yäracuypaj esclavo yurimurgan, chayga alimi cargan. Paycunaga yanapargan ali shongu runacuna Sagrado Nänipa puripäcunanpaj (Mat. 24:45-47; Is. 35:8). Naupacho ali shongu runacuna rurashgancunami yanapargan achca runacuna Jehovapita yachacur sagrado nänilapa puripäcunanpaj (Prov. 4:18). Jinamanpis cawaynincho cambiucunata rurapäcush Jehovata cushichinanpaj. Pero payga manami jucla ruranantachu munargan, sinoga siervuncunata ichic ichiclapa yanapargan. Cayman yarpay, ¿imanoraj ricacushun Jehovata lapancho cushichiptinchi? Juc ali nänipa purinapäga shumaj alchashga caycanman. Jatuncaray Babiloniapita chaychica runacuna yargupäcunanpaj 1919 watapita “Sagrädu Näni” alchashga y pichashga cashga. w23.05 17 parr. 15; 19 parr. 16

Jehovapa testiguncunata Pushaj hermanucunaga quiquincunami waquincunata shumaj yachaycächin paycunata yanapänanpaj. Chay yanapajnincunaga alimi arurcaycan. Paycunaga ali yachachishga carcaycan Jehovapa sirvejnincunata shumaj pushananpaj. Chauraga cielupaj acrashga cristianucuna cay Pachacho manana caycaptinpis, Diospa sirvejnincunaga jinala Jehovata sirviycäshun. Reyninchi Jesús Pushamajninchi captinmi guepaman manami cutishunchu. Chiquicoj runacuna o Magogpita Gog contranchicho imaycata ruraptinpis Jehovataga jinala sirviycäshun (Ezeq. 38:18-20). Paycuna lapan rurashgancunaga yangalapämi canga, manami ushacächimäshunchu. Apóstol Juanga juc visiuncho ricargan fiyupa jatun nacaypita “yupaytapis mana atipaypaq tsaytsika runakuna” yarguycajta. Jehovaga cuyashgan sirvejnincunataga salvangami (Apoc. 7:9, 14). w24.02 5, 6 parr. 13, 14

Diosninchi espiritunta gomananchipäga mañacushwanmi, Palabranta leishwan y waquin cristiano masinchicunawan juc shongunola caycashwan. Chaynopa Jehovapa espiritun yanapaycalämäshun pay munashganno cawanapaj (Gál. 5:22, 23). Jina imano portacushganchi y rurayninchicunapis ali caycanman Jehová espiritunta gomananchipaj. Payga espiritunta gomäshunchu mana ali munaycunaman yarpaptinchi (1 Tes. 4:7, 8). Bibliapis nimanchi “Espíritu Santu tantiyatsishqanta […] manakaqman ama churapäkunkitsu” (1 Tes. 5:20). Jehovaga espiritunwan runacunata tantiachergan ichiclacho imacuna pasananpaj. Musyanchimi ichiclana pishiycashganta Jehovapa junajnin o Armagedón chayamunanpaj, capaz cawaycashganchi hora chayamungapis. Chaymi calpachacunanchimi ali portacärinapaj y “jutsata mana ruraypa Tayta Dios munashqanno” cawacunapaj (2 Ped. 3:11, 12). w23.06 12 parr. 13, 14

Lapanchipämi imapitapis más valuryoj caycan Jehovawan amistäninchi. Chauraga, ¿imataraj juc cristiano ruranman celularninta ricaycaptin ilajpita pornografía nishgan o ganra ruraycuna yurimuptin? Rasla juc ladupa ricaranman y upichirpis upirichinmanmi. Y ima nishwantaj waquin fotucuna ganra ruraycuna mana captinpis chaycunata ricar mana alicunaman yarpachacächimaptinchi. Shongulanchichopis adulterio juchata rurayta mana munarga chaycunatapis ricashwanchu (Mat. 5:28, 29). Tailandiapita David jutiyoj anciano cayno nin: “Nogaga cayno tapucö: ‘¿Jehovaga cushicungachuraj cay fotucuna pasaypa mana ali mana caycaptinpis ricaraycarla captë?’. Chayman yarpar yanapaman ali cajta acranäpaj”. Chauraga ali cajcunataga acrashun Jehovata manchacur, payta laquichiyta mana munarmi. w23.06 23 parr. 12, 13

‘Ruri cuartuyquicuna’ niptenga parlaycämun congregaciuncunapitami. Chay wichan hermanunchicunawan juc shongunola captinchega Jehová aunimanchi chapaycalämänanchipaj. Chauraga calpachacunanchimi hermanunchicunata shongupita cuyanapaj, chayta ruraptinchirämi salvaciuntapis tarishun. Jehová Dios ‘juzganan junajga’, achcajpämi alapa manchariypaj canga (Sof. 1:14, 15). Jehovapa sirvejnincunapis sasacunapa pasashwanmi. Ichanga cananlapita ali camaricushga caycarga manami manchacushwanchu, listo caycashwan waquincunata yanaparcunapaj. Aumi, ima captinpis mana yamacaypa valurwan aguantashwan. Jina cuyapäcoj car listo caycashwan hermanunchicunata imalachopis yanaparcunapaj y necesitashgancunatapis tarichinapaj. Nircur paycunata cuyashpanchimi chay wichanchopis juc shongunola caycashwan. Ichiclacho lapan nacachimashganchicuna pipis yarpanganachu, Jehová imaycamapis cawayta goycalämäshun (Is. 65:17). w23.07 7 parr. 16, 17

Bibliaga wilacun unaycho Diospa waquin sirvejnincuna alapa calpayoj cashganta, chayno captinpis öraga calpaynaj ricacurgan. Rey Davidpis gaga japuyno calpayoj ricacurpis, öraga pasaypa manchacuywan caycargan (Sal. 30:7). Jehovapa espiritunwanmi Sansonpis calpasapa runa cargan, ichanga musyarganmi Jehová mana yanapaptenga “kalpaynaqna rikakur wakin runanölami” cananpaj cashganta (Juec. 14:5, 6; 16:17). ¿Pitaj paycunata calpata gorgan? Jehová. Apóstol Pablo musyargan Jehovapa yanapacuynintaraj necesitashganta (2 Cor. 12:9, 10). Payga gueshyawan nacargan (Gál. 4:13, 14). Ali cajta rurayta munarpis öraga pantaycojmi (Rom. 7:18, 19). Y sasacunapa pasar ‘wañushächari’ nirpis yarpajmi (2 Cor. 1:8, 9). Chayno captinpis payga nergan: “Kalpaynaq karpis kalpayuqmi rikakü”. Aumi, payga Jehovapa yanapacuyninwanmi calpayoj ricacurgan. w23.10 12 parr. 1, 2

Noganchipis öraga mana valejno ricacuptinchega, yarpäshun quiquin Jehová marcanman pushamashganchita (Juan 6:44). Payga ricaycanmi imano runataj caycashganchita y musyanmi shongunchi imano caycashgantapis (2 Crón. 6:30). Chauraga ricayninpaj alapa valuryoj cashganchita nimaptinchega creishwanmi (1 Juan 3:19, 20). Waquinninchicuna Bibliapita manaraj yachacur mana alicunata rurashganchiman yarpar, capaz öraga culpayojraj ricacunchi (1 Ped. 4:3). Waquincuna achca watapana Jehovata sirviycarpis, mana ali munaynincunawan luchaycanrächi. ¿Y gamga imalapitapis culpayojchu ricacunqui? Chayno captenga ama laquicuychu, waquin Diospa sirvejnincunapis chayno ricacurgan. Apóstol Pabluga unay juchancunaman yarpar pasaypa laquipaypämi ricacurgan (Rom. 7:24). Juchancunapita arrepenticur bautizashgana caycaptinpis, payga yarpargan waquin apostulcunawan mana tincushganta y waquincunapitapis “mas jutsayuq” cashganta (1 Cor. 15:9; 1 Tim. 1:15). w24.03 27 parr. 5, 6

Rey Jehoás pantashganraycu ima pasashganpitaga yachacunchi imaypis Jehovata cuyaj y cäsucoj amigucunata acranapaj, chayta rurarga alimi cawacushun. Amigunchicunaga tucuy edäpitami canman. ¿Manachu Jehoiadá auquinna caycarpis Jehoaspa amigun cargan? Chaymi amiguyquicunaman yarpar cayno tapucuy: “¿Paycunaga yanapämanchuraj Jehovaman masraj yäracunäpaj? ¿Nimanchuraj Diospa mandätuncunata cäsucunäpaj? ¿Cada cadala Jehovapitachuraj parlapacuycan y Bibliantapis leipäcunchuraj? ¿Diospa leynincunata cäsucärinchuraj? ¿Imalachopis pantarcuptëga corregimanchuraj?” (Prov. 27:5, 6, 17). Amiguyquicuna Jehovata mana cuyaptenga, paycunapita witicurinquimanmi. Ichanga Jehovata cuyaj amiguyquicunapitaga imaypis ama raquicaychu (Prov. 13:20). w23.09 9, 10 parr. 6, 7

Chaywanga Jehová niycargan pay imatapis rurayta galaycuptenga, manami jamanchu ushananyaj. Adantawan Evata camaycurna Jehovaga wilargan cayno nir: “Kay patsa juntananyaq mirapäkuy. Munaynikicho katsun pescädukuna, päriqkuna y kay patsacho lapan kawaqkunapis” (Gén. 1:28). Chaywanga Jehová musyachicuycargan paycunapaj imata munashganta, chayno ricächicuycargan “Alfa” cashganta. Pero “Omega” cashganga ricacämunga shamoj tiempucho lapan aunicuynincuna cumplishgana captin y runacunapis juchaynajna captin. Tayta Dios “kay patsata y kay patsacho kaqkunata, jana patsata y jana patsacho kaqkunatapis lapanta kamarkurnami cay Pachapaj y runacunapäpis voluntäninta cumplinanpaj aunirgan, chayga claro ricacämunga ganchis caj junaj usharcuptinrämi (Gén. 2:1-3). w23.11 5 parr. 13, 14

Babiloniapita Israelman cutimunanpaj judiucunaga chuscu quillatarämi purinanmi cargan, chayno captinpis Jehovaga aunirganmi yanapänanpaj imalapis cutimunanta mana michänanpaj. Yäracoj judiucunapäga Israelman cutimunanta imayca charashgancunapitapis más alimi cargan. Paycunaga musyargan Israelcho Jehovata shumaj adurapäcunanpaj. Babiloniachoga luta dioscunata adurapäcunanpaj templucunalami cargan, ichanga Jehovata adurapäcunanpaj templo y sacerdoticuna mana cashganraycu israelitacunaga sacrificiucunata rurayta puedipäcojchu. Jinamanpis chay marcacho Jehovata adurajcunaga walcajlami cargan. Chaymi Jehovata cuyaj waranga Judiucunaga marcanman cutiyta munarcaycargan chaynopa Jehovalata adurapäcunanpaj. w23.05 14, 15 parr. 3, 4

Achquicho caycajcunano cawacunapaj munarga, Diospa santo espiritunpa yanapacuyninta ashinanchi. Chaywanrämi cay mundupa mana ali ruraynincunapita raquicashga caycäshun (1 Tes. 4:3-5, 7, 8). Diospa espiritunga yanapämäshun cay munducho Diospa contrancho caycaj mana ali yachachicuycuna mana pantachimänanchipaj. Jina yanapämäshunmi cuyapäcoj canapaj, alilata ruranapaj y rasun cajlata rimanapaj (Efes. 5:9). Jesusga nergan Taytan mañacoj cajman espiritunta cachamunanpaj (Luc. 11:13). Chaymi mañacushganchi hora Jehovata mañacushun espiritunpaj. Jina espíritu santuta chasquinchi hermanunchicunawan reuniuncunacho Jehovata alabaptinchi (Efes. 5:19, 20). Diospa espiritunga yanapämäshun pay munashganno imaypis cawacunapaj. w24.03 23, 24 parr. 13-15

Más pacienciacoj cayta munarga Jehovatami mañacushwan. Payga santo espiritunwan yanapämäshun pacienciacoj canapaj, chaymi imaypis santo espiritunta gomänanchipaj mañacushwan (Gál. 5:22, 23). Masraj chayta rurashwan sasa captin pacienciacoj canapaj ima problemacunapapis pasaycar (Luc. 11:13). Jina mañacuyninchicho nirishwan yanapämänanchipaj pay yarpashganno yarpänapaj, nircur mañacushganchimanno calpachacushwan waran waran pacienciacoj canapaj. Chauraga mana jaguiypa Jehovapa yanapacuyninta ashiptinchi y quiquinchipis shongupita calpachacuptinchega Jehová ichic ichiclapa yanapämäshun pacienciacoj runaman ticranapaj. Bibliapis wilacunmi achca runacuna pacienciacoj cashganta. Chaymi ali canman chaycunaman yarpachacunapaj, chayta rurarga paycunapita yachacushwanmi. w23.08 22 parr. 10, 11

Juc cuticho, Jesús cawarimushgana caycar apóstol Pedrutawan waquin discipuluncunata yanapargan chaychicaj pescaducunata charipäcunanpaj (Juan 21:4-6). Chayta ricaycur Pedruga tantiargan lapan necesitashgancunata Jehová mana pishichinanpaj. Jina yarparganchi Jesús aunishganta, pipis Diospa Gobiernunta puntaman churaptenga Jehová lapan munashgancunatapis camaripänanpaj cajta (Mat. 6:33). Chayta musyaycur Pedruga arucuycarla caycänanpaj trucan más calpachacurgan runacunata yachachicunanpaj. Chaymi 33 wata, Pentecostés fiestacho valurwan yachachicushganraycu chaychicaj runacuna bautizacärergan (Hech. 2:14, 37-41). Tiempuwanga samaritanucunata y mana judío cajcunatapis yanapargan Jesuspa discipuluncunaman ticrananpaj (Hech. 8:14-17; 10:44-48). Jehovaga Pedruwanmi achca runacunata yanapargan sirvejnincunaman ticrananpaj. w23.09 20 parr. 1; 23 parr. 11

Babiloniucuna Jerusalenta ushacächishganpita ishcay watacunano pasaptin, Nabucodonosor reymi manchanaypaj sueñuynincho ricargan juc jatuncaray monumentuta. Ricchapacaramurmi musyaj caj runacunataga yachachergan ima sueñushganta wilananpaj y tantiachinanpäpis, chaychomi quiquin Danielpis caycargan. Paycunacush Nabucodonosor ima sueñushganta mana wilacärinmanchu cargan, wanuynincunalachi shuyaraycanman cargan (Dan. 2:3-5). Pipis wanunanta mana munarmi, Danielga jucla reyta ashergan y “ruwaran imapaj suyñushan cashantapis willapänanpäga shuyaycunanpäraj” (Dan. 2:16). Chayta rurananpäga mana facilchu cargan. ¿Imanir? Unaycho Danielga manami pitapis sueñushganpita tantiachirganchu, chaymi payga ali yäracurcur valurcharcushgarächi. Quimsa amiguncunawanpis parlapacushgarämi cargan, “paycunataga willaparan janaj pachacho caycaj Tayta Diosta mañacunanpaj” (Dan. 2:18). Mañacärishgancunataga Jehová contestarganmi, Danielta yanapargan Nabucodonosorta wilananpaj ima sueñushganta y tantiachinanpäpis. ¡Danielwan amiguncunaga wanuypita libracärirganmi! w23.08 3 parr. 4

¿Imanirtaj ali caycan pacienciacoj captinchi? Pacienciacoj captinchega imaypis jaucala o tranquilo caycäshun, chayga yanapämäshun saludninchipis ali caycänanpaj. Jina waquincunawan ali apanacur juc shongunola cawacushun. Y imalapitapis jucla mana rabiacurga, mana alicunamanga mana chayashwanchu (Sal. 37:8; Prov. 14:29). Chaycunata rurarga Jehovano pacienciacoj cashun, y payman guelicamur amigun caymanpis chayashun, chayga imapitapis más valuryojmi. Canan ricashganchinopis alapa alimi caycan calpachacuptinchi pacienciacoj runaman ticranapaj. Öraga chayno runa canapaj sasa captenga, Jehová yanapämäshun pacienciacoj cananchipaj. Chaymi mushoj mundo chayamunancama, Jehovaman mana ajayaypa shuyaraycashwan. Bibliapis nin Diosninchega “kuyakuq kashpanmi payman yärakuqkunata [o shuyaraycajcunata] yanapan” (Sal. 33:18). Chaymi calpachacushwanmi cada cadala pacienciacoj runaman ticranapaj. w23.08 22 parr. 7; 25 parr. 16, 17

Santiaguga nergan pipis rico cajta respetar ali ricaptin y wacchacunata manacajman churaptenga, Diosman yäracushganga yangalapämi caycan (Sant. 2:1-5, 9). Nircurpis nergan pipis yäracoj masinta ropaynajta o micanaycajta ricaycar mana yanapaptenga, “Diosmanmi yärakuykä” nirpis ruraynincunacho mana ricacämuptin, “¿imapaqtaq yärakushqantsipis välin?” (Sant. 2:14-16). Santiaguga parlamunmi Rahab jutiyoj warmi Diosman yäracur imata rurashganpita (Sant. 2:25, 26). Chay warmiga Jehová pï cashganta mayargan y israelitacunata yanapaycashgantapis musyargan (Jos. 2:9-11). Chaymi Jehovaman yäracur ishcay espía israelitacunata wasincho pacaycurgan mana wanuchinanpaj. Chayta rurashganraycumi juchasapa captinpis y mana israelita warmi captinpis, Jehovaga Abrahantano ali ricargan. Rahab rurashganpita yachacunchi Diosman yäracushganchega rurayninchicunachomi ricacämunman. w23.12 5, 6 parr. 12, 13

Cristianucunaga galanancho yachacushganchilawanga conformacunchichu. Manchäga Diospa Palabrancho pacaraycajno yachachicuycunata ashinanchi shumaj tantiarcunapaj (1 Cor. 2:9, 10). Chaymi ali canman maygan temalapitapis yachacurcunayquipaj, chayta rurarga Diosman masraj guelicunqui. Shumaj yachacuy unay sirvejnincunata Jehová cuyashpan imano cuidashganta, chayta rurarga gampis seguro caycanqui Jehová cuidashunayquipaj cajpita. Jina yachacunquimanpis unaycho israelitacuna Jehovata imano adurashganpita y canan wichan imano payta aduranchi. Jinamanpis yachacunquimanmi Jesús cay Pachacho caycar ima profeciacuna cumplicushganta. Bibliapita shumaj yachacuyta munarga caycan Índice de las publicaciones Watch Tower y la Guía de estudio para los testigos de Jehová nishgan. Chayta rurarga ali yäracoj runaman ticranqui y “TAYTA DIOSTA reqir payta mantsakunaykipaq tantiyakunki” (Prov. 2:4, 5). w23.10 18, 19 parr. 3-5

Cay versiculupa ushananchona nin “kuyakuq runaqa imaykata ruraptinpis perdonanmi”. Imanomi juc telawan imayca mana alicunata o mana ricacänanpaj cajcunata chaparcunchi, chaynolami shongupita rasunpa cuyacoj carga yäracoj masinchicuna cutin cutin pantarcuptinpis jinala perdunashunmi. Yäracoj masinchicunata alapa cuyarga calpachacushunmi pantashgancunata perdunanapaj, chaytaga rurashwan sasa captinpis (Col. 3:13). Waquincunata perdunashganchichomi ricacämunga rasunpa cuyacoj cashganchita, y Jehovata cushichiyta munashganchitapis. w23.11 11, 12 parr. 13-15

Rey Josías 26 watayoj caycar templuta alchachipäcuycashgancho tarirgan, “Moisés chaskishqan mandamientukuna qelqaraykashqan libruta”. Chay librucho ima nishganta musyar, rey Josiasga calpachacurgan Ley nishganta cäsucunanpaj (2 Crón. 34:14, 19-21). ¿Gampis calpachacuycanquichu Bibliayquita cada cadala leinayquipaj? Y chayta mayna ruraycarga, ¿cushishgalachu leinqui? ¿Ima mastaraj ruranquiman leishgayqui textucunata mana gonganayquipaj? Rey Josías 39 watayoj caycar mana alicunata rurashganraycu wanuyman chayargan. Jehovaman yäracunanpaj trucan quiquinman yäracurgan (2 Crón. 35:20-25). Paypitaga yachacunchi pogushga runa caycarpis o achca watapana Jehovata sirviycarpis, jinala paypa yanapacuyninta ashinanchipaj. Y, chaytaga ruranchi Jehovata mañacuptinchi, Palabranta leiptinchi y pogushga cristianucunapa consejuncunata chasquicuptinchi. Chayta ruraptinchega, cada cadala manami pantaycäshunchu y cawayninchipis ali cangapaj (Sant. 1:25). w23.09 12 parr. 15, 16

Biblia wilamanchi unay achca ali warmicuna Jehovata cuyar imano sirvishganpita. Chay warmicunaga cargan ‘shumaq tantiyakuq y awnishqanta cumpliq’ (1 Tim. 3:11). Jina congregaciunniquichopis caycanchi achca pogushga hermanacuna paycunapita yachacunayquipaj. Gam jipashlaraj captiqui, yarpachacuy maygan pogushga cristianacunapita yachacunquiman y calpachacuy paycunano canayquipaj. Chaypäga ricay imano ricächicun ali cristiana cashganta y nircur yarpachacuy gampis imano calpachacunayquipaj payno ali cristianaman ticranayquipaj. Humilde warmiga cushishgalami Jehovata sirvin y waquincunawanpis ali apanacun. Chaymi humilde cashpan y Jehovata cuyashganraycu congregaciuncho pushajcunata y familiancho pushajtapis cushishgala cäsucärin (1 Cor. 11:3). w23.12 18, 19 parr. 3-5

Jehová munan runa caj warminta cuyananpaj, imaycancunata mana pishichinanpaj, espiritual cajcho pushananpaj y laquicushgan horachopis yanapänanpaj. Chauraga ali yarpachacoj captiqui, warmicunata respetaptiqui y confiacuypaj captiquega yanapäshunqui ali maja canayquipaj y familiayquitapis ali pushanayquipaj. Casaracuptiquega wamrayquicunapis yurinmanchi. Chaura ali tayta canayquipäga Jehovapita yachacunquiman (Efes. 6:4). Payga nergan Jesús cuyay churin cashganta y paypita cushishga caycashgantapis (Mar. 1:11). Gampis taytana carga, wamrayquicunata cuyashgayquita ninquiman y alicunata rurashganpita felicitanquiman. Jehová wamranta cuyashganno taytacunapis chayno ruraptenga wamrancunata yanapanga pogushga cristianuman ticrananpaj. Chauraga, ¿imataj cananlapita ruranquiman ali tayta canayquipaj? Familiayquita y congregaciuncho caycaj hermanucunatapis cuyacuywan tratanquiman, jina ninquimanpis paycunata cuyashgayquita y valurashgayquitapis (Juan 15:9). w23.12 28, 29 parr. 17, 18

Jehovapa siervuncunaga waquin runacunanomi imayca problemacunapa pasanchi y gueshyanchipis. Jina Diosta sirvishganchiraycu chiquishga o mana ali ricashgapis canchi. Chay lapancunapita Jehová mana libramaptinchipis, pay aunimashcanchi yanapämänanchipaj (Is. 41:10). Chaymi ima captinpis, paypa yanapacuyninwan cushishga sirvinchi, ali cajcunata decidinchi y pasaypa mana alicunapa pasarpis paypitaga raquicanchichu. Jehová Bibliacho aunimanchi yanapämänanchipaj jaucala o tranquilo caycänapaj (Filip. 4:6, 7). Y chaynoga ricacushun Jehovawan ali amigo captinchiraj. Aumi, payman yäracurga mana yarpachacuycarla y mana laquicuycarla cawacushun. Jehová jauca cawayta gomaptinchega, cushishga y alina cawacunchi. ¿Imaylapis lapan shonguyquiwan Jehovata mañacurcur cuentata gocushcanquichu jaucala o tranquilo ricacushgayquita? Chayno captenga, Jehovami yanapäshushcanqui chayno ricacunayquipaj. w24.01 20 parr. 2; 21 parr. 4

Diosta rasunpa cuyajcunaga shongupita imaypis jutinta alabaycun. Rey David tantiargan Jehovapa jutinta alabarga, quiquin Jehovatami alabaycargan. Jutinpita parlarga ali ricashga, imano cashganpita y lapan camashgancunapitami parlananchi. Davidga lapan shongunwanmi Diospa jutinta alabargan y respetargan. Levitacunapis lapan voluntäninwan Jehovata alabapäcurgan. Humilde cashpan paycunaga Jehovapa jutin santo cashganta ricargan, chaymi imaycanopapis alabayta munargan (Neh. 9:5). Jehovaga alapachi cushicurgan runacuna shongupitami y alapa respetuwan alabapäcuptin. w24.02 9 parr. 6

Öraga puedishgayquipita mastaraj rurayta munarga, rurashgayquega mana ali yargunman. Chayno captinpis Jehovaga ali nawilanwan ricashunqui (2 Cor. 8:12). Y mana ali pasashushgayquipita ali cajcunata yachacunquimanmi. Yarpaycuy Diosta sirvir canancama rurashgayquicunata. Diospa Palabran nin: “Imano ñacarpis payman yäracushayquitaga Tayta Diosninchi manami gongangachu” (Heb. 6:10). Gampis ama gongaycuychu. Canancamaga maynachi bautizacushcanqui, maynachi Diospita yachachicuycanqui. Jehovapa amigunman ticranayquipäpis calpachacuycanqui. Diosta mastaraj sirvinayquipaj canancama calpachacushgayquega, yanapäshunquimi canan wichanpis Diosta sirvishgayquicho masraj calpachacunayquipaj. Jehovaga yanapäshunquimi payta masraj sirvinayquipaj calpachacuptiqui, ‘unaycho imata ruranäpaj aunicushgäta cumplishcämi’ ninquiraj. Diosta sirvir calpachacushgayquiraycu waran waran cushishgala caycanquiman (2 Cor. 4:7). Chayno captenga achca bendiciuncunatami Jehová tarichishunqui (Gál. 6:9). w23.05 31 parr. 16-18

Jehovaga Palabrancho nimanchi sirvejnincunata cuyashganta y ali ricashgantapis. Bibliacho wilacun ishcay cuticunacho Jehová ‘cuyay Wamrä’ Jesusta nishganta y paypita cushishga caycashgantapis (Mat. 3:17; 17:5). ¿Gampis munanquimanchuraj Jehová nishunayquipaj gampita cushishga caycashganta? Pay canan cielupita mana parlapämaptinchipis, Palabranwan parlapämanchi. Bibliacho leiptinchi Jesús discipuluncunata cuyacuywan parlashgantaga, quiquin Jehová parlapaycämashganchitano ricacushwan. Jesusga Taytanno cuyacojmi. Bibliacho wilacun discipuluncuna juchasapa captinpis Jesús cuyashgantami, chayga ricächimanchi chayno Jehovapis noganchita cuyamashganchita (Juan 15:9, 15). Pruebacunapa pasarga ama yarpashwanchu Jehová noganchiwan cushishga mana caycashganta, sinoga calpachacushwanmi payta amatar cuyashganchita ricächicunapaj y payman yäracushganchitapis (Sant. 1:12). w24.03 28 parr. 10, 11