Diciembre

¿Jehovaga poderyojchuraj caycan wanushgacunata cawarachimunanpaj? Aumi, payga Lapanta Puedejmi (Apoc. 1:8). Chaymi maygan chiquejnincunatapis, wanuytapis ushacächiyta puedinmi (1 Cor. 15:26). Jina Jehovapa yarpayninga manami noganchicunapanochu. Paypa yarpayninga mana ushacajmi, chaymi seguro caycanchi wanushgacunata cawarachimunanpaj. Bibliaga wilacun lapan goylarcunata jutinpa jutinpa reguishganta (Is. 40:26). Jehová yarparanmi lapan wanushga cajcunata (Job 14:13; Luc. 20:38). Payga yarpanmi cawarimunanpaj cajcuna ima coluryoj cashganta, imano winashga cashganta y yarpaynincunapis. Ricashganchinopis Jehovaga alapa munaycunmi wanushgacunata cawarachimunanpaj y poderyojpis caycan chayta rurananpaj, chaymi yäracunchi wanushgacuna rasunpa cawarimunanpaj cajta. Jina unaychopis mayna waquin runacunata cawarachimushgana. Jehovaga unaycho waquin runacunata y Jesucristutapis poderta gorgan wanushgacunata cawarachimunanpaj. w23.04 9, 10 parr. 7-9

Runacuna ali chasquimäshun o mastaraj wiyaytapis munanga creencianchicunapita ali shimilapa parlapaptinchega. Ichanga pipis rimanacuylata munaptenga, witicurishwanmi (Prov. 26:4). Pero caycanrämi ali shongu runacuna. Paycunaga wiyayta munapäcunmi. Canan ricashganchino, alapa alimi caycan jucla mana rabiacoj runa captinchega. Pipis rimanacuyta munaptin o creencianchicunapita mana alicunata parlaptenga Jehovata mañacuy jucla mana rabianächishunayquipaj. Chayta rurarga piwanpis rimanacuymanga manami chayashunchu. Respetulawan y ali shimilapa parlapaptinchega runacunaga imaman creishganchipita y noganchipitapis manami lutantaga yarpanganachu. Chauraga pipis creencianchicunapita tapushuptiquega, tantiachinayquipaj “imaypis kamarikushqala karkaykay” (1 Ped. 3:15). ¡Ama gongaychu, jucla mana rabiacojcunaga sinchimi capäcun! w23.09 19 parr. 18, 19

¿Imatataj ruran pacienciacoj runaga? 1) Pacienciacoj runaga jucla mana rabiacunchu. Imayca yarpachacuycunawan caycarpis calpachacunmi jaucala caycänanpaj y pipis ashlipar rabianächiptenga manami cutichinchu (Sal. 86:15). 2) Pacienciacoj runaga mana ajayaylapa imatapis shuyaran. Chaymi munashganno imapis mana yarguptenga manami piñacunchu (Mat. 18:26, 27). 3) Pacienciacoj runaga shumaj yarpachacur-raj imatapis ruran. Maygan ruraypis shumaj yarpachacur-raj ruranapaj captenga, pacienciacoj runaga manami jucla ushayta munangachu ni yalinacuypapis ruranchu. Chaypa trucanga, shumaj yarpachacun imano chay lapanta rurananpaj, nircur tiempunta camacächin ali rurananpaj. 4) Pacienciacoj runaga nacaycarpis mana ajayaypa aguantan. Payga imaycanopapis calpachacunmi imaycacunapa pasarpis Jehovata cushishga sirvinanpaj (Col. 1:11). Cristianucunaga cay lapancho pacienciacoj cananchi. w23.08 20, 21 parr. 3-6

Runacunaga ricayta manami camäpacunchu shongunchicho ima caycashganta. Jehová ichanga lapantami rican y musyanmi ima yarpashganchitapis. Chaymi imaypis shongunchita chapaycushun imapis mana ganratananpaj. Chaypäga cada cadala payman masraj guelicushun (Juan 4:14; 1 Juan 5:18, 19). Chaynopa cuyashganchi y respetashganchipis miraycungapaj. Consejuncuna shongunchicho caycänanpaj calpachacuptinchega Jehovaga cuyaycalämäshunmi. Jina tantiacoj cashpan Satanás munashgancunata, ni cay munducho mana alicuna caycashgantapis rurashunchu. Chaypa trucanga Jehová chiquishgancunata chiquishun y yarpaylapis yarpashwanchu ima juchamanpis ishquinapaj. Croaciapita Marta jutiyoj cristianaga, fornicación jucha ruraytash munaycargan. Cayno wilacun: “Cutin cutin shongö mana ali munashganta rurayta munaj cä. Sasami cargan chayman yarpayta jaguirinäpaj. Ichanga Jehovata cuyar manchacushgämi yanapaycalämashga juchaman mana chayanäpaj”. Martaga yarpachacojshi chay mana ali munayninta ruraptin mana aliman chayachinanpaj cajta. Chauraga ima tentaciunlapis captenga juchamanga ama ishquishwanchu. w23.06 20, 21 parr. 3, 4

Jesusga musyarganmi Taytan alapa munaycashganta jutin ali ricashga cananpaj. Chaymi discipuluncunata cayno yachachergan mañacuynincho ninanpaj: “Jana patsacho kaykaq Papä, qampa jutiki respitashqa kaykulätsun” nir (Mat. 6:9). Jesusga munargan jana pachacho y cay Pachachopis Taytanpa jutin alapa respetashga cananta. Chaymi cielucho o Pachacho caycarpis Jesusga Taytanpa jutinta alapa respetachishga, paynoga manami pipis rurashgachu. Chayno captinpis, chiquejnincunaga Jesusta preso charicurcurgan. ¿Imanir? Paycunaga tumpargan Diospa jutinta manacajman churashganpitami o mana respetaycashganpita. Pero payga chayta manami ruranmanchu cargan, Jesusga musyarganmi pipis chayta ruraptenga, alapa jatun juchata ruraycan. Chaymi preso manaraj chariycuptin Jesús pasaypa laquicuycargan chayraycu chiquejnincuna tumpananpaj o acusananpaj cajta musyar. Bibliaga nin ‘fiyupa lakikurqan’ (Luc. 22:41-44). w24.02 11 parr. 11

Premiuta chasquinapaj corrishganchichoga, Jehovatawan Jesustami imapitapis masraj cuyananchi (Mat. 10:37). Ichanga familianchita yanapänapaj captenga yanapaycushun, y manami lasaj guepitanoga ricashwanchu. Chaypa trucanga Jehovatawan Jesusta cushichiyta munarga familianchicunata yanapashwan (1 Tim. 5:4, 8). Chayta rurar cushi cushila cawacushun. Quiquin Jehovami familiacunata camashga majachacashgacuna cuyacuywan y respetuwan tratanacunanpaj, tayta mamacuna cuyacuywan wamrancunata yachachinanpaj y wamracunapis taytancunata cäsucunanpaj (Efes. 5:33; 6:1, 4). Taytacuna, majayoj o wamracuna carpis calpachacärinayqui Bibliacho caycaj consejucunata cäsucärinayquipaj. Ama yarpachacäriychu quiquiqui yarpashgayquino cawacuyga más ali cashganta, ni cay munducho yachaj runacunatapis cäsupaychu. Publicaciunninchicunachoga Bibliapita imayca shumaj yachachicuycuna caycan Dios munashganno cawacunapaj. w23.08 28 parr. 6, 7

Wamralaraj cashpayqui imalatapis yachacushgayquega yanapäshunquimi jipashna captiquipis. Chaymi alichi canman jipashna caycarpis jinala imalatapis yachacuptiqui. Shumaj leiyta y escribiytapis yachacunquimanmi. Waquin marcacunachoga warmicunata escuelaman mandanchu estudiananpaj. Pero lapan cristianucunaga yachacunmanmi leiyta y escribiyta (1 Tim. 4:13). Chaymi ama permitiychu imapis michäshunayquipaj chayta ruranayquipaj. Chaycunaga yanapäshunqui cawayniquicho y aruytapis tarinayquipaj. Pero manami chaylachu, Diospa Palabrantapis ali yachacunayquipaj y ali yachachicoj canayquipäpis yanapäshunqui. Chaypitapis masga Bibliata leir y leishgayquiman yarpachacur calpata goshunqui Jehovawan amigo canayquipaj (1 Tim. 4:15). w23.12 20 parr. 10, 11

Mana ali ruraycunapita libracunapaj Jehovata mañacushun. Juchasapa cashganchiraycumi, imaycataraj rurananchi alicunalata ruranapaj. Satanaspis más pruebacunataraj churapämanchi juchacunaman ishquinapaj. Jucnin caj caycan cushicunapaj yargamoj ganra ruraycuna. Chaypita mana cuidacurga yarpayninchipis ganratacäcunga y Jehovapa ricayninpäpis mana ali caycäshun (Mar. 7:21-23; Sant. 1:14, 15). Ima tentaciuncunatapis quiquinchicunalaga manami venciyta puedishunchu, Jehovatarämi mañacunanchi. Juc cuti Jehovata mañacushgancho Jesús cayno nergan: “Jucha rurayman Satanás chayachimänanpitapis chapaycallämay ari” (Mat. 6:13). Jehová yanapämänanchipäga ruwacunanchimi. Mañacushgana carpis manami chaylachu. Jucninchi jucninchimi calpachacunanchi ima jucha ruraymanpis mana ishquinapaj. w23.05 6, 7 parr. 15-17

Chayno captenga Biblia nishgannola cawar consejuncunata ganas ganasla cäsucäringa. Ima problemacunapa pasarpis cuyanacärishganga shumaj rataycaj nina japuymi caycanga. Taytalanchi Jehovaga amatar cuyacojmi, pacienciacojmi y perdunacojmi. Amiguncunapis paynola cananpämi waran waran calpachacärin (Efes. 4:32–5:1). Chayno Diosninchi cashgannola matrimoniucuna calpachacäriptenga, masrämi cuyanacärenga. Achca watapana casada caycaj Lena jutiyoj cristiana cayno nin: “¡Runalä Diosta cuyaptenga, nogapäga más facilmi payta cuyanäpaj y respetanäpaj!”. Josewan Mariapita Biblia wilacushganta ricärishun. Paycunatami Jehová acrargan Jesuspa taytancuna capäcunanpaj. Paycunata acrargan cuyashgan amiguncuna captinmi, Jehovaga maynachi musyargan Josewan María cawaynincunacho payta sirvir puntaman churananpaj. w23.05 21 parr. 3, 4

Cay Pachacho pushamajninchi hermanunchicuna pantaj runacuna cashganraycu, öraga sasami canman cäsucunapaj. Masrämi nimashganchicuna gustunchipäno mana captin. Juc cuticho apóstol Pedrupis chayno ricacurgan. Juc ángel payta nergan impuro uywacunata micunanpaj, pay ichanga quimsa cuticunacho ‘chayta micushächu’ nergan (Hech. 10:9-16). Pedrupäga chay ángel mandashganga mana alinomi cargan. Pero juc cuticho apóstol Pablo cäsucurganmi Jerusalencho ancianucunaga payta niptin chuscu runacunawan templuman aywar purificacunanpaj. Chaynopa ricächinman cargan Moisespa Leyninta cäsucuycashganta. Pabluga musyargan ima juchatapis mana rurashganta, y Moisespa Leynintapis manana cäsucunapaj cashganta. Chayno captinpis ‘jukaqnin tuta tsay chusku wawqikunawan Pablo aywarqan’ purificacunanpaj (Hech. 21:23, 24, 26). Pay cäsucushganraycu lapan cristianucuna juc shongunola carcaycargan (Rom. 14:19, 21). w23.10 10 parr. 15, 16

¿Ima nishwantaj manchacuypita? ¿Chayga yanapacunmanchuraj piwanpis ali amigo canapaj? Bibliachoga nin Jehovaga manchacojcunapa amigunmi cashganta. Chaymi Jehovapa amigun canapäga payta manchacushwanmi, unayna o chaylaraj sirviycarpis. Jehovata alapa manchacoj runaga payman guelicamun, amistäninta ushacächiyta mana munanchu y shongupita cuyan. Señorninchi Jesusmi chayta ruraj (Heb. 5:7). Payga Taytanta amatar cuyashpan lapan mandamientuncunata cushi cushila cäsucoj, manami manchacuypita rurarganchu (Is. 11:2, 3; Juan 14:21, 31). Chaura Jehová Lapanta puedej, alita ruraj, alapa yachaj y cuyacoj captinmi noganchipis payta alapa respetashpanchi aduranchi. Diosninchitaga rurayninchicunawan laquichiyta manami munanchichu, chaypa trucanga shongunta cushichiyta munanchi. ¿Imanir? Payga cuyamanchi (Sal. 78:41; Prov. 27:11). w23.06 14 parr. 1, 2; 15 parr. 5

Rey Uzías munayniyoj reyman ticraycur gongaycushga Jehovapa yanapacuynilanwan imaycacunata rurashganta. Caypitaga yachacunchi Jehovata sirvir imaycata rurashga carga ama gongashwanchu Jehovapa yanapacuyninlawan chay lapanta rurashganchita. Chaymi imata rurarpis ali yarguptenga, Jehovata agradecicushwan (1 Cor. 4:7). Humilde carga waquincuna corregimaptinchipis ama piñacushunchu. Juc hermanulanchi 60 watayoj cayno nin: “Yachacushgä lapan rurashgäcunaga Jehovapa yanapacuyninwanraj cashganta. Chaymi imalachopis pantarcuptë pipis corregimaptenga, calpachacö mejoranäpaj y ali cristianuman ticranäpaj”. Humilde cashpanchi Jehovata cäsucurga, alimi cawacushun (Prov. 22:4). w23.09 10 parr. 10, 11

Punta caj cristianucunaga yäracuyninraycu chiquishga cargan. Pushacoj religiosucuna y autoridäcunaga Jesuspa gatejnincunata gaticachajmi. Quiquinpa familianchopis mana ali ricashgami cargan, chaymi paycunaga mana yamacaypa aguantananrämi cargan (Mat. 10:21). Jina luta yachachicojcuna manacajcunata yachachicuycashgancunapita cuidacunmanmi cargan (Hech. 20:29, 30). Chay jinanpa pasaycarpis, paycunaga Jehovaman mana yamacaypa yäracur carcaycargan (Apoc. 2:3). Chaypäga Bibliacho wilacushgan Diospa sirvejnincuna rurashgancunaman yarpachacurganchi (Sant. 5:10, 11). Jina Jehovata mañacärergan calpanta goycunanpaj (Hech. 4:29-31). Y manami gongapäcurganchu yäracoj captin Jehová bendicinanpaj cashganta (Hech. 5:41). Noganchipis mana yamacaypa aguantanapaj Bibliacho y publicaciuncunacho Diospa sirvejnincuna imacunapa pasashganman yarpachacushwan. w23.07 3 parr. 5, 6

Jehovawan Jesusga noganchitapis manami jaguimäshunchu. Apóstol Pedro Jesusta niegashgana captin, ¿yarparganchuraj discipulun manana cananpaj? ¿O valurcharcurganchuraj jinala Jesusta gatiränanpaj? Imano captinpis, Jesusga mayna Taytanta Pedrupaj ruwacushga cargan yäracuynin mana ushacänanpaj. Nircur Pedruta nergan paypaj mañacushganta y mandargan cristiano masincunatapis shacyächinanpaj (Luc. 22:31, 32). ¡Jesús nishganta wiyarga Pedruga alapachi cushicurgan! Noganchipis cawayninchichoga shumajraj yarpachacunanchi imatapis rurayta munarga. Chaypäga Jehová cuyacoj ancianucunawan shacyächimanchi imaypis ali cajcunalata acranapaj (Efes. 4:8, 11). Ama gongashunchu Pedrutawan waquin apostulcunata lapan necesitashgancunata Jehová camaripashganta. Noganchitapis chaynolami yanapämäshun paylata sirviptinchega. w23.09 24, 25 parr. 14, 15

Jehovaga manami gonganchu waquincunaraycu lapan rurashganchita, ichicla captinpis. Pilatapis yanapaptinchega, payta yanapaycashganchino caycan. Jehovaga valuranmi unaycho siervo ministerialno o ancianuno yanapacur shongupita lapan rurashgayquita (1 Cor. 15:58). Payga ricaycanmi canan wichanpis cuyacoj cashgayquita. Diosnilanchi Jehovaga payta y runa masinchicunatapis cuyanapaj munan. Chaypäga Diospa Palabranta leinanchi, leishganchiman yarpachacushwan y junaj junaj mañacunanchi. Y yäracoj masinchicunata cuyar imalachopis yanapacushun. Chayta rurarga, Jehovaman masraj guelicushun y hermanunchicunawanpis juc familiano caycäshun. ¡Aumi, imaycamapis Jehovawan amigo cashun y hermanunchicunawanpis jauca jaucala goyäcushun! w23.07 10 parr. 11; 11 parr. 13; 13 parr. 18

Saludninchicho aliyarcuyta munarga quiquinchipitami canman ima tratamientutapis chasquicunapaj. Bibliaga clarumi wilacun yawarta mana churacunapaj, shojpicojcunaman, curanderucunaman o brujucunaman mana aywanapäpis. Ichanga waquin ruraycunaga quiquinchipitami canga (Hech. 15:20; Gál. 5:19, 20). Öraga pipis ninmanchi ‘saludninchipäga cay cajmi ali caycan’ nir, pero alapa ali canga waquincunaga saludnincho aliyarcunanpaj imata decidishganta respetaptinchi. Chaymi ali canga gatejnin cajcunaman yarpachacuptinchi: 1) Diospa Gobiernun wichanlachomi ima gueshyapis ilacäcunga (Is. 33:24); 2) cada cristiano shumaj yarpachacunman ima tratamientutapis ashinanpaj (Rom. 14:5); 3) pipis saludnincho aliyarcunanpaj ima tratamientuta ashishganpitaga jamurpänapaj canmanchu (Rom. 14:13), y 4) cristianucunaga cuyanacunchimi (Rom. 14:15, 19, 20). w23.07 24 parr. 15

Jehovawan ali amigo cashgayquitaga alapachi valuranqui. Unaychopis achca runacuna chayno ricacärergan (Sal. 104:33, 34). Achcajmi imaycata rurargan Jehovata sirvishganraycu, waquincunaga cargan Israelcho caycaj nazareucuna o “raquishga” o “acrashga” cajcuna. Diosta cuyaj israelitacunaga Jehovata sirvinanraycu imaycacunata rurananpaj listumi caycargan. Chaymi maygan olgupis o maygan warmipis auninmanmi cargan Jehovata nazareuno sirvinanpaj, chayga unay Leycho claro niycargan (Núm. 6:1, 2). Pipis chayta auniptenga waquin israelitacuna mandatucunata cäsucushganpitapis masraj cäsucärinanpaj caycargan. ¿Imanirtaj waquincunaga nazareuman ticrargan? Chaytaga ruraj Jehovata alapa cuyashpan y lapan bendiciuncunata chasquishganpita alapa agradecicur (Deut. 6:5; 16:17). w24.02 14 parr. 1, 2

Bibliaga parlamunmi cuyapäcoj car pitapis yanapänapaj. Pipitapis más cuyapäcoj y yanapacoj caycan quiquin Tayta Jehovami, payga imaypis cachaycunchu sirvejnincunata. Jina Bibliaga parlamunmi Diospa sirvejnincuna jucnin jucnin cuyanacärinanpaj (2 Sam. 9:6, 7). Piwanpis cuyapäcoj canapaj jinala calpachacuptinchega tiempuwanga yarpaylapis yarpanchinachu raquicäcunapaj. Cayga clarumi ricacan Daniel pasashgancho. Danielpa lapan cawayninchomi ricacämurgan Jehovata amatar cuyashgan. Ichanga 90 watacunayoj caycaptin juc jatun pruebapa pasargan. Reypa mandatuncho caycaj waquin carguyoj runacunaga pasaypami Danielta chiquipäcoj, quiquin Jehovapäpis ima respetulapis carganchu. Danieltaga juc trampatano churapäcurgan. Chay chiquicojcunaga adrede documentuta ruraycur reyta firmachergan Danielwan piñacunanraycu, chauraga chaychomi ricacänan cargan Jehovata o chay reyta cäsucunanpaj. Chay reyta cäsucuptenga 30 junajcunapa manash Diosta ruwacunmanchu cargan. ¿Imatataj Daniel rurargan? Jehovata cushichiyta munarmi payta cäsucurgan (Dan. 6:12-15, 20-22). w23.08 5 parr. 10-12

Jehovaga munan yäracoj masinchicunawan cuyanacur cawacunapaj. Pipis congregaciunpita mana cuyacuywan tratamaptinchega jucla ama rabiacushwanchu. Sinoga yarpachacushwan mana munaycar chayno tratamashganchita o calpachacuycashgantapis alicunata rurananpaj (Prov. 12:18). Jehovaga amatar cuyamanchi juchasapa captinchipis. Juchata rurashga carpis payga jucla jagayäcunchu ni manacajpa churamanchichu (Sal. 103:9). Chaymi Taytanchi Jehovano cananchi y waquincunatapis perdunashwan (Efes. 4:32–5:1). Ama gongashunchu cay mundupa ushacaynin caylachona cashganta, chaymi hermanunchicunawan juc familianola cawacushwan. Cay ushanan tiempuchoga pasaypa chiquishga car, capaz carcelmanpis apamäshun. Chay wichanga hermanunchicuna yanapämänanchita necesitashun (Prov. 17:17). w24.03 15, 16 parr. 6, 7

Bibliaga wilacunmi waquin jovincunapis Jehovaman yäracushganraycu ali ricashga cashganpita y ali cawacushganpitapis. Jucmi cargan David. Pay mozularaj caycaptin Jehovata sirvinanpaj acrargan y tiempuwanga Jehovata cuyaj rey cargan. (1 Rey. 3:6; 9:4, 5; 14:8). David ima rurashgancunapita yachacuptiquega, yanapäshunqui Jehovalata mana cachaypa sirvinayquipaj. Jina alichi canman Marcos y Timoteo rurashgancunapitapis yachacunayquipaj. Paycuna jovincunalaraj caycar calpachacärergan Jehovata tucuynopa sirvipäcunanpaj. Chayno Jehovapa shongunta cushichirgan y ali cawacärergan. Canan wichan imacunata rurashgayquipitami shamoj tiempucho cawayniqui imano cananpaj canga. Quiquiqui yachashgayquilaman yäracunayquipaj trucan Jehovaman yäracuptiquega, paymi yanapäshunqui imaypis alicunata ruranayquipaj. Maquiquichomi caycan ali y cushishga cawacunayquipaj. Jehovaga manami gonganchu payraycu lapan rurashgayquicunata sirvinapaj. Ama gongaychu, Taytalanchi Jehovaga amatar cuyayculäshunqui. ¡Jehovata sirvishganchega imapitapis más ali caycan! w23.09 13 parr. 18, 19

Apóstol Pabluga musyarganmi yäracoj masincuna juchasapa cashganta. Jerusalencho caycaj congregaciunman chayaptin, achcajmi payta manchacurgan y mana yäracurganpischu (Hech. 9:26). Waquincunaga washantapis parlapäcurgan (2 Cor. 10:10). Jina ricarganpis apóstol Pedro pantashganta, y chayga waquin cristianucunatapis laquichinmanmi cargan (Gál. 2:11, 12). Juc cuticho yanagajnin Marcuspis cachariycur aywacushga cargan (Hech. 15:37, 38). Chay lapancunata ricar Pabluga paycunawan manana juntacanmannachu ni parlapanmannachu cargan. Pero chayta rurananpaj trucan paycunaman yäracurgan y Jehovata sirviycarla caycargan. ¿Imataj yanapargan? Pabluga yäracoj masincunata cuyajmi, chaymi paycuna pantashgancunaman yarparajchu. Sinoga cutin cutin pantarcuptinpis ali shonguyoj cashganta yarparaj y perdunacojmi. w24.03 15 parr. 4, 5

Bibliaga wilamanchi jucla mana rabiacoj runacunapita. Guerar pampacho Isaac tiyaycaptin, uyshancunapaj yacuyoj pozucunata ojtichimurgan, ichanga filisteo runacuna pasaypa chiquishpan ojtishgan pozuncunata pampaycurgan. Isaac chaycunaraycu peliananpaj trucan juc ladupana aywacurgan y mushoj pozucunata ojtichimurgan (Gén. 26:12-18). Chayta ricaycur filisteucunaga nipäcurgan chaycho caycaj yacuga paycunapita cashganta. Chay jinanpa pasaycarpis, Isaacga mana jucla rabiacurganchu (Gén. 26:19-25). ¿Imataj yanapargan chayno runa cananpaj? Taytancunachi chayno capäcurgan. Abrahanga piwanpis jaucala cawacoj runa cargan y maman Sarapis pacienciacoj y piwanpis ali goyäcoj warmi cargan (1 Ped. 3:4-6; Gén. 21:22-34). w23.09 15 parr. 4

Y tiempo pasariptin Jehovaga runacunata cuyashpan Wamranta cachamurgan. Jesusga Diospa Gobiernunpita yachachicurgan, y juchapita wanuypitapis salvamänanchipaj wanurgan. Nircur cawarimuptin cielucho Diosga Gobiernuncho Rey cananpaj churargan. Diospa munaynin cay Pachacho cumplicaptenga, jutin respetashga canga, y chaymi caycan Bibliapa más alinnin caj yachachicuy. Jehová munashganta cumplinanpäga imapis michäcungachu, pay nishganga imaypis ruracan (Is. 46:10, 11; Heb. 6:17, 18). Cay Pacha cuyaylapaj paraisuman ticraptin Adanpa cäsucoj caj miraynincuna juchaynajna caycar, chaycho imaycamapis tiyapäcunga (Sal. 22:26). Y mana chaylachu, Jehovaga munaycun Pachachopis cieluchopis caycaj wamrancuna juc shongunola caycar lapancuna paylata adurapäcunanpaj (Efes. 1:8-11). ¡Alapami cushicunchi Jehová munashganta imano cumplicunanpaj cajta yachacur! w23.10 20 parr. 7, 8

Babiloniapita yargushgan judiucuna Jerusalenchona carcaycaptin imayca sasacunapa pasargan micuyraycu, politicaraycu y chiquicojnincunaraycupis. Chaymi waquin judiucunapäga sasachi cargan yanapacunanpaj templuta sharcachiycho. Chaymi Jehovaga Ageo y Zacarías profetacunata mandargan judiucunata shacyächinanpaj (Ageo 1:1; Zac. 1:1). Paycuna rurashganga alapa alimi cargan. Pero 50 watacuna pasariptin judiucunaga yapay guelanar galaycärirgan. Chaura Diospa Leyninpita alapa yachaj sacerdote Esdrasga Babiloniapita Jerusalenman cutirgan marca masincunata shacyächinanpaj y yanapänanpaj rasunpa caj aduraciunta puntaman churananpaj (Esd. 7:1, 6). Ageo y Zacarías wilacushganga Diospa sirvejnincunata yanapargan chiquishga captinpis Jehovaman yäracunanpaj, chayga noganchitapis yanapämäshunmi ima captinpis jinala Jehovaman yäracunapaj (Prov. 22:19). w23.11 14, 15 parr. 2, 3

Cuyacoj cashganchega ricacämun hermanunchicunata shacyächiptinchi y shogaptinchipis, chaypäga laquipäcoj runa cananchi (1 Tes. 4:18). ¿Imanotaj ricächicunchi lapan shongunchiwan cuyanacushganchita? Waquincuna pantashgancunata perdunaptinchi. ¿Imanirtaj canan wichan masraj cuyanacunanchi? Apóstol Pedruga nergan: “Kay patsa ushakänanpaq walkalanami pishiykan. [Chaymi] imano karpis lapan shonquykiwan kuyanakäriy” (1 Ped. 4:7, 8). ¿Imacunaraj pasanga ushacay junaj caylachona caycaptin? Jesús cayno nergan gatejnincunapaj: “Noqaman yärakamashqaykipitami pïmaypis chikipäkushunkipaq” (Mat. 24:9). Chaymi waquincuna chiquimaptinchipis Jehovata jinala sirvinapäga, juc shongunola cuyapänacur cawacushwan. Chayta rurarga, Satanás hermanunchicunapita raquichimäshunchu y juc shongunolami cawacushun (Col. 3:14; Filip. 2:1, 2). w23.11 13 parr. 18, 19

Bibliapa yachachicuynincunaga alapa poderyojmi. Runacunaga alapami cushicärin Jehová pï cashganta y imano cashganta yachacuptin. Paycunaga ichic ichiclapa cuentata gocärin maygan rasunpa yachachicuycuna cashganta y Diostapis noganchino rasunpa taytantano ricayta galaycärin. Jehová Lapanta puedej Dios cashganta musyar almiracärin (Is. 40:26). Jaucalana cawapäcun Dios alilata ruraj captinmi (Deut. 32:4). Alapa cushicärin fiyupa yachaj cashgantami musyar (Is. 55:9; Rom. 11:33). Cuyashgapis ricacärin Jehová amatar cuyacoj captin (1 Juan 4:8). Jina cada cadala payman masraj guelicamur convencido carcaycan imaycamapis cawapäcunanpaj y Diospa wamrancuna japuy cananpaj. ¿Manachu alapa cushicurcunchi runacunata yanaparcuptinchi Jehovata rasunpa taytantano ricananpaj? Chayta ruraptinchi, ‘Tayta Diospa aruqninkunami’ caycanchi (1 Cor. 3:5). w24.02 12 parr. 15

¿Gamga pilawanpis Bibliapita yachacuycanquichu? Taytayquicuna Testigo captenga, ¿Bibliapita yachaycächishunquichu? Chayno captenga mayna yarpachacuycanquichi bautizacunayquipaj. ¡Y chayga alapa alimi canman! Pero manaraj bautizacurga, Jehovata auninayqui paylata sirvinayquipaj. Pipis Jehovalata sirviyta munarga, juc oraciuncho Diosta aunin paylata adurananpaj y voluntäninta imapitapis más puntaman churananpaj. Chaywanga Jehovata auniycan lapan shongunwan, calpanwan, yarpayninwan y voluntäninwan cuyananpaj (Mar. 12:30). Mañacuyninchicho Jehovata aunishganchitaga paylami musyan. Ichanga bautizacurga waquincuna cuentata gocärin mayna Jehovata sirvinapaj aunishganchita. Pero Jehovata aunishganchega manami ratulapächu caycan. Chaymi imanopapis calpachacunchi aunishganchita cumplinapaj, y Jehovapis chaytami shuyaran (Ecl. 5:4). w24.03 2 parr. 2; 3 parr. 5

Bibliaga wilacun casaducuna o majachacashgacuna problemacunapa pasananpaj (1 Cor. 7:28). Warmipis olgupis juchasapa carcaycan. Jina gustuncunapis y imano cashganpis manami igualchu caycan. Waquincuna juc marcapita captin costumbrincuna y imano ashmashga cashganpis jucnomi canman. Y chaycunaga más claro ricacan casado vidachona. Chaymi öraga majachacashgacuna problemacunapa pasapäcun. Waquincunaga ima problematapis alchananpaj trucan jucnin jucnin culpanacärin o jitapänacun y raquicaytapis yarpapäcun. ¿Pero chayga alichuraj caycan? Manami. Jehovaga munan casaducuna matrimoniunta respetapäcunanpaj, y chaytaga ruranman runan o warminpis mana ali geniuyoj captinpis. w24.03 16 parr. 8; 17 parr. 11

Bautizashgana captiqui, Bibliapita jinala yachacur pogushga cristianumanchi ticrashcanqui y shamoj tiempupaj imaycamapis cawanayquipaj shuyarashgayquipitapis más convenciduchi caycanqui (Heb. 5:13–6:1). Romanos 5:2-4 textucuna nishganno pruebacunapa pasashcanquichi, y chaycunata imano aguantashgayquita ricar Jehová cushicurganchi. Chaura pay ali ricashushgayquita musyar más convencido caycanqui lapan aunishgancunata cumplinanpaj. Chaymi ima shuyarashgayqui rasunpa cananpaj cajman yarpar, cawayniquicho cambiucunata rurashcanqui familiayquita ali tratanayquipaj y ima decidishgayquichopis ricacämun. Apóstol Pablo nergan Diospa ricaynincho ali cashganchita musyar, yanapämanchi aunimashganchiman shuyaränapaj y seguro caycänapaj chaycuna rasunpa cumplicunanpaj (Rom. 15:13). w23.12 12, 13 parr. 16-19

Imayca sasacunapa pasarga alapa yarpachacuylawan caycar, öraga lutanta yarpar imatapis rurayta galaycushwanchi. Imanomi pulchachaycaj lamarcho juc barco wacpa caypa tunicuyta o ishquiyta munan, chaynomi öraga ricacushwan. ¿Imanotaj Jehová yanapämanchi laquicuylawan y yarpachacuylawan caycaptinchi? Pay aunimashcanchi ima pasamaptinchipis yanapämänanchipaj. Lamarcho yacu pasaypa pulchajyaptenga, juc barco ali aywaycaptin caypa wacpa cuyur galaycunman. Chaymi mana talpucänanpäga yacu rurincho barcupa ishcay laduncho guerucunano caycan ali chararänanpaj. Chaywanga barco alapa cuyunnachu y pasajerucunapis cushishga viajapäcun. Chaynolami, sasa problemacunapa pasaycaptinchipis, Jehová yanapämänanchita munarga, jinala payta sirviycäshun. w24.01 22 parr. 7, 8

Gampis manchacushpayqui hora yarpachacuy unaycho Jehová lapan rurashgancunaman. Pay camashgancunata ricaptiqui, yarpachacunquiman pishgucunata o avicunata y waytacunata imano cuidashganta, chayta rurarga Jehovaman masraj yäracunqui imaypis yanapäshunayquipaj (Mat. 6:25-32). Jina yarpachacuy sirvejnincunata Jehová imano yanapashganta. Chaypäga Bibliacho yachacuy unaycho Jehová sirvejnincunaraycu imata rurashganta y canan wichanpis imacunata ruran. Nircur quiquiquitapis Jehová imano yanapäshushgayquiman yarpachacuy. ¿Imanotaj yanapäshushcanqui paypita yachacunayquipaj? (Juan 6:44). ¿Imanotaj mañacuyniquicunata contestargan? (1 Juan 5:14). Jesús gamraycu wanushganpita, ¿ima alicunatataj tarishcanqui? (Efes. 1:7; Heb. 4:14-16). w24.01 4 parr. 6; 7 parr. 17