Octubre

¿La kʼax kabʼan che ukʼutik nimanik? Are je xubʼan ri David. Rumal laʼ xubʼij wariʼ che ri Dios: «Bʼanaʼ la chwe chi kinnaʼ chi jumul ri kikotemal ri kuyaʼ ri kolonik la» (Sal. 51:12). Paneʼ ri David sibʼalaj kuloqʼoqʼej ri Jehová, are kʼu jujun taq mul kʼax xubʼan che unimaxik y ri oj xuqujeʼ je kqakʼulmaj. ¿Jasche? Nabʼe, rumal che qechebʼem kan wajun itzel bʼantajik riʼ che kʼax kqabʼan che ukʼutik nimanik. Ukabʼ, rumal che ri Satanás kojutaqchiʼj rech kojniman taj, junam rukʼ ri xubʼan ri areʼ (2 Cor. 11:3). Y urox, rumal che oj kʼo pa jun uwach Ulew che ri winaq kkaj taj kenimanik; y che «ri uxlabʼal ri kataqan pa kiwiʼ ri man keniman ta che ri Dios» (Efes. 2:2). Rumal laʼ, rech kqanimaj ri Jehová y ri uyaʼom taqanik pa kiqʼabʼ rajawaxik kqakoj qachuqʼabʼ rech keqanimaj y kqaxutuj ri kkibʼan ri winaq che e kʼo pa uqʼabʼ ri Satanás. w23.10 6 párr. 1

¿Jas kqetaʼmaj chrij ri milagro che xubʼan ri Jesús? Ri Jesús xunimarisaj ta ribʼ are chiʼ xubʼan vino che ri joron y are chiʼ xubʼan milagros. Xaneʼ amaqʼel xraj che are xyaʼ uqʼij ri uTat (Juan 5:19, 30; 8:28). We kqesaj uwach ri Jesús kqanimarisaj ta qibʼ riʼ che ri kojkun che ubʼanik. Maqanimarisaj qibʼ, xaneʼ are chqayaʼ unimal uqʼij ri Jehová (Jer. 9:23, 24). Rumal che we kʼo ta ri utobʼanik qukʼ kʼo ta kojkun che ubʼanik (1 Cor. 1:26-31). Jun winaq che kmachʼachʼik kubʼij taj jas ri xubʼan che kitoʼik ri e nikʼaj chik. Kraj che xaq xiw ri Jehová ketaʼmanik (chajunamisaj rukʼ Mateo 6:2-4; Heb. 13:16). We kqakʼut machʼachʼem junam rukʼ ri Jesús sibʼalaj kkikot ri Jehová qukʼ (1 Ped. 5:6). w23.04 4 párr. 9; 5 párrs. 11, 12

Ri apóstol Pablo xubʼij che rajawaxik kojchoman chkij ri e nikʼaj chik. Kqanimaj wajun pixabʼ are chiʼ kqaya bʼe chke ri e nikʼaj chik kkiya kicomentarios. Chojchʼaw chrij jun kʼutbʼal che kojutoʼ che uchʼobʼik wariʼ. ¿La mat qastzij che xaq xiw ta ri at katchʼawik are chiʼ at kʼo rukʼ jun awachiʼl? Je wariʼ kkʼulmataj pa ri e qariqbʼal ibʼ, kqaj che ri e qachalal kkiya ri kicomentarios. Kqaya kichuqʼabʼ ri e qachalal are chiʼ kqaya bʼe chke e areʼ kkiya kicomentarios (1 Cor. 10:24). Chqilaʼ ri kojkunik kqabʼano rech e kʼi kkiya kicomentarios. Rajawaxik kʼi ta tzij kqabʼij are chiʼ kqabʼan qacomentarios rech kechʼaw chi ri e nikʼaj. Katchʼaw ta chrij ronojel ri kubʼij ri párrafo rech kʼo kkibʼij chi ri nikʼaj qachalal. w23.04 22, 23 párrs. 11-13

Paneʼ kqariq kʼax rajawaxik keqatoʼ ri nikʼaj chik, junam rukʼ ri utzijoxik ri utzij ri Dios. Rajawaxik kkʼojiʼ jun utz qachomanik are chiʼ kqatzijoj ri utzij ri Dios. Rumal che kojchʼaw kukʼ winaq che jalajoj ri kikojonem, kibʼantajik y kitinamit. Utz we kojchoman chrij ri ukʼutbʼal ri apóstol Pablo. Rumal che ri areʼ utz xchomanik. Rumal laʼ, ri Jesús xukoj che taqoʼn pa kiwiʼ «ri man aj judeyibʼ taj» (Rom. 11:13). Rech kubʼan ri xtaq che ubʼanik ri apóstol Pablo xutzijoj ri utzij ri Dios chke ri judíos, winaq che nim ketaʼmabʼal, ajchakibʼ y e qʼatal taq tzij. Rumal laʼ, ri Pablo xubʼij wariʼ «nubʼanom chkixoʼl konojel ri winaq, rech jeriʼ kekolotaj jujun chke» (1 Cor. 9:19-22). Are chiʼ xtzijon kukʼ ri winaq riʼ, ri areʼ xchoman chrij ri kikojonik y ri kitinamit che keʼel wi. ¿Jas kqetaʼmaj chrij wariʼ? Che kojkunik kqariq utzilal we are kojtzijon chrij jastaq che ketaʼm uwach ri winaq y kojchoman chrij ri tajin kkikʼulmaj. w23.07 23 párrs. 11, 12

Ri winaq che aninaq taj kpe royowal, kukʼutu che kʼo unojibʼal. Kajwataj chuqʼabʼ rech jun winaq aninaq taj kpe royowal. Ri kunimarisaj ta ribʼ tajin kukʼut jun chke ri «uwachinik ri Uxlabʼixel» (Gál. 5:22, 23). Ri tzij «nimarisan ibʼ» (apacibilidad) pa griega jujun taq mul kkoj chke ri kej che e chʼuʼj y che ketijoxik rech keʼux mansos. ¿La kachomaj ri xbʼan che kitijoxik rech keʼux mansos paneʼ nabʼe e chʼuʼj? ¿Y ri oj? ¿Jas rajawaxik kqabʼano rech kojux utz taq winaq y aninaq taj kpe qoyowal? Kojkun taj kqabʼan wariʼ xaq qatukel. Rajawaxik kqataʼ ri ruxlabʼixel ri Jehová rech kojutoʼo. Kqachomaj taj che kojkun taj kojux utzalaj taq winaq che kpe ta qoyowal. E kʼi testigos rech Jehová kikʼutum che kpe ta koyowal are chiʼ ri winaq kkaj kechʼojin kukʼ y wariʼ ubʼanom che nikʼaj chi winaq kkil ri qas kibʼantajik ri testigos rech Jehová che kechʼojin taj (2 Tim. 2:24, 25). w23.09 15 párr. 3

Pa jun visión, ri apóstol Juan xeril 24 nimaʼq taq tatayibʼ tajin kkiya uqʼij ri Jehová pa ri kaj rumal che ketaʼm che yaʼtal che «ri juluwem, ri nim ilik xuqujeʼ ri kuʼinem» (Apoc. 4:10, 11). Ri ángeles xuqujeʼ ketaʼm che rajawaxik kkiya uqʼij ri Jehová. Más na rumal che e kʼo pa ri kaj, qas ketaʼm uwach y kkil ronojel ri kubʼano (Job 38:4-7). Ri oj xuqujeʼ rajawaxik kqaya uqʼij ri Jehová are chiʼ kojchʼaw rukʼ. Kqabʼano are chiʼ kqabʼij che jas utz taq ubʼantajik utz kqilo y jasche nim kqil wi. Are chiʼ kqasikʼij ri Biblia y kqanikʼoj uwach chqilaʼ jas ubʼantajik ri Jehová utz kqilo (Job 37:23; Rom. 11:33). Tekʼuriʼ chqabʼij che. Xuqujeʼ chqayaʼ uqʼij are chiʼ kqil ri kubʼan che qatoʼik y ri kubʼan che kitoʼik ri e qachalal (1 Sam. 2:1, 2). w23.05 3, 4 párrs. 6, 7

Pa ri 1919, ri utinamit ri Jehová xel kan pa uqʼabʼ ri Nimalaj Babilonia, ri e qastzij taj kojonem. Pa riʼ ri junabʼ xkoj «ri jikalaj pataninel, utz uchomanik», qas xpe pa ri tiempo che kajwatajik rech ketoʼ ri winaq rech kebʼin pa «ri bʼe ri tastalik» (Mat. 24:45-47; Is. 35:8). Rumal che xkimaj upakik «ri bʼe ri tastalik» ri e nikʼaj chik che xeʼok chupam xekunik xketaʼmaj chrij ri Jehová (Prov. 4:18). Xuqujeʼ xkikʼex ri kikʼaslemal rech keqaj chuwach ri Dios. Are kʼu ri Dios retaʼm che kekun taj pa re jun tzij (aninaq) kkikʼex ri kikʼaslemal. Xaneʼ nojimal chi nojimal tajin kuchʼajchʼobʼej ri utinamit. ¡Qastzij riʼ che sibʼalaj kojkikotik are chiʼ kopan ri qʼij che kojkunik kqabʼan ronojel ri kqaj chuwach ri Jehová! Rech jun bʼe amaqʼel utz, rajawaxik ksukʼumaxik. Pa ri 1919 más tajin ksukʼumax chik «ri bʼe ri tastalik» rech e kʼi winaq keʼel lo pa ri Nimalaj Babilonia. w23.05 17 párr. 15; 19 párr. 16

Ri Jupuq Ajkʼamal bʼe cho ronojel uwach Ulew tajin kkiya tijonik chke qachalal rech ketobʼan pa ri comités. Ri e qachalal riʼ che e kʼo pa ri comités yaʼom kʼi eqeleʼn chke. Qastzij che kʼo ketaʼmabʼal rech kkikʼam ubʼe ri utinamit ri Dios. Are chiʼ kkʼis ri nimalaj kʼaxkʼolil y ri e chaʼom e kʼo chi pa ri kaj, ri kekanaj kan cho ri uwach Ulew kkiya ta kan upatanexik riʼ ri Dios. Rumal che ri kkʼamow kibʼe are ri Jesucristo. Qastzij che kbʼan na kʼax chke kumal ri Gog re Magog (Ezeq. 38:18-20). Are kʼu wariʼ naj ta kuchʼijo. Kekun taj kekiqʼatej ri Testigos che mat kkiqʼijilaj chi ri Dios. Ri Jehová keʼutoʼ na ri upatanelabʼ. Ri apóstol Juan xril pa jun visión ri «kʼiʼalaj winaq» che kbʼix nikʼaj chi chij chke, xuqujeʼ xbʼix che che ri «kʼiʼalaj winaq» riʼ keʼel lo «pa ri nimalaj kʼaxkʼolil». Wariʼ kukʼut chqawach che xekʼasiʼ kanoq (Apoc. 7:9, 14). w24.02 5, 6 párrs. 13, 14

¿Jas rajawaxik kqabʼano rech ri Jehová kuya ri ruxlabʼixel pa qawiʼ? Rajawaxik kqataʼ che, kqanikʼoj ri uTzij y kqabʼan ri kubʼij ri utinamit. We kqabʼan wariʼ kqakʼut ri «uwachinik ri Uxlabʼixel» (Gál. 5:22, 23). Rech ri Jehová kuya ri ruxlabʼixel pa qawiʼ rajawaxik chʼajchʼoj ri qachomanik, rumal laʼ kresaj pa qawiʼ we kqaya bʼe che kok tzʼil taq chomanik pa qajolom (1 Tes. 4:7, 8). ¿Jas más rajawaxik kqabʼano? Ri Pablo xubʼij: «Miwetzelaj uwach ri kitzij ri kkiqʼaxej tzij chke ri winaq ri yoʼm chke rumal ri Dios» (1 Tes. 5:20). Pa wajun versículo, ri tzij «ri kkiqʼaxej tzij» kraj kubʼij ri kuya ubʼixik ri Dios rumal ri ruxlabʼal, junam rukʼ ri kyaʼ ubʼixik chrij ri uqʼij ri Jehová. Ri oj kqachomaj taj che kbʼeyetaj na ri upetibʼal ri uqʼij ri Jehová o che kqil ta chi ri Armagedón, xaneʼ kqachomaj che naqaj chi kʼo wi. Rumal laʼ, kqakoj qachuqʼabʼ che ukʼutik utz taq bʼantajik y kojniman che ri Dios ronojel taq qʼij (2 Ped. 3:11, 12). w23.06 12 párrs. 13, 14

¿Jas kqabʼano we xaq kʼateʼ kqʼalajin lo jun tzʼil wachbʼal chqawach? Rajawaxik aninaq kqaya kan rilik. We knaʼtaj chqe che más nim ubʼanik ri qachilanik rukʼ ri Jehová, kojutoʼ rech kqaxutuj ri itzel taq wachbʼal. E kʼo wachbʼal che e pornografía taj, are kʼu kukʼasuj itzel taq rayinik chqe. Rajawaxik keqaxutuj ri tzʼil taq wachbʼal riʼ, rumal che kqaj taj kojmakun pa qanimaʼ (Mat. 5:28, 29). Jun qachalal David ubʼiʼ re Tailandia kubʼij: «Amaqʼel kinchoman chrij wariʼ: ‹¿La utz kril ri Jehová ri tajin kwilo paneʼ pornografía taj?›. Uchomaxik wariʼ in utoʼm rech utz ri kinchaʼ ubʼanik». We kqaxibʼij qibʼ chuwach ri Jehová kojutoʼ rech utz ri kqachaʼ ubʼanik. «Ri noʼj kachapletajik rumal ri [xeʼn ibʼ chuwach ri Dios]». w23.06 23 párrs. 12, 13

Rumal che ri tzij «chatok chupam ri awachoch» are kchʼaw chkij ri congregaciones. We pa ri nimalaj kʼaxkʼolil kʼo utz achilanik chqaxoʼl kukʼ ri qachalal, ri Jehová kojuchajij na junam rukʼ ri ubʼim kanoq. Rajawaxik qas keqaloqʼoqʼej ri qachalal xaq xiw ta kqabʼij. Rumal che we qas ta keqaloqʼoqʼej kojkʼasiʼ ta kan riʼ pa ri nimalaj kʼaxkʼolil. Ri «uqʼij ri Ajawaxel» are jun qʼij che sibʼalaj kʼax (Sof. 1:14, 15). Ri oj upatanelabʼ ri Jehová xuqujeʼ kqariq na kʼax. Rumal laʼ, kimik rajawaxik kqil apanoq jas rajawaxik kqabʼano. Rajawaxik kqakʼut kochʼonik, toqʼobʼisal wachaj y loqʼoqʼenik rech kqaxiʼj ta qibʼ chuwach ri kʼax che kpe na y keqatoʼ nikʼaj chik. Rumal che ri kochʼonik kojutoʼ che uchʼijik apachike kʼax kqariq na. Ri toqʼobʼisal wachaj kojutoʼo rech keqatoʼ ri qachalal che kʼo kajwataj chke. Y, ri loqʼoqʼebʼal kojutoʼo rech kʼo utz achilanik chqaxoʼl. Je riʼ ri Jehová kusipaj na ri kʼaslemal che kʼo ta ukʼisik chqe pa jun uwach Ulew jawiʼ kriqitaj ta chi wi nijun kʼax (Is. 65:17). w23.07 7 párrs. 16, 17

Ri Biblia keʼujunamaj ri upatanelabʼ ri Dios kukʼ winaq che kʼo nim kichuqʼabʼ. Are kʼu ri kʼo nim kichuqʼabʼ jujun taq mul xkinaʼo che kʼo ta kichuqʼabʼ. Jun kʼutbʼal, ri qʼatal tzij David jujun taq mul xunaʼo che sibʼalaj kʼo uchuqʼabʼ, are kʼu jujun taq mul xunaʼo che kʼo ta uchuqʼabʼ y xuxiʼj ribʼ (Sal. 30:7). Xuqujeʼ je xukʼulmaj ri Sansón che xkʼojiʼ nimalaj uchuqʼabʼ are chiʼ ri Jehová xuya ri uxlabʼixel che, are kʼu xrilo che we man kʼo ri utobʼanik ri Jehová rukʼ kux «na sibʼalaj tuqar jachaʼ jun apachike achi ri man kʼo ta uchuqʼabʼ» (Juec. 14:5, 6; 16:17). ¿Jachin xyaʼow kichuqʼabʼ ri sukʼalaj taq achijabʼ riʼ? Are ri Jehová. Ri apóstol Pablo xuqujeʼ xuchʼobʼo che kajwataj ri utobʼanik ri Jehová che (2 Cor. 12:9, 10). Ri areʼ xuqujeʼ xyawajik junam qukʼ oj (Gál. 4:13, 14). Y xukoj uchuqʼabʼ che ubʼanik ri utzilal (Rom. 7:18, 19). Jujun taq mul xbʼisonik y xuxiʼj ribʼ rumal che xuchomaj che weneʼ kkamisaxik (2 Cor. 1:8, 9). Paneʼ je wariʼ, are kʼu xubʼij: «Are taq kʼu in tuqar, kʼateʼ riʼ sibʼalaj kʼo nuchuqʼabʼ». ¿Jasche je waʼ xubʼij? Rumal che ri Jehová xutoʼo y xuya ri chuqʼabʼ che xajwataj che. w23.10 12 párrs. 1, 2

We jujun taq mul kqanaʼo che kʼo ta qapatan, chnaʼtaj chqe che are ri Jehová ri xojkʼamow lo pa ri utinamit (Juan 6:44). Ri areʼ are kril ri utz taq qabʼantajik, paneʼ oj kojkun ta che rilik, y qas retaʼm ri qabʼantajik (2 Crón. 6:30). Rumal laʼ, we kubʼij che nim qabʼanik, kqakoj ri kubʼij chqe (1 Juan 3:19, 20). Weneʼ jujun chqe kojbʼison na rumal ri itzel taq jastaq che xqabʼan kan nabʼe are chiʼ majaʼ kqetaʼmaj uwach ri Jehová (1 Ped. 4:3). Nikʼaj chik weneʼ naj tiempo chik tajin kkipatanij ri Jehová rukʼ sukʼilal, are kʼu tajin kkikoj na kichuqʼabʼ chuwach ri itzel taq rayinik. ¿E ri at? ¿La katbʼison na rumal ri abʼanom ojer kanoq? We jeʼ, weneʼ ri kikʼutbʼal ri upatanelabʼ ri Jehová ojer kanoq katutoʼo, rumal che xkinaʼ ri tajin kanaʼo. Jun kʼutbʼal, ri apóstol Pablo xbʼisonik are chiʼ knaʼtaj ri makaj che xubʼan nabʼe kanoq (Rom. 7:24). Paneʼ xuya kan ubʼanik ri makaj y xubʼan uqasanjaʼ, amaqʼel xubʼij che «kʼo ta [...]ubʼanik chkixoʼl ri taqomxelabʼ» y che are ri nim na umak chkiwach konojel (1 Cor. 15:9; 1 Tim. 1:15). w24.03 27 párrs. 5, 6

Ri kqetaʼmaj chrij ri ukʼutbʼal ri qʼatal tzij Jehoás are che rajawaxik utz kqabʼan che kichaʼik ri qachiʼl, kachilaxik winaq che kkipatanij ri Jehová y che kojkitoʼo rech kqaya ta kan upatanexik. Xaq xiw ta keqatzukuj achilanik che junam kijunabʼ qukʼ. Chnaʼtaj chqe che ri Jehoiadá más nim chi ujunabʼ chuwach ri Jehoás. Are chiʼ keʼachaʼ ri awachiʼl chataʼ wariʼ: «¿La kinkitoʼ ri wachiʼl che upatanexik más ri Jehová? ¿La kinkitoʼo rech are kinnimaj ri ktaqan wi ri Jehová? ¿La ketzijon chrij ri Jehová y chrij ri kketaʼmaj pa ri Biblia? ¿La nim kkil wi ri utaqanik ri Jehová? Are chiʼ kinbʼan jastaq che utz taj, ¿la xaq kkilo o kkibʼij chwe?» (Prov. 27:5, 6, 17). We ri e awachiʼl kkipatanij ta ri Jehová cheʼayaʼ kanoq, are kʼu we kkipatanij ri Jehová amaqʼel chatkʼol kukʼ rech kaya ta kan upatanexik ri Jehová (Prov. 13:20). w23.09 9, 10 párrs. 6, 7

Alfa are ri nabʼe letra re ri alfabeto griego y omega are ri kʼisbʼal. Rukʼ ri e tzij riʼ «ri nabʼe xuqujeʼ ri kʼisbʼal», ri Jehová tajin kubʼij che are chiʼ kumaj ubʼanik jun jastaq qas kutzʼaqatisaj ubʼanik. Are chiʼ ri Jehová ya ubʼanom chi ri Adán y Eva, xubʼij chke, «chekʼol kʼi iwalkʼwal; chinojisaj ri uwach ulew, chixtaqan puwiʼ» (Gén. 1:28). Pa riʼ ri tiempo ri Jehová xchʼaw chrij ri urayibʼal che ri uwach Ulew y chke ri winaq jetaneʼ xubʼij «nabʼe» o «Alfa». Ri kijaʼlil ri Adán y Eva kkinojisaj na ri uwach Ulew y kkibʼan na kotzʼiʼj che. Are wa ri kraj kubʼij, «Omega». Are chiʼ xtoʼtaj che ubʼanik «konojel ri jastaq ri e kʼo pa ri kaj xuqujeʼ ri e kʼo cho ri uwach ulew», ri Jehová xutzʼaqatisaj ri utzujum. Xukoj ri uwuq qʼij che utzʼaqatisaxik ri urayibʼal chke ri winaq y che ri uwach Ulew. Ri urayibʼal qas ktzʼaqat na are chiʼ kkʼis ri uwuq qʼij (Gén. 2:1-3). w23.11 5 párrs. 13, 14

Kajibʼ ikʼ rajawaxik kebʼin ri israelitas rech keʼopan pa ri kitinamit. Are kʼu ri Jehová xubʼij chke che kupak bʼi ri kibʼe are chiʼ ketzalij bʼik rech kkiriq ta jun kʼax. Are kʼu ri judíos che kkipatanij ri Jehová utz xkita che ketzalij pa ri kitinamit, rumal che kkaj kkiqʼijilaj ri Jehová. Are kʼu kʼo ta nijun templo rech ri Jehová chilaʼ. Ri israelitas kekun taj kkiya ri kisipanik che ri Jehová rumal che kʼo ta altar y e kojol tabʼal toqʼobʼ. Xuqujeʼ, e kʼi ta más ri nim kkil wi ri Jehová y keniman che, más e kʼi na ri kekiqʼijilaj taq tyox. Rumal laʼ, ri judíos che kkaj kkibʼan ri kqaj chuwach ri Jehová xkaj xetzalij bʼi pa ri kitinamit rech kkiqʼijilaj chi jumul. w23.05 14, 15 párrs. 3, 4

Kajwataj ri utobʼanik ri ruxlabʼixel ri Dios chqe rech kqaya ta kan ubʼanik «ri kkibʼan ri e aj saqilal». ¿Jasche? Rumal che kʼax ukʼutik sukʼilal pa wajun uwach Ulew riʼ che nojinaq che itzelal (1 Tes. 4:3-5, 7, 8). Ri ruxlabʼixel ri Dios kojutoʼ chuwach ri kichomanik ri winaq che kʼo ta ubʼanik rukʼ ri utaqanik ri Dios. Xuqujeʼ kojutoʼo rech kqakʼut «ronojel utzil, sukʼil xuqujeʼ qastzij» (Efes. 5:9). Ri Jesús xubʼij, che ri Jehová «kuyaʼ na ri Ruxlabʼal [...] chke ri winaq ri kkitaʼ che» (Luc. 11:13). Rumal laʼ, rech kyaʼtaj ri ruxlabʼixel ri Jehová chqe, rajawaxik kqataʼ che pa chʼawem. Jun chik che kojtoʼwik rech kqariq ri ruxlabʼixel ri Jehová are che kqaqʼijilaj pa taq ri e riqbʼal ibʼ kukʼ ri qachalal (Efes. 5:19, 20). Ri ruxlabʼixel ri Jehová che kkʼojiʼ chqaxoʼl kojutoʼo rech kqabʼan ri kqaj chuwach. w24.03 23, 24 párrs. 13-15

¿La kanaʼ che kajwataj más apaciencia? We jeriʼ chataʼ che ri Jehová. Ri paciencia are jun bʼantajik che kuya ri uxlabʼixel chqe (Gál. 5:22, 23). Rumal laʼ, kojkunik kqataʼ che ri Jehová che kojutoʼ rukʼ ri ruxlabʼixel rech kqakʼut ri e bʼantajik che kuyaʼo. We tajin kqariq jun kʼax pa ri qakʼaslemal che kubʼano che kʼax kqabʼan che ukʼutik paciencia, chqataʼ ri utobʼanik ri Jehová (Luc. 11:13). Xuqujeʼ kojkunik kqataʼ che ri Jehová che keqil ri jastaq junam rukʼ ri kubʼan ri areʼ che kilik. Are chiʼ qabʼanom chi qachʼawem, chqakojoʼ qachuqʼabʼ rech ronojel taq qʼij kqakʼut paciencia. We amaqʼel kqataʼ tobʼanik che ri Jehová y kqakoj qachuqʼabʼ che ukʼutik paciencia, nojimal chi nojimal kkʼojiʼ qapaciencia. Xuqujeʼ kʼo kojutoʼ wi we kojchoman chrij ri e kʼutbʼal che e kʼo pa ri Biblia. Pa ri Biblia keqariq kʼutbʼal kech winaq che xkʼojiʼ kipaciencia. We kojchoman chrij ri kikʼutbʼal, kojkun riʼ kqakʼut paciencia junam kukʼ. w23.08 22 párrs. 10, 11

Ri Jesús xubʼij che ri apóstol Pedro che kchajix rumal ri Jehová. Are chiʼ kʼastajinaq chi ri Jesús xutoʼ ri Pedro y nikʼaj chi apóstoles rech xekichap kar (Juan 21:4-6). Wajun milagro che xubʼan ri Jesús xukʼut chuwach ri Pedro che ri Jehová kkunik kuya ronojel ri kajwataj che. Qastzij riʼ che wariʼ kunaʼtajisaj che ri Pedro che ri Jehová keʼuchajij na ri kkikoj kichuqʼabʼ «che uriqik ri rajawbʼal ri Dios» (Mat. 6:33). Ri Pedro are más xutas utiempo che utzijoxik ri utzij ri Dios y are ta ri kichapik kar (Hech. 2:14, 37-41). Pa ri Pentecostés re ri junabʼ 33 ri Pedro xuxiʼj ta ribʼ rech xutzijoj ri utzij ri Dios chke e kʼi winaq, tekʼuriʼ xeʼutoʼ e kʼi samaritanos y gentiles rech xeʼux utijoxel ri Jesús (Hech. 8:14-17; 10:44-48). Qastzij che ri Jehová xukoj ri Pedro rech e kʼi winaq xekojonik. w23.09 20 párr. 1; 23 párr. 11

Weneʼ kebʼ junabʼ chik che ri babilonios kisachisam uwach ri Jerusalén, ri qʼatal tzij Nabucodonosor xuxiʼj ribʼ are chiʼ xrachikʼaj jun nimalaj wachbʼal o tzʼaq. Tekʼuriʼ xuya taqanik chke ri ajnoʼjabʼ xuqujeʼ ri Daniel che kkibʼij che ri kraj kubʼij ri rachikʼ, we kkibʼij ta ri kraj kubʼij ri rachikʼ keʼukamisaj konojel (Dan. 2:3-5). Ri Daniel rajawaxik che aninaq kʼo kubʼano rumal che e kʼi kʼo pa kʼax ri kikʼaslemal. Rumal laʼ «xutzʼonoj kʼu che chi chuyaʼ na kebʼ oxibʼ qʼij che rech kkunik kutzijoj ri ichikʼ che xuqujeʼ ri kel kubʼij» (Dan. 2:16). Ri Daniel xajwatajik che kuxiʼj ta ribʼ y che kkʼojiʼ nim ukojonik. ¿Jasche? Rumal che ri Biblia kubʼij taj che ri Daniel nabʼe kanoq xuya ubʼixik ri kraj kubʼij jun achikʼ. Ri Daniel xchʼaw kukʼ ri oxibʼ rachiʼl «rech kkitzʼonoj tobʼanik che ri Dios ri kʼo pa ri kaj» (Dan. 2:18). Ri Jehová xutatabʼej ri kichʼawem, rumal laʼ xkunik xuya ubʼixik ri kraj kubʼij ri rachikʼ ri qʼatal tzij. ¡Ri Daniel y ri e rachiʼl xekamisax taj! w23.08 3 párr. 4

Chojchoman chrij ri utzilal che kqariqo we kqakʼut paciencia. We kʼo qapaciencia sibʼalaj kojkikot riʼ y kpe ta qoyowal riʼ. Rumal laʼ, ri paciencia kojutoʼo rech kojyawaj taj. Xuqujeʼ ktobʼanik rech kkʼojiʼ utzilal chqaxoʼl kukʼ ri nikʼaj chik y rech kkʼojiʼ ta tasoj ibʼ pa ri congregación. We aninaq ta kpe qoyowal rumal ri kubʼan jun chik chqe, wariʼ kubʼano che kkʼojiʼ ta chʼoj chqaxoʼl (Sal. 37:8; Prov. 14:29). We kqakʼut paciencia, kqesaj uwach ri Jehová y kojqebʼ más rukʼ. Junam rukʼ ri qilom chik, ri paciencia are jun utz bʼantajik che kuya kikotemal chqe. Paneʼ kʼax kqabʼan che ukʼutik, are kʼu ri Jehová kojutoʼ che ukʼutik wajun bʼantajik riʼ. Y, rech kqeyeʼj che kopan ri kʼakʼ uwach Ulew, qas kqakubʼsaj qakʼuʼx che «ri Ajawaxel amaqʼel keʼuchajij ri nim kil wi kumal xuqujeʼ ri kuʼl kikʼuʼx chrij ri loqʼoqʼebʼal ukʼuʼx» (Sal. 33:18). Rumal laʼ, chqakojoʼ qachuqʼabʼ rech kqakʼut paciencia. w23.08 22 párr. 7; 25 párrs. 16, 17

Ri Santiago xubʼij chke che we are más nim kkil wi jun winaq qʼinom e itzel kkil jun mebʼaʼ rukʼ wariʼ tajin kkikʼutu che kʼo ta kikojonik (Sant. 2:1-5, 9). Ri Santiago xubʼij che are chiʼ jun qachalal kril jun chi qachalal che kajwataj ratzʼyaq o uwa are kʼu kutoʼ taj. Paneʼ wajun winaq riʼ kubʼij che kʼo ukojonik, are kʼu rumal che kukʼut taj kʼo ta ukojonik riʼ. (Sant. 2:14-16). Ri Santiago xchʼaw chrij ri Rahab che xukʼut rukʼ ri xubʼano che kʼo nim ukojonik (Sant. 2:25, 26). Wajun ixoq riʼ utom ronojel ri ubʼanom ri Jehová y retaʼm che tajin keʼutoʼ ri israelitas (Jos. 2:9-11). ¿Jas xubʼan che ukʼutik che qas xkojon chrij ri Jehová? Xeʼutoʼ e kebʼ israelitas rech xekamisax taj. Rumal laʼ, rukʼ ri xubʼan wajun ixoq riʼ xux sukʼ chuwach ri Dios paneʼ israelita taj, junam rukʼ ri Abrahán. Ri xubʼano kukʼut chqawach che rajawaxik kqakʼut ri qakojonik rukʼ ri kqabʼano. w23.12 5, 6 párrs. 12, 13

Ri oj cristianos kqaj taj xaq jubʼiqʼ kqetaʼmaj chrij ri Biblia. Kqaj kqetaʼmaj «ri jastaq re ri Dios ri man kechʼobʼotaj taj», y rukʼ ri utobʼanik ri ruxlabʼal kojkun che uchʼobʼik (1 Cor. 2:9, 10). Are chiʼ kqasikʼij ri Biblia utz che qas kqanikʼoj rech kojqebʼ más rukʼ ri Jehová. Kʼi kojkunik kqabʼano. Kojkunik kqanikʼoj ri xubʼan ri Jehová che ukʼutik ri uloqʼoqʼebʼal chke ri upatanelabʼ ojer y wariʼ kukʼutu che xuqujeʼ kojuloqʼoqʼej. Kojkunik kqanikʼoj ri xubʼij ri Jehová chke ri israelitas ojer chrij ri kkibʼan che uqʼijilaxik y kqajunamaj rukʼ ri kbʼan che uqʼijilaxik kimik. O kojkunik kqanikʼoj ri profecías che xtzʼaqat chrij ri Jesús are chiʼ xkʼojiʼ cho ri uwach Ulew rukʼ ri utobʼanik ri Índice de las publicaciones Watch Tower y ri Tobʼanik chike ri testigos rech Jehová rech kketaʼmaj más. Wariʼ katutoʼo rech más kkowir ri akojonik y rech «¡kachʼobʼ na ri retaʼmaxik uwach ri Dios!» (Prov. 2:4, 5). w23.10 18, 19 párrs. 3-5

Are chiʼ ri Pedro xubʼij «chikojoʼ ichuqʼabʼ che uloqʼoqʼexik iwibʼ» ri e tzij riʼ kraj kubʼij «che más kkʼiyik». Ri parte b re ri versículo kchʼaw chrij ri utzilal che kuya ri loqʼoqʼenik: kuchʼuq ri kimak ri qachalal. Ri loqʼoqʼebʼal kjunamataj rukʼ jun atzʼyaq che kojkunik kqalikʼo, che xa ta jun makaj kuchʼuqu, xaneʼ «kʼi mak». Pa wajun contexto riʼ, «kesachtaj» o kuchʼuq kraj kubʼij ukuyik makaj. Junam rukʼ ri kubʼan jun atzʼyaq che kuchʼuq ri tzʼilobʼinaq wi, ri loqʼoqʼebʼal che kqanaʼ chke ri nikʼaj chik kubʼano che kqakuy ri kesach wi. Ri loqʼoqʼenik che kqanaʼ chke ri qachalal rajawaxik kubʼan chqe che kqakuy kimak, paneʼ kʼax kqabʼan che ubʼanik (Col. 3:13). Are chiʼ kqakuy kimak ri nikʼaj chik, kqakʼutu che sibʼalaj nim ri qaloqʼoqʼenik y are kqabʼan ri kqaj chuwach ri Jehová. w23.11 11, 12 párrs. 13-15

26 ri ujunabʼ ri Josías are chiʼ xusukʼumaj ri templo. Are chiʼ xmajix ubʼanik ri templo xriqitaj «ri uwujil ri upixabʼ ri Ajawaxel; ri xyaʼ rumal ri Moisés». Y are chiʼ ri Josías xuta ri kubʼij wajun wuj riʼ, aninaq xunimaj ri Taqanik che uyaʼom ri Jehová (2 Crón. 34:14, 19-21). ¿La kawaj kasikʼij ri Biblia? ¿La tajin kasikʼij chik? ¿La utz kanaʼ usikʼixik? ¿La tajin kakoj achuqʼabʼ rech ksach ta pa ajolom ri versículos che ktobʼan chawe pa ri akʼaslemal? Weneʼ 39 ujunabʼ ri Josías are chiʼ utz ta ri xuchaʼ ubʼanik y che rumal wariʼ xuriq kʼax pa ri ukʼaslemal. Ri areʼ xutzukuj ta ri utobʼanik ri Jehová (2 Crón. 35:20-25). ¿Jas kqetaʼmaj chrij? Che apastaneʼ ri qajunabʼ o ri tiempo che tajin kqetaʼmaj chrij ri Biblia, rajawaxik amaqʼel kqatzukuj ri utobʼanik ri Jehová. Rech kqetaʼmaj chrij ri Jehová rajawaxik kqataʼ ri utobʼanik, kqasikʼij ri Biblia y kqakʼam ri pixabʼ che kkiya ri qachalal chqe che ko ri kikojonik. We kqabʼan wariʼ, más kojkikot riʼ pa ri qakʼaslemal y kqabʼan ta jastaq riʼ che utz ta kril ri Jehová (Sant. 1:25). w23.09 12 párrs. 15, 16

Ri Biblia kchʼaw chkij jujun taq ixoqibʼ che xkipatanij ri Jehová rukʼ loqʼoqʼebʼal. E areʼ qas «kkichomaj jas kkibʼano, e jik pa ronojel» (1 Tim. 3:11). Qastzij riʼ che pa ri acongregación e kʼo qachalal ixoqibʼ che kʼo jun ko kikojonik y kʼo katkunik kawetaʼmaj chkij. We at ali na, chatchoman chrij jun qachalal che ko ukojonik y chawesaj uwach. Rech katkunik kawesaj uwach, chawilaʼ ri utz taq ubʼantajik tekʼuriʼ chatchoman chrij ri kabʼan che resaxik uwach. Ri ixoq che kmachʼachʼik are ri kʼo jun utz rachilanik rukʼ ri Jehová y kukʼ ri nikʼaj chik. Jun kʼutbʼal, rumal che kmachʼachʼik y kuloqʼoqʼej ri Jehová, kniman chke ri kʼamal taq bʼe pa ri congregación y pa ri familia che uchaʼom ri Jehová (1 Cor. 11:3). w23.12 18, 19 párrs. 3-5

Ri Jehová kraj che ri achijabʼ kekiloqʼoqʼej ri kixoqil y kkiya ri kajwataj chke pa ri kikʼaslemal y pa ri kikojonik. We utz kabʼan che ukojik ri achomanik, nim keʼawil wi ri ixoqibʼ y kakʼutuʼ che kkubʼsax kʼuʼx chawij, wariʼ katutoʼo rech at jun utz achajil. We katkʼulik weneʼ kekʼojiʼ awalkʼwal, kʼo kʼi kawetaʼmaj chrij ri ukʼutbʼal ri Jehová rumal che ri areʼ are jun utzalaj tat (Efes. 6:4). Ri Jehová xqaj ri Jesús chuwach, xuloqʼoqʼej y nim xril wi (Mar. 1:11). Utz che kanaqʼatisaj awibʼ rech amaqʼel kabʼij chke ri awalkʼwal che keʼawaj, nim kawil wi ri kkibʼano y kabʼij chke are chiʼ utz kkibʼan che ubʼanik jun jastaq. Ri e tat che kkesaj uwach ri ukʼutbʼal ri Jehová kekitoʼ ri kalkʼwal rech kkowir ri kikojonik. ¿Jas kabʼan kimik rech katijoj awibʼ rech katux jun utz tat pa ri petinaq? Cheʼaloqʼoqʼej ri afamilia, ri e qachalal pa ri congregación, chabʼij chke che keʼawaj y nim chawilaʼ wi ri kkibʼano (Juan 15:9). w23.12 28, 29 párrs. 17, 18

Ri oj upatanelabʼ ri Jehová kqariq kʼax y kqariq yabʼil junam kukʼ ri winaq. Xuqujeʼ rajawaxik kqachʼijo are chiʼ ri winaq itzel kojkil wi o kkibʼan kʼax chqe rumal che kqapatanij ri Dios. Qastzij che ri Jehová kresaj ta ri kʼax che kqakʼulmaj, are kʼu kubʼij chqe che kojutoʼ che uchʼijik (Is. 41:10). We amaqʼel kʼo ri Jehová qukʼ, kqanaʼ kikotemal riʼ, utz ri kqachaʼ ubʼanik pa ri qakʼaslemal y kojux sukʼ riʼ che ri Jehová apastaneʼ ri kʼax che kqariqo. Pa wajun kʼutunem riʼ kqil na kajibʼ jastaq che kubʼan ri Jehová che qatoʼik are chiʼ kqariq kʼax pa ri qakʼaslemal. Ri Jehová kubʼij che kuya na «ri ujamaril» chqe (Filip. 4:6, 7). Wajun jamaril riʼ are ri utzilal che kqanaʼ pa qanimaʼ rumal che kʼo jun utzalaj qachilanik rukʼ ri Jehová. Sibʼalaj mayibʼal rumal che «nim na chuwach ronojel noʼj». ¿La kʼo jumul abʼanom achʼawem che ri Jehová rukʼ ronojel awanimaʼ y che sibʼalaj xamayo rumal che are chiʼ xbʼantaj awumal xanaʼ jun nimalaj jamaril? Wariʼ are «ri ujamaril ri Dios». w24.01 20 párr. 2; 21 párr. 4

Ri kkipatanij ri Dios rukʼ ronojel kanimaʼ nim kkil wi ri ubʼiʼ. Ri David qas retaʼm che are chiʼ nim kril ri ubʼiʼ ri Jehová xa junam rukʼ are chiʼ tajin kupatanij. Uyaʼik retaʼmaxik ri ubʼiʼ kraj kubʼij che kojchʼaw chrij ri utz taq ubʼantajik y ri jeʼlalaj taq jastaq che ubʼanom. Ri David kraj kukʼutu che sibʼalaj chʼajchʼoj kril wi ri ubʼiʼ ri Jehová y che kraj kuqʼijilaj. Xubʼij che kraj kukʼut wariʼ rukʼ ronojel ranimaʼ. Ri levitas xuqujeʼ xkiya uqʼij ri Jehová. Xkichʼobʼo che kʼo ta nijun tzij kekunik kkikojo che kukʼutu che nim kkil wi ri ubʼiʼ ri Dios (Neh. 9:5). ¡Sibʼalaj xkikot riʼ ri Jehová are chiʼ xrilo che rukʼ ronojel kanimaʼ xkiya uqʼij! w24.02 9 párr. 6

Ri Jehová kuchomaj taj che xa kʼo ta katkun che ubʼanik we kakʼex jun ameta (2 Cor. 8:12). Chatchoman chrij ri at kunaq chik abʼanom. Ri Biblia kubʼij: «Sukʼ ri Dios, man ksach ta pa ujolom ri chak ri ibʼanom» (Heb. 6:10). Je chabʼanaʼ at junam rukʼ ri kubʼan ri Dios. Chatchoman chrij ri metas che at kunaq chi che ubʼanik: awachiʼl chi ri Jehová, tajin katzijoj chi ri utzij o abʼanom chi aqasanjaʼ. Wariʼ kukʼutu che katkunik kabʼan chi nikʼaj ametas. Rukʼ ri utobʼanik ri Jehová, at katkun che ubʼanik ri ameta xuqujeʼ katkikot che ubʼanik ri ameta we kachomaj jas ubʼanom ri Jehová che atewchixik (2 Cor. 4:7). Rumal laʼ, we kkʼistaj ta akʼuʼx kariq na más tewchibʼal pa ri petinaq (Gál. 6:9). w23.05 31 párrs. 16-18

Ri Jehová qas kukʼut chkiwach ri upatanelabʼ che keraj y kkikot kukʼ. Pa ri Biblia kamul xubʼij che ri Jesús are ri loqʼalaj ukʼojol y kkikot rukʼ (Mat. 3:17; 17:5). ¿La kawaj che ri Jehová kubʼij wariʼ chawe? Qastzij riʼ che ri Jehová kchʼaw ta lo qukʼ pa ri kaj. Are kʼu kchʼaw qukʼ pa ri Biblia. Are chiʼ kqasikʼij ri utzalaj taq tzij che xubʼij ri Jesús chke ri utijoxelabʼ, kqanaʼo jetaneʼ che are ri Jehová tajin kubʼij chqe. Ri Jesús xresaj uwach ri Jehová. Rumal laʼ are chiʼ ri Jesús xubʼij sukʼ chke ri Utijoxelabʼ paneʼ e ajmakibʼ, kojkunik kqachomaj che ri Jehová je waʼ ri kubʼij chqe (Juan 15:9, 15). Maqachomaj che ri kʼax kqariqo are rumal che ri Dios kkikot ta chi qukʼ, xaneʼ are chiʼ kqariq jun kʼax chqakʼutuʼ che kqaloqʼoqʼej y kqakubʼa qakʼuʼx chrij (Sant. 1:12). w24.03 28 párrs. 10, 11