Jehová cushicuyta gomanchi

1, 2. 1) Canan tiempo, ¿imanotaj waquin runacuna sienticärin? 2) ¿Imatataj canan yachacushun?

CANAN tiempo runacuna imaycacunata rurapäcun cushishgala caycänanpaj pero cushish caycaptinpis ratulapami caycan. Waquincunana cayno yarpapäcun: “manami imaypis cushishga cawashächu” nir. Y Jehovapa sirvejnincunapis chayno sienticärinman. Ushanan tiempucho cawashganchiraycu achca problemacunapa pasarga laquichimashwan y yarpachacushwanpis (2 Tim. 3:1).

² Canan yachacushun imacunataj laquichimashwan y imatataj rurashwan yapay cushish caycänanchipaj. Puntata yachacushun pitaj cushicuyta gomanchi.

PITAJ YANAPÄMASHWAN CUSHISH CANANCHIPAJ

3. ¿Imanirtaj cay pachacho imayca cajcunata Jehová camashga? (Fotucunatapis ricay).

³ Jehová cushicoj Dios cashganraycu cushishgaraj cananchipaj munaycan. Chaymi cay pachata, tucuy colorniyoj waytacunata, mishqui micuycunata y cuyaylapaj uywacunatapis camashga cushishgala cawacunanchipaj. Aumi, Jehová alapa cuyamanchi y cushishga cawacunanchita munaycan.

Malwa elefante: Image © Romi Gamit/Shutterstock; iti pingüinucuna: Vladimir Seliverstov/500px via Getty Images; mallwa lachucuna: Rita Kochmarjova/stock.adobe.com; ishcay delfincuna: georgeclerk/E+ via Getty Images

4. 1) Jehová runacunata nacashganta ricarpis, ¿imanirtaj Biblia nin cushishgala cawacoj Dios cashganta? 2) ¿Imano cawacunanchipajtaj Jehová yanapämanchi? (Salmo 16:11).

⁴ Jehová altantumi caycan imacunapita nacashganchita, y nacashganchita ricar laquicunmi, chayno captinpis Bibliaga nimanchi cushishgala cawacoj Diosmi cashganta (1 Tim. 1:11). ¿Imanirtaj Jehová cushishga caycan? Pay ichiclachona lapan nacachimashganchicunata chipyaypa ushacächenga. Chay junaj chayamunancama pacienciawanmi shuyaraycan, y noganchitapis yanapämanchi jaucala y cushishgala cawananchipaj (leiriy Salmo 16:11). Canan yachacushun imanotaj Jehová Jesusta yanapargan cushishgala caycänanpaj.

5, 6. ¿Imanirtaj Jesús cushishgala cawacoj caycan?

⁵ Pï runacunapitapis Jesusmi más cushishgala cawacojmi. Payga Taytan cashgannomi caycan, chaymi cushish caycan (Col. 1:15; 1 Tim. 6:15). Y cielucho achca tiempupa Jehovawan cawarga cushish cacuyta yachacurgan.

⁶ Jesús cushishga sienticun papänin munashganta rurar (Prov. 8:30, 31; Juan 8:29). Y papänin ali nawilanwan rican cäsucoj cashganraycu (Mat. 3:17).

7. ¿Imatataj rurananchi cushish caycänanchipaj?

⁷ Jehovata masraj reguiptinchi noganchipis más cushishga caycäshun. Aumi, Jehovapita masraj yachacunanchipaj calpachacuptinchi más ali cristianumi cashun, chaynopa payno cushishga cawacushun. Jina pay munashganno cawaptinchi y cuyamashganchita seguro caycaptinchi cushishgalami cawashunpis (Sal. 33:12).a Capazchi mana alicunapa pasar mana facilchu canman cushishga caycänanchipaj. Chaypa pasarga manami yarpashwanchu “Jehová manana cuyamannachu” nir. Jehová musyanmi juchayoj cashganchiraycu nacashganchita y laquicushganchita (Sal. 103:14). Canan yachacushun imacuna laquichimashwan y imatataj rurananchi yapay cushish cananchipaj.

IMAPITA LAQUICUSHWAN Y IMATA RURANANCHI YAPAY CUSHICUNANCHIPAJ

8. ¿Imanotaj sienticushwan imayca problemacunapa pasar?

⁸ Imayca problemacunapa pasar laquicushwanmi. Capazchi chiquimashganchiraycu, desgraciapa pasashganchiraycu, guellay pishiptin, gueshyaraycu o edayashgana cashganchiraycu laquishga sienticunchi, y chaycunata alchachiyta mana puedirga más laquicunchi. Bibliapis nin “lakishqa kaptinmi itsanqa qaqlanpis jukaqyashqa kaykan” (Prov. 15:13). Babis jutiyoj anciano chayno sienticurgan. Chuscu watacunalacho paypa wauguin y taytancunapis wanucurgan, paycuna manaraj wanur imaycacunata rurananpaj cargan. Chay pasashganpita cayno nin: “Japalä y mana pipis yanapamashgantano sienticoj cä. Taytäcunawan wauguëwanpis tiemputa pasanäpaj munargä, ichanga manami puedirgächu, chaymi laquishga sienticoj cä”. Yachacushganchino imaycacunapa pasar noganchitapis nacachimashwanmi.

9. ¿Imata rurananchi yapay cushishga cananchipaj? (Jeremías 29:4-7, 10).

⁹ ¿Imata rurashwan yapay cushish cawananchipaj? Imatapis alchayta mana puedirga manami chaylaman yarparashwanchu, sinoga charashganchicunapita agradecido caycäshun. Cay mundo runacuna nipäcun lapan ali caycaptinrämi cushish caycashwan, ichanga chayga manami rasunchu. Jehová Babiloniacho caycaj judiucunata nergan cawaynin mana fácil captinpis cushish cawayta puedishganta (leiriy Jeremías 29:4-7, 10). ¿Caypita imata yachacunchi? Cawayninchicho imacunapa pasarpis ali cajcunaman yarpar agradecido caycänanchi. Ama gongashunchu, Jehová manami imaypis jaguimäshunchu y listumi caycan yanapämänanchipaj (Sal. 63:7; 146:5). Efi jutiyoj hermananchi accidentiraycu manami puriyta puedinnachu, pay cayno nin: “Alapa agradecicö Jehovata, familiäta y cristiano masëcunatapis, paycuna yanapämargan y shacyächimargan. Agradecida caycar calpachacömi cushishgala caycänäpaj”.

10. Problemacunapa pasarpis, ¿cushishga caycashwanchuraj?

¹⁰ Noganchita o familianchicunata imayca problemacuna nacachimaptinchipis cushishgala cawayta puedishunmi (Sal. 126:5).b María jutiyoj precursora cayno wilacun: “Imayca problemacunapa pasaptinchi Jehovapa aunicuycunaman yarpänanchi, chayga yanapämanchi cushishga cawananchipaj. Chay hora wagarpis y imano sienticushganchita wilapaptinchi Jehová yanapämäshun cushish cananchipaj”. Canan tiempo cawayninchi mana fácil captinpis ichiclachona Jehová nacachimashganchicunata chipyaypa ushacächenga.

11. ¿Imata yachacunchi apóstol Pablo pasashganpita?

¹¹ Imayca problemacunapa pasar capaz cayno yarpar galaycushwan: ‘Jehová manana cuyamannachu, chaymi nacaycä’ nir. Chayno mana yarpänapaj, ¿imatataj rurashwan? Naupa tiempo Jehovapa sirvejnincunaman yarpäshun, paycunapis noganchino imayca problemacunapa pasargan. Mä yarpäshun apóstol Pablo pasashganman. Apóstol Pabluta Jesús acrargan “juk lädu nación runakunata, reykunata y Israel mayinkunatapis” ali wilacuyninta wilacunanpaj (Hech. 9:15). Chayno captinpis Pablo imayca problemacunapa pasargan (2 Cor. 11:23-27). Jehová Pabluta cuyashganta manami imaypis jaguirganchu, sinoga yanaparganmi imayca problemancunata aguantananpaj (Rom. 5:3-5). Gampis imayca problemacunapa pasarpis mana jaguiypa Jehovata sirviycanqui, chaymi seguro caycay Jehová cuyashushgayquita.

12. Munashganchino Jehovata sirvishganchicho mana rurarga, ¿imanotaj sienticushwan?

¹² Munashganchino Jehovata sirvishganchicho ruranapaj mana puedirga laquicushwanmi (Prov. 13:12). Jehovata cuyar y paywan agradecido caycar imalachopis sirviyta munanchi. Chayno captinpis Jehovata sirvinapaj puedishganchilata rurashun, puedishganchipita masta rurayta munaptinchi laquicushwanchi (Prov. 17:22). Holly jutiyoj precursora cayno nin: “Diospita Yachachicojcunapaj Escuelaman aywayta munargä, juc naciuncho runacunata Bibliapita yachachiyta munargä y Estados Unidos Betel sharcachishgancho yanapacuyta munargä. Pero chaycunata rurayta mana puedirga laquishga sienticurgä”. Waquin hermanucunapis payno sienticärin.

13. Munashganchino Jehovata sirvinanchipaj mana puedirga, ¿imamantaj yarpashwan?

¹³ ¿Imata rurashwan yapay cushish cawananchipaj? Imaypis gongashwanchu mana puedishganchita ruranapaj Jehová manami mañamanchichu. Jehová manami ricanchu ali carguyoj cashganchita, sinoga paypäga más valuryojmi caycan ali shonguyoj y cuyacoj cashganchi. Pay munan humilde, cäsucoj cananchipaj (Miq. 6:8; 1 Cor. 4:2). Chaymi munashganchino Jehovata sirviyta mana puedirga pay cushicun yarpayninchiwan, rurayninchiwan, lapan shongunchiwanpis sirviptinchi.c Chauraga yarpachacuy imacunata rurayta puedishgayquita: Congregaciunniquicho capazchi mozu jipashcunata yanapanquiman Jehovata masraj sirvinanpaj, edayashga hermanunchicunata shacyächinquiman, o pilatapis watucur, telefunupa gayacur o juc mensajitapis escribir shacyächinquiman. Chaycunata ruraptiquega Jehová cushicur bendicishunquimi, jina paraisuchona caycar yarpashgayquino Jehovata masmi sirvinqui. Holly hermananchipis chayno yarpan, paymi nin: “Laquishga caycashgä hora, paraisucho imaycamapis cawacunäpaj yarpachacö. Paraisuchona caycar imano Jehovata sirvinäpaj yarpä y segurami caycä lapan munashgäta ruranäpaj Jehová yanapämänanpaj cajta”.

14. ¿Imamantaj yarpaptinchi laquichimashwan?

¹⁴ Munashgalanchita ruranapaj yarparäptinchi laquicushwanmi. Waquin runacuna internetcho churapäcun viajashganpita, rantipäcamoj aywashganpitapis, chaynopa cushish cawacushganta waquincuna yarpänanpaj. Jehová cushishga cawananchipaj camamashcanchi, pero cushish cananchipaj imacunata ruraptinchipis chay ruraycunalaman yarparar laquishgami sienticushun. Chaypita parlar Eva jutiyoj precursora cayno nin: “Munashgalayquita ruranayquipaj yarpaptiqui manami contentuchu caycanqui, sinoga yargaj runano imaypis masta munanqui”.

15. ¿Imata yachacunchi Salomón pasashganpita?

¹⁵ Rey Salomón pasashganman yarpäshun. Payga quiquin munashgalanta rurayta munargan cushish cawananpaj, chaymi ali micuycunalata micoj, musicata wiyaj y imaycacunata rantej. Ichanga chaycunata rurarpis laquishga sienticurgan, chaymi cayno nergan: “Imaykata runa rikaptinpis rikananpaq kaqkuna masraqmi kaykan. Atskata mayaptinpis mayananpaq kaqkuna masraqmi kaykan” (Ecl. 1:8; 2:1-11). Waquin runacuna achca guellay-yoj car yarpapäcun cushish caycänanpaj, pero manami rasunpa cushicuyta tarinchu.

16. Waquincunata yanapaptinchi, ¿imanirtaj cushicunchi? (Fotucunatapis ricay).

¹⁶ ¿Imata rurashwan yapay cushish cawananchipaj? Jesús yachachimashcanchi “imatapis chaskir kushikushqantsipitapis mas kushikuypaqmi kaykan pitapis yanapashqantsi” (Hech. 20:35). Alekos jutiyoj anciano cayno wilacun: “Waquincunata yanapänäpaj calpachacuptë paycunaman yarpachacö, manami quiquilämanchu. Chayta rurar alapa cushichiman”. Gampis waquincunata yanapayta puedinquimi imayca problemacunapa pasaptin, y laquishga caycaptin shacyächinquiman. Problemancunata ilgächiyta mana puedirpis wiyayta y imano sienticushganta tantiayta puedinquimi, jina ninquimanpis ‘Jehová cuyashunqui, payta wilapay imano sienticushgayquita’ nir (Sal. 55:22; 68:19). Laquish caycajta yarpachinquimanpis Jehová payta mana jaguishganta (Sal. 37:28; Is. 59:1). Y wasiquiman shamunanpaj o pasiaj aywananpaj invitanquiman, o paywan predicanayquipaj ninquiman, Jehovapita parlar cushicungapaj. Quiquilayquiman mana yarparga waquincunata yanapaptiqui paycunapäga Jehová yanapashgannomi canga, y gampis alapa cushicunquimi (Prov. 11:25).

17. ¿Imata rurananchi cushish cawananchipaj? (Salmo 43:4).

¹⁷ Jehovapita más yachacuptinchi y payta cäsucuptinchi más cushishga cawacushun. Chaymi Bibliapis nin: “Tayta Diosnilä, qammi shumaq kushikuyta qomanki” (leiriy Salmo 43:4). Chauraga imayca problemacunapa pasarpis yarpachacurla ama cacushunchu, Taytalanchi Jehovaman guelicuptinchega pay yanapämäshun imaycamapis cushish cawananchipaj (Sal. 144:15).