Diciembre

¿La kkun ri Jehová che kikʼasuxik ri kaminaqibʼ? Kkunik. Rumal che are ri Dios «ri kʼo ronojel ukuʼinem» (Apoc. 1:8). Kkun che usachik uwach ri kamikal (1 Cor. 15:26). Jun chi rumal che ri Jehová kkunik keʼukʼastajisaj ri kaminaqibʼ are che tzʼaqat ri uchomanik. Ri Biblia kubʼij che retaʼm ri kibʼiʼ konojel ri chʼumil (Is. 40:26). Knaʼtaj che e jachin taq ri winaq e kaminaq, ri ubʼanik ri kiwiʼ, ri kekaʼyik y ronojel ri xkikʼulmaj (Job 14:13; Luc. 20:38). Rukʼ ri qilom chik kojkunik kqakubʼsaj qakʼuʼx che ri Jehová qas keʼukʼasuj na ri kaminaqibʼ rumal che kurayij kikʼasuxik y kkun che ubʼanik. Jun chi rumal che qas qetaʼm che kkun che kikʼasuxik ri kaminaqibʼ are che ojer kanoq xeʼukoj e jujun achijabʼ rech xekikʼasuj jujun winaq. Jun chke ri achijabʼ che xukojo are ri Jesucristo. w23.04 9, 10 párrs. 7-9

We rukʼ utz taq tzij kojchʼaw rukʼ ri winaq weneʼ kraj kretaʼmaj más chrij ri Biblia. Are kʼu, we ri winaq xa kutzeʼj qawach y kraj kchʼojinik, utz che kqaya kanoq (Prov. 26:4). Are kʼu kojonel ta ri winaq kkibʼan wariʼ. E kʼi weneʼ kkaj kojkitatabʼej. Junam rukʼ ri xqilo, are chiʼ kqakoj qachuqʼabʼ rech aninaq taj kpe qoyowal kuya kʼi utzilal chqe. Chataʼ che ri Jehová che katutoʼo rech kpe ta awoyowal are chiʼ ri nikʼaj chik kkitzukuj chʼoj o kʼax kechʼaw chrij ri qakojonik. Chnaʼtaj chqe che are chiʼ kpe ta qoyowal, kubʼano che kʼo ta chʼoj chqaxoʼl are chiʼ junam ta ri qachomanik kukʼ ri nikʼaj chik. Y are chiʼ kojtzijon rukʼ utzilal, wariʼ kubʼano che ri nikʼaj chik kkʼextaj ri kichomanik chqij y chrij ri Biblia. Rumal laʼ chqakojoʼ qachuqʼabʼ rech kojkun che ubʼixik chke ri winaq ri kkitaʼ chqe, rukʼ utz taq tzij y rukʼ ta oyowal (1 Ped. 3:15). ¡Chakʼutuʼ che kʼo anojibʼal y mape awoyowal! w23.09 19 párrs. 18, 19

Chqilaʼ kajibʼ ubʼantajik jun winaq che kʼo upaciencia. Nabʼe, aninaq taj kpe royowal. Aninaq taj kpe royowal rukʼ ri kbʼix che y kutoj ta ukʼaxel ri kbʼan che (Éx. 34:6). Ukabʼ, ri winaq che kʼo upaciencia keyenik. Kpe ta royowal are chiʼ aninaq taj kebʼan ri jastaq (Mat. 18:26, 27). Urox, ri winaq che kʼo upaciencia aninaq taj kchʼojinik. Are chiʼ kyaʼ jun chak che nim ubʼanik che jun winaq che kʼo upaciencia, aninaq taj kumajij y aninaq taj kukʼisilaʼ. Xaneʼ kchoman na chrij ri kraj kubʼano, rech utz kel ri uchak che kubʼano. Ukaj, ri winaq che kʼo upaciencia kukoj uchuqʼabʼ rech xaq ta are kchʼaw chrij ri kʼax che kuriqo. Ri winaq che kʼo upaciencia kkʼojiʼ jun utz ubʼantajik y kuya ta kan upatanexik ri Jehová rukʼ kikotemal apastaneʼ ri kʼax che kuriqo (Col. 1:11). Ri oj upatanel ri Jehová kqakoj qachuqʼabʼ rech amaqʼel kqakʼut paciencia. w23.08 20, 21 párrs. 3-6

Rajawaxik kqachajij ri qanimaʼ rumal che ri Jehová kunikʼoj. Wariʼ kraj kubʼij che ri Jehová kril ri kkil ta ri winaq, rumal che retaʼm ronojel. Are chiʼ ri Jehová krilo che rukʼ ronojel qanimaʼ kqanimaj ri e utaqanik sibʼalaj kojuloqʼoqʼej. We kʼo qanojibʼal kqakoj ta riʼ ri molom taq tzij re ri Satanás y kqabʼan ta qe ri kkibʼan ri winaq (Juan 4:14; 1 Juan 5:18, 19). Y are chiʼ kojqebʼ más rukʼ ri Jehová, más nim kqil wi y más kqaloqʼoqʼej. Jeriʼ kqabʼan ta jastaq che kuya bʼis che. Jun qachalal re Croacia Marta ubʼiʼ che xa jubʼiqʼ xraj xqaj pa jun mak, kubʼij: «Qas ta kʼo chi saq ri nuchomanik. Y kʼax xinbʼan che ukojik nuchuqʼabʼ chuwach ri nurayinik, are kʼu rumal ri xibʼin ibʼ kinnaʼ chuwach ri Jehová xinutoʼoʼ». ¿Jas xubʼano? Ri areʼ kubʼij che xchoman chrij ri kʼax che kuriqo we kmakunik. Xuqujeʼ ri oj chojchoman chrij ri kʼax kqariqo we kqabʼan jun mak. w23.06 20, 21 párrs. 3, 4

Ri Jesús qas retaʼm che ri urayibʼal ri Jehová are che kchʼajchʼobʼisax ri ubʼiʼ rumal ri molom taq tzij che bʼim chrij. Rumal laʼ xubʼij chke ri utijoxelabʼ ri rajawaxik kkitaʼ pa ri kichʼawem: «QaTat ri kʼo la pa ri kaj, chtastaj ri bʼiʼ la» (Mat. 6:9). Ri Jesús retaʼm che ri más nim ubʼanik pa ri kajulew are che kchʼajchʼobʼisax ri ubʼiʼ ri Jehová. Xaq xiw ri Jesús kʼi ubʼanom rech kchʼajchʼobʼisax ri ubʼiʼ ri Jehová. Are kʼu, are chiʼ xchap kumal ri ukʼulel, ¿jas molom tzij xbʼix chrij? Xbʼixik che tajin kutzʼilobʼisaj ri ubʼiʼ ri uTat. Chuwach ri Jesús utzʼilobʼisaxik ri ubʼiʼ ri Jehová are jun nimalaj makaj. Y are chiʼ majaʼ kchap bʼik, sibʼalaj kbʼisonik rumal che ya retaʼm chik che kbʼix na che tajin kutzʼilobʼisaj ri ubʼiʼ ri Jehová y kkamisax rumal wariʼ. Xuqujeʼ weneʼ rumal wariʼ «xel chʼuʼj ri ranimaʼ» are chiʼ majaʼ kkamisaxik (Luc. 22:41-44). w24.02 11 párr. 11

Rajawaxik che are más kqaloqʼoqʼej ri Jehová y ri Jesús chkiwach ri qafamilia (Mat. 10:37). Are kʼu wariʼ kraj ta kubʼij che kqaya ta chi ri kajwataj chke ri qafamilia, rumal che kojuqʼatej ta che upatanixik ri Jehová. We kqaj che ri Jehová y ri Jesús kekikot qukʼ rajawaxik kqaya ri kajwataj che ri qafamilia (1 Tim. 5:4, 8). We kqabʼano, sibʼalaj kojkikot riʼ. Are ri Jehová xbʼanow ri familias y rech kkiriq utzilal rajawaxik che ri e kʼulaj kkiloqʼoqʼej kibʼ, ri e tat nan kekiloqʼoqʼej y kekipixbʼej ri kalkʼwal, y ri akʼalabʼ rajawaxik keniman chke ri kitat kinan (Efes. 5:33; 6:1, 4). Apastaneʼ ri aweqelen kʼo pa ri afamilia, chakubʼsaj akʼuʼx chrij ri kubʼij ri Biblia. Are ta kabʼan ri kachomaj at, ri kkibʼan ri winaq pa ri lugar che katel wi o ri winaq che kkibʼij che kʼo nim ketaʼmabʼal. Chasikʼij ri kkibʼij ri e qawuj. Chilaʼ kubʼij wi ri rajawaxik kabʼano rech kabʼan ri kubʼij ri Biblia. w23.08 28 párrs. 6, 7

Utz che ri qachalal ixoqibʼ kketaʼmaj ubʼanik jujun taq chak. Ri kawetaʼmaj are chiʼ at akʼal na ktobʼan chawe pa ronojel ri akʼaslemal. Jun kʼutbʼal, chawetaʼmaj kattzʼibʼanik y katsikʼinik. Pa jujun taq tinamit, qas ta nim ubʼanik che jun ali kretaʼmaj ktzʼibʼanik y ksikʼinik. Are kʼu wariʼ sibʼalaj nim ubʼanik che jun cristiano (1 Tim. 4:13). Rumal laʼ mayaʼ bʼe che kʼo katqʼatenik rech katkunik katsikʼinik y kattzʼibʼanik. ¿Jas katutoʼ wi wariʼ? Katutoʼo rech kariq jun achak che katutoʼ pa ri akʼaslemal. Jun chi tobʼanik che kuya chawe, are che katux jun utz tijoxel y che qas katkunik kakʼut ri kubʼij ri Biblia. Are kʼu ri más nim ubʼanik are chiʼ kasikʼij ri Biblia y katchoman chrij, ktobʼanik rech kkʼojiʼ jun utz awachilanik rukʼ ri Jehová (1 Tim. 4:15). w23.12 20 párrs. 10, 11

Chqataʼ che ri Jehová che kojutoʼ rech kojqaj ta pa mak. Rumal che xa oj ajmakibʼ, rajawaxik kqachajij qibʼ chuwach ri mak. Y ri Satanás sibʼalaj kukoj uchuqʼabʼ rech kojqaj pa mak. Jun kʼutbʼal, kukoj ri música, películas, internet o ri videojuegos rech kutzʼilobʼisaj ri qachomanik. Rech jeriʼ kqabʼan jastaq che kqaj ta chuwach ri Jehová y kojqaj pa mak (Mar. 7:21-23; Sant. 1:14, 15). Kajwataj ri utobʼanik ri Jehová chqe rech kojqaj ta pa mak. Ri Jesús xubʼij che rajawaxik kqataʼ wariʼ pa ri qachʼawem: «Mujyaʼ la chuwach ri taqchibʼal makaj, xaneʼ chujtoʼ la chujesaj la pa uqʼabʼ ri bʼanal etzelal» (Mat. 6:13). Ri Jehová kraj kojutoʼo are kʼu rajawaxik kqataʼ che. Wariʼ kraj ta kubʼij che xaq xiw rajawaxik kqabʼan qachʼawem, xaneʼ rajawaxik kqachajij qibʼ oj rech kojqaj ta pa mak y rech kqabʼan ta qe jas ri kkibʼan ri winaq. w23.05 6, 7 párrs. 15-17

Are chiʼ jun kʼulaj nim kkil wi ri kachilanik rukʼ ri Jehová kʼax ta kkibʼan che unimaxik ri utaqanik y qas kekun riʼ kkichʼij apachike kʼax che kkiriqo. Xuqujeʼ ri kʼo jun utz kachilanik rukʼ ri Jehová kkikoj kichuqʼabʼ che resaxik uwach. Jun kʼutbʼal, keʼux e utz taq winaq, aninaq taj kpe koyowal y kekuyunik (Efes. 4:32–5:1). ¡Más kkʼojiʼ loqʼoqʼenik riʼ chkixoʼl we kkibʼan wariʼ! Jun qachalal Lena ubʼiʼ che 25 junabʼ chik kʼulanik, kubʼij wariʼ: «¡Kʼax ta uloqʼoqʼexik y unimaxik jun achajil che kʼo nim ukojonik!». Chqilaʼ jun kʼutbʼal che kubʼij pa ri Biblia. Chkixoʼl konojel ri rachalaxik ri David, ri Jehová are xuchaʼ ri José y ri María rech xeʼux utat unan ri Mesías. ¿Jasche are xeʼuchaʼo? Rumal che kʼo jun utz kachilanik rukʼ y retaʼm che are más nim kkil upatanexik. w23.05 21 párrs. 3, 4

Ri Jehová kubʼij chqe che kojniman chke ri yaʼom taqanik chke pa ri congregación. Paneʼ ri Jesús tzʼaqat, are kʼu e ukojom winaq pa ri congregación che xa ajmakibʼ. Jujun taq mul kʼax kqabʼan che kinimaxik ri taqanik che kkiyaʼo, más na are chiʼ kbʼix jun jastaq chqe che kqaj taj kqabʼano. Are waʼ ri xunaʼ ri apóstol Pedro. Are chiʼ jun ángel xubʼij che che keʼutij ri awaj che yaʼtal taj ketijik. Are kʼu ri Pedro oxmul xubʼij che kutij taj (Hech. 10:9-16). Chuwach ri areʼ utz ta ri xtaʼ che. Ri areʼ kʼamanaq chi che che jalan ri kubʼan che kibʼanik ri jastaq. Xuqujeʼ, ri apóstol Pablo xukʼutu che kraj knimanik are chiʼ ri e kʼamal taq bʼe pa Jerusalén xkibʼij che che rajawaxik keʼukʼam bʼi kajibʼ achijabʼ pa ri templo rech kukʼutu che tajin kniman che ri taqanik che uyaʼom ri Dios. Are kʼu ri Pablo retaʼm che ri cristianos rajawaxik ta chik kkinimaj ri taqanik che yaʼom che ri Moisés y che ri areʼ kʼo ta jun itzel jastaq ubʼanom. Paneʼ je wariʼ aninaq xniman che ri taqanik che xyaʼ che. Ri Biblia kubʼij: «Ri Pablo xeʼukʼam kʼu bʼik ri kajibʼ achijabʼ. Chukabʼ chi kʼu qʼij xkijosqʼij kibʼ» (Hech. 21:23, 24, 26). Rukʼ ri nimanik che xukʼutu xtobʼanik rech xkʼojiʼ jamaril chkixoʼl ri cristianos (Rom. 14:19, 21). w23.10 10 párrs. 15, 16

Weneʼ katchoman ta chrij ri xeʼn ibʼ. Are kʼu, ri kkaj keʼux rachiʼl ri Jehová rajawaxik kkixeʼj kibʼ chuwach. Qonojel rajawaxik kqaxeʼj qibʼ chuwach ri Jehová paneʼ kʼi o kʼi ta tiempo tajin kqapatanij. Are kʼu, ¿jas kraj kubʼij kqaxeʼj qibʼ chuwach ri Dios? ¿Jas kubʼan ri winaq che kuxibʼij ribʼ chuwach ri Dios o nim kril wi? Kubʼan ta jun jastaq che kubʼan kʼax che ri rachilanik rukʼ rumal che kuloqʼoqʼej. Ri Jesús are jun winaq che xuxibʼij ribʼ chuwach ri Dios (Heb. 5:7). Are kʼu ri xunaʼo are ta jun xibʼin ibʼ che kunaʼ jun chuwach jun itzel winaq (Is. 11:2, 3). Xaneʼ ri areʼ kuloqʼoqʼej ri uTat rukʼ ronojel ranimaʼ y kraj kunimaj (Juan 14:21, 31). Ri oj xuqujeʼ nim kqil wi ri Jehová y kqaj kqapatanij, rumal che are jun Dios kloqʼoqʼenik, kʼo unojibʼal, sukʼ y kʼo uchuqʼabʼ. Xuqujeʼ qetaʼm che we kojniman che, kkikot qukʼ. Y we kojniman taj kuya bʼis che rumal che sibʼalaj kojraj (Sal. 78:41; Prov. 27:11). w23.06 14 párrs. 1, 2; 15 párr. 5

Are chiʼ ri qʼatal tzij Uzías xux nim uqʼij, xsach pa ujolom che are ri Jehová xyaʼow ronojel che. ¿Jas kqetaʼmaj chrij? Utz che knaʼtaj chqe che ronojel ri tewchibʼal o ri eqeleʼn che yaʼom chqe are ri Jehová yaʼowinaq. Utz che are kqaya uqʼij ri Jehová rumal ri kojkun che ubʼanik y xa ta kqabʼan nimal (1 Cor. 4:7). Rajawaxik kojux machʼalik taq winaq y knaʼtaj chqe che kʼo jujun mul kajwatajik che kojpixbʼexik. Jun qachalal che más che 60 ujunabʼ kubʼij wariʼ: «Xwetaʼmaj che utz taj kinbʼan nim che wibʼ. Kinkoj nuchuqʼabʼ rech kinbʼan ri pixabʼ are chiʼ kbʼix chwe che utz ta ri tajin kinbʼano». Are chiʼ kqapatanij ri Jehová y kqakoj qachuqʼabʼ rech oj machʼalik taq winaq utz kel ronojel chqawach (Prov. 22:4). w23.09 10 párrs. 10, 11

Ri nabʼe taq cristianos xkikʼut kochʼonik. Rumal che xkiriq kʼi taq kʼax, xbʼan kʼax chke kumal ri kʼamal taq bʼe y kumal ri kifamilia (Mat. 10:21). Y rajawaxik xkichajij kibʼ chkiwach ri apóstatas, che xkaj xkijach uwach ri congregación rukʼ ri kkikʼutu (Hech. 20:29, 30). Paneʼ xkiriq kʼi taq kʼax, ri nabʼe taq cristianos xkichʼijo (Apoc. 2:3). ¿Jas xetoʼw che uchʼijik? Are ri kikʼutbʼal ri upatanelabʼ ri Dios che kʼo kan pa ri Escrituras Hebreas, junam rukʼ ri Job (Sant. 5:10, 11). Xkitaʼ kichuqʼabʼ che ri Jehová (Hech. 4:29-31). Y xnaʼtaj chke che ketewchix na rumal ri kikochʼonik (Hech. 5:41). Ri oj xuqujeʼ kojkunik kqachʼij ri kʼax we kojchoman chrij ri kikʼutbʼal ri upatanelabʼ ri Jehová che kʼo pa ri Biblia y pa ri e qawuj. w23.07 3 párrs. 5, 6

Ri Jehová y ri Jesús man kojkiya ta kanoq. Sibʼalaj kʼax xuriq ri apóstol Pedro rumal che xubʼij che kuchʼobʼ ta uwach ri Jesús. ¿La kukoj uchuqʼabʼ che uterenexik ri Jesús? Ri Jesús utoʼm che ri Jehová rech kuya uchuqʼabʼ ri ukojonik ri Pedro. Tekʼuriʼ ri Jesús xubʼij che ri Pedro che ubʼanom uchʼawem puwiʼ y retaʼm che are chiʼ kqʼax ri tiempo, kkun na che kitoʼik ri cristianos rech kʼo jun ko kikojonik (Luc. 22:31, 32). ¡Qastzij riʼ che xuya uchuqʼabʼ ri Pedro are chiʼ xchoman chrij ri e tzij che xubʼij ri Jesús! Ri oj xuqujeʼ jujun taq mul rajawaxik kqachaʼ ubʼanik jun jastaq pa ri qakʼaslemal. Are chiʼ kqabʼan wariʼ, qastzij riʼ che ri Jehová keʼukoj ri kʼamal taq bʼe y rukʼ loqʼoqʼebʼal kkiya qachuqʼabʼ (Efes. 4:8, 11). Xqilo che ri Jehová xuya ri kajwataj che ri Pedro y ri e nikʼaj chik apóstoles. Jeʼ kubʼan che qatoʼik kimik we are kqaya nabʼe pa qakʼaslemal ri upatanixik. w23.09 24, 25 párrs. 14, 15

Ri Jehová kril ri kqabʼan che kitoʼik ri qachalal paneʼ xa jubʼiqʼ y kutoj ukʼaxel chqe. We xatux tobʼanel o kʼamal bʼe ojer kanoq, sachinaq ta che ri Jehová ronojel ri loqʼoqʼebʼal y ri utzilal che xakʼutu (1 Cor. 15:58). Y ri loqʼoqʼebʼal che tajin kakʼut kimik sibʼalaj nim krilo. Ri Jehová kraj che kqaloqʼoqʼej ri areʼ y ri e qajil qatzʼaqat. Rech kkʼiy ri qaloqʼoqʼenik che ri Jehová rajawaxik kqasikʼij ri uTzij, kojchoman chrij y kqabʼan qachʼawem ronojel taq qʼij. Y rech kqakʼutu che qas keqaloqʼoqʼej ri qachalal, rajawaxik kqatzukuj ri kqabʼan che kitoʼik. Are chiʼ knimar más ri qaloqʼoqʼenik kojutoʼo rech más knimar ri qachilanik rukʼ ri Jehová y kukʼ ri qachalal, jun achilanik che kʼo ta ukʼisik. w23.07 10 párr. 11; 11 párr. 13; 13 párr. 18

Chqajujunal ri oj cristianos kqilo jas kqabʼan che uchajixik qibʼ rech kojyawaj taj. Rumal laʼ, are chiʼ jun cristiano rajawaxik kbʼe rukʼ jun kunanel rajawaxik kunimaj ri kubʼij ri Biblia rech kukoj ta kikʼ o kbʼe kukʼ ajqʼijabʼ che utaʼik ukunabʼal o jastaq che kʼo ubʼanik rukʼ ri itzel taq uxlabʼal o nikʼaj chik che kʼo ubʼanik rukʼ ri itzinik. Rajawaxik kqaxutuj wariʼ (Hech. 15:20; Gál. 5:19, 20). Are kʼu chqajujunal kqachaʼ we kojbʼe rukʼ jun kunanel o kojbʼe taj. Xuqujeʼ utz che knaʼtaj wariʼ chqe: 1) che xaq xiw ri uQʼatbʼal tzij ri Dios kkunik kusachisaj kiwach ri yabʼil (Is. 33:24); 2) chqajujunal ri oj cristianos rajawaxik «qas qetaʼm jas ri» utz chqe (Rom. 14:5); 3) kqaqʼat ta tzij pa kiwiʼ ri qachalal y kqaj taj xa rumal qech kemakunik (Rom. 14:13), y 4) ri oj cristianos kqaj qibʼ y nim kqil wi ri kkichaʼ ubʼanik ri nikʼaj chik y are ta ri kqaj oj kqabʼano (Rom. 14:15, 19, 20). w23.07 24 párr. 15

¿La nim kawil ri awachilanik rukʼ ri Dios? ¡Qastzij riʼ che nim kawil wi! Pa kʼi taq junabʼ e kʼi winaq kinaʼom wariʼ (Sal. 104:33, 34). E kʼi kiyaʼom kan ubʼanik jujun taq jastaq che utz kkilo rech kkipatanij más ri Dios, jun chke are ri nazareos re ri ojer Israel, o «tastalik». Rumal che ri sukʼalaj taq israelitas riʼ xkiya kan ubʼanik jujun taq jastaq che utz kkilo rech qas utz kkibʼan che upatanexik ri Dios, qas taqal waʼ taq tzij ri chke. Ri Taqanik che xyaʼ che ri Moisés kuya bʼe che jun achi o jun ixoq kutzujuj che ri Dios che kraj kupatanij y rech kux nazareo pa jun tiempo (Núm 6:1, 2). Ri winaq che kraj kux nazareo, kunimaj na jujun taq taqanik che konojel taj rajawaxik kkinimaj. ¿Jasche jun winaq kraj kux nazareo? Qastzij riʼ che xa rumal kuloqʼoqʼej ri Jehová y che kumaltyoxij ronojel ri tewchibʼal che yaʼom che (Deut. 6:5; 16:17). w24.02 14 párrs. 1, 2

Pa ri Biblia, ri tzij «sukʼilal» are kchʼaw chrij ri loqʼoqʼebʼal che kunaʼ jun winaq che jun chik. Kʼi taq mul are kchʼaw chrij ri loqʼoqʼebʼal che kunaʼ ri Dios chke ri upatanelabʼ. Xuqujeʼ kchʼaw chrij ri loqʼoqʼebʼal che kkinaʼ ri upatanelabʼ ri Dios chbʼil taq kibʼ (2 Samuel 9:6, 7). Ri Jehová kraj che ri oj xuqujeʼ kojux sukʼ. Are chiʼ kqʼax ri tiempo, más kojux sukʼ. Wariʼ xilitaj rukʼ ri profeta Daniel. Pa ronojel ri ukʼaslemal, ri Daniel kʼi taq mul xukʼut sukʼilal che ri Jehová. Are kʼu, are chiʼ 90 chi ujunabʼ xuriq kʼax ri usukʼilal. Jujun chke ri winaq che nim kibʼanik pa ri qʼatbʼal tzij, itzel kkil ri Daniel y nim ta kkil wi ri Jehová. Rumal laʼ xkitzukuj ri xkibʼano rech kkisachisaj uwach ri Daniel, xkibʼano che ri Darío xuya jun taqanik che xuya pa kʼax ri usukʼilal ri Daniel. Rech kukʼut sukʼilal che ri qʼatal tzij rajawaxik kubʼan ta uchʼawem che ri Dios pa 30 qʼij, are kʼu ri Daniel xubʼan ta wariʼ (Dan. 6:12-15, 20-22). w23.08 5 párrs. 10-12

Ri Jehová kraj che amaqʼel kqakʼut loqʼoqʼebʼal chke konojel ri qachalal. We kʼo jun chke ri qachalal pa ri congregación che xubʼan kʼax chqe, utz che kojchoman chrij ri rumal che xubʼano. Chqachomaj che chubʼanik taj xubʼano y che tajin kukoj uchuqʼabʼ che ubʼanik ri kqaj chuwach ri Jehová (Prov. 12:18). Paneʼ kʼi kojsach wi, are kʼu ri Jehová kojuloqʼoqʼej. Kojuya ta kan qatukel are chiʼ kʼo kojsach wi y amaqʼel taj royowal qukʼ (Sal. 103:9). ¡Sibʼalaj nim ubʼanik che kqesaj uwach ri Jehová y kqakuy kimak ri qachalal! (Efes. 4:32–5:1). Xuqujeʼ rajawaxik knaʼtaj chqe che oj kʼo pa ri kʼisbʼal taq qʼij y che rajawaxik oj utz kukʼ ri qachalal. Y utz che knaʼtaj chqe che kqariq na más kʼax y che weneʼ kojkʼam bʼi pa cárcel. Are chiʼ kqakʼulmaj wariʼ qas kajwataj na riʼ ri kitobʼanik ri qachalal chqe (Prov. 17:17). w24.03 15, 16 párrs. 6, 7

Ri Biblia xuqujeʼ kchʼaw chkij nikʼaj chi alabʼom alitomabʼ che xkikoj kichuqʼabʼ che upatanexik ri Jehová y xkiriq utzilal junam rukʼ ri David. Are chiʼ kʼa ala na, xuchaʼ upatanexik ri Jehová y are chiʼ xqʼax ri tiempo, xux qʼatal tzij (1 Rey. 3:6; 9:4, 5; 14:8). We kawetaʼmaj más chrij ri ukʼaslemal ri David, wariʼ katutoʼo rech kapatanij ri Jehová rukʼ sukʼilal. Jun chik che katkunik kabʼano, are che kanikʼoj ri kikʼaslemal ri Marcos y ri Timoteo rech kawetaʼmaj más chkij. E kebʼ xkipatanij ri Jehová rukʼ sukʼilal are chiʼ kʼa e alabʼom na y qas xetaʼmax kiwach rumal wariʼ. Ri kachaʼ ubʼanik kimik pa ri akʼaslemal kʼo ubʼanik rukʼ ri kariq na pa ri petinaq. We kakubʼsaj akʼuʼx chrij ri Jehová, ri areʼ katutoʼo rech utz ri kachaʼ ubʼanik pa ri akʼaslemal. Katkunik kariq utzilal y kikotemal pa ri akʼaslemal. Y masach pa ajolom che ri Jehová nim kril wi ri kabʼan che upatanexik. Qastzij che kqariq kikotemal pa ri qakʼaslemal are chiʼ are kqachaʼ upatanexik ri Jehová rumal che sibʼalaj kojuloqʼoqʼej. w23.09 13 párrs. 18, 19

Ri apóstol Pablo qas retaʼm che ri e rachalal e ajmakibʼ. Jun kʼutbʼal, are chiʼ xumaj bʼenam pa ri congregación re Jerusalén, e kʼi xkikubʼsaj ta kikʼuʼx chrij y xkixiʼj kibʼ chuwach (Hech. 9:26). Are chiʼ xqʼax ri tiempo, nikʼaj chik kʼax xechʼaw chrij kukʼ nikʼaj chi winaq (2 Cor. 10:10). Tekʼuriʼ ri Pablo xrilo are chiʼ jun chke ri cristianos che nim ukojonik, utz ta ri xuchaʼ ubʼanik y che weneʼ kubʼano che ri nikʼaj chik kemakunik (Gál. 2:11, 12). Xuqujeʼ xumay ri xubʼan ri Marcos, jun chke ri rachiʼl (Hech. 15:37, 38). Ri Pablo kʼo rumal che xuya kan kachilaxik ri winaq riʼ che utz ta ri xkibʼano y kʼax xechʼaw chrij. Are kʼu, xuya taj che wariʼ xubʼano che xuya kan upatanexik ri Jehová y kʼo ta itzelal xuchomaj chkij. ¿Jas xtoʼw che ubʼanik? Ri Pablo sibʼalaj keʼuloqʼoqʼej ri rachalal, rumal laʼ are ta xril ri xesach wi, xaneʼ are xril ri utz taq kibʼantajik. Y ri loqʼoqʼebʼal che xunaʼ chke xubʼano che xukuy kimak, rumal laʼ xubʼij ri e tzij kʼo pa ri texto re kamik. w24.03 15 párrs. 4, 5

Ri Biblia kukʼutu che nim ubʼanik che jun winaq kunimarisaj ta ribʼ y kpe ta royowal. Are chiʼ ri Isaac kʼo pa Guerar, ri filisteos che e kʼo chilaʼ itzel xkilo y xekimuq ri kʼwaʼ che kikʼotom kan ri rajchakibʼ ri Abrahán. Ri Isaac xpe ta royowal, xaneʼ xbʼe pa jun chi lugar y xukʼot chi nikʼaj kʼwaʼ chilaʼ (Gén. 26:12-18). Are kʼu ri filisteos xkibʼij che xuqujeʼ kech ri jaʼ ri xuriq ri Isaac. Paneʼ je wariʼ ri xkʼulmatajik, ri Isaac xpe ta royowal (Gén. 26:19-25). ¿Jas xtoʼwik rech xpe ta royowal are chiʼ xbʼan wariʼ che? Qastzij che ri xtoʼwik are ri ukʼutbʼal ri utat. Ri Abrahán aninaq taj xpe royowal y kbʼix wariʼ chrij ri Sara jun ixoq «machʼal pa jamaril» (1 Ped. 3:4-6; Gén. 21:22-34). w23.09 15 párr. 4

Are chiʼ xqʼax ri tiempo, ri Jehová xutaq lo ri uKʼojol cho ri uwach Ulew. Ri Jesús xutzijoj ri uQʼatbʼal tzij ri Dios chke ri winaq y xuya ri ukʼaslemal rech keresaj ri winaq chuxeʼ ri kamikal. Tekʼuriʼ xkʼastajisaxik xbʼe pa ri kaj rech kuqʼat lo tzij pa kiwiʼ ri winaq. Ri qas kuya ubʼixik ri Biblia are ri kubʼan na ri Jehová che uchʼajchʼobʼisaxik ri ubʼiʼ y ri kubʼan che utzʼaqatisaxik ri urayibʼal cho ri uwach Ulew rukʼ ri uQʼatbʼal tzij. Kʼo ta nijun kqʼaten ri Jehová rech kutzʼaqatisaj ri urayibʼal. Ri areʼ kubʼij che kubʼan na ronojel (Is. 46:10; Heb. 6:17, 18). Are chiʼ kopan ri tiempo, ri uwach Ulew kux na kotzʼiʼj y konojel ri e kalkʼwal ri Adán kux na tzʼaqat ri kikʼaslemal y kekam ta chik (Sal. 22:26). Xaq xiw ta waʼ ri uchomam ubʼanik ri Jehová, xaneʼ kʼo nikʼaj chik kraj kubʼano. Ri jun chik che kraj ri Jehová kubʼano, are che konojel ri winaq cho ri uwach Ulew y ri ángeles pa ri kaj keʼux xa jun familia che keniman che ri Jehová y nim kkil wi ri uQʼatbʼal tzij (Efes. 1:8-11). ¿La mat qastzij che sibʼalaj mayibʼal ri kubʼan na ri Jehová che utzʼaqatisaxik ri urayibʼal? w23.10 20 párrs. 7, 8

Are chiʼ majaʼ naj xeʼopan ri judíos pa Jerusalén, xkiriq kʼax rumal ri política, rumal che kʼo ta chi kipwaq y kumal ri kikʼulel. Rumal che kʼi kʼax xkiriq pa ri kikʼaslemal kʼax xkibʼan che usukʼumaxik ri templo. Rumal laʼ ri Jehová xutaq ri Ageo y ri Zacarías rech kkiya kichuqʼabʼ ri judíos (Ageo 1:1; Zac. 1:1). Junam rukʼ ri kqil na, utz xel ri kichak che xkibʼano. Are kʼu okʼowinaq chi 50 junabʼ jumul chik xubʼan chi kebʼ kikʼuʼx. Rumal laʼ ri Esdras, che kʼo pa Babilonia xtzalij pa Jerusalén rech kkitoʼ ri tinamit y kkimajij chi uqʼijilaxik ri Jehová (Esd. 7:1, 6). Ri profecías rech Ageo y Zacarías xeʼutoʼ ri upatanelabʼ ri Jehová re ojer rech kkiya ta kan upatanexik ri Jehová paneʼ xkiriq kʼax, xuqujeʼ kukubʼsaj qakʼuʼx oj kimik y kojutoʼo apastaneʼ ri kqakʼulmaj (Prov. 22:19). w23.11 14, 15 párrs. 2, 3

¿Jas kqabʼan che ukʼutik ri loqʼoqʼenik che kqanaʼ chke ri qachalal? Jun ukʼutik are che kqakubʼsaj kikʼuʼx. Y rech kqaya ta kan ubʼanik wariʼ, rajawaxik kqakʼutu che nim keqil wi. ¿Jas más kojkunik kqabʼano rech kqakʼutu che kqaloqʼoqʼej qibʼ? Are che kqakuy kimak ri nikʼaj chik. ¿Jasche nim ubʼanik che kqaya ta kan ukʼutik loqʼoqʼenik kimik? Chqilampeʼ ri xubʼij ri Pedro: «Kpe kʼu na ri qʼij are taq kekʼis konojel ri jastaq. Utz bʼaʼ chixchomanoq, [...] chikojoʼ ichuqʼabʼ che uloqʼoqʼexik iwibʼ» (1 Ped. 4:7, 8). ¿Jas ri kkʼulmataj na rumal che más naqaj chi kʼo wi ri kʼisbʼal taq qʼij? Are chiʼ ri Jesús xtzijon kukʼ ri utijoxelabʼ xubʼij wariʼ: «Ketzelax na iwach kumal konojel ri winaq rumal rech ri nubʼiʼ» (Mat. 24:9). Rech kqaya ta kan upatanexik ri Jehová paneʼ itzel kojkil ri winaq, rajawaxik kkʼojiʼ junamil chqaxoʼl. Ri Satanás kraj kutukij qawach, are kʼu kkun ta che ubʼanik wariʼ we kqaya ta kan uloqʼoqʼexik qibʼ (Filip. 2:1, 2). w23.11 13 párrs. 18, 19

Ri qastzij che kʼo pa ri Biblia sibʼalaj kʼo uchuqʼabʼ. Are chiʼ kqaya ubʼixik chke ri winaq jachin riʼ ri Jehová y jas ri ubʼantajik, wariʼ kuya kʼi utzilal. Are chiʼ kkilo che qastzij ta ri kubʼij ri Satanás, wariʼ kubʼano che kkʼextaj ri kichomanik chrij ri Jehová y kkilo junam rukʼ ri kqabʼan oj che rilik. Sibʼalaj kkimay ri uchuqʼabʼ ri Jehová (Is. 40:26). Ri usukʼilal kubʼano che kkinaʼ utzilal y kkixiʼj ta chi kibʼ (Deut. 32:4). Sibʼalaj kkimay ri unojibʼal (Is. 55:9; Rom. 11:33). Y kuya kubʼsal kikʼuʼx are chiʼ kketaʼmaj che ri Jehová are loqʼoqʼebʼal (1 Juan 4:8). Are chiʼ kketaʼmaj uwach ri Jehová, kkilo che kekunik kkiriq jun kikʼaslemal che kʼo ta ukʼisik y keʼux ralkʼwal. ¿La mat qastzij che are jun eqeleʼn kitoʼik ri winaq rech kketaʼmaj uwach ri Jehová? Xuqujeʼ, are chiʼ kqabʼan wariʼ, kojux «rajchakibʼ ri Dios» (1 Cor. 3:5). w24.02 12 párr. 15

¿La tajin kawetaʼmaj chrij ri Biblia? ¿O la e Testigos ri anan atat y tajin kkikʼut ri qastzij chawach? Apastaneʼ, are kʼu weneʼ tajin katchoman chrij we kabʼan aqasanjaʼ. ¡Y utz che kachomaj wariʼ! Are kʼu kʼo rajawaxik kabʼano are chiʼ majaʼ kabʼan ri aqasanjaʼ, kajach ri akʼaslemal che ri Jehová. ¿Jas kubʼan jun winaq are chiʼ kujach ri ukʼaslemal che ri Jehová? Kubʼan uchʼawem y kubʼij che xaq xiw ri areʼ kupatanij pa ronojel ri ukʼaslemal. Pa nikʼaj chi tzij, jetaneʼ kubʼij che ri Jehová che amaqʼel kuloqʼoqʼej rukʼ ronojel ranimaʼ, rukʼ ronojel ri uchomanik y rukʼ ronojel uchuqʼabʼ (Mar. 12:30). Are chiʼ jun winaq kujach ri ukʼaslemal che ri Jehová, xaq xiw ri areʼ etaʼmanaq y ri Jehová. Are kʼu ri qasanjaʼ, kbʼan chkiwach konojel; je wariʼ ri winaq kukʼut chkiwach konojel che ujachom chi ri ukʼaslemal che ri Jehová. Ri ujachik ri kʼaslemal che ri Jehová sibʼalaj nim ubʼanik. Qastzij riʼ che qas kawaj kabʼan ri xabʼij che ri Jehová y ri areʼ xuqujeʼ kraj che qas kabʼano (Ecl. 5:4). w24.03 2 párr. 2; 3 párr. 5

Konojel ri e kʼulanik «kkiriq na kʼax pa ri kikʼaslemal» junam rukʼ ri kubʼij ri Biblia (1 Cor. 7:28). ¿Jasche? Rumal che ri achi y ri ixoq e ajmakibʼ. Xuqujeʼ junam ta ri kibʼantajik y jalan ri jastaq che utz kkilo weneʼ junam ta ri cultura che kepe wi y junam ta ri xbʼan che kikʼiyisaxik. Y weneʼ are chiʼ xqʼax ri tiempo kkilo che kʼo jastaq che utz ta kubʼan ri kikʼulaj che xkil taj are chiʼ tajin kkichʼabʼej kibʼ. Ronojel wariʼ weneʼ kubʼano che kuriq kʼax ri kikʼulanem. Kʼi taq mul ri kkibʼano are che kkibʼij che ri jun chik are ajmak, kkichomaj ujachik kibʼ y kkitoʼ kibʼ chuwach ri kʼax che kkikʼulmaj. Are kʼu ¿la utz che jewaʼ kkibʼano? Utz taj, ri Jehová kraj che ri e kʼulanik nim kkil wi ri kʼulanem, paneʼ jun chke kʼax uchʼabʼexik. w24.03 16 párr. 8; 17 párr. 11

Are chiʼ xbʼantaj ri aqasanjaʼ, ri aweyebʼal más tajin knimarik, rumal che más tajin kawetaʼmaj chrij ri Biblia (Heb. 5:13–6:1). Qastzij riʼ che weneʼ akʼulmam junam rukʼ ri kubʼij Romanos 5:2-4, che ariqom kʼax pa ri akʼaslemal y awilom che ri Jehová at uyaʼom ta kanoq. Rumal che ri Jehová kkikot awukʼ, qas kakubʼsaj akʼuʼx chrij che kubʼan na ri utzujum. Ri aweyebʼal kimik más kʼo na uchuqʼabʼ y sibʼalaj nim chi kimik. Kʼo kubʼan pa ronojel ri akʼaslemal. Jun kʼutbʼal, kakʼut rukʼ ri kabʼan che kichʼabʼexik ri afamilia, ri kachaʼ ubʼanik pa ri akʼaslemal y ri kabʼan che ukojik ri atiempo. Are chiʼ ri apóstol Pablo xubʼij che are chiʼ kqachʼij jun kʼax wariʼ kuya eyebʼal chqe y xubʼij jun jastaq che nim ubʼanik: qas qetaʼm che wajun eyebʼal riʼ qas ktzʼaqat na (Rom. 15:13). w23.12 12, 13 párrs. 16-19.

We tajin kqakʼulmaj jun nimalaj kʼaxkʼolil pa ri qakʼaslemal, weneʼ ksach ri qachomanik y kojkun ta chi che ubʼanik ri kqabʼan ronojel taq qʼij. Weneʼ kqanaʼo che ri kʼax che tajin kqakʼulmaj pa ri qakʼaslemal uternelon taq ribʼ junam rukʼ ri kubʼan ri olas re ri mar che jun barco are chiʼ más kʼo uchuqʼabʼ. ¿Jas kubʼan ri Jehová che qatoʼik are chiʼ kqanaʼo che kqachʼij ta chi ri kʼax che tajin kqakʼulmaj? Ri areʼ kubʼij che kojutoʼ na chuwach ri kʼax. Are chiʼ jun barco kʼo pa ri mar y kʼo kaqiqʼ jabʼ, weneʼ ri mar kuseyopisaj rukʼ chuqʼabʼ. Rech kkiriq ta kʼax, jujun barcos kʼo tobʼal ke chkixeʼ che kbʼix estabilizadores che. Wariʼ kubʼano che ri barco más ta ksilabʼik, ri winaq kkixiʼj ta kibʼ y kkiriq ta kʼax. Are kʼu, jujun chke ri tobʼanik riʼ más ktobʼanik are chiʼ ri barcos tajin kebʼinik. Xa junam rukʼ, we kqaj che ri Jehová kojutoʼo are chiʼ tajin kqariq kʼax, rajawaxik che kqaya ta kan upatanexik. w24.01 22 párrs. 7, 8

Are chiʼ kaxiʼj awibʼ, chataʼ wariʼ chbʼil awibʼ: «¿Jas xubʼan ri Jehová ojer kanoq?». Chatchoman chrij ronojel ri ubʼanom ri Jehová. Jun kʼutbʼal, are chiʼ kojchoman chrij ri kubʼan ri Jehová che kichajixik ri alaj taq chikop che kerapanik y ri e kotzʼiʼj —che kejunamataj ta qukʼ che kojkunik kqaqʼijilaj ri Dios—, kuya qachuqʼabʼ retaʼmaxik che xuqujeʼ kojuchajij (Mat. 6:25-32). Xuqujeʼ chatchoman chrij ri xubʼan che kitoʼik ri upatanelabʼ ojer kanoq. Katkunik katchoman chrij ri ukʼutbʼal jun upatanel ri Jehová che kʼo pa ri Biblia o kasikʼij ri ukʼutbʼal jun upatanel re kimik. Xuqujeʼ, chatchoman chrij ri tajin kubʼan ri Jehová che achajixik kimik. ¿Jas xubʼan che atoʼik rech xawetaʼmaj ri qastzij? (Juan 6:44). ¿Jas ubʼanom che utzalixik uwach ri achʼawem? (1 Juan 5:14). ¿Jas tobʼanik kuya chawe ronojel taq qʼij ri ukamikal ri Jesús? (Efes. 1:7; Heb. 4:14-16). w24.01 4 párr. 6; 7 párr. 17