Noviembre

¿Jas más rajawaxik kqabʼano rech kqaya qachuqʼabʼ pa ri e riqbʼal ibʼ? We ri ix tat nan e kʼo iwalkʼwal che e nitzʼaq na cheʼitoʼ rech kkiya jujun kicomentarios. Jujun taq mul knikʼox kʼutunem pa ri riqbʼal ibʼ che kchʼaw chrij ri kʼax kkʼulmataj pa ri kʼulanem o nikʼaj chik. Are kʼu ri akʼalabʼ kekunik kkibʼan kicomentarios. Xuqujeʼ utz kibʼij chke ri iwalkʼwal jasche kbʼan taj kyaʼ ronojel ri comentarios chke are chiʼ kkiyak ri kiqʼabʼ, wariʼ keʼutoʼ rech kpe ta koyowal o kebʼison taj chiʼ kyaʼ ta chke (1 Tim. 6:18). Qonojel kojkunik kqaya qacomentarios che uyaʼik uqʼij ri Jehová y kuya kichuqʼabʼ ri e qachalal (Prov. 25:11). Jujun taq mul weneʼ kuyaʼ kojchʼaw chrij ri qakʼulmam pa ri qakʼaslemal, are kʼu rajawaxik are ta más kojchʼaw chqij oj (Prov. 27:2; 2 Cor. 10:18). Xaneʼ are más chojchʼaw chrij ri Jehová, ri utinamit y ri uTzij (Apoc. 4:11). w23.04 24, 25 párrs. 17, 18

Rech kojkʼaskʼatik y kqachʼobʼ ri kqabʼano rajawaxik kqakʼut loqʼoqʼebʼal (Mat. 22:37-39). Jun kʼutbʼal, ri loqʼoqʼebʼal che kqanaʼ che ri Jehová kojutoʼ rech kqaya ta kan utzijoxik ri utzij paneʼ kqariq kʼax (2 Tim. 1:7, 8). Y rumal che keqaj ri winaq kqakoj qachuqʼabʼ che utzijoxik ri utzij ri Dios chke, paneʼ pa teléfono o pa carta. Y kqachomaj taj che kkikʼex ta wi ri kikʼaslemal (Ezeq. 18:27, 28). Xuqujeʼ keqaloqʼoqʼej ri qachalal are chiʼ kqakubʼsaj kikʼuʼx y kqaya kichuqʼabʼ (1 Tes. 5:11). Ri ajchʼojabʼ che junam kechʼojinik kkitoʼ la kibʼ. Rajawaxik je kqabʼan oj kukʼ ri qachalal, kqabʼan ta kʼax chke y kqatoj ta ukʼaxel ri kʼax che kbʼan chqe (1 Tes. 5:13, 15). Jun chi ukʼutik kqabʼano che keqaj ri e qachalal are che nim keqil wi ri e kʼamal taq bʼe pa ri congregación (1 Tes. 5:12). w23.06 10 párr. 6; 11 párrs. 10, 11

Jun jastaq kqabʼano rech kqakowirisaj ri qakojonik are che kojchoman chrij ri xubʼan ri Jesús pa qawiʼ. Rumal ri xubʼan pa qawiʼ qas kbʼantaj ri utzujum ri Jehová. Rajawaxik kojchoman chrij ri xkibʼan ri Jehová y ri Jesús pa qawiʼ. Rech jeriʼ más kqakubʼsaj qakʼuʼx chrij ri Jehová che qas kukʼam lo ri kʼakʼ ulew che utzujum. Ri Jehová xuya bʼe che xpe ri loqʼalaj uKʼojol cho ri uwach Ulew. Are chiʼ xpe ri Jesús waral xuriq kʼi taq kʼax y más na chiʼ xkamisaxik. Sibʼalaj kʼax xunaʼ riʼ ri Jehová are chiʼ xril wariʼ rumal che are jun tat kloqʼoqʼenik. Are kʼu rumal che kraj kqariq jun utz kʼaslemal, xuya bʼe che xkam ri uKʼojol (Juan 3:16; 1 Ped. 1:18, 19). Ri Jehová nim xutojbʼej ri qamak rumal laʼ qas kuya na ri kʼaslemal che kʼo ta ukʼisik chqe. w23.04 27 párrs. 8, 9

¿La kraj ri Jehová keʼukʼasuj ri kaminaqibʼ? Kraj. Rumal laʼ ri areʼ xuya bʼe che ktzʼibʼax kan ri kʼastajibʼal pa ri Biblia (Is. 26:19; Apoc. 20:11-13). Y are chiʼ ri areʼ kutzujuj jun jastaq qas kubʼano (Jos. 23:14). Xuqujeʼ kurayij kikʼasuxik ri kaminaqibʼ. Chojchoman chrij ri xubʼij ri Job. Ri areʼ xubʼij che we kkamik, ri Jehová kurayij ukʼasuxik (Job 14:14, 15). Wariʼ kunaʼtasaj chqe che ri Jehová kurayij kikʼasuxik ri upatanelabʼ che e kaminaq, kraj che keyawaj ta chik y kekikotik. ¿Jas kubʼan na ri Jehová chke ri winaq che xekun taj xketaʼmaj uwach? Ri areʼ kubʼij che keʼuwalajisaj chi na (Hech. 24:15). Kraj che keʼux rachiʼl y kkiriq jun kʼaslemal che kʼo ta ukʼisik cho ri uwach Ulew (Juan 3:16). w23.04 9 párrs. 5, 6

¿Jas kabʼano rech más kakubʼsaj akʼuʼx chrij ri eyebʼal? We ri aweyebʼal are waral cho ri uwach Ulew, chasikʼij ri kubʼij ri Biblia chrij ri kotzʼiʼj uwach Ulew y chachomaj che at kʼo chilaʼ (Is. 25:8; 32:16-18). Chatchoman chrij ri kʼaslemal pa ri kʼakʼ uwach Ulew. ¿La at kʼo at chilaʼ? We amaqʼel kojchoman chrij ri kʼaslemal pa ri kʼakʼ uwach Ulew, ri kʼax che kqariq kimik «man al taj, ri xaq okʼowel» (2 Cor. 4:17). Ri eyebʼal che kuya ri Jehová kuya qachuqʼabʼ, uyaʼom ronojel ri kajwataj chqe rech ko ri qakojonik. Rumal laʼ, are chiʼ kqanaʼo che kojkun ta che ubʼanik jun eqeleʼn che yaʼom chqe, kojkun taj kqachʼij jun kʼax o kojkun ta chik kqapatanij ri Jehová rukʼ kikotemal, chqabʼanaʼ qachʼawem che rukʼ ronojel qanimaʼ y chqasikʼij ri Biblia rech ri Jehová kukʼam qabʼe. Chqakʼamaʼ ri tobʼanik che kkiya ri qachalal chqe y amaqʼel chojchoman chrij ri eyebʼal. Are kʼu ri Jehová «rukʼ ri nimalaj ukuʼinem» kuya na qachuqʼabʼ rech kojkun che uchʼijik ronojel kʼax y kqakuy ronojel ri kbʼan chqe (Col. 1:11). w23.10 17 párrs. 19, 20

Kʼo kʼi kojkunik kqamaltyoxij che ri Jehová. Chqamaltyoxij ronojel ri utz taq jastaq uyaʼom chqe (Sant. 1:17). Junam rukʼ ri jeʼlalaj uwach Ulew, ri jastaq ubʼanom chuwach, ri qakʼaslemal, ri qafamilia, ri qachiʼl, ri kʼaslemal kʼo ta ukʼisik kuya na chqe y ri rachilanik. ¿Jasche rajawaxik kojmaltyoxin che ri Jehová? Rumal che oj kʼo chkixoʼl winaq che kemaltyoxin taj, xaq xiw kkaj más jastaq y are ta kkimaltyoxij ri kʼo kukʼ. We kqabʼan qe junam kukʼ ri winaq riʼ weneʼ xaq xiw kqataʼ chi jastaq pa ri qachʼawem. Rech kkʼulmataj ta waʼ qukʼ rajawaxik kqamaltyoxij che ri Jehová ronojel ri uyaʼom chqe (Luc. 6:45). w23.05 4 párrs. 8, 9

Ri Jehová kojuloqʼoqʼej y kraj taj che kqariq kʼax (Is. 63:9). Are kʼu kresaj ta ronojel ri kʼax che kqariqo che ri Biblia kujunamaj rukʼ nimaʼq taq jaʼ y qʼaqʼ (Is 43:2). Ri kubʼij chqe are che kojutoʼo are chiʼ kojqʼax pa apachike kʼax y kuya taj che kqariq jun kʼax che kojkun ta che uchʼijik. Xuqujeʼ ri Jehová kuya ri ruxlabʼixel chqe rech kqachʼij ri kʼax (Luc. 11:13; Filip. 4:13). Rumal laʼ qas qetaʼm che kojutoʼo rech kojux sukʼ che. Ri Jehová kraj che kqakubʼsaj qakʼuʼx chrij (Heb. 11:6). Weneʼ kqachomaj che sibʼalaj kʼax ri tajin kqakʼulmaj y che rumal laʼ kqachomaj che ri Jehová kojutoʼ taj. Are kʼu ri Biblia kubʼij chqe che rukʼ ri uchuqʼabʼ ri Dios jetaneʼ kojkunik kqaxalqʼatij jun tapya (Sal. 18:29). Rumal laʼ mubʼan kebʼ qakʼuʼx xaneʼ chqabʼanaʼ qachʼawem che ri Jehová y qas chqakojoʼ che kutzalij uwach ri qachʼawem (Sant. 1:6, 7). w23.11 22 párrs. 8, 9

¡Sibʼalaj jeʼl waʼ taq tzij! Wariʼ kukʼut chqawach che ri loqʼoqʼenik chkixoʼl ri kʼulaj kuyaʼ kkʼis ta wi. Ri e kʼulaj rajawaxik kkikoj kichuqʼabʼ rech ksach ta ri loqʼoqʼebʼal chkixoʼl. Chojchoman chrij ri qʼaqʼ, rech kchup taj rajawaxik kkoj más siʼ chupam. Je kkʼulmataj chkixoʼl jun kʼulaj we kkichajij ta kibʼ kkʼis riʼ ri loqʼoqʼebʼal chkixoʼl. Are kʼu jujun taq mul rumal ri pwaq, ri yabʼilal y ri kikʼiyisaxik ri akʼalabʼ kukʼam lo jujun kʼax pa ri kʼulanem che kubʼano che ksach uwach ri loqʼoqʼebʼal. Rech amaqʼel kʼo ri «qʼaqʼ aj Dios» pa jun kʼulanem, rajawaxik che ri achi y ri ixoq kkikoj kichuqʼabʼ rech kʼo jun utz kachilanik rukʼ ri Jehová. w23.05 20, 21 párrs. 1-3

Paneʼ ri qatat qanan kkixiʼj ta kibʼ y kkibʼij chqe che xuqujeʼ kqaxiʼj ta qibʼ, are kʼu wariʼ kqechbʼej ta oj. Wajun bʼantajik riʼ kjunamataj rukʼ jun chak: rajawaxik kqakoj qachuqʼabʼ rech kqetaʼmaj. Rech kojkun che ubʼanik jun chak rajawaxik qas kqil ri kubʼan ri ajtij y kqesaj uwach. Junam rukʼ, rech kqaxiʼj ta qibʼ rajawaxik kqil ri kkibʼan ri kkixiʼj ta kibʼ y kqesaj kiwach. Junam rukʼ ri xubʼan ri Daniel, oj xuqujeʼ rajawaxik kqanikʼoj ri Biblia, kojux rachiʼl ri Jehová, kqabʼan qachʼawem rukʼ ronojel qanimaʼ y kqakubʼsaj qakʼuʼx che amaqʼel kojutoʼo. We kqabʼan wariʼ, kqaxeʼj ta qibʼ riʼ are chiʼ kbʼan kʼax chqe pa ri qakojonik. Ri ukʼutbʼal kukʼut chqawach che ri winaq che kkixiʼj ta kibʼ, kubʼano che ri e nikʼaj chik nim kekilo y che kkaj kketaʼmaj más chrij ri Jehová. Nim ubʼanik che kqaxiʼj ta qibʼ. w23.08 2 párr. 2; 4 párrs. 8, 9

Ri tzij griega «chitijtobʼej» kkojik rech jun winaq krilo we jun jastaq qas che oro o plata bʼanom wi. Rajawaxik je kqabʼano oj, rajawaxik kqanikʼoj ronojel we qastzij ri kbʼixik o ri kkʼutik, rumal che más tajin knaqajin ri nimalaj kʼaxkʼolil. Kqatatabʼej ta ronojel ri kkibʼij ri winaq o ri kkʼutik, xaneʼ chqilaʼ jas kubʼij ri uTzij ri Dios y ri utinamit ri Jehová. Jeriʼ kʼo ta kojsubʼuwik (Prov. 14:15; 1 Tim. 4:1). Qetaʼm che e kʼi testigos rech Jehová kekʼasiʼ kan pa ri nimalaj kʼaxkʼolil, are kʼu qetaʼm taj jas kqakʼulmaj chqajujunal (Sant. 4:14). Paneʼ kojkʼasiʼ kan pa ri nimalaj kʼaxkʼolil o kojkam neʼ, are kʼu qas qetaʼm che ri Jehová kuya na ri kʼaslemal kʼo ta ukʼisik chqe. Ri rajawaxik kqabʼan kimik are che ksach ta chqe ri kʼaslemal kʼo ta ukʼisik che utzujum ri Dios y chojkʼaskʼat che reyexik ri uqʼij ri Jehová. w23.06 13 párrs. 15, 16

Qetaʼm taj jas kbʼan che kitzʼaqatisaxik ri profecías riʼ (Dan. 12:8, 9). Paneʼ qetaʼm taj jas kbʼan che kitzʼaqatisaxik jujun profecías, wariʼ kraj ta kubʼij che mat ketzʼaqatik. Qas qetaʼm che ri Jehová kuqʼalajisaj na chqawach ri kraj kubʼij ri profecías, junam rukʼ ri xubʼan ojer kanoq. Ri winaq kkibʼij na «Utz uj kʼolik, man kʼo ta kqakʼulmaj» (1 Tes. 5:3). Tekʼuriʼ ri qʼatal taq tzij re wajun uwach Ulew riʼ, kkimajij ubʼanik kʼax chke ri kojonem che e qastzij taj y kkisachisaj na kiwach (Apoc. 17:16, 17). Tekʼuriʼ kkimaj chi ubʼanik kʼax che ri utinamit ri Dios (Ezeq. 38:18, 19). Y kumajij ri Armagedón (Apoc. 16:14, 16). Qetaʼm che wariʼ naj ta chi kraj rech kkʼulmatajik. Rumal laʼ kqaya ta kan ukʼutik maltyoxinik che ri Jehová, amaqʼel kqilo are chiʼ ketzʼaqat ri profecías re ri Biblia y keqatoʼ nikʼaj chik rech je kkibʼano. w23.08 13 párrs. 19, 20

Are chiʼ ri apóstol Pablo xchʼaw chkij ri e bʼantajik junam rukʼ ri kojonik, ri eyebʼal kʼuʼxaj y ri loqʼoqʼebʼal, xubʼij wariʼ: «Ri nim kʼu na uqʼij [...], are ri loqʼoqʼebʼal kʼuxaj» (1 Cor. 13:13). ¿Jasche xubʼij wariʼ? Rumal che pa ri petinaq kajwataj ta chik che kʼo qakojonik chrij ronojel ri utzujum ri Jehová, rumal che oj kʼo chi riʼ pa ri kʼakʼ uwach Ulew. Are kʼu amaqʼel kqaloqʼoqʼej na ri Jehová y ri e winaq. Wajun loqʼoqʼenik ksach ta uwach. Rumal che are chiʼ kqabʼan wariʼ, tajin kqakʼutu che oj qastzij cristianos. Ri Jesús xubʼij wariʼ chke ri utijoxelabʼ: «Rumal kʼu waʼ konojel kketaʼmaj na chi ix nutijoxelabʼ, we kiloqʼoqʼelaʼ iwibʼ» (Juan 13:35). Xuqujeʼ ri loqʼoqʼenik kubʼano che kkʼojiʼ junamil chqaxoʼl. Rumal laʼ, ri Pablo xubʼij che «rukʼ we riʼ, kʼo ronojel utzil» (Col. 3:14, TW). Ri apóstol Juan xutzʼibʼaj wariʼ chke ri cristianos: «Ri kuloqʼoqʼej ri Dios, xuqujeʼ rajawaxik kuloqʼoqʼej ri rachalal» (1 Juan 4:21). Rumal laʼ, are chiʼ kqakʼutu che keqaloqʼoqʼej ri qachalal, tajin kqakʼutu che xuqujeʼ kqaloqʼoqʼej ri Jehová. w23.11 8 párrs. 1, 3

Ri Biblia kubʼij che ri oj cristianos tajin kqatij anim. Ri kechʼakanik kkiriq na ri kʼaslemal che kʼo ta ukʼisik (2 Tim. 4:7, 8). Rajawaxik kqakoj qachuqʼabʼ y kqaya ta kan utijik anim rumal che más naqaj chi kʼo wi ri kʼisbʼal qʼij. Ri apóstol Pablo, xubʼij chqe ri rajawaxik kqabʼano rech kqaya ta kan utijik anim y kojopan pa ri meta. Xubʼij: «Chqesaj ronojel alal […], chqakʼamaʼ qanim, chqachʼijaʼ rukʼ kochʼonik ri xikʼinem ri yoʼm chqawach». Ri Pablo xubʼij taj che utz taj kqukʼaj jujun eqaʼn, xaneʼ xubʼij chqe che rajawaxik kqesaj ri kubʼan kʼax chqe pa ri qakojonik. Ri eqaʼn riʼ kubʼan chqe che kojkosik y kqapatanij ta chi ri Jehová rukʼ kikotemal. Rech kqaya ta kan utijik anim, rajawaxik kqilo we kʼo jujun eqaʼn qukʼam che kojutoʼ ta pa ri qakojonik y rajawaxik kqaya kanoq. Are kʼu kʼo jujun eqaʼn che kajwataj chqe, rajawaxik che amaqʼel kqukʼaj rumal che we kqesaj kanoq kqaya kan riʼ ri utijik anim y kqariq ta ri kʼaslemal che kʼo ta ukʼisik (2 Tim. 2:5). w23.08 26 párrs. 1, 2

We utz kojchomanik, nim kqil wi riʼ ri kkichomaj ri nikʼaj chik. Jun kʼutbʼal, e kʼo jujun qachalal ixoqibʼ utz kkilo kkibʼan maquillar kibʼ, are kʼu e nikʼaj chik utz ta kkilo. Y nikʼaj chik kkaj kkitij jubʼiqʼ tzam are kʼu e kʼo jujun kkaj taj kkitijo. Konojel ri cristianos kkaj che utz kiwach, are kʼu jalajoj ri kkibʼan che uchajixik kibʼ. We kqakoj qachuqʼabʼ rech ri nikʼaj chik kkibʼan ri kqaj oj, weneʼ kqabʼan kʼax chke o kkʼojiʼ tasoj ibʼ pa ri congregación (1 Corintios 8:9; 10:23, 24). Jun kʼutbʼal ri Jehová kubʼij ta chqe jas atzʼyaq y jas kqabʼan che usukʼumaxik qibʼ, are kʼu uyaʼom jujun taq pixabʼ rech kqetaʼmaj jas ri kqaj chuwach. Jeriʼ rukʼ ri qatzʼyaq kqanimarisaj uqʼij y kqakʼutu che qas kojchomanik y che oj jik (1 Tim. 2:9, 10). Kqaj taj che xaq kekaʼy chi ri winaq chqe rumal ri atzʼyaq che kqakojo. Ri pixabʼ che e kʼo pa ri Biblia xuqujeʼ keʼutoʼ ri kʼamal taq bʼe rech kkibʼij taj jas atzʼyaq rajawaxik kkikoj ri qachalal y jas ri kkibʼan che uxiyik ri kiwiʼ. w23.07 23, 24 párrs. 13, 14

Ri Jehová kraj kojkikot pa ri qakʼaslemal. Ri kkikʼam ri sikʼinik re ri ixoq «ri man kʼo ta unoʼj» utz kkinaʼ ubʼanik ri inmoralidad sexual. Rumal laʼ, kkiriq ri «kamik chupam ri rajawbʼal ri kamikal» (Prov. 9:13, 17, 18). Are kʼu, ri kkikʼam ri usikʼinik ri qastzij nojibʼal kkiriq utzilal (Prov. 9:1). Rumal laʼ, tajin kqetaʼmaj uloqʼoqʼexik ri kqaj chuwach ri Jehová y uxutuxik ri utz ta krilo (Sal. 97:10). Xuqujeʼ kojkikot che kisikʼixik chi nikʼaj rech kkiriq ri utzalaj taq noʼj che kuya ri qastzij nojibʼal. Kojjunamataj kukʼ ri aj ikʼabʼ (mos) che kubʼij pa ri capítulo 9 re Proverbios che xetaq bʼi «che uraqik kichiʼ puwiʼ ri utanataʼil ri tinamit». Ri kqakʼam ri sikʼinik kqariq utzilal kimik y pa ri petinaq. We kojbʼin «jachaʼ ri winaq ri kekʼoxomanik» kqariq ri kʼaslemal kʼo ta ukʼisik (Prov. 9:3, 4, 6). w23.06 24 párrs. 17, 18

¿Jas kanaʼo are chiʼ jun awachiʼl pa ri chak o pa ri escuela kubʼan preguntas chawe chrij ri akojonik? ¿La kaxiʼj awibʼ? Kʼi chqe kqaxej qibʼ. Are kʼu ri preguntas che kubʼan ri winaq kukʼut ri kuchomaj o ri kunaʼo. Wariʼ kuya bʼe chqe che kqatzijoj ri utzij ri Dios che. Are kʼu, weneʼ jun winaq kubʼan jun pregunta chqe rukʼ oyowal, weneʼ kubʼan wariʼ rumal ri kkibʼij ri nikʼaj chik chqij (Hech. 28:22). Y rumal che oj kʼo pa ri «kʼisbʼal taq qʼijol», e kʼi «man e kuyenelabʼ taj» y «e kʼanalaj taq winaq» (2 Tim. 3:1, 3). Kinkun taj che mat kʼo kinbʼij are chiʼ ri winaq rukʼ oyowal kubʼan preguntas chwe chrij ri nukojonik weneʼ katchaʼ. Are kʼu aninaq mape a woyowal. Jun winaq che aninaq taj kpe royowal kchʼojin ta rukʼ jun chik are chiʼ utz ta ri kbʼix che o are chiʼ kkun taj kutzalij uwach ri ktaʼ che. w23.09 14 párrs. 1, 2

Ri utinamit ri Jehová kuya pixabʼ chqe rech kbʼe ta qakʼuʼx chrij ri qʼinomal y nikʼaj chi jastaq che kubʼano che kqanimaj ta chi ri Jehová. Ubʼanik ri kubʼij ri Jehová kuya utzilal chqe, kubʼano che kkʼojiʼ jun utz retaʼmabʼal qakʼuʼx y rech xaq ta kqʼoxow qajolom. Y wariʼ kubʼano che kqapatanij ri Jehová rukʼ ronojel qanimaʼ. Xaq xiw upatanixik ri Jehová kuya utzilal y jamaril chqe (Is. 48:17, 18; 1 Tim. 6:9, 10). Ri Jehová kuya ta kan kikojik achijabʼ che ukʼamik ubʼe ri utinamit pa ri nimalaj kʼaxkʼolil y are chiʼ kuqʼat tzij ri Jesús pa Mil Junabʼ. Pa ri tiempo riʼ, ¿la kojniman chke paneʼ rajawaxik kqaya kan ubʼanik ri e jastaq che utz kqilo? We kimik tajin kojnimanik kʼax ta riʼ kbʼan che ukʼutik nimanik are chiʼ kopan ri qʼij riʼ. Rumal laʼ, amaqʼel chqanimaj ri Jehová, xuqujeʼ ri achijabʼ che tajin keʼukoj che ukʼamik qabʼe (Is. 32:1, 2; Heb. 13:17). Kʼo kʼi rumal che kqaj kqakubʼsaj qakʼuʼx chrij ri Jehová, ri kʼamal qabʼe che kojutoʼ chuwach ri kʼax, rech kojopan pa ri kotzʼiʼjalaj uwach Ulew jawiʼ kqariq wi ri kʼaslemal che kʼo ta ukʼisik. w24.02 25 párrs. 17, 18

Ri apóstol Pablo xkikot che upatanexik ri Dios, are kʼu xuqujeʼ xuriq kʼi kʼax. Rumal che naj xbʼinik y xuriq jujun taq kʼax pa ri bʼe, xubʼij wariʼ: «Xaq kebʼ xubʼij pa nuwiʼ pa taq nimaʼ, pa taq kiqʼabʼ elaqʼomabʼ». Y jujun taq mul xbʼan kʼax che kumal ri ukʼulel (2 Cor. 11:23-27). Xuqujeʼ ri cristianos nim xkil ri xubʼan che kitoʼik (2 Cor. 10:10; Filip. 4:15). ¿Jas xtoʼw ri Pablo rech xuya ta kan upatanexik ri Dios? Are che xretaʼmaj uwach ri Jehová pa ri uTzij y ri ukʼulmam ri areʼ pa ri ukʼaslemal. Y qas xuchʼobʼo che kloqʼoqʼex rumal ri Jehová (Rom. 8:38, 39; Efes. 2:4, 5). Xuqujeʼ ri Pablo xukʼutu che kuloqʼoqʼej ri Jehová are chiʼ xeʼupatanij ri rachalal (Heb. 6:10). w23.07 9 párrs. 5, 6

Ri winaq kilom che keʼajwataj ri qʼatal taq tzij y che rajawaxik «kkiya kibʼ pa taqik chke ri qʼatal taq tzij ri e kojom». Are kʼu are chiʼ ri qʼatal taq tzij kkiya taqanik che kʼax ubʼanik, kkaj ta chik kenimanik. Junam rukʼ ri kubʼij ri Biblia ri qʼatal taq tzij kkibʼan kʼax chke ri winaq, rumal che e kʼo pa uqʼabʼ ri Satanás naj ta chi kraj ksachisax kiwach (Sal. 110:5, 6; Ecl. 8:9; Luc. 4:5, 6). Xuqujeʼ kubʼij chqe che «ri kukʼulelaj uwach ri qʼatal tzij, are kukʼulelaj ri utaqanik ri Dios». Ri Jehová uyaʼom na che e kʼo ri qʼatal taq tzij rech kʼo jachin ktaqan pa kiwiʼ ri tinamit y kraj che keqanimaj. Rumal laʼ rajawaxik kqatoj ri qakʼas «kukʼ konojel», y wariʼ kraj kubʼij che kqatoj ri impuestos, nim keqil wi y keqanimaj (Rom. 13:1-7). Weneʼ kqachomaj che kʼax unimaxik jujun taq taqanik che kkiya ri qʼatal taq tzij o kqachomaj che kʼo ta upatan chqe. Are kʼu ri oj kqanimaj ri Jehová y keqanimaj ri qʼatal taq tzij, are kʼu kojniman ta chke are chiʼ xa kojkitaqchiʼj che ubʼanik jun jastaq che utz taj (Hech. 5:29). w23.10 8 párrs. 9, 10

Are chiʼ xalax ri Sansón, ri filisteos tajin kkibʼan kʼax che ri tinamit Israel (Juec. 13:1). Rumal che ri filisteos sibʼalaj itzel, sibʼalaj xkiriq kʼax ri israelitas pa kiqʼabʼ. Rumal laʼ, ri Jehová xuchaʼ ri Sansón «rech areʼ ri kachaplen ri kitoʼtajisaxik ri israelitas pa kiqʼabʼ ri filisteos» (Juec. 13:5). Rajawaxik che qas kukubʼsaj ukʼuʼx chrij ri Jehová. Jumul e kʼi filisteos xebʼe che uchapik ri Sansón pa Lehí, che weneʼ re Judá. Ri winaq che e kʼo pa Judá sibʼalaj xkixiʼj kibʼ. Rumal laʼ xkijach ri Sansón pa kiqʼabʼ ri filisteos. Are ri israelitas xeximow ri Sansón rukʼ kebʼ kʼakʼ taq kolobʼ y xkijach pa kiqʼabʼ ri filisteos (Juec. 15:9-13). «Xqaj kʼu ri ruxlabʼal ri Ajawaxel rukʼ kuʼinem, puwiʼ ri Sansón ri xeʼutʼoqopij kʼut ri kolobʼ ri e ximowinaq ri e uqʼabʼ» y ri Sansón xkunik xanimaj bʼi chkiwach ri filisteos. Tekʼuriʼ, xuriq «apan jun ukakateʼ bʼur ri kʼa ko na ri kʼo apan jelaʼ», xukʼamo... ¡y rukʼ wariʼ xeʼukamisaj 1,000 filisteos! (Juec. 15:14-16). w23.09 2 párrs. 3, 4

Ri Jehová kʼo jun «uchomam uloq ojer are taq kʼa majoq katikiritaj ri uwach ulew» y sibʼalaj kojmaltyoxinik che nojimal tajin kuqʼalajisaj chqawach rukʼ ri Biblia. Ri areʼ amaqʼel utz kel ri kubʼano (Prov. 16:4). Y ronojel ri kubʼan ri Jehová ksach ta uwach. Rumal laʼ, ¿jas riʼ ri urayibʼal ri Jehová y jas taq ukʼexom rech kkunik kubʼano? Ri Dios xuqʼalajisaj chkiwach ri nabʼe taq winaq ri urayibʼal are chiʼ xubʼij: «Chekʼol kʼi iwalkʼwal; chinojisaj ri uwach ulew, chixtaqan [...] pa kiwiʼ konojel» (Gén. 1:28). Paneʼ ri Adán y ri Eva xemakunik y xkiqʼaxej kan ri makaj chke ri winaq, wariʼ kraj ta kubʼij che mat kbʼantaj chi ri urayibʼal ri Jehová. Ri areʼ xukʼex ri kubʼan che utzʼaqatisaxik ri urayibʼal. Xukoj jun Qʼatbʼal tzij pa ri kaj rech ktzʼaqat ri urayibʼal chke ri winaq cho ri uwach Ulew (Mat. 25:34). w23.10 20 párrs. 6, 7

Ri Jehová xuqujeʼ kojutoʼ kimik rech kqaya ta kan ukojik qachuqʼabʼ. Jujun taq mul kʼax kqabʼan che ubʼanik wariʼ, más na we tajin kqakoj qachuqʼabʼ chuwach jun itzel jastaq. Y weneʼ jujun taq mul kqanaʼo che más nim na ri kʼax tajin kqariqo chuwach ri xuriq ri apóstol Pedro. Are kʼu ri Jehová kojutoʼo rech kqaya ta kan ukojik qachuqʼabʼ (Sal. 94:18, 19). Chqilampeʼ ri ukʼutbʼal jun qachalal, che are chiʼ majaʼ kretaʼmaj ri qastzij, xux homosexual pa kʼi taq junabʼ. Paneʼ xkunik xuya kan wajun itzel bʼantajik, are kʼu jujun taq mul xpe na ri itzel taq chomanik pa ujolom. ¿Jas xtoʼwik rech kuya ta kan ukojik uchuqʼabʼ chuwach wariʼ? Ri areʼ kubʼij: «Ri Jehová kuya qachuqʼabʼ» y kubʼij chik: «Rukʼ ri utobʼanik ri ruxlabʼal ri Jehová [...], wetaʼmam che kinkunik kinbʼin pa ri bʼe re ri qastzij». Y chukʼisbʼal kubʼij: «Ri Jehová inutoʼm rech tajin kinpatanij [...], y paneʼ kʼo jastaq che tajin kinkoj na nuchuqʼabʼ chuwach, are kʼu tajin kinutoʼo». w23.09 23 párr. 12

We at ala chnaʼtaj chawe che kkowir ta ri akojonik we man kanimarisaj at pa atukel. Cheʼachaʼ utz taq kʼutbʼal, chakojoʼ utz chomanik, chabʼanaʼ che kkubʼsax kʼuʼx chawij, chawetaʼmaj ubʼanik jun chak rech katutoʼ pa ri petinaq. Are chiʼ katchoman chrij ronojel ri chak che kabʼano weneʼ jujun taq mul kachomaj che katkun ta che ubʼanik. Are kʼu kubʼan ta kebʼ akʼuʼx, ¡katkunik kabʼano! Ri Jehová katutoʼo rech katkun che ubʼanik (Is. 41:10, 13). Xuqujeʼ ri qachalal rech ri congregación kkiya ri tobʼanik che kajwataj chawe. Are chiʼ kkʼojiʼ nim awetaʼmabʼal junam rukʼ ri kraj ri Jehová, katkikot riʼ rukʼ ronojel ri kabʼan pa ri akʼaslemal. Sibʼalaj katqaj y kqaj che ri Jehová katutewchiʼj pa ronojel ri chuqʼabʼ che kakojo y rech katux jun cristiano che ko ukojonik. w23.12 29 párrs. 19, 20

Chatchoman chrij che at kʼo kukʼ ri qachalal tekʼuriʼ kiwesaj jun ifoto. Rech knaʼtaj wajun qʼij riʼ chawe, kawesaj oxibʼ fotos. Tekʼuriʼ kawilo che jun chke ri xawesaj kʼo jun qachalal che qas ta utz xel chupam ri foto. Weneʼ kachup ri utz ta xelik y are kakʼol kan ri kebʼ, rumal che utz xixel chupam. Wariʼ kunaʼtasaj chqe ri xqabʼan kukʼ ri qachalal che xuya kikotemal chqe. Are kʼu chatchoman chrij che jun qachalal xubʼij o xubʼan jun kʼax chawe che utz taj. Utz we kasach kanoq o kachupu junam rukʼ ri kabʼan rukʼ ri foto che utz ta xelik (Efes. 4:32). Rumal che kʼi utz taq jastaq qabʼanom rukʼ wajun qachalal riʼ che uyaʼom kikotemal chqe, utz che kqasach kan ri kʼax che xubʼan chqe junam rukʼ ri xqabʼan rukʼ ri foto che qas ta utz xelik. w23.11 12, 13 párrs. 16, 17

Ri tzij griegas che xukojo pa wajun texto riʼ kraj kubʼij che ri cristianas rajawaxik utz kkibʼan che ratzʼyaqixik kibʼ y kechoman chkij ri nikʼaj chik. ¡Sibʼalaj kojkikot kukʼ ri qachalal ixoqibʼ are chiʼ kkibʼan wariʼ! Ukojik utz nojibʼal. Wajun bʼantajik riʼ kjunamataj rukʼ ukojik utz chomanik, kraj kubʼij, retaʼmaxik ri utz y ri utz taj, wariʼ ktobʼan che ri winaq rech are kuchaʼ ubʼanik ri utz. Chqilaʼ ri ukʼutbʼal ri Abigaíl. Ri rachajil utz ta ri xuchaʼ ubʼanik y xrilo che wariʼ kukʼam lo kʼax pa ri ufamilia. Aninaq xukoj ri unojibʼal y rukʼ wariʼ xkiriq ta kʼax ri ufamilia (1 Sam. 25:14-23, 32-35). Ri utz nojibʼal xuqujeʼ kojutoʼo rech kqetaʼmaj jampaʼ utz kojchʼawik y jampaʼ utz taj y nim keqil wi ri nikʼaj chik xuqujeʼ kqaya bʼe che kechʼawik (1 Tes. 4:11). w23.12 20 párrs. 8, 9

Ri apóstol Pablo xutzʼibʼaj wariʼ chke ri cristianos re ri congregación pa Roma. Ri areʼ xketaʼmaj chrij ri Jehová y ri Jesús y xkikʼutu che kʼo kikojonik are chiʼ xeʼux cristianos. Rumal laʼ, ri Dios xubʼij che e sukʼ rumal ri kikojonik y xuya ri ruxlabʼixel pa kiwiʼ (Rom. 5:1). Chilaʼ xmajtaj wi loq che xkʼojiʼ jun utzalaj keyebʼal y che qas ktzʼaqat na. Tekʼuriʼ ri apóstol Pablo xchʼaw kukʼ ri cristianos pa Éfeso ri e chaʼom rumal ri uxlabʼixel chrij ri eyebʼal che xuya ri Dios chke. Xubʼij chke che kyaʼ na «ri echabʼal ri kuyaʼ chke ri winaq ri e rech ri Dios» (Efes. 1:18). Y chke ri colosenses xubʼij jas riʼ ri keyebʼal ri areʼ. Xubʼij chke: «Kʼolom chiwe pa ri kaj» (Col. 1:4, 5). Rumal laʼ ri cristianos che e chaʼom rukʼ ri uxlabʼixel kʼo ri utzalaj eyebʼal kukʼ che kekʼastajisax na rech kebʼe pa ri kaj y kkiqʼat na tzij rukʼ ri Jesús chbʼe qʼij saq (1 Tes. 4:13-17; Apoc. 20:6). w23.12 9 párrs. 4, 5

Ri tzij «kuchajij» kkoj chke ri soldados che kkichajij jun tinamit rech kbʼan ta kʼax che. Ri winaq che e kʼo pa ri tinamit kkixiʼj ta kibʼ rumal che ketaʼm che ri soldados tajin kkichajij. Xaq junam rukʼ, are chiʼ «ri ujamaril ri Dios» kuchajij ri qanimaʼ y ri qachomanik, kqaxiʼj ta qibʼ y kqanaʼ jamaril (Sal. 4:8). Paneʼ ksach ta ri kʼax che tajin kqakʼulmaj, are kʼu kqanaʼ jamaril junam rukʼ ri xunaʼ ri Ana (1 Sam. 1:16-18). Je wariʼ ksach ta qakʼuʼx y utz ri kqachaʼ ubʼanik pa ri qakʼaslemal. Ri rajawaxik kqabʼano. Junam rukʼ ri kkibʼan ri winaq che e kʼo pa jun tinamit che kkitaʼ che jun soldado che kechajix rumal, ri oj rajawaxik kqataʼ che ri Jehová che kojuchajij. Chqabʼanaʼ qachʼawem kʼa kqanaʼ na «ri ujamaril ri Dios» (Luc. 11:9; 1 Tes. 5:17). We tajin kakʼulmaj jun kʼax pa ri akʼaslemal, amaqʼel chabʼanaʼ achʼawem. Qas kawil na che ri Jehová kuya ri jamaril chawe, kuchajij ri awanimaʼ y ri achomanik (Rom. 12:12). w24.01 21 párrs. 5, 6

Ri Jesús xuchʼijo are chiʼ xyoqʼik, xbʼix molom taq tzij chrij y xbʼan kʼax che xa rumal che xuchʼajchʼobʼisaj ri ubʼiʼ ri uTat. Qas retaʼm che qas xniman che ri Dios y xubʼan ta jun jastaq che xa kresaj ukʼixbʼal (Heb. 12:2). Xuqujeʼ retaʼm che are ri Satanás ri tajin kbʼanow kʼax che (Luc. 22:2-4; 23:33, 34). Ri Satanás kraj taj che ri Jesús kux sukʼ che ri Jehová, are kʼu je ta xkʼulmatajik. Ri Jesús qas xuqʼalajisaj che ri Satanás are jun bʼanal tzij y che ri upatanelabʼ ri Jehová kekunik keʼux sukʼ paneʼ kbʼan kʼax chke. ¿La kawaj at kakikotemaj ri Jesús? Kakikotemaj riʼ are chiʼ kaya ta kan uyaʼik uqʼij ri ubʼiʼ ri Jehová y kitoʼik ri nikʼaj chik rech qas kkichʼobʼ uwach. Je wariʼ tajin kawesaj uwach ri Jesús (1 Ped. 2:21). Junam rukʼ ri Jesús katkunik kakikotemaj ri Jehová y kakʼutu che ri Satanás are jun bʼanal tzij. w24.02 11, 12 párrs. 11-13

Pa ri cinco junabʼ qʼaxinaq chik, más che jun millón winaq kibʼanom kiqasanjaʼ y e uxinaq testigos rech Jehová. Chqawach oj, are chiʼ kqajach ri qakʼaslemal che ri Dios kraj kubʼij che kqaj kojux utijoxelabʼ ri Jesús y kqabʼan pa ri qakʼaslemal ri kubʼij ri Dios chqe. ¿Y jas kraj kubʼij wariʼ? Ri Jesús xubʼij: «We kʼo jun kraj kpe wukʼ in, rajawaxik chi areʼ mubʼan ri urayibʼal» (Mat. 16:24). Ri tzij griega che kubʼij «are mubʼan ri urayibʼal» xuqujeʼ kraj kubʼij «che kuxutuj ribʼ chbʼil ribʼ», wariʼ kraj kubʼij, che no kchaʼ chbʼil ribʼ. Are chiʼ kajach ri akʼaslemal che ri Jehová, rajawaxik kaxutuj ronojel ri itzel kril ri Dios (2 Cor. 5:14, 15). Wariʼ kraj kubʼij che xuqujeʼ rajawaxik kaxutuj «ri kirayibʼal aj winaq re mak», junam rukʼ ri inmoralidad sexual (Gál. 5:19-21; 1 Cor. 6:18). ¿La kʼax ubʼanik wariʼ? Kʼax taj, we kaloqʼoqʼej ri Jehová y awetaʼm che ronojel ri utaqanik kuya utzilal chawe (Sal. 119:97; Is. 48:17, 18). w24.03 2 párr. 1; 3 párr. 4

Ri Jehová kuya ri ruxlabʼixel chke ri kkikot kukʼ (Mat. 12:18). Chqachomaj wariʼ: «¿La tajin kinkʼut pa ri nukʼaslemal ri e bʼantajik re ri uwachinik ri uxlabʼixel?». Jun kʼutbʼal ¿la más kʼo chi apaciencia kimik chuwach are chiʼ majaʼ kawetaʼmaj uwach ri Jehová? Are chiʼ kawilo che tajin kakʼut ri uwachinik ri uxlabʼixel qastzij riʼ che más kakojo che ri Jehová sibʼalaj kkikot awukʼ. Ri Jehová kukoj ri tojbʼal mak rech ri keniman che kkiriq utzilal (1 Tim. 2:5, 6). Are kʼu ¿y we kʼax kqabʼan che ukojik che ri Jehová kkikot qukʼ paneʼ kojkojon chrij ri tojbʼal mak y qabʼanom chi qaqasanjaʼ? Chnaʼtaj chqe che kojkun taj kqakoj ronojel ri kubʼij ri qanimaʼ, xaneʼ amaqʼel chqakubʼaʼ qakʼuʼx chrij ri Jehová. Chuwach ri areʼ, ri kekojon chrij ri tojbʼal mak e sukʼ y keʼutewchiʼj na (Sal. 5:12; Rom. 3:26). w24.03 30 párr. 15; 31 párr. 17