Ali ruraj angelcunanomi cashwan

1, 2. 1) ¿Imacunachotaj angelcuna mana noganchinochu caycan? 2) ¿Imacunataj angelcuna rurashganno ruranchi?

JEHOVAPA marcancho may naciunpita carpis juc familianomi payta aduranchi, y mana noganchilachu sinoga maychicaj angelcunapis noganchiwan Jehovata adurarcaycan (Dan. 7:9, 10). Noganchega manami angelcunanochu canchi. Paycunata Jehová runacunapita más unayna camashga (Job 38:4, 7). Jina más poderyoj caycan y manami noganchinochu juchayoj caycan. Paycunaga santumi y juchaynajmi carcaycan (Luc. 9:26).

² Paycunano igual mana captinchipis, angelcunawan noganchipis Jehová taytalanchinomi cuyacoj y ali shongu cayta puedinchi. Angelcunanomi jutiyoj canchi y imaycanopapis Jehovata sirviycanchi. Jina angelcunanomi noganchipis Jehovata adurayta munanchi (1 Ped. 1:12).

3. ¿Imataj yachacunchi ali angelcunapita?

³ Noganchipis angelcunanomi ali cajta rurayta puedinchi, chaymi cananga yachacushun angelcunano humilde canapaj, runa masinchicunata cuyanapaj, jina sasacunapa pasar aguantanapaj y congregaciunpis juchacunapita limpio caycänanpaj.

ANGELCUNAGA MANAMI ALI TUCUNCHU

4. 1) ¿Imacunata rurartaj angelcuna ali tucunchu? 2) ¿Imanirtaj angelcuna humilde capäcun? (Salmo 89:7).

⁴ Cäsucoj angelcunaga manami ali tucunchu. Paycunaga alapa poderyoj y yachaj caycarpis Jehovata imaypis cäsucärin (Sal. 103:20). Jehovapa voluntäninta rurarpis manami ali tucunchu, ‘runacunapita más poderyoj canchi’ nir yarpanchu. Noganchicuna jutincunapa mana reguiptinchipis paycunaga cushishga Jehovata sirvircaycan (Gén. 32:24, 29; 2 Rey. 19:35).a Paycuna Jehovalata adurananchita munan, manami munanchu paycunata adurananchipaj. Jehovata alapa respetar y cuyarmi humilde capäcun (leiriy Salmo 89:7).

5. ¿Imatataj juc ángel rurargan humilde cashpan? (Dibujutapis ricay).

⁵ Angelcuna humilde cashganta tantiarinapaj ricärishun Biblia wilacushganta. 96 caj watacho Jesús shamushganpita, juc ángel apóstol Juanta revelargan almiraypaj cajcunata, chay angelpa jutinta manami musyanchichu (Apoc. 1:1). Chayta ricar apóstol Juan almiracur angelpa naupancho gongurpacurgan adurananpaj. Jinan hora chay angelga cayno nergan: “¡Noqata ama adoramaytsu! Noqapis qamno y yärakuq mayikikunanölami Tayta Diospa sirviqnin kaykä. ¡Tayta Dioslata adorayqa!” (Apoc. 19:10). Angelga manami ali tucurganchu, chaymi payta alabananpaj manami munarganchu. Chaypa trucan apóstol Juanta nergan Jehovalata adurananpaj. Jina apóstol Juanpita más poderyoj y más watapana Jehovata sirviycaptinpis manami ali tucurganchu, chaymi cayno nergan: “Noqapis qamno [...] Tayta Diospa sirviqnin kaykä”. Apóstol Juan auquinna caycaptinpis angelga respetulawan y ali shimilapa corrigirgan. Cuentata gocurganchi apóstol Juan manchacushpan gongurpacushganta.

6. ¿Imatataj rurashwan angelcunano humilde cananchipaj?

⁶ ¿Imatataj rurashwan angelcunano humilde cananchipaj? Ima cargulata chasquiptinchipis humilde car manami ali tucushwanchu (1 Cor. 4:7). Carguyoj captinchi o achca watapana Jehovata sirviycarpis mana nishwanchu ‘noga waquincunapita masna musyä’ nir, chaypa trucan imalachopis Jehovata sirvirga wamracunano humilde cashwan (Luc. 9:48). Angelcuna rurashganno waquincunatapis yanapashun, chaynopa paycuna más valurashga sienticärenga.

7. ¿Imanotaj humilde cashwan pitapis corrigirga?

⁷ Cristiano masinchicunata o wamranchicunata corriginapäga o consejananchipäga humilde cashwan. Öraga pilatapis mana ali rurashganpita corriginanchi. Angelga apóstol Juanta ali shimilapa cuyapaylapa corrigirgan. Chaynolami pitapis anyapänanchipaj captenga manami pasaypa laquichishwanchu, chaypa trucanga cuyacuywan anyapashwan. Humilde carga pitapis Bibliawan consejashun, respetuwan y ali shimilapa (Col. 4:6).

ANGELCUNAGA RUNACUNATA CUYANMI

8. 1) ¿Imanotaj Lucas 15:10 texto musyachicun angelcuna runacunata cuyashganta? 2) ¿Imanotaj angelcuna predicaciuncho yanapämanchi? (Garancho caycaj).

⁸ Angelcunaga cuyamashpanchimi altanto caycan imacunapa pasaptinchi. Paycunaga cushicunmi juc ogracashga uyshano pipis arrepenticur Diosman cutiptin o juc runa Bibliapita yachacur Dios munashgannona cawacuptin (leiriy Lucas 15:10). Angelcunapis predicaciuncho yanapämanchi (Apoc. 14:6). Aumi, paycunaga ali shonguyoj runacunata tarinanchipaj pushamanchi. Chayno captinpis predicashganchi hora Jehová jucnopapis yanapämashwanmi y espíritu santunwanpis pushamanchimi (Hech. 16:6, 7). Imano captinpis segurumi caycänanchi Diospita yachachicuptinchi angelcunaga noganchiwanmi caycanga yanapämänanchipaj (“Mañacushganta Jehová contestarganmi” nej recuadruta ricay).b

9. ¿Imacunata rurartaj angelcunano runacunata cuyashwan?

⁹ ¿Imacunata rurartaj angelcunano runacunata cuyashwan? Pipis arrepenticur congregaciunman cutimushganta wiyarga angelcunanomi cushicushwan, ‘cushicömi congregaciuncho yapay caycashgayquita’ nir macalaycushwan (Luc. 15:4-7; 2 Cor. 2:6-8). Angelcunano cuyacoj captinchi lapan shongunchiwan calpachacushun predicanapaj (Ecl. 11:6). Angelcuna predicaciuncho yanapämashganchino noganchipis hermanunchicunata predicaciuncho yanaparcushwan. Capazchi mushoj publicadurta nishwan paywan predicaj yargunanchipaj, jina edayashga o gueshyaycaj hermanunchicunata yanapashwan predicananpaj.

10. Sara hermananchi imapa pasashganpita, ¿imataj yachacunchi?

¹⁰ Hermanunchicunawan predicaciunman yarguyta mana puedirga angelcunata yanapänapaj imalatapis ruranapaj cangapächi. Chaynomi rurargan India naciunpita Sarac hermananchi. Payga 20 watacunano precursorano sirviycaptin, fiyu gueshyata charashganraycu ni puriytapis puedirgannachu. Chaypa pasarga pasaypami laquicurgan ichanga waran waran Bibliata leirgan, y hermanucunapis payta yanapargan, chaymi yapay valurcharcurgan. Jucnopana predicar galaycurgan. Cartapa predicananpäga jamacuylatapis puedirganchu, chaymi telefunulapa predicaj. Chauraga unay watucushgan runacunata telefunupa gayacurgan, paycunashi reguishgan runacunata gayananpaj y numerunta gorgan, ‘capazchi paycuna Bibliapita yachacuyta munapäcunman’ nir. Walca quillalachoshi 70 runacunata Saraga Bibliapita yachachicuycargan, achca captinmi lapancunata yachachinanpaj tiempun aypargannachu. Chaymi waquin hermanucunata yanapänanpaj nergan. Waquin estudianticunaga reuniuncunaman aywaycanna. Angelcunaga alapachi cushicärin Saratano maychicaj hermanucunata predicananpaj yanapaycashganpita.

ANGELCUNAGA MANA UTICAYPA JEHOVATA SIRVIN

11. ¿Imacunapataj angelcuna pasapäcun, y imatataj yachacunchi chaypita?

¹¹ Angelcunaga mana yamacaypa Jehovata sirviycan. Unaypitana ricarcaycanmi mana alicuna pasaycashganta. Jina ricapäcurgan Satanaswan demoniuncuna Jehovapa contrancho churacärishganta (Gén. 3:1; 6:1, 2; Jud. 6). Bibliaga wilacun juc ali ángel poderyoj demoniuta ichipashganta (Dan. 10:13). Jina angelcunaga ricargan walca runacunala Jehovata sirvishganta. Chayno captinpis mana yamacaypa cushi cushila Jehovata sirvircaycan. Musyapäcunmi tiempo chayamungami Jehová lapan mana alicunata ilgächinanpaj.

12. ¿Imatataj rurashwan mana yamacaypa Jehovata sirvinapaj?

¹² ¿Imata rurartaj angelcunano mana yamacaypa Jehovata sirvishwan? Noganchipis mana alicuna pasashganta ricanchimi. Angelcuna musyashganno noganchipis musyanchimi ichiclachona Dios mana alicunata ushacächinanpaj cajta. Chaymi ali angelcunano “mana ajayaypa alikunalata rurashun” (Gál. 6:9). Jehovami yanapämäshun imaycacunata aguantanapaj (1 Cor. 10:13). Pacienciawan y cushishgala aguantananchipaj Jehová Diosninchipa santo espiritunta mañacushun (Gál. 5:22; Col. 1:11). Jehovata sirvishgayquiraycu chiquishuptiquega, ¿imatataj ruranquiman? Mana manchacuylapa lapan shonguyquiwan Jehovaman yäracuy, payga imaypis yanapäshunquimi y calpatapis goshunquipämi (Heb. 13:6).

ANGELCUNAGA CONGREGACIÓN LIMPIO CAYCÄNANPAJ YANAPAN

13. ¿Imacunata Jehová mandargan cay último tiempucho angelcunata rurananpaj? (Mateo 13:47-49).

¹³ Cay ushanan tiempucho angelcunata Jehová mandargan tucuy casta ali shonguyoj runacunata tarinapaj (leiriy Mateo 13:47-49). Waquincunaga Jehovapa testigunman ticrananpaj calpachacun, waquincuna ichanga mana. Jehovaga angelcunata mandashga “ali runakunapita jutsa ruraq runakunata” raquinanpaj, chaynopa congregaciuncuna juchacunapita limpio caycänanpaj. Pero pipis juchata rurar congregaciunpita witicuptin, arrepentir cutimuyta puedinmi, jina öraga congregaciuncho ima problemalapis canmanchi juchayoj runa cashganchiraycu. Chayno captinpis seguro caycashwan congregación limpio caycänanpaj angelcuna yanapacunanpaj cajta.

14, 15. ¿Imata rurartaj angelcunano yanapacushwan congregaciuncuna limpio caycänanpaj? (Fotucunatapis ricay).

¹⁴ ¿Imanotaj angelcunano congregación limpio caycänanpaj yanaparcushwan? Waran waran calpachacunanchimi mana ali amigucunawan mana juntacunanchipaj, ni mana alicunata mana rurananchipaj. Chaynopa Jehovawan ali amigo cashun y congregaciunpis limpio caycänanpaj yanapaycäshun (Sal. 101:3). Hermanunchicunata cuyarga, ¿imanotaj yanaparcushwan Jehovapita mana raquicäcunanpaj? Pipis jatun juchata rurashganta musyarga chay jucha rurajta nirishwan ancianucunata wilapänanpaj. Ichanga mana wilacuptenga quiquinchina ancianucunata wilapashwan ima juchatapis rurashganta. Chay lapanta ruranchi hermanunchicunata yanapayta munarmi Jehovapita mana raquicäcunanpaj (Sant. 5:14, 15).

¹⁵ Waquin cristianucuna jatun juchata rurashganraycu congregaciunpita jorgupäcun y paycunawan manami juntacanchinachu (1 Cor. 5:9-13).d Chaynopa congregaciunga juchacunapita limpio caycanga. Paycunawan manana juntacaptinchega yanapaycanchimi cuentata gocunanpaj Jehovaman cutiyta necesitashganta. Y paycuna cutimuptenga Jehovano y angelcunanomi alapa cushicushun (Luc. 15:7).

16. ¿Imacunatataj ruranquiman angelcunano Jehovata sirvinayquipaj?

¹⁶ Alapa cushicunchimi angelcunapita yachacuptinchi y paycunawan Jehovata junto sirvir. Paycunanomi calpachacushwan humilde canapaj, runacunata cuyanapaj, mana yamacaypa Jehovata sirvinapaj y congregaciunninchipis limpio caycänanpaj. Chaycunata rurarga angelcunawan juntula Jehovapa familiancho imaypis caycäshun.