11 CAJ YACHACUY

Shongupitami parlashwan

Romanos 12:11

ICHIC YACHACUY: Shongupitami parlay wiyaycajcunata shacyächinayquipaj.

Shongupita parlanayquipaj camacächiy. Preparacushgayqui horacho yarpachacuy yachachicunayquipaj cajga alapa ali cashganta. Nircur cutin cutin yachacuy seguro parlanayquipaj.
Pïcunata parlanayquipaj cajman yarpay. Yarpachacuy ima nishgayqui o leishgayquipis waquincunata imano yanapänanpaj cajta. Nircurpis pensanayqui imano yachachicunayquipaj wiyaycajcuna ali tantiananpaj y yachacushgancunata mana gongananpaj.
Nishgayquega shongupitami canman. Shongupita parlarga, gajlayquicho o maquiquitapis cuyuchishgayquicho ricacanga laquishgano o cushicuypaj parlashgayquita y pïcunapa shongunmanpis chayayta munashgayquita.

Cada rato maquiquita caypa wacpa cuyuchiptiquega wiyaycajcuna maquiquilata más ricaraycanga y manami cäsupangachu yachachicushgayquita. Chaymi imapäpis parlaptiqui y maquiquita cuyucherga chayta tantiachinayquipaj canman. Shacya shacyala o cushishga yachachinayqui más importante caj yachachicuycunata o wiyaycajcuna imacunata rurananpaj. Pero lapanta cushishgala o fuertipa parlaptiquega, wiyaycajcuna yamacäcunman.