Ri chʼoj rukʼ ri bombas nucleares | ¿Jas kubʼij ri Biblia chrij wariʼ?

Kʼo pa kʼax ri uwach Ulew rumal che jujun taq países tajin kkibʼan bombas o misiles nucleares y más nim kichuqʼabʼ. Ri winaq sibʼalaj kkixiʼj kibʼ rumal che kkichomaj che we kʼo kʼi bombas nucleares weneʼ kmajtaj jun nimalaj chʼoj. E kʼi winaq xuqujeʼ kkibʼisoj we jun país kukoj jun bomba nuclear, kukʼam lo jun nimalaj chʼoj che kukʼis tzij che ri uwach Ulew. Ri wuj Bulletin of the Atomic Scientists (Boletín de los Científicos Atómicos) xubʼij wariʼ: «Ri winaq sibʼalaj kkixeʼj kibʼ rumal che kkichomaj che kmajtaj jun nimalaj chʼoj rukʼ bombas nucleares».

¿La qastzij wi kbʼan na jun nimalaj chʼoj rukʼ bombas nucleares? We jewaʼ, ¿la ksach uwach riʼ ri uwach Ulew? We kqaxeʼj qibʼ kkʼulmataj jun chʼoj, ¿jas kojkunik kqabʼano? ¿Jas kuya ubʼixik ri Biblia?

Pa wajun kʼutunem riʼ kqil na:

• ¿La kuya ubʼixik ri Biblia che kkʼulmataj na jun nimalaj chʼoj rukʼ bombas nucleares?

• ¿La kuya bʼe ri Dios kbʼantaj wariʼ?

• ¿La ksach na uwach ri uwach Ulew?

• ¿Jas kqabʼano we kqaxiʼj qibʼ kkʼulmataj jun chʼoj rukʼ bombas nucleares?

• ¿La kchʼaw ri Biblia chrij jun Armagedón nuclear?

• Junam rukʼ ri kubʼij ri Biblia, ¿jas kbʼan che usachik uwach ri chʼoj?

• ¿La are kchʼaw ri wuj re Apocalipsis chrij jun nimalaj chʼoj rukʼ bombas nucleares?

¿La kuya ubʼixik ri Biblia che kkʼulmataj na jun nimalaj chʼoj rukʼ bombas nucleares?

Ri Biblia kchʼaw ta chrij chʼoj junam rukʼ wariʼ. Pero kchʼaw chrij ri itzel taq kibʼantajik ri winaq y ri kbʼanowik che weneʼ kmajtaj jun nimalaj chʼoj.

Chqajunamaj ri kubʼij ri Biblia rukʼ ri tajin kkʼulmataj kamik cho ri uwach Ulew:

Ri kubʼij ri Biblia: Ri u discípulos ri Jesús xkitaʼ che: «¿Jampaʼ kebʼantaj na riʼ ri jastaq, y jas kkʼutuw ri tiempo are chiʼ kattzalij loq y are chiʼ kopan ri ukʼisbʼalil ri e qʼij?». Ri Jesús xubʼij chke: «Kchʼojin na jun tinamit rukʼ jun chi tinamit y kchʼojin na jun qʼatbʼal tzij rukʼ jun chi qʼatbʼal tzij» (Mateo 24:3, 7).

Ri tajin kkʼulmatajik: E kʼi países che kkibʼan más armas nucleares are ri kkibʼan más chʼoj.

«Pa ri kʼisbʼal taq junabʼ riʼ tajin knimar más ri itzelal y ri chʼoj» (Proyecto de Datos de Localización y Eventos de Conflictos Armados).

Ri kubʼij ri Biblia: «Are taq kopan ri joqʼotaj kʼisbʼalil, ri ajawinel ri kʼo pa umox relebʼal qʼij kchʼojin na rukʼ ri ajawinel ri kʼo pa ri rikiʼaqʼabʼ relebʼal qʼij» (Daniel 11:40).

Ri tajin kkʼulmatajik: Junam rukʼ ri kubʼij ri Biblia, e kʼo jujun países tajin kechʼojinik rech kkilo jachin más kʼo uchuqʼabʼ. Paneʼ kamik ri nimaʼq taq países kkikoj ta ri armas nucleares che ubʼanik kʼax che kibʼ, pero tajin kkibʼan armas ri kʼo más kichuqʼabʼ.

«Pa ri kʼisbʼal diez junabʼ qilom che ri e chʼoj tajin knimataj chkixoʼl ri países, tajin kkitzukuj achilanik chkixoʼl y kkibʼan kikʼulel chke nikʼaj chik» (Programa de Datos sobre Conflictos de la Universidad de Uppsala).

Ri kubʼij ri Biblia: «Pa ri kʼisbʼal taq qʼijol, kepe na kʼaxalaj taq qʼij. Kekʼojiʼ na winaq ri [...] man kʼo ta loqʼoqʼebʼal kikʼuʼx, man e kuyenelabʼ taj, e bʼil taq tzijtal, man kkijikʼ ta kibʼ, e kʼanalaj taq winaq ri kkibʼan kikʼulel che ri utz» (2 Timoteo 3:1-3).

Ri tajin kkʼulmatajik: Junam kukʼ e kʼi taq winaq kamik ri gobiernos xaq aninaq kpe koyowal. Ri gobiernos kkitzukuj ta jamaril chkixoʼl xaneʼ kkikoj ri kichuqʼabʼ o rukʼ taq amenazas kkibʼan kʼax chke ri e nikʼaj chik. Juntir wariʼ kubʼano che weneʼ kmajtaj jun nimalaj chʼoj rukʼ bombas o misiles nucleares.

«We kqakoj ta qachuqʼabʼ rech kojchakun pa junamil xa más knimataj riʼ ri e chʼoj» (Samir Saran y Jane Harman, Foro Económico Mundial).

¿La kuya bʼe ri Dios kbʼantaj wariʼ?

Ri Biblia kʼo ta kubʼij chrij wariʼ. Ri kubʼij are che pa taq ri qaqʼij «kekʼojiʼ na jastaq xibʼibʼal» (Lucas 21:11). Jun ejemplo re waʼ taq xibʼibʼal jastaq riʼ are ri xkʼulmataj pa ri Segunda Guerra mundial are chiʼ xkoj nimaʼq taq bombas che sibʼalaj xubʼan kʼax. Ri Biblia kuya ubʼixik jasche ri Dios uyaʼom bʼe kbʼan chʼoj. Rech kawetaʼmaj más chawilaʼ ri video ¿Jasche uyaʼom ri Dios che kʼo kʼaxkʼolil?

¿La ksach na uwach ri uwach Ulew?

No. Paneʼ ri winaq kkikoj chi jumul ri bombas nucleares, pero ri Dios kuya ta bʼe che ksachisax uwach ri uwach Ulew. Ri Biblia kuya ubʼixik che ksachisax ta uwach ri uwach Ulew, y amaqʼel kekʼojiʼ winaq chuwach.

E jujun winaq kkichomaj che pa ri petinaq, ri uwach Ulew kchaqijik y xa kebʼ oxibʼ winaq kekanaj kan chuwach y sibʼalaj kʼax kkiriqo rumal ri contaminación che kkiya ri bombas nucleares. Pero ri Biblia kuya ubʼixik che ksukʼumax na apachike kʼax kbʼan che ri uwach Ulew rumal taq ri chʼoj.

Ri aj Bʼanol qe ubʼanom che ri uwach Ulew kkunik utukel kusukʼumaj ribʼ. Pero ri Dios kukoj na ri u poder rech kusukʼumaj ri uwach Ulew; ri areʼ xubʼan ri uwach Ulew rech amaqʼel kojkʼojiʼ chuwach (Salmo 37:11, 29; Apocalipsis 21:5).

¿Jas kqabʼano we kqaxiʼj qibʼ kkʼulmataj jun chʼoj rukʼ bombas nucleares?

E jujun winaq sibʼalaj kkixiʼj kibʼ che taq ri bombas nucleares y ri kʼax che kukʼam loq. Ri kubʼsal kʼuʼx y ri pixabʼ che kuya ri Biblia kuya tobʼanik chke ri winaq che kkixeʼj kibʼ. ¿Jas kubʼan che kitoʼik?

Ri Biblia kchʼaw chrij ri utz taq jastaq che kuriq na ri uwach Ulew y kchʼaw chrij ri utzilal che kkiriq na ri kekʼojiʼ chupam. Nim kojutoʼ wi retaʼmaxik wariʼ rumal che jetaneʼ jun chʼichʼ o ancla ri «ktakʼabʼan [jun] nim jukubʼ» rech kqaxibʼij ta qibʼ (Hebreos 6:19). Xuqujeʼ kojkunik kqakoj qachuqʼabʼ chuwach ri xibʼin ibʼ are chiʼ kqabʼan qe ri xubʼij kan ri Jesús, «xaq xiw chixok il che ri rech jun qʼij» jeriʼ kojchoman ta más chrij ri kʼax che weneʼ kkʼulmataj taj (Mateo 6:34).

Xuqujeʼ rajawaxik kqachajij ri qachomanik y ri kqanaʼo rech xaq ta kojbʼisonik. Are utz kqatatabʼej ta jastaq ri kubʼano che kqaxibʼij qibʼ, junam rukʼ ri información chrij bomas nucleares o ri kkibʼij ri winaq chrij ri kkʼulmataj na y ri noticias. Wariʼ kraj ta kubʼij che mat kojok il che ri tajin kkʼulmatajik. Xaneʼ tajin kqachajij qibʼ rech más ta kojchoman chrij ri kʼax che weneʼ kekʼulmataj taj o che kojkun taj kqakʼexo.

Matchoman chrij noticias che kuya bʼis chawe xaneʼ are chatchoman chrij jastaq che kuya kikotemal chawe.

Retaʼmaxik chrij ri kubʼsal kʼuʼx che kuya ri Dios kojutoʼ rech kojkikot pa ri qakʼaslemal y kqanaʼ jamaril.

¿La kchʼaw ri Biblia chrij jun Armagedón nuclear?

E jujun winaq kkichomaj che ri Armagedón kpetik are chiʼ kekʼatisax ri bombas nucleares y kkichomaj che sibʼalaj nim ri kʼax kkʼulmataj na.

Pero ri Biblia kukoj ri tzij Armagedón are chiʼ kchʼaw chrij ri chʼoj chkixoʼl «ri ajawinelabʼ o gobiernos re ronojel ri uwach ulew» rukʼ ri Diosa (Apocalipsis 16:14, 16). Ri Armagedón are ta jun bomba nuclear ri kusachisaj kiwach konojel ri winaq. Xaneʼ pa ri Armagedón ri Dios xaq xiw kusachisaj kiwach ri itzel taq winaq, rech ri utz taq winaq kkiriq jamaril y kkiriq ta chi kʼax (Salmo 37:9, 10; Isaías 32:17, 18; Mateo 6:10).

Junam rukʼ ri kubʼij ri Biblia, ¿jas kbʼan che usachik uwach ri chʼoj?

Ri Jehováb Dios kukoj na ri u poder rech kusachisaj kiwach ri e qʼatal taq tzij y rech kusachisaj kiwach ri ki armas che kkikoj pa taq ri chʼoj. Kubʼan wariʼ rukʼ ri utobʼanik ri Uqʼatbʼal tzij, jun gobierno che kusukʼumaj na ronojel ri jastaq cho ri uwach Ulew (Daniel 2:44).

Ri Uqʼatbʼal tzij ri Dios kukʼut chkiwach ri winaq ri rajawaxik kkibʼano rech kekʼojiʼ pa jamaril y pa junamil. Rumal che xa jun chi gobierno kkʼojiʼ pa ri uwach Ulew, kʼo ta chi chʼoj chkixoʼl taq ri tinamit. ¡Ri winaq kkaj ta chik kketaʼmaj ubʼanik chʼoj! (Miqueas 4:1-3). ¿Jas kqariq na? «Konojel kʼut kejeqiʼ na man kʼo ta chi jachin kexibʼinik, chkijujunal kekun na keʼuxlan chuxeʼ ri umuʼjal ri u uva xuqujeʼ chuxeʼ ri ucheʼal ri u higo» (Miqueas 4:4).