Septiembre

Ri Dios uyaʼom pa uqʼabʼ ri Jesús che kusachisaj uwach ri kʼaxkʼolil. Kʼo kʼax che kojkun ta oj che resaxik. Are kʼu, rukʼ ri milagros che xubʼan ri Jesús are chiʼ xpe cho ri uwach Ulew xukʼutu che kkun che resaxik uwach ronojel kʼaxkʼolil. Junam rukʼ ri makaj, ri kamikal y ri yabʼilal (Mat. 9:1-6; Rom. 5:12, 18, 19). Rukʼ ri milagros che xubʼano xukʼutu che kkunik «keʼukunaj» ri yawabʼibʼ y kkunik keʼuwalajisaj ri kaminaqibʼ (Mat. 4:23; Juan 11:43, 44). Xuqujeʼ kkunik ktaqan puwiʼ ri kaqiqʼ jabʼ y pa kiwiʼ ri itzel taq uxlabʼal (Mar. 4:37-39; Luc. 8:2). ¿La mat qastzij che kukubʼsaj qakʼuʼx rumal che ri Jehová xuya che ri uKʼojol che kubʼan ronojel wariʼ? Qas qetaʼm che ri tewchibʼal che kukʼam lo ri uQʼatbʼal tzij ri Dios qas kbʼantaj na. Rumal che ri milagros che xubʼan ri Jesús kukʼut ri kubʼan na pa ronojel uwach Ulew are chiʼ kux qʼatal tzij. w23.04 3 párrs. 5-7

We pa ri acongregación e kʼo kʼi qachalal, weneʼ katkun taj kabʼan acomentario. Weneʼ kachomaj che kayak ta chi ri aqʼabʼ. Are kʼu kkʼistaj ta akʼuʼx. Rajawaxik che katijoj awibʼ rukʼ ronojel ri kʼutunem, rech je wariʼ we man xyaʼ jun acometario katkunik kayak chi jumul ri aqʼabʼ. Are chiʼ tajin katijoj awibʼ rukʼ ri wuj Ri Chajinel chachomaj jas ubʼanik ri párrafos rukʼ ri ubʼiʼ ri kʼutunem. Jun chi jastaq che katkunik kabʼano are katijoj awibʼ chrij ri jastaq che kʼax kichʼobʼik. Rumal che kʼax kichʼobʼik, e kʼi qachalal kkiyak ta kiqʼabʼ. Are kʼu ¿jas katkunik kabʼano we kyaʼ ta acomentarios? Katkunik kattzijon rukʼ ri qachalal che kkʼamow bʼe jas párrafo kawaj kaya acomentario. w23.04 21, 22 párrs. 9, 10

Ri José amaqʼel xunimaj ri utaqanik ri Jehová y wariʼ xtobʼanik rech xux jun utzalaj achajil. Oxibʼ mul ri Jehová xubʼij che ri rajawaxik kubʼano rech kuchajij ri ufamilia, y aninaq xubʼano (Mat. 1:20; 2:13-15, 19-21). Rumal che amaqʼel xunimaj ri Jehová, xkunik xuchajij ri María. Rumal laʼ, xloqʼoqʼex rumal ri María y nim xil wi. Achajilaxelabʼ kixkunik kibʼan iwe junam rukʼ ri José. Chitzukuj pixabʼ pa ri Biblia che kixutoʼ che uchajixik ri ifamilia. We kinimaj ri kubʼij ri Biblia kikʼutu che nim kiwil wi ri iwixoqil y wariʼ kubʼano che kʼo loqʼoqʼenik chixoʼl. Jun qachalal che kel pa Vanuatu che más che 20 junabʼ chik kʼulanik kubʼij: «Nim kwil wi ri wachajil are chiʼ kwilo che kutzukuj ri utobʼanik ri Jehová y kunimaj. Y kinkubʼsaj más nukʼuʼx chrij». w23.05 21 párr. 5

Rajawaxik che ri judíos e «tastal [...] che upatanixik ri Ajawaxel» (Deut. 7:6). ¿La kraj kubʼij che ri judíos e tastalik? Je taj. Xaneʼ rajawaxik xkikʼex jujun jastaq pa ri kikʼaslemal rech xeqaj chuwach ri Jehová. E kʼi judíos kʼateʼ xekʼojiʼ pa Babilonia, rumal laʼ kkibʼan ke jas kkibʼan e areʼ. Y are chiʼ xopan ri Nehemías xrilo che ri kalkʼwal ri e judíos riʼ ketaʼm taj kechʼaw pa hebreo (Deut. 6:6, 7; Neh. 13:23, 24). Rumal laʼ, ¿jas kkibʼan che uloqʼoqʼexik o retaʼmaxik uwach ri Dios we ketaʼm ta ri chʼabʼal ri tzʼibʼam wi ri uTzij? (Esd. 10:3, 44). Rajawaxik kʼi kkikʼex ri e judíos riʼ pa ri kikʼaslemal, are kʼu xaq xiw kekunik kkibʼan wariʼ we kekʼojiʼ kan pa Israel rumal che chilaʼ tajin kqʼijilax wi ri Jehová (Neh. 8:8, 9). w23.05 15 párrs. 6, 7

Paneʼ kqaj kqabʼan jun qameta, are kʼu weneʼ xaq kʼateʼ kqakʼulmaj jun kʼax che kubʼano che kʼo ta chi qatiempo che ubʼanik (Ecl. 9:11). Xuqujeʼ e kʼo chi nikʼaj kʼax che kresaj qachuqʼabʼ (Prov. 24:10). Y rumal che xa oj ajmakibʼ, weneʼ kqabʼan jun jastaq che utz ta kel chqawach rumal laʼ kqabʼan ta chi ri qameta (Rom. 7:23). O weneʼ rumal che oj kosinaq (Mat. 26:43). ¿Jas kojtoʼwik rech kqaya ta kan ubʼanik jun qameta? Kaya ta bʼe che ri kʼax katuqʼatej che ubʼanik ri ameta. Ri Biblia kubʼij che weneʼ jujun taq mul kojqʼax pa kʼax. Are kʼu xuqujeʼ ubʼim chqe che kojkunik kqabʼan ri qameta rukʼ ri utobʼanik ri Jehová. Rumal laʼ, we kqaya ta kan ubʼanik ri qameta paneʼ kqariq kʼax, kqakʼutu che kqaloqʼoqʼej ri Jehová. Chatchoman chrij ri kikotemal che kunaʼ ri Jehová are chiʼ kakoj achuqʼabʼ che ubʼanik ri ameta. w23.05 30 párrs. 14, 15

We kabʼan ri precursorado, katkunik kawetaʼmaj chkij jalajoj qachalal y utz kabʼan che ukojik ri pwaq (Filip. 4:11-13). Chamajij ri precursorado auxiliar. Rumal che wariʼ katutoʼo rech kapatanij ri Jehová pa tiempo completo. Jun kʼutbʼal, weneʼ katpatanin che siervo de construcción o betelita. Konojel ri qachalal alabʼom rajawaxik kkikoj kichuqʼabʼ rech keʼux kʼamal taq bʼe pa taq ri congregación. Ri Biblia kubʼij che ri kraj kyaʼ jun eqeleʼn che keʼupatanij ri qachalal y jun «utzalaj chak riʼ karaj» (1 Tim. 3:1). Rech keʼux kʼamal bʼe, nabʼe rajawaxik kkibʼan tobʼanelabʼ. Ri e tobʼanelabʼ rajawaxik kkitoʼ ri e kʼamal taq bʼe pa jalajoj chak. Ri e kʼamal taq bʼe y ri e tobʼanelabʼ kkipatanij ri e qachalal rukʼ kikotemal y kkitzijoj ri utzij ri Dios. w23.12 28 párrs. 14-16

Ri qʼatal tzij Josías kʼa nitzʼ na are chiʼ xumaj retaʼmaxik chrij ri Jehová. Xraj xretaʼmaj uwach y xniman che, are kʼu xuriq jujun taq kʼax rumal che kʼa nitzʼ na are chiʼ xux qʼatal tzij. Pa ri tiempo riʼ ri winaq are kekiqʼijilaj ri dioses, rumal laʼ ri Josías xukoj uchuqʼabʼ rech ri winaq kekiqʼijilaj ta chi ri dioses. Rumal laʼ ri Josías xusachisaj kiwach ri dioses y wariʼ xubʼano are chiʼ majaʼ 20 ujunabʼ (2 Crón. 34:1, 2). Paneʼ kʼa majaʼ ajunabʼ, katkunik kawesaj uwach ri Josías. ¿Jas kabʼan che ubʼanik? Kawetaʼmaj chrij ri Jehová y chrij ri jeʼlalaj taq ubʼantajik. Wariʼ kubʼano che kawaj kajach ri akʼaslemal che. ¿Jas kariq riʼ we kajach ri akʼaslemal che ri Jehová? Ri a Luke che kʼateʼ 14 ujunabʼ are chiʼ xubʼan uqasanjaʼ kubʼij wariʼ: «Kimik kinkoj nuchuqʼabʼ rech are nabʼe kinpatanij ri Jehová y rech kkikot wumal» (Mar. 12:30). Kariq kʼi tewchibʼal riʼ we kabʼan awe. w23.09 11 párrs. 12, 13

Weneʼ kʼateʼ jun junabʼ kʼo ri congregación re Tesalónica are chiʼ ri Pablo xutzʼibʼaj bʼi ri carta chke. Rumal laʼ, weneʼ ri e kʼamal taq bʼe kʼo ta más ketaʼmabʼal y kʼo kesach wi, are kʼu rajawaxik kenimaxik. Are chiʼ más knaqajin ri nimalaj kʼaxkʼolil, más rajawaxik riʼ kqanimaj ri kkibʼij ri e kʼamal taq bʼe, rumal che weneʼ kkun ta chi ri central mundial y ri sucursal che ukʼamik qabʼe. Rumal laʼ, kimik rajawaxik che nim keqil wi ri e kʼamal taq bʼe y are ta kqil ri kesach wi. Chnaʼtaj chqe che are ri Jehová kojowinaq ri Jesús rech kukʼam kibʼe ri e sukʼalaj taq achijabʼ riʼ. Junam rukʼ jun tobʼal jolomaj sibʼalaj nim ktobʼan wi che jun ajchʼoj, ri eyebʼal kuchajij ri qachomanik. Kqachʼobʼo che ronojel ri jastaq che kutzujuj wajun uwach Ulew riʼ kʼo ta upatan (Filip. 3:8). Ri tewchibʼal che kuya na ri Dios chqe kukubʼsaj qakʼuʼx. w23.06 11, 12 párrs. 11, 12

Konojel ri kesikʼix rumal ri ixoq «ri man kʼo ta unoʼj» rajawaxik kkichomaj we kkikʼamo o kkixutuj. (Prov. 9:17). Kojkunik kqaxutuj ri inmoralidad sexual, rumal che ri wuj re Proverbios kubʼij che ri ixoq «ri man kʼo ta unoʼj» kubʼij wariʼ: «Ri elaqʼam jaʼ are sibʼalaj kiʼ na». ¿Jas kraj kubʼij «ri elaqʼam jaʼ»? Ri Biblia kubʼij che ri relaciones sexuales chkixoʼl ri e kʼulanik are jun jaʼ kjororik (Prov. 5:15-18). Xaq xiw ri e kʼulan chuwach qʼatbʼal tzij kekunik kkibʼan ri relaciones sexuales. Are kʼu «ri elaqʼam jaʼ» kjunamataj ta rukʼ ri jaʼ che kjororik. Are waʼ ri kraj kubʼij ri kkibʼan ri inmoralidad sexual, rumal che xa kkowaj kibʼ kkibʼano junam rukʼ jun elaqʼom. «Ri elaqʼam jaʼ» kiʼ chkiwach ri winaq rumal che utz kkinaʼ ubʼanik, are kʼu kʼa rumal che tajin kril ri Jehová (1 Cor. 6:9, 10). w23.06 22 párrs. 7-9

¿Y we kawilo che pa ri achʼawem kakʼex ta ri kabʼij che ri Jehová, o qas ta chi katkikotik are chiʼ katzijoj ri utzij ri Dios? Machomaj che nim ta chi katril wi ri Jehová. Rumal che oj ajmakibʼ qonojel jujun taq mul weneʼ kqanaʼo che qas ta chi kojkikotik. Chatchoman chrij ri ukʼutbʼal ri Pablo. Paneʼ ri areʼ xukoj uchuqʼabʼ che resaxik uwach ri Jesús, are kʼu jujun taq mul xunaʼo che kkun ta che ubʼanik ri kqaj chuwach ri Dios. Pa nikʼaj chi tzij ri Pablo xukoj uchuqʼabʼ che ubʼanik ri uchak che ri Dios paneʼ jujun taq mul kʼo ta uchuqʼabʼ. Xa junam rukʼ, kaya taj che ri kanaʼo kubʼan chawe che kaya kan upatanexik ri Dios. Xaneʼ chakojoʼ achuqʼabʼ che ubʼanik ri kqaj chuwach ri Dios paneʼ kanaʼo che katkun ta che ubʼanik. Are chiʼ kqʼax ri tiempo wariʼ ktobʼan chawe pa ri akʼaslemal (1 Cor. 9:16). w24.03 11, 12 párrs. 12, 13

Utz kqabʼan che kikʼulaxik y keqachilaj ri e qachalal, ri e qachiʼl, jeriʼ kkʼiy más ri loqʼoqʼebʼal chqaxoʼl (2 Cor. 6:11-13). Pa taq ri congregaciones e kʼo qachalal che jalajoj ri kibʼantajik rumal ri xbʼan che kikʼiyisaxik. Are kʼu, ¿jas kqabʼano rech más kqaloqʼoqʼej qibʼ? Rajawaxik are kqil ri utz taq kibʼantajik. Rumal laʼ, ¿jas kqabʼan che ukʼutik che keqaj ri qachalal? Are che kqil ri utz taq kibʼantajik junam rukʼ ri Jehová. Are chiʼ kumaj ri nimalaj kʼaxkʼolil rajawaxik kqakʼut loqʼoqʼebʼal chke ri qachalal. ¿Jas kubʼan ri Jehová che qatoʼik pa ri nimalaj kʼaxkʼolil? Chqilampeʼ ri xubʼij ri Jehová che ri utinamit ojer rech xekʼasiʼ kanoq are chiʼ xbʼan kʼax che ri Babilonia. Ri Jehová xubʼij wariʼ che ri utinamit: «Jat, nutinamit, chatok chupam ri awachoch chatzʼapij kʼu ri okibʼal are taq at okinaq chi bʼik. Chakʼuʼ na jubʼiqʼ awibʼ kʼa kokʼow na ri royowal ri Ajawaxel» (Is. 26:20). Weneʼ je kqabʼan oj are chiʼ kumajij ri nimalaj kʼaxkʼolil. w23.07 6, 7 párrs. 14-16

Chqakʼutuʼ utz chomanik are chiʼ kkʼextaj ri qakʼaslemal. Chojchoman chrij wariʼ: «¿La kkibʼij ri nikʼaj chik che utz kinchomanik, nim kwil ri kkichomaj ri nikʼaj chik y are ta kbʼan ri kwaj in? ¿La kentatabʼej ri nikʼaj chik?». Are chiʼ utz kojchomanik más kojjunamataj rukʼ ri Jehová y ri Jesús. Are chiʼ kʼo kkʼextaj pa ri qakʼaslemal, rajawaxik kkʼojiʼ utz qachomanik. Rumal che weneʼ xaq kʼateʼ kojyawajik, kqariq kʼax che uriqik ri qarajil o kqariq kʼax rumal ri política (Ecl. 9:11). Xuqujeʼ are chiʼ kʼo kkʼextaj pa ri utinamit ri Jehová kqʼalajinik we kʼo jun utz qachomanik. We kajibʼ jastaq riʼ kojutoʼ are chiʼ kʼo kkʼextajik: 1) chqachʼobʼoʼ jasche kqariq kʼax, 2) chojchoman chrij ri petinaq, 3) chkʼol jun utz qachomanik y 4) cheqatoʼ ri nikʼaj chik. w23.07 21, 22 párrs. 7, 8

Are chiʼ ri Daniel kʼa ala na ri babilonios naj xkikʼam wi bʼik, are kʼu sibʼalaj xkimayo are chiʼ xkilo. Y are más xkil ri uwachbʼal, jun ala che «utz [k]kaʼyik, ri man kʼo ta [u]yabʼ» che kpe pa jun familia che nim ubʼanik (1 Sam. 16:7). Rumal laʼ, ri babilonios xkikʼut kʼi jastaq chuwach rech kux jun junam kukʼ (Dan. 1:3, 4, 6). Ri Daniel sibʼalaj xloqʼoqʼex rumal ri Jehová rumal ri utz taq ubʼantajik. Y qetaʼm che ri Jehová qas xuloqʼoqʼej ri Daniel, rumal che are chiʼ kʼateʼ 20 ujunabʼ xuqujeʼ xchʼaw chrij are chiʼ xtzijon chkij ri Noé y ri Job, achijabʼ che xkipatanij ri Jehová rukʼ sukʼilal pa kʼi taq junabʼ (Gén. 5:32; 6:9, 10; Job 42:16, 17; Ezeq. 14:14). Y ri Jehová xuya ta kan uloqʼoqʼexik ri Daniel, che kʼi junabʼ xkʼasiʼk (Dan. 10:11, 19). w23.08 2 párrs. 1, 2

Are chiʼ kawaj kaloqʼ jun awachoch qastzij riʼ che kanikʼoj ronojel ri ja rech kawilo we kaloqʼo. Are je kqabʼano are chiʼ kqanikʼoj ri Biblia. We xaq aninaq kqasikʼij kʼo ta kqetaʼmaj riʼ, xaneʼ rajawaxik kojtijox «chi na jumul chke ri nabʼe taq taqanik re ri chaplebʼal re ri utzij ri Dios» (Heb. 5:12). Junam rukʼ ri kqabʼan che ri ja: utz che je kqabʼan rukʼ ri Biblia, kqanikʼoj rech qas kqetaʼmaj ri kubʼij. Rech qas kqetaʼmaj ri kubʼij ri Biblia, utz che kqilo jas kejunamataj wi jujun versículos kukʼ ri nikʼaj chik. Xaq xiw ta rajawaxik kojkojon chrij ri kqasikʼij, xaneʼ rajawaxik kqetaʼmaj jasche qas kqakojo. Rech kqetaʼmaj chrij ri kubʼij ri Biblia, rajawaxik che kqanikʼoj ri más kʼax uchʼobʼik. Ri apóstol Pablo xubʼij chke ri cristianos che kkikoj kichuqʼabʼ che unikʼoxik ri Biblia rech kekun «che uchʼobʼik ri sibʼalaj nim uwach, nim urabʼik, naj uqajbʼem xuqujeʼ naj elinaq chikaj» chrij ri qastzij. Rukʼ wariʼ ko e «tikil» pa ri kikojonik (Efes. 3:14-19). Rajawaxik che je kqabʼano. w23.10 18 párrs. 1-3

Ri Biblia kchʼaw chkij winaq che xkikʼut paciencia. Utz we kanikʼoj ri kikʼaslemal ri winaq riʼ. Ri David kʼa ala na are chiʼ xchaʼ che qʼatal tzij pa Israel, are kʼu xreyej na kʼi junabʼ rech kuqʼat tzij. Ri Simeón y ri Ana rukʼ sukʼilal xkipatanij ri Jehová are chiʼ xkeyej che kpe ri Mesías (Luc. 2:25, 36-38). Are chiʼ kanikʼoj uwach ri e bʼantajik riʼ che e kʼo pa ri Biblia, chachomaj: «¿Jas xtoʼw wajun winaq riʼ rech xukʼut paciencia? ¿Jas utzilal xuriqo rumal che xukʼut paciencia? ¿Jas kinbʼan che resaxik uwach?». Xuqujeʼ kʼo kʼi kawetaʼmaj chkij ri xkʼojiʼ ta kipaciencia (1 Sam. 13:8-14). Chachomaj wariʼ: «¿Jasche xkʼojiʼ ta kipaciencia? ¿Jas kʼax xkiriqo rumal che xkikʼut ta paciencia?». w23.08 25 párr. 15

Ri apóstol Pedro amaqʼel xukʼut sukʼilal. Kʼo ta jun jastaq xqʼaten che utereneʼxik ri Jesús. Xukʼut ri usukʼilal are chiʼ ri Jesús xubʼij jun tzij che xkichʼobʼ ta ri utijoxelabʼ (Juan 6:68). Ri tijoxelabʼ xkeyej ta na che xqʼalajisax chkiwach ri xubʼij ri Jesús, xaneʼ xetzalij cho taq kachoch. Are kʼu ri Pedro je ta xubʼano. Xaneʼ xubʼij wariʼ che ri Jesús «ukʼ la kʼo wi ri tzij re junalik kʼaslemal». Ri Jesús retaʼm che ri Pedro y nikʼaj chi utijoxelabʼ kkiya kan utukel. Paneʼ je xkibʼano, are kʼu ri Jesús retaʼm che ri Pedro kux na sukʼ che (Luc. 22:31, 32). Ri Jesús retaʼm ri xkikʼulmaj ri utijoxelabʼ, rumal laʼ xubʼij: «Ri iwanimaʼ kraj, are kʼu ri icuerpo man kʼo ta uchuqʼabʼ» (Mar. 14:38). Xuqujeʼ are chiʼ ri Pedro xubʼij che kuchʼobʼ ta uwach ri Jesús, rumal ta wariʼ xyaʼ kan rumal. Are chiʼ xaq utukel ri Pedro ri Jesús xukʼut ribʼ chuwach are chiʼ xkʼastajik (Mar. 16:7; Luc. 24:34; 1 Cor. 15:5). Qastzij riʼ che wariʼ xtobʼan che ri Pedro rech xubʼan ta kebʼ ukʼuʼx. w23.09 22 párrs. 9, 10

Ri Jehová kukuy kimak ri winaq are chiʼ kekojon chrij y knaʼtaj ta chi ri kimak che (Sal. 32:1, 2). Ri Jehová kukuy kimak ri e winaq riʼ rumal ri kisukʼilal y kekojon chrij. Paneʼ ri Abrahán, ri David y nikʼaj chi upatanelabʼ ri Dios xbʼixik chi xeʼux sukʼ, are kʼu kʼo xemakun wi. Rumal ri kikojonik ri Dios xubʼij chi e sukʼ y che kejunamataj ta kukʼ ri winaq che kekojon ta che ri Dios (Efes. 2:12). Pa ri Carta che xutzʼibʼaj ri apóstol Pablo chke ri Romanos, xuqʼalajisaj che rech kojux rachiʼl ri Jehová rajawaxik kojkojon chrij. Are waʼ ri xkibʼan ri Abrahán y ri David, y ri oj xuqujeʼ kojkunik kqabʼan qe junam kukʼ areʼ. w23.12 3 párrs. 6, 7

Qonojel ri oj cristianos yaʼom ri eqeleʼn chqe che kqaqʼijilaj ri Jehová. ¿Jas kqabʼan che ubʼanik? Are ukojik ri qatiempo, qachuqʼabʼ y ri qapwaq rech kqatoʼ uwiʼ ri uQʼatbʼal tzij ri Dios. We kqabʼan wariʼ, tajin kqakʼutu che nim kqil wi ri eqeleʼn che yaʼom chqe che kojkunik kqaqʼijilaj ri Jehová. Ri kʼisbʼal taq tzij che kubʼij ri carta che xutzʼibʼaj ri apóstol Pablo chke ri hebreos, kchʼaw chrij kʼi jastaq che kʼo ubʼanik rukʼ ri qʼijilanik che kqaya che ri Jehová y che rajawaxik kqachajij (Heb. 10:22-25). Kchʼaw chrij che kqabʼan qachʼawem che ri Jehová, kqatzijoj ri utzij ri Dios chke nikʼaj chik, kojbʼe pa ri e riqbʼal ibʼ kukʼ ri qachalal y kqaya qachuqʼabʼ chbʼil taq qibʼ, «rumal rech chi [...] knaqajin ri qʼij re ri» Jehová. Pa ri kʼisbʼal taq capítulos re Apocalipsis, ri ángel rech ri Jehová kubʼij: «¡Chaqʼijilaj ri Dios!». Kamul xuya ubʼixik rech kuqʼalajisaj che nim ubʼanik (Apoc. 19:10; 22:9). Masach pa qajolom ronojel ri qetaʼmam chrij ri templo espiritual che nim ubʼanik y ri eqeleʼn che yaʼom chqe che kojkunik kqaqʼijilaj ri Jehová. w23.10 29 párrs. 17, 18

Qonojel kqaj kqanimaj ri taqanik riʼ: «Chqaloqʼoqʼelaʼ qibʼ». Are kʼu masach chqe ri xubʼij kan ri Jesús: «E kʼi winaq kajarobʼ na ri kiloqʼobʼal kʼuʼx» (Mat. 24:12). Rukʼ ri e tzij riʼ, ri Jesús tajin ta kubʼij che kʼi chke ri utijoxelabʼ kkiya kan uloqʼoqʼexik kibʼ. Paneʼ je wariʼ, are kʼu rajawaxik kqachajij qibʼ y kqabʼan ta qe ri kkibʼan ri winaq re wajun uwach Ulew riʼ che kʼo ta loqʼoqʼenik chkixoʼl. Rumal laʼ, chqilampeʼ ri urespuesta wajun pregunta riʼ: ¿jas kqabʼan che retaʼmaxik we qas keqaloqʼoqʼej ri qachalal? Ri kqabʼan che retaʼmaxik we qas keqaloqʼoqʼej ri qachalal are ri kqabʼan chuwach ri kesach wi (2 Cor. 8:8). Jun chke wariʼ are ri xubʼij kan ri apóstol Pedro: «Puwiʼ ronojel, chikojoʼ ichuqʼabʼ che uloqʼoqʼexik iwibʼ, rumal rech chi ri loqʼoqʼebʼal kʼuʼx kubʼano chi kesachtaj kʼi mak» (1 Ped. 4:8). Ri qaloqʼoqʼenik chke ri qachalal kkoj pa kʼax are chiʼ kkibʼij o kkibʼan kʼax chqe. w23.11 10, 11 párrs. 12, 13

We xaq chke jujun qachalal kqakʼut wi loqʼoqʼebʼal, tajin ta kojniman riʼ che ri xubʼij ri Jesús che kqaloqʼoqʼej qibʼ. Qastzij che weneʼ kʼo jujun chke ri qachalal che más keqaloqʼoqʼej, are je xubʼan ri Jesús kukʼ jujun chke ri utijoxelabʼ (Juan 13:23; 20:2). Are kʼu ri apóstol Pedro kunaʼtasaj chqe che rajawaxik kqakʼut loqʼoqʼebʼal chke konojel ri qachalal, jun loqʼoqʼenik jas ri kʼo chkixoʼl jun familia (1 Ped. 2:17). Ri Pedro xuya wajun pixabʼ riʼ: «Chiloqʼoqʼela bʼaʼ iwibʼ rukʼ ronojel iwanimaʼ xuqujeʼ ronojel ichuqʼabʼ» (1 Ped. 1:22). Pa wajun texto riʼ ri loqʼoqʼebʼal «rukʼ ronojel» animaʼ, kraj kubʼij che qas kojloqʼoqʼenik y xa ta kojtaqchixik. Chqachomaj, ¿jas kqanaʼo are chiʼ jun winaq kubʼij jun tzij o kubʼan kʼax chqe? Weneʼ kʼax kqabʼan che uloqʼoqʼexik y kqaj kqatoj ukʼaxel ri kʼax che xubʼan chqe. Are kʼu wariʼ utz ta kril ri Jehová, junam rukʼ ri xubʼij ri Jesús che ri Pedro (Juan 18:10, 11). Ri apóstol xutzʼibʼaj kan wariʼ: «Mitoj itzelal che ukʼaxel itzelal. Are taq kixyoqʼik, mitoj ukʼaxel ri yoqʼobʼal iwe. Xaneʼ chitewichiʼj ri kixyoqʼowik» (1 Ped. 3:9). We qas kqakʼut loqʼoqʼebʼal paneʼ kbʼan kʼax chqe, kpe ta qoyowal riʼ y kojtzijon riʼ rukʼ utzilal. w23.09 28, 29 párrs. 9-11

¿La mat qastzij che are chiʼ kkʼojiʼ jun alaj akʼal aninaq kkʼiyik? Ri alaj taq akʼalabʼ kitukel kekʼiyik. Are kʼu je ta kkʼulmataj rukʼ ri qakojonik (1 Cor. 13:11; Heb. 6:1). Rech kojux ko pa ri qakojonik, rajawaxik kkʼojiʼ jun utz qachilanik rukʼ ri Jehová. Xuqujeʼ kajwataj ri utobʼanik ri ruxlabʼixel chqe rech kqakʼut utz taq bʼantajik, kqetaʼmaj jujun taq chak y kqetaʼmaj ri kqabʼano are chiʼ kqachaʼ ubʼanik jun jastaq pa ri qakʼaslemal (Prov. 1:5). Ri Jehová are xebʼanow ri winaq; xubʼan ri achi y ri ixoq (Gén. 1:27). Qas qetaʼm che ri achi y ri ixoq junam ta ri kicuerpo y nikʼaj chik. Ri Jehová jalajoj ri chak xuya che ri achi y che ri ixoq y rech kekun che ubʼanik kajwataj jalajoj bʼantajik chke (Gén. 2:18). w23.12 18 párrs. 1, 2

¿La kraj ri Jesús che nikʼaj chik kkikoj ri ubʼiʼ ri uTat? Kraj. Weneʼ jujun taq kʼamal bʼe pa taq ri uqʼij ri Jesús xkichomaj che utz taj kkoj ri ubʼiʼ ri Dios rumal che nim ubʼanik. Are kʼu ri Jesús xuya ta bʼe che wajun chomanik riʼ —che kʼo ta kukʼut ri Biblia— xuqʼatej che uyaʼik uqʼij ri ubʼiʼ ri Jehová. Chojchoman chrij are chiʼ xukunaj jun achi che okinaq itzel taq uxlabʼal che. Ri winaq sibʼalaj xkixiʼj kibʼ y xkibʼij che ri Jesús che kel bʼi chilaʼ (Mar. 5:16, 17). Are kʼu kraj che ketaʼmax ri ubʼiʼ ri Jehová. Rumal laʼ xubʼij che ri achi che kubʼij chke ri winaq ri xubʼan ri Jehová —y are ta ri xubʼan ri Jesús— che utoʼik (Mar. 5:19). Ri Jesús kraj che xuqujeʼ oj kqabʼan wariʼ, che kqakʼut ri ubʼiʼ ri Jehová chke konojel ri winaq (Mat. 24:14; 28:20). Are chiʼ kqabʼan wariʼ kqakikotemaj ri Jesús. w24.02 10 párr. 10

¡Are jun utzilal che oj kʼo pa ri utinamit ri Jehová! Paneʼ ri winaq che e kʼo kimik cho ri uwach Ulew sibʼalaj kkibʼan itzelal, are kʼu kojkikotik che kʼo jun qafamilia che kʼo junamil chkixoʼl (Sal. 133:1). Ri kubʼan ri Dios che ukʼamik qabʼe wariʼ kojutoʼo rech kʼo kikotemal pa ri qafamilia (Efes. 5:33–6:1). Kuya qanojibʼal rech qetaʼm jas kqabʼano are chiʼ kojbʼisonik. Rech kubʼan ta kebʼ qakʼuʼx che upatanexik ri Jehová, jujun taq mul kajwataj chuqʼabʼ chqe. ¿Jasche? Rumal che weneʼ ri kkibʼan ri nikʼaj chik o ri kkibʼij kubʼan kʼax chqe. Xuqujeʼ kubʼan kebʼ qakʼuʼx are chiʼ kojsachik y más na we kʼi taq mul kqabʼano. Kqaya ta kan upatanexik ri Jehová: 1) are chiʼ jun qachalal kubʼan kʼax chqe, 2) are chiʼ ri qakʼulaj kubʼan jun jastaq che utz ta kqilo 3) o are chiʼ utz ta ri kqabʼan oj. w24.03 14 párrs. 1, 2

Weneʼ kʼo jujun taq mul kawetaʼmaj na ri xkibʼan jujun qachalal che upatanexik más ri Jehová. Weneʼ xebʼe pa ri Tijobʼal chke ri kkiya ubʼixik ri Ajawbʼal o xebʼe pa jun chi lugar rech kkiya ri kitobʼanik. ¿La katkun at kabʼan awe junam rukʼ ri xkibʼan areʼ? Ri oj upatanelabʼ ri Jehová kqakoj qachuqʼabʼ rech kqabʼan más pa ri utinamit (Hech. 16:9). Are kʼu, ¿we katkun ta che ubʼanik? Kachomaj taj che kʼo ta apatan. Ri más nim ubʼanik che kubʼan jun cristiano are kuya ta kan upatanexik ri Dios (Mat. 10:22). Chnaʼtaj chawe che ri Jehová sibʼalaj kkikotik are chiʼ kabʼan ri katkun che ubʼanik y kabʼan jujun jastaq ri katnaʼw che ubʼanik. Je wariʼ katkunik katerneʼj ri Jesús are taq kbʼantaj ri aqasanjaʼ (Sal. 26:1). w24.03 10 párr. 11

Ri loqʼalaj qaTat qas kukuy qamak we kqakʼex ri qakʼaslemal (Sal. 86:5). Rumal laʼ, we qas kqaya kan ubʼanik ri makaj, kojkunik kqakojo che qas kubʼan ri kubʼij: qastzij riʼ che ukuyum chi ri qamak. Chnaʼtaj chqe che ri areʼ retaʼm ri kojkun che ubʼanik y kutaʼ ta ri kojkun ta che ubʼanik. We ri tajin kqabʼan che upatanexik are ri kojkun che ubʼanik, paneʼ nim o nim taj, ri areʼ kkikot qukʼ. Chojchoman chrij ri apóstol Pablo, pa kʼi junabʼ xupatanij ri Jehová, kʼi kilómetros xubʼinibʼej y xubʼano che xekʼojiʼ kʼi congregaciones. Are kʼu xopan jun tiempo che xkʼextaj ri ukʼaslemal y xkun ta chik xutzijoj ri utzij ri Dios junam rukʼ ri xubʼan nabʼe kanoq. ¿La xkikot ta chi ri Jehová rukʼ? Xkikotik. Ri Pablo xubʼan ri xkun che ubʼanik y ri Jehová xutewchiʼj (Hech. 28:30, 31). Junam rukʼ ri Pablo, amaqʼel taj kojkunik kqabʼan más che upatanexik ri Jehová, are kʼu ri nim ubʼanik chuwach ri Jehová are ri rumal che kqabʼano. w24.03 27 párrs. 7, 9

Ri Jesús xuya jun utz kʼutbʼal chkiwach ri utijoxelabʼ, rumal che amaqʼel xubʼan uchʼawem. Rajawaxik xutas utiempo rech xubʼan uchʼawem, rumal che latzʼ uwach y amaqʼel e teren winaq chrij (Mar. 6:31, 45, 46). Aqʼabʼil kwalij bʼi che ubʼanik uchʼawem che ri uTat. Jumul are chiʼ xuchaʼ ubʼanik jun jastaq nim ubʼanik, jun aqʼabʼ xubʼan uchʼawem (Luc. 6:12, 13). Y je xubʼano are chiʼ xa jubʼiqʼ chi kraj kkamisaxik (Mat. 26:39, 42, 44). Ri ukʼutbʼal ri Jesús kukʼut chqawach che paneʼ sibʼalaj latzʼ qawach, rajawaxik kqesaj qatiempo che ubʼanik qachʼawem che ri Jehová. Junam rukʼ ri Jesús weneʼ rajawaxik kqilo jas hora kojkunik kojchʼaw rukʼ ri Jehová: weneʼ más aqʼabʼil o más chaqʼabʼ. Rech kqakʼut chuwach ri Jehová che nim kqil wi ri ubʼanik qachʼawem rukʼ. w23.05 3 párrs. 4, 5

Jun wuj kujunamisaj ri uloqʼoqʼebʼal ri Dios rukʼ jaʼ che kel lo pa jun chorro che sibʼalaj kʼo uchuqʼabʼ. ¡Are jun utzalaj kʼutbʼal che kukʼut ri loqʼoqʼebʼal che kunaʼ ri Jehová chke ri kebʼe pa ri kaj! Ri e areʼ qas ketaʼm che «e loqʼoqʼem rumal ri Dios» (Jud. 1). Konojel kkibʼij ke junam rukʼ ri xubʼij ri apóstol Juan: «¡Chiwilaʼ chi sibʼalaj nim ri qaloqʼoqʼexik rumal ri Dios ri Tataxel, chi kbʼix chqe chi oj ralkʼwal ri Dios!» (1 Juan 3:1). ¿La xaq xiw ri kebʼe pa ri kaj keʼuloqʼoqʼej ri Jehová? Xaq xiw taj, junam rukʼ ri qilom chik ri Jehová keʼuloqʼoqʼej konojel ri upatanelabʼ. ¿Jas riʼ ri nimalaj kʼutbʼal kkʼutuwik che ri Jehová sibʼalaj kojuloqʼoqʼej? Ri tojbʼal mak. Wariʼ kukʼutu che sibʼalaj kojuloqʼoqʼej (Juan 3:16; Rom. 5:8). w24.01 28 párrs. 9, 10

Wajun versículo riʼ kukʼut chqawach ri xubʼan ri David rech xuxiʼj ta chi ribʼ are chiʼ xkʼojiʼ ri ukʼaslemal pa kʼax: xchoman chrij ri kubʼan na ri Jehová che utoʼik pa ri petinaq. Retaʼm che ktoʼ na rumal ri Jehová are chiʼ kajwataj che. Rumal che ri Jehová ubʼim chik che ri David kux na qʼatal tzij pa Israel (1 Sam. 16:1, 13). Ri David xuqujeʼ qas retaʼmam che ri Jehová qas kutzʼaqatisaj ri kutzujuj. ¿Jas utzujum ri Dios chqe oj? Qastzij che ri Jehová kubʼij ta chqe che mat kʼo kʼax kqariq kimik. Are kʼu, paneʼ kqariq kʼax pa ri qakʼaslemal, ri Jehová utzujum che pa ri kʼakʼ uwach Ulew kusachisaj na uwach ronojel ri kubʼan kʼax chqe (Is. 25:7-9). Qas qetaʼm che keʼuwalajisaj na ri kaminaqibʼ, kresaj ri yabʼil y kusach na kiwach ri winaq che kkibʼan kʼax chqe (1 Juan 4:4). w24.01 6 párrs. 12, 13

Chnaʼtaj chqe jasche xqajach ri qakʼaslemal che ri Jehová y jasche xqabʼan qaqasanjaʼ. Xqabʼan wariʼ rumal che kqaj kqatoʼ uwiʼ ri Jehová. ¿La knaʼtaj chawe jasche xachʼobʼo che xariq ri qastzij? Xawetaʼmaj uwach ri Jehová, xux aTat, nim xawilo y xaloqʼoqʼej. Xnimar ri akojonik chrij, rumal laʼ xakʼex ri akʼaslemal. Xaya kan ubʼanik ri itzel kril ri Jehová y xamaj ubʼanik ri kqaj chuwach. Sibʼalaj xatkikotik are chiʼ xawetaʼmaj che ri Jehová kukuy amak (Sal. 32: 2). Xamajij bʼenam pa ri e riqbʼal ibʼ y utzijoxik chke nikʼaj chik ri tajin kawetaʼmaj. Rumal laʼ, ajachom chi ri akʼaslemal che ri Jehová y abʼanom chi ri aqasanjaʼ y kawaj taj katel kan pa ri bʼe che kkʼaman bʼi pa ri kʼaslemal kʼo ta ukʼisik (Mat. 7:13, 14). Ko chojtakʼal pa ri qakojonik y qas chojchomanoq rech kqaya ta kan uloqʼoqʼexik ri Jehová y unimaxik. w23.07 17 párr. 14; 19 párr. 19

Are chiʼ kojchoman chrij che qajachom chi ri qakʼaslemal che ri Jehová wariʼ kojutoʼo rech kqaxutuj ri makaj. Chojchoman chrij wariʼ, ¿la xaq utz chqe che kojuchʼabʼej jun winaq che kʼulan chik? ¡Qastzij che utz ta riʼ kqilo! Are chiʼ xqajach ri qakʼaslemal che ri Jehová, xqabʼij che che ronojel wariʼ kqaxutuj. Rumal che are taq kqajach ri qakʼaslemal che ri Jehová kqakoj qachuqʼabʼ che uxutuxik ri itzel taq rayinik y kʼateʼ ta chi kqakoj qachuqʼabʼ are chiʼ oj kʼo chi chuwach. Qas kqaxutuj ronojel «ri kibʼe ri e bʼanal taq etzelal» (Prov. 4:14, 15). Junam rukʼ ri Jesús che xubʼan ronojel ri xqaj chuwach ri uTat, ri oj xuqujeʼ rajawaxik kqakoj qachuqʼabʼ y kqaxutuj apachike jastaq che kubʼan kʼax che ri qachilanik rukʼ ri Jehová (Mat. 4:10; Juan 8:29). Qastzij che are chiʼ kojtaqchiʼx che ubʼanik jun mak o ri kʼax che kqariq pa ri qakʼaslemal, rukʼ waʼ kqakʼutu che kqabʼan qe junam rukʼ ri xubʼan ri Jesús. Y qas qetaʼm che ri Jehová kojutoʼ che ubʼanik. w24.03 9, 10 párrs. 8-10