Noviembre

Tacshala wamrayquicuna captenga yanaparcuy preparacunanpaj puedishganmanno comentamunanpaj. Reuniuncunacho casaracuy vidacho ima problemacuna cashganpita o Diospa ricaynincho imano limpio caycänapaj parlacamuptinpis, juc ishcay parrafucuna canmanmi wamracuna parlacämunanpaj. Jina wamrayquicunata tantiachinquiman imanir öraga maquinta cutin cutin jogariptinpis comentayta mana puedingachu. Chayta ruraptiquega paycuna manami laquicungachu paypa trucan jucta acraptin comentananpaj (1 Tim. 6:18). Lapanchimi ali comentariunchicunawan Jehovata alabayta puedinchi y hermanunchicunatapis shacyächiyta (Prov. 25:11). Öraga vidanchicho imacunapa pasashganchita parlayta puediptinchipis, ama alapaga quiquinchipita parlapacushwanchu (Prov. 27:2; 2 Cor. 10:18). Chaypa trucanga Jehovapita, Palabranpita y sirvejnincunapitapis parlashwanmi (Apoc. 4:11). w23.04 24, 25 parr. 17, 18

¿Imataj yanapämäshun camaricushgala y ali juiciuwan cawacunapaj? Cuyacuyninchimi (Mat. 22:37-39). Chaymi, ima captinpis Jehovata cuyashpanchi valurcharcunchi runacunata yachachicunapaj (2 Tim. 1:7, 8). Jina waquin runacuna creencianchicunawan acuerducho mana caycaptinpis, jinala calpachacunchi telefunupapis o cartapapis predicanapaj. Y chaytaga ruranchi paycunata cuyashpanchimi. Galananlacho ali mana chasquimaptinchipis, yäracunchi imaylapis cambiananpaj cajta (Ezeq. 18:27, 28). Hermanunchicunata cuyashganchitaga ricacämun shacyächinacuptinchi y jucninchi jucninchi yanapanacuptinchi (1 Tes. 5:11). Soldaducuna jucnin jucnin yanapanacushgannomi jucninchi jucninchi shacyächinacunchi. Chaymi musyaycar hermanunchicunapa contrancho imatapis ruranchichu, ni igual cutichinchichu ofendimaptinchipis (1 Tes. 5:13, 15). Congregaciunta ricajcunata respetaptinchega paycunata cuyashganchita ricacämun (1 Tes. 5:12). w23.06 10 parr. 6; 11 parr. 10, 11

Yäracuyninchitaga sinchiyächinchi Jesuspa wanuyninman yarpachacuptinchi. Paypa wanuyninwan Jehová aunimashganchicunata cumplenga. Chaymi alapa ali caycan tiempunchita jorgunapaj Jesuspa wanuyninman yarpachacunapaj y imanir Jehová Wamranta cachamushgantapis. Chayta rurarga masraj yäracushun Jehová mushoj Pachata rasunpa apamunanpaj y chaycho imaycamapis cawacunapaj. ¿Imanirtaj chayta ninchi? Yarpachacushun Jesús imacunapa pasashganta wanunanpaj. Jehovaga jaguirergan cuyashga japalan Wamran y más ali amigun cay Pachacho juchaynaj runano yurinanpaj. Jesús Pachacho caycar chiquishga, ashlishga cargan, jina imayca mana alicunapa pasargan y laquicuypämi imano wanushga cargan. Jehovaga alapachi laquicurgan Wamran chay jinanpa pasashganta ricar. Cuyacoj Taytaga manami jaguinmanchu cargan Wamran chaycunapa pasananpaj, ichanga noganchita cuyamashpanchi chayta rurargan, shamoj tiempucho ali cawayta tarichimänanchipaj (Juan 3:16; 1 Ped. 1:18, 19). Chaymi seguro caycanchi mushoj Pachacho chay cawayga manami ratulapächu canga, sinoga imaycamapis. w23.04 27 parr. 8, 9

¿Jehovaga munaycanchuraj wanushgacunata cawarachimunanta? Aumi. Quiquinmi achca runacunata yanapargan Bibliacho guelgananpaj wanushgacuna rasunpa cawarimunanpaj cajta (Is. 26:19; Apoc. 20:11-13). Y Jehová imatapis auniptenga cumplinmi (Jos. 23:14). Mana chaylachu, Jehovaga pasaypami munaycan wanushgacunata cawarachimunanpaj. Job ima nishganmanmi yarpachacushun. Payga seguro caycargan wanuptinpis Jehová cawarachimuyta munaycashganta (Job 14:14, 15). Jehovaga chaynolami rurayta munaycan waquin wanushga sirvejnincunawanpis. Aumi, payga alapa munaycun cawarachimunanpaj, cushi cushila y sano cawapäcunanpaj. ¿Ima nishwantaj Jehovata mana reguej achca runacuna wanushganpita? Cuyacoj Taytalanchega shuyaraycanmi paycunatapis cawarachimunanpaj (Hech. 24:15). Payga munan paycunapis cawarircamur amiguncunaman ticrananpaj y cay Pachacho imaycamapis cawapäcunanpaj (Juan 3:16). w23.04 9 parr. 5, 6

¿Imataraj ruranquiman Diospa aunicuyninman lapan shonguyquiwan yäracunayquipaj? Pachacho cawanayquipaj captenga, ali canman leinayquipaj paraisupita Biblia wilacushganta y chayman yarpachacunayqui (Is. 25:8; 32:16-18). Yarpachacuy paraisucho cawayninchi imano cananpaj cajman. ¿Chaychochu cashgayquita ricacunqui? Chay lapanta rurarga ima problemacunatapis ushacajtanola ricanquipaj (2 Cor. 4:17). Jehovapa aunicuynincunaman yarparga calpata tarinqui. Jina Jehová achca yanapacuycunatami gomanchi. Chauraga ima cargutapis cumplinapaj sasa captin, pruebacunata aguantanapaj y Jehovata cushishgala sirvinapäga, payta mañacuy y Bibliata leishgayquimanpis yarpachacuy. Jina hermanucunapa yanapacuynintapis ashiy y Diospa aunicuyninmanmi yarpay. Chay lapanta ruraptiquega Jehovaga calpanwan yanaparcushunqui mana ajayaypa aguantanayquipaj (Col. 1:11). w23.10 17 parr. 19, 20

Imaycacuna caycan Jehovata agradecicunapaj. Lapan alicunata charashganchicunapita agradecicushun, Paylapitami ima bendiciuncunapis shamun (Sant. 1:17). Chaymi, ¿manachuraj graciaslä nishwan cay cawaycashganchi Pacha cuyaylapaj captin? Jina cawayta goycalämashganchipita, familianchipita, amigunchicunapita y shamoj tiempucho imata chasquinapaj cajpitapis agradecicushwan. Aumi, mana uticaypa graciaslä nishwan, payraycumi familian rurinchopis caycanchi. ¿Imanirtaj jucninchi jucninchipis agradecido runa cashwan? Öraga sasa ticracurinman agradecido runa canapaj. ¿Imanir? Cay munducho runacunaga pasaypa desagradecido capäcun, munashgancunalaman yarparmi mana yachanchu ‘gracias’ niylatapis. Noganchipis chay runacunano carga munashganchilatachi Diosta ruwacuycashwan. Pero chayno mana cananpäga, noganchicuna waran waranmi Jehovata agradecicushwan lapan gomashganchicunapita, chaynopa agradecicoj runa cashun (Luc. 6:45). w23.05 4 parr. 8, 9

Taytalanchi Jehovaga cuyamanchimi y nacaptinchega paypis laquicunmi (Is. 63:9). Pero manami libramanchichu problemacunapitaga (Isaías 43:2). Chaypa trucan, payga aunimanchi yanapämänanchipaj ima pruebatapis aguantanapaj, y japalanchitaga manami jaguimäshunchu. Jina imaycatapis aguantanapaj espíritu santunta gomanchimi (Luc. 11:13; Filip. 4:13). Chaymi seguro caycashwan imatapis aguantanapaj y Jehovata cushishga sirvinapaj. Jehová munan payman yäracunanchipaj (Heb. 11:6). Öraga jatun pruebacunapa pasaptinchega capaz manchacunchimi, ‘Jehová quevä yanapämanga’ ninchirämi. Pero manami chaynochu, Bibliaga nimanchi Diospa poderninwanga “marka murällan altu kaptinpis achpaypami” yaycuyta puedinchi (Sal. 18:29). Chauraga dudashwanchu Jehová yanapämänanchipaj, chaypa trucanga lapan shongunchiwan mañacushun y yäracushun mañacuyninchita contestananpaj (Sant. 1:6, 7). w23.11 22 parr. 8, 9

Biblia nishganga cuyaylapaj ¿au? Casado vidacho ishcancuna cuyanacärishganga ushacäcunmanchu ni imapis ushacächinmanchu. Casaracushga cajcunaga calpachacärinmanmi cuyanacuycarla carcaycänanpaj. Rataycaj tulpapita parlarcushun. Mana upicäcunanpäga, cutin cutin pücaparmi yantata tuquipanchi. Chaynolami casado vidachopis ishcancuna imaycata rurapäcunman cuyanacärishgan mana ushacäcunanpaj. Chayno captinpis pilapis ninmanchi ‘guellayta tarinapaj sasaraj captin, gueshyapis captenga, o wamräcunata ashmanäpaj sasa captenga unayno cuyanacärinäpäga sasami ticracurin’. Chauraga cuyanacuy imaypis mana upicäcunanpäga, olgu cajpis warmi cajpis calpachacärinmanmi Jehovapa ali amigun capäcunanpaj. w23.05 20, 21 parr. 1-3

Valiente canapaj taytanchicuna yanapämaptinchipis quiquinchipitami canga imacunapa pasarpis valurcharcunapaj. Pipis valiente cananpäga yachacunanrämi, manami jinaylapitachu yurimunga. Waquincuna yachachimaptinchi imatapis ruranapaj calpachacunchimi atentula caycänapaj, nircur paynola ruranapaj. Chay japuyla calpachacunanchirämi Diosta sirvej valiente runacunapita yachacunapaj y nircur paycunanola canapaj. Danielno, Bibliapitaga manami janan jananla yachacushwanchu, Jehovapa amigun canapäga cutin cutinmi y shongunchita mashtapaycurmi mañacunanchi, jina yäracushwan Diosninchi yanapaycalämänanchipaj. Chay lapanta rurarga imayca sasacunapa pasarga valientimi caycäshun. Valiente captinchega waquincunaga respetamäshunmi, y Jehovapitaga masrächi yachacuyta munapäcunga. Chaymi valiente canapaj calpachacuptinchega alapa alimi canga. w23.08 2 parr. 2; 4 parr. 8, 9

Metalwan aroj runaga ima metaltapis chulurcachinraj rasunpa goripita cashganta musyananpaj. Chaynolami ima wilacuycunatapis creinapäga shumajraj tantiarcushwan rasunpa cashganta o manapis. Chaymi leishganchi, wiyashganchi o ricashganchi wilacuycunata tincuchishun Bibliacho o publicaciuncunacho nishganwan. Y chaytaga masraj rurashwan jatun nacay caylachona caycaptin. Chayta rurashpanchega, supaycunapita shamoj wilacuycunaga pantachimäshunchu (Prov. 14:15; 1 Tim. 4:1). Jatun nacay chayamuptin cawaycar-raj caycaptinchi o wanushgana caycaptinchipis ushanancama yäracoj sirvejnincunataga Jehová imaycamapis cawayta goycunga. Musyanchimi Jehová marcantaga salvananpaj cajta, ichanga musyanchichu waray o warantin ima pasamänanchipaj cajta (Sant. 4:14). Chaymi shuyarashganchi cajman imaypis yarpachacushun y camaricushgala shuyarcushun Jehovapa junajninta. w23.06 13 parr. 15, 16

Manami musyanchichu waquin profeciacuna imano cumplicunanpaj cajta (Dan. 12:8, 9). Chauraga, waquin profeciacuna imano cumplicunanpaj shumaj mana tantiarcurpis yäracuycäshunla rasunpa cumplicunanpaj cajta. Musyanchimi tiempulancho Jehová shumaj tantiachimänanchipaj Bibliacho caycaj profeciacuna imano cumplicuycashganta, unaychopis chaynomi rurargan. Ichiclacho runacunaga nipäcunga seguro cawaycashganchita y “imapis mana pasananpaq” (1 Tes. 5:3). Chayno captin, ilajpita gobiernucunaga lapan lutan religiuncunata ushacächir galaycunga (Apoc. 17:16, 17). Nircur Diospa sirvejnincunatapis ushacächiyta munanga (Ezeq. 38:18, 19). Chayno captin Armagedón guerra galaycunga (Apoc. 16:14, 16). Biblia wilacushganga manami lutan wilacuychu. Yäracunchimi ichiclacho rasunpa pasananpaj. Chaymi chaycamaga Taytalanchi Jehovata agradecicur profeciacunapita jinala yachacuycäshun y waquincunatapis yanaparcushun chaycunata tantiarcunanpaj. w23.08 13 parr. 19, 20

Apóstol Pabluga parlamurgan Diosman yäracunapaj, imata shuyarashganchipita y cuyacuypitapis. Pero nergan: “Lapanpitapis mas aliqa kaykan kuyanakushqantsimi” (1 Cor. 13:13). ¿Imanirtaj chayno nergan? Shamoj tiempucho ricashunmi Jehovapa lapan aunicuynincuna cumplicushgantana. Pero Jehovatawan runa masinchicunata cuyashganchega imaycamapis jinala winaycämungami. Rasunpa cristiano cashganchitaga ricächicunchi jucninchi jucninchi cuyanacuptinchiraj. Chaymi Jesusga apostulnincunata cayno nergan: “Kuyanakäriptikimi pïmaypis musyapäkunqa discïpulükuna kashqaykita” (Juan 13:35). Rasunpa cuyanacuptinchega, Pablo nishganno juc shongunola cawacushun (Col. 3:14). Jina caytapis apóstol Juan yäracoj masincunata nergan: “Tayta Diosta kuyarqa runa mayikitapis kuyay” (1 Juan 4:21). Chauraga, Jehovata cuyashganchega ricacanga yäracoj masinchicunata cuyaptinchiraj. w23.11 8 parr. 1, 3

Yalinacojcunaga chayananpaj cajman chayayta munapäcun, chaynolami Diospa sirvejnincunapis imaycamapis cawayta tarinapaj carreracho caycanchi (2 Tim. 4:7, 8). Ichanga cay ushanan tiempucho chay carreracho corriycänapaj masrämi calpachacunanchi. Apóstol Pablupis wanunancama Diosta sirvergan, chaynola noganchipis ruraycänapaj cayta nimarganchi: “Cörriq runa qepinta kachaykuqno […] noqantsipis Tayta Dios munashqanno wanunantsiyaq kawashun”. Apóstol Pablo nishganwanga, manami niycarganchu jinayla corriycänapaj, chaypa trucanga niycargan lasaj guepino caycajcunata jaguirinapämi. Chaycunaga uticächimashwan y gänasninchitapis ushacächinmanmi Diosta manana sirvinapaj. Chay mana pasamänanchipäga jucla lasaj guepino cajcunata cachaycushun. Ichanga premiuta chasquiyta munarga, waquin ruranapaj cajcuna lasaj guepino captinpis manami cachaycushwanchu (2 Tim. 2:5). w23.08 26 parr. 1, 2

Waquincunata ali tantiapar y ali shongu carga, piwanpis respetuoso runami cashun. Waquin cristianacunaga gajlantami pintapacun y alchapacun, pero waquincunaga manami. Waquincunapis traguta ichiclata upupäcun, ichanga waquincunaga maliylatapis o yawaylatapis munapäcunchu. Lapanchicunami ali saludniyoj cayta munanchi. Chayraycumi waquincunaga nipäcun ‘cayta upushgämi nogata aliyächimash’ nir. Chauraga mana alichi canman pitapis niptinchi ‘noga upushgäta upuy’, ‘noga yarpashgäno yarpay’, ‘noga rurashgäno ruray’ niptinchega. Chayno captenga congregaciunchoga raquicaypis canmanchi (1 Cor. 8:9; 10:23, 24). Jehovaga ichanga manami obligamanchichu ‘cayno, wacno visticunqui’ nir. Payga Palabranwanmi ali tantiachimanchi imano visticunapaj. Ali visticushganchiwanpis Diostaga alabaycunchimi. Chaypaj parlarmi Bibliapis nin ali juiciuwan “tincushalla adurnacuchun” nir (1 Tim. 2:9, 10). Chaymi pipis jamurpamänanchipäga ima ropatapis jaticushwanchu. Bibliacho caycaj consejucunami ancianucunatapis yanapanman, pitapis mana ninanpaj ‘cayta jaticunquiman cayta mana; cayno najchacunquiman, cayno mana’ nir. w23.07 23, 24 parr. 13, 14

Jehová shumaj tantiachimanchi imata ruranapaj rasunpa cushishga cawacuyta munar. “Mana tantiyakuq” warmi nishganta chasquipacojcunaga, shamoj tiempuman mana yarpachacur shongun munashgalanta rurapäcun. Paycuna manami musyapäcunchu “wanunanpaq kashqanta” (Prov. 9:13, 17, 18). “Tantiyakuq” warmi nishganta chasquipacojcuna ichanga rasunpa cushishga cawapäcun (Prov. 9:1). Jehovaga Palabranwan yachaycächilamanchi pay chiquishgancunata chiquinapaj y cuyashgancunata cuyanapaj (Sal. 97:10). Jina cushicurcunchi waquincunata yachachiptinchi tantiacoj runacunaman ticrananpaj. Imanomi Proverbios 9 caj capitulucho wilacushgan ashmaycuna marca jananman aywaycur gayacamun, noganchipis paycunano ‘“¡mana tantiyakuq mözukuna y jipashkuna!” cayman shapäcamuy’ ninchi. Chaura noganchi o pipis chay invitaciunta chasquiycurga, canan y shamoj tiempuchopis ali cawacäringa. “Tantiyakuq runano shumaq” cawacurga imaycamapis cawacushun (Prov. 9:3, 4, 6). w23.06 24 parr. 17, 18

Mayganlapis aroj masiquicuna o estudiaj masiquipis creenciayquicunapita tapupäshuptiquega capaz waquincunano öraga manchacunquimanmi. Pilapis chaycunata tapupämaptinchega capaz öraga Bibliapita yachachicushwanmi. Jina cuentatapis gocunchi imano runa cashganta y noganchipita imata yarpaycashgantapis. Ichanga waquincunaga Testigucunapita mana alicunata wiyashganraycu, creencianchicunapita rimanacuyta munar capaz tapupämäshunmi, chayno captenga ama manchacushwanchu (Hech. 28:22). Bibliaga nimanchi “ultimo tiempucho” cawaycashganchita, chaymi runacunaga “tumpakuq” y “ali ruraqkunapa contran sharkuq” (2 Tim. 3:1, 3). Pilapis imaman yäracushgayquicuna yangala cashganta nishuptiquega, ¿imaraj yanapäshunqui rimanacuyman mana chayanayquipaj? Chaypäga jucla mana piñacoj runa canayqui. Waquincuna yäracushgayquiraycu ashlipäshuptiquipis geniuyquita dominanayqui. w23.09 14 parr. 1, 2

Diospa marcanchoga imayca consejucunatami chasquinchi guellaylata mana ashinapaj y Jehová chiquishgan ruraycunatapis mana ruranapaj. Jehová nimashganchita cäsucuptinchega quiquinchipämi caycan (Is. 48:17, 18; 1 Tim. 6:9, 10). Jatun nacay wichancho y Waranga Watacunacho Jesús gobernashganchopis jinala Jehovaga runacunawan sirvejnincunata pushaycanga. Chay wichan nimashganchega, ¿cäsucushwanchuraj? Canan wichan cäsucoj carga, shamoj tiempucho sasanachu canga cäsucoj canapaj. Chaymi Jehová pushamashganchita cäsucushun y pay acrashgan runacunatapis pushamänanchipaj (Is. 32:1, 2; Heb. 13:17). Imaycacunami caycan pushamajninchi Jehovaman yäracunapaj, payga imayca yanapacuycunatami gomanchi mana ali ruraycunaman mana ishquinapaj. Jina yanapämänanchita munan mushoj Pachaman yaycunapaj imaycamapis cawacunapaj. w24.02 25 parr. 17, 18

Apóstol Pablo may chaypa runacunata cushishga yachachicurgan, chayno captinpis imayca sasacunapami pasargan. Lapan pasashganpita cayno nergan: “Atska kutimi mayupis cäsi cäsi apamashqa. Suwakunapa makinpitapis qeshpirqä. Israel runakunapis y mana Israel runakunapis wanutsimaytami munamashqa” (2 Cor. 11:23-27). Jina waquin cristiano masincuna consejuncunata chasquinanpaj trucan Pabluta jamurpaj (2 Cor. 10:10; Filip. 4:15). Pabluga Bibliapita ali yachacoj cargan y cawaynincho imayca pasashgancunacho ricargan Jehová amatar cuyashganta. Chayga yanapargan Jehovalata sirvir caycänanpaj (Rom. 8:38, 39; Efes. 2:4, 5). Jehovata lapan shongunwanmi cuyar, Pabluga calpachacurgan yäracoj masincunata imaypis yanapänanpaj (Heb. 6:10). w23.07 9 parr. 5, 6

Runacunaga cuentata gocärin autoridäcuna alipaj cashganta, chaymi paycuna camacächishgan waquin leynincunata cäsucärin. Pero waquin leycuna gustunpäno mana caycaptenga, cäsucuyta munapäcunnachu. Bibliaga nimanchi autoridäcunaga Satanaspa maquincho caycashganraycu runacunata nacachipäcun, chaymi ichiclacho ushacächishga canga (Sal. 110:5, 6; Ecl. 8:9; Luc. 4:5, 6). Jina wilacun “autoridäkunata pipis mana cäsukurqa Tayta Diostapis manami cäsukuykantsu”. Jehová Diosmi autoridäcunata churashga imapis ordenado cananpaj, chaymi pay munan paycunata respetananchipaj. Chauraga impuestuta pagananchi, autoridäcunata respetananchi y leynincunatapis cäsucunanchi (Rom. 13:1-7). Öraga capaz cäsucuyta munashwanchu autoridäcunapa leynincuna sasa captin o gustunchipäno mana captin. Chayno captinpis cäsucunanchimi, chayta rurarga, Jehovatami cäsucuycanchi. Pero autoridäcuna Jehovapa Palabranpa contrancho imalatapis ruranapaj nimaptinchega, chaychomi ichanga mana cäsucunchichu (Hech. 5:29). w23.10 8 parr. 9, 10

Sansón yurishgan wichanpäga, Israel marcaga filisteo runacunapa munayninchomi caycargan (Juec. 13:1). Paycuna alapa fiyu runacuna cashganraycu, israelitacunata pasaypa nacachipäcoj. Chaymi Sansón manaraj yuriptin Jehovaga nergan “paymi Israel runakunata filisteo runakunapa munayninpita jorquyta qalaykunqa” (Juec. 13:5). Chayta Sansón rurananpäga, Jehovaman yäracunanrämi. Juc cuticho Sansonta preso charipacuyta munar filisteo runacuna Lehí marcaman aywapäcurgan. Chayta musyar Judá runacunaga manchacärirgan, chaura quiquin marca masincuna wilanacurcur Sansonta mushoj wascawan watarcur o liyarcur filisteo runacunapa munayninman churargan (Juec. 15:9-13). Pero jinan horami ‘TAYTA DIOSPA espiritun yanapaptin’, Sansonga watarashgan wascatapis rachirirgan. “Nirkurmi bürrupa chakawshan [o cachalwan] manaraq shumaq tsakishqa jitaraykaqta aptarkur waranga (1,000) filisteo runakunata wanutsirqan” (Juec. 15:14-16). w23.09 2 parr. 3, 4

Jehovapa munayninpis ruracänanpäga imapis michäcunchu, y payga chaypita Palabrancho mayna wilamashcanchina. Aumi, imapis munashganno y “yarpashqanno kananpaqmi lapantapis TAYTA DIOS kamashqa” (Prov. 16:4). Pay rurashganga manami ratulapächu caycan. ¿Imataj caycan paypa munayninga? Y, ¿imataj rurashga cumplinanpaj? Adantawan Evata camaycur Jehovaga nergan: “Kay patsa juntananyaq mirapäkuy. Munaynikicho katsun pescädukuna, päriqkuna y kay patsacho lapan kawaqkunapis”, chaynopa musyachicurgan paycunapaj ima munashganta (Gén. 1:28). Adanwan Eva mana cäsucuptin Jehovaga manami nerganchu ‘cananga munashgätaga mana rurashänachu’ nir. Chaypa trucan payga cielucho jucla juc Gobiernuta camacächirgan munashganta cumplinanpaj (Mat. 25:34). w23.10 20 parr. 6, 7

Noganchitapis Jehovaga yanapämanchimi guepaman mana cutinapaj. Öraga achca watacunapana imalawanpis luchaycarga más sasarämi canman aguantanapaj. Ichanga imacunacho pantashganchicuna apóstol Pedro rurashganpita más peor-raj captinpis, Jehovaga listumi caycan calpanwan yanapämänanchipaj (Sal. 94:18, 19). Juc cristiano masinchi Bibliapita manaraj yachacur, achca watacunapa olgu runa masincunawanshi cacurgan. Chayta canan jaguirishgana captinpis, juchasapa cayninwanga jinala luchaycanrämi. ¿Imataj yanapargan guepaman mana cutinanpaj? Payga nin: “Jehová calpanta goman, y espiritunpa yanapacuyninwan [...] calpachacö guepaman mana cutiypa [...] ali caj nänilapa purinäpaj”. Caytapis nin: “Jehovaga yanapämanmi, [...] pantarcuptëpis shacyächiman valurcharcunäpaj”. w23.09 23 parr. 12

Mozularaj cristiano captiqui, yarpachacuy pogushga cristianuman ticranayquipäga manami jinaylapitachu canga. Chaymi ali cristianucunapita yachacunquiman, ali yarpachacoj y confiacuypäpis canquiman. Jina imalatapis rurayta yachacunquiman y shamoj watacunapäpis camaricushgala caycanquiman. Mozo cashpayqui imaycata ruranayquipaj cashganta yarpar capazchi ninquiman ‘nogapäga sasami chay lapanta ruranäpaj’ nir. Pero ama manchacuychu, ¡gamga puedinquimi! Jehovapis listo caycan yanapäshunayquipaj (Is. 41:10, 13). Congregaciuncho caycaj hermanucunapis yanapäshunayquita munan. Jehová munashganno runaman ticraptiquega alapa cushishgami cawacunqui. Mozucuna, gamcunataga amatar cuyayculanchi y Jehovapis bendiciyculäshunqui lapan calpachacushgayquita pogushga cristianuman ticranayquipaj. w23.12 29 parr. 19, 20

Cayman yarpäshun, gamshi hermanucunawan cushi cushila carcaycar fotucunata tomacunqui. Pero juc foto mana ali yarguptenga, ¿imataj chay fotuwanga ruranqui? Borrarinqui ¿au?, y ali caj fotucunalawanchi quedacunqui. Chararashganchi fotucunata ricaycurga yarpanchimi unaycho hermanunchicunawan ali pasashganchita. Pero imaylapis paycuna pantarcuptenga, ¿imataraj rurashwan? ¿Chaylaman yarparaycäshunchuraj? Manami. Imanomi juc mana ali fotuta borrarinchi, chaynolami hermanunchi pantashgantapis umanchipita borrarishwan (Efes. 4:32). Aumi, imaycacuna caycan hermanunchiwan ali pasashganchita yarparänapaj. Chayta rurarga paycunapita ali cajcunalatami yarpäshun. w23.11 12, 13 parr. 16, 17

Hermanacunaga mana jamurpaypaj ropacunata jaticunmanchu y ali juiciuwan visticunman. Pabluga nergan cristianacunaga shumaj yarpachacur-raj visticunanpaj y waquincunamanpis yarpachacunman. ¡Alapami cushicunchi pogushga cristianacuna ali tantiaycur visticuptin! Ali tantiacoj warmiga tantiacunmi ima ali cashganta y mana ali cashgantapis. Abigaíl rurashganta ricashun. Runan mana ali decidishganta musyar, payga tantiacurgan wasincho caycajcunapa vidancuna peligrucho caycashganta. Chaymi jucla imaycata rurargan paycunata salvananpaj (1 Sam. 25:14-23, 32-35). Tantiacoj cashganchega yanapämanchi imay parlanapaj y imay upälacunapaj, jina waquincunawanpis cuyacoj canapaj (1 Tes. 4:11). w23.12 20 parr. 8, 9

Cay textuta Romacho caycaj congregaciuncho hermanucunata apóstol Pablo guelgashga. Paycunaga Jehovapita y Jesuspitapis yachacur, paycunaman yäracushpan cristianucunaman ticrapäcushga cargan. Chaymi ali yäracoj runacuna cashganraycu Tayta Dios ali ricargan y santo espiritunwan acrargan (Rom. 5:1). Chaura chaypita pacha paycuna ima shuyarashganga cushicuypämi cargan. Tiempuwanna Éfeso marcapita cielupaj acrashga cristianucunata Pablo shumaj tantiachirgan Dios ima aunishganta. Paycunata nergan “chasquinayquipaj caycaj erensya fiyupa alli cashanta” (Efes. 1:18). Y Colosas marcacho cristianucunatana nergan ima shuyarashganga caycan cielucho imaycamapis cawananpaj cashganta (Col. 1:4, 5). Chay cristianucunaga shuyaraycan cawarircamur cielucho imaycamapis cawanapaj y Jesuswan gobernapäcamunanpaj (1 Tes. 4:13-17; Apoc. 20:6). w23.12 9 parr. 4, 5

Cay textucho “cuidanqa” nishgan palabraga yarpächimanchi unaycho soldaducuna juc marcata imano täpashganta chiquejnincuna mana atacananpaj. Soldaducuna chay marcata täpaycashganta musyar runacunaga tranquilula o jaucala punucärin. Chaynolami Diosninchipis shongunchita y yarpayninchita cuidaptenga jaucala ricacunchi (Sal. 4:8). Ima laquichimashganchicuna jucla o rasla mana alchacaptinpis, alapa yarpachacuycarla manami caycanchichu, sinoga Ana ricacushganno jaucala ricacunchi (1 Sam. 1:16-18). Chayga yanapämanchi shumaj yarpachacurcur-raj imatapis ali decidinapaj. ¿Imataj rurananchi? Imanomi juc marcacho tiyaj runacuna soldaducunata mañacunman marcanta täpananpaj, chaynolami noganchipis Jehovata mañacunanchi chapämänanchipaj. Cutin cutin mañacushpanchega Jehová yanapämäshun jaucala ricacunapaj (Luc. 11:9; 1 Tes. 5:17). Gampis sasacunapa pasaycaptiquega, cutin cutin Jehovata mañacurcuy. Chayta ruraptiqui, quiquiqui ricanqui imano Jehová yanapäshushgayquita jaucala caycänayquipaj shonguyquitapis y yarpayniquitapis cuidashganta (Rom. 12:12). w24.01 21 parr. 5, 6

Chiquejnincunaga Jesusta alapami nacachergan, ashlirgan y tumparganpis, payga chay lapancunata aguantargan Taytanpa jutin respetashga o ali ricashga cananpaj. Lapanchomi Taytanta cäsucurgan, chaymi imapitapis pengacunmanchu cargan (Heb. 12:2). Jina musyarganmi chay lapan mana alicunapa pasashganga Satanás caycashganta (Luc. 22:2-4; 23:33, 34). Diabluga munargan Jesús Jehovata jaguirinanta, pero lapan rurashgancunaga yangalapami cargan. Jesús musyachicurgan Satanás lulacoj cashganta y Diospa sirvejnincuna imayca sasa pruebacunapa pasarpis Jehovata mana jaguirinanpaj cajta. ¿Gampis munanquichu Reyninchi Jesuspa shongunta cushichiyta? Chayno captenga Jehovapa jutinta imaypis alabay y waquincunatapis yachachiy Jehová imano cashganta. Chayta rurarmi Jesús rurashganno ruraycanqui (1 Ped. 2:21). Chaynopa Jesús rurashganno Jehovapa shongunta cushichishun y ricächicushun Satanás pasaypa lulacoj cashganta. w24.02 11, 12 parr. 11-13

Chaylaraj pasashgan pichga watacunacho, aypala runacuna bautizacärergan Jehovapa testiguncuna cananpaj. Jehovata auniptinchi paylata sirvinapaj, niycanchi Jesuspa discipulunman ticranapaj y Diospa voluntäninta imapitapis más puntaman churanapaj. Jesús nergan: “Pipis discïpulü kayta munarqa kikin munashqanno ama kawatsuntsu” (Mat. 16:24). Chaywanga Jesús niycargan cawacuyninchi y ima munashganchipis Jehovalapaj cananpaj. Chaura gam Jehovalata sirvinayquipaj aunirga, chiquinayqui pay lapan chiquishgancunata (2 Cor. 5:14, 15). Chayga ninan fornicación o jucwan jucwan cacuyta juchatapis chiquinayqui (Gál. 5:19-21; 1 Cor. 6:18). Y chaycunata cäsucunayquipaj, ¿sasachuraj canman? Manami, Jehovata cuyar y mandätuncunapis yanapäshushgayquita ricarga cushishgalachi cäsucunquiman (Sal. 119:97; Is. 48:17, 18). w24.03 2 parr. 1; 3 parr. 4

Jehovaga espíritu santunta goycun cuyashgan cajta (Mat. 12:18). Chaymi tapucunanchi: “¿Cawaynëcho ricacämunchuraj Dios munashganno runa cashgäta?”. Tantiarinapaj, ¿cananchu más paciente canqui Jehovata manaraj reguishgayquipita? Cawayniquicho cuentata gocuptiqui espíritu santo yanapäshushgayquita ali cawanayquipaj, seguro caycay Jehová gamwan cushishga caycashganta. Jehová Wamranta cachamurgan ricaynincho ali caycajcunapa juchancunata perdunananpaj (1 Tim. 2:5, 6). Pero öraga Jesús wanushganman yäracurpis y bautizashgana caycarpis sasami canman creinapaj Jehová noganchiwan cushishga caycashganta. Chayno captenga shongunchi ima nimashganchita cäsupashwanchu, sino Jehová ima nishganman yäracushun. Payga nimanchi Jesús wanushganman yäracojcunaga alita ruraj runa cashganta y aunimanchi bendicimänanchipäpis (Sal. 5:12; Rom. 3:26). w24.03 30 parr. 15; 31 parr. 17