Martes 30 setiembripita
Diosga manami cachaycushunquipächu. Chaymi pruebata aguantar juchaman mana ishquinayquipaj imaypis yanapäshunqui (1 Cor. 10:13).
Diospa voluntäninta ruranapaj aunishganchiman yarpachacurga calpatami tarishun ima juchamanpis mana tuninapaj. Tantiarinapaj, ¿alichuraj caycanman casado cajcunawan asipaylapa miluycachir parlapaptinchi? ¡Manami! Jehovata sirvinapaj aunishganchicho, payta nishcanchi chaycunata mana ruranapaj. Chauraga puntalapitana shongunchicho ima mana ali munaycunapis mana captenga, imapis mana cangachu juchaman chayachimänanchipaj. Fiyu runacuna mana alicunata rurashgancunapita witicunanchi (Prov. 4:14, 15). Jesusga imaypis decidido caycargan Taytanta cushichinanpaj y noganchipis payno rurayta munanchi. Chaymi imaypis decidido caycänanchi Dios chiquishgancunata mana ruranapaj (Mat. 4:10; Juan 8:29). Tucuy problemacunapa y tentaciuncunapa pasarga, imaypis decidido caycashwan Jesusta gatiränapaj. Diosninchi Jehová aunimanchi yanapämänanchipaj. w24.03 9, 10 parr. 8-10
Miércoles 1 octubripita
Cäsukuq kanäpaq tantiyaykatsilämay (Sal. 51:12).
¿Imaylapis sasachu cargan cäsucunayquipaj? Öraga Davidpaj sasa captin Jehovapa yanapacuynintaraj ashirgan. Pay Jehovata cuyaptinpis öraga facilchu cashga cäsucoj cananpaj, y noganchitapis chayno pasamashwanchi. ¿Imanir? Juchasapa runacuna canchi. Jina Satanás imaypis imaycata ruraycan Jehovapa contrancho churacänapaj (2 Cor. 11:3). Y canan wichan runacunaga Jehovata cäsucärinchu; paycunaga “Tayta Diosta mana cäsukur” cawapäcun (Efes. 2:2). Chaymi juchasapa cashganchiraycu y Satanaspa maquincho caycaj mana cäsucoj runacuna imaycata ruraptin, imaycanopa calpachacunanchirämi Jehovata y autoridäyoj runacunatapis cäsucunapaj. w23.10 6 parr. 1
Jueves 2 octubripita
Qamqa fiesta ushananchöraq mas alinnin kaq vïnuta sirviykätsinki (Juan 2:10).
Jesús cay milagruta rurashganpita yachacunchi ñanpu shongu o humilde canapaj. Payga manami ali tucurganchu yacuta vinuman ticrachishganpita. Aumi, payga manami imaypis ali tucojchu rurashganpita. Chaypa trucan humilde cashpanmi Taytanta imaypis alabargan (Juan 5:19, 30; 8:28). Noganchipis Jesusno captinchega humilde cashun y rurashganchicunapita manami ali tucushunchu. Waquincuna alabamänanchipaj ama ashishwanchu, sinoga Diosninchi Jehovata alabananchipaj ashishwan (Jer. 9:23, 24). Calpachacushun imaypis Jehovalata alabanapaj. Pay mana yanapämaptinchega imatapis rurayta puedinchichu (1 Cor. 1:26-31). Pipis humilde cashpan waquincunata yanapashganpita, manami ashinchu runacuna alabananta. Chaypa trucan masga yarpan Jehová lapanta ricashganta y rurashgancunatapis valurashganta (Mateo 6:2-4 textuwan tincuchiy; Heb. 13:16). Jehovaga alapami cushicun calpachacuptinchi Jesusno humilde canapaj (1 Ped. 5:6). w23.04 4 parr. 9; 5 parr. 11, 12