¿Jas rajawaxik kubʼan jun qastzij cristiano? | ¿Jas kubʼij ri Biblia chrij wariʼ?

Cho ronojel ri uwach Ulew, e kʼi winaq kkibʼij che e cristianos. Pero rukʼ ri kkibʼano kkibʼan kʼax chke ri nikʼaj chik. E jujun nim kkibʼan che kibʼ, kkibʼij ta ri qastzij y kkibʼan kʼax chke ri nikʼaj chik. E nikʼaj chik kkichʼabʼej jun chi winaq che are ta ri kikʼulaj. Rumal laʼ jujun kkichomaj ¿jas rajawaxik kubʼan jun qastzij cristiano?

¿Jas rajawaxik kubʼan jun qastzij cristiano?

Jun winaq kkunik kubʼij che cristiano, pero rajawaxik kukʼutu che qastzij cristiano. Ri Biblia kubʼij che jun cristiano are jun discípulo re ri Jesús (Hechos 11:26). Ri Jesús xubʼij: «We ix kitanabʼaʼ ta kinimaxik ri kinbʼij, qas ix nu discípulos riʼ» (Juan 8:31). Nijun kkunik kunimaj rukʼ tzʼaqatil ri kubʼij ri Jesús. Pero jun qastzij cristiano kukoj uchuqʼabʼ che ubʼanik pa ri ukʼaslemal ri kubʼij ri Jesús. Chqilampeʼ jujun ejemplos.

Ri cristianos kkikʼut loqʼoqʼebʼal chke nikʼaj chik

Ri xubʼij ri Jesús: «Kinya jun kʼakʼ taqanik chiwe: chiloqʼoj iwibʼ; junam rukʼ ri nubʼanom in che iloqʼoqʼoqʼexik, jelaʼ chibʼanaʼ ix che uloqʼoqʼexik iwibʼ. Rukʼ wariʼ ketaʼmaxik che ix nu discípulos: we kiloqʼoqʼelaʼ iwibʼ» (Juan 13:34, 35).

Ri xubʼan ri Jesús: Ri Jesús qas xeʼuloqʼoqʼej juntir ri winaq, apastaneʼ ri lugar che kepe wi, we e qʼinomabʼ (biʼomabʼ) o e mebʼaʼ. Xeʼukunaj ri e yawabʼ, xeʼutzuq ri kenumik y xuya ri ukʼaslemal pa kiwiʼ e juntir (Mateo 14:14-21; 20:28).

Ri kkibʼan ri qastzij cristianos: Kkikʼutu che qas kekaj ri winaq are chiʼ kesipanik, junam kkibʼan che kilik y kkikuy kimak ri nikʼaj chik. Kekitoʼ ri kʼo kirajawaxik y jujun taq mul kkiya kan ubʼanik ri utz kkil ri e areʼ rech kekunik kekitoʼ ri nikʼaj chik (1 Juan 3:16).

Ri cristianos kkibʼij ta molom taq tzij y kelaqʼ taj

Ri xubʼij ri Jesús: «In riʼ [...], ri qastzij» (Juan 14:6).

Ri xubʼan ri Jesús: Ri Jesús xubʼan ta molom taq tzij, xelaqʼ taj y amaqʼel xubʼan ri utz. Xeʼubʼan ta engañar ri nikʼaj chik rech are kkibʼan ri kraj ri areʼ. Konojel ketaʼm uwach rumal che amaqʼel kubʼij ri qastzij, paneʼ utz ta kkil ri nikʼaj chik (Mateo 22:16; 26:63-67).

Ri kkibʼan ri qastzij cristianos: Kkibʼij ri qastzij y kelaqʼ taj. Kkitoj ri impuestos, qas kechakunik y e puntuales pa ri kichak (Romanos 13:5-7; Efesios 4:28). Kekibʼan ta engañar ri nikʼaj chik, kkibʼan ta copiar ri exámenes pa ri escuela y kkibʼij taj che kʼi ketaʼm are chiʼ kkitzukuj kichak (Hebreos 13:18).

Ri cristianos e utz kukʼ juntir

Ri xubʼij ri Jesús: «Chixpet wukʼ, ix juntir, ri sibʼalaj ix chakunaq y ix kosinaq, y in kinya na uxlanem chiwe. Chikʼamaʼ ri weqabʼal ri kinya chiwij y chiwetaʼmaj iwech wukʼ rumal che in manxo y kinmachʼ wibʼ. Wukʼ kʼu in kiriq wi na uxlanem. Rumal che kʼax ta ukʼamik bʼi ri weqabʼal ri kinya chiwe y qas ta al ri eqaʼn kinya chiwij» (Mateo 11:28-30).

Ri xubʼan ri Jesús: Ri Jesús utz kukʼ ri winaq y wariʼ xubʼano che kkaj kekʼojiʼ rukʼ. Utz kunaʼo kkʼojiʼ kukʼ ri akʼalabʼ, kukubʼsaj kikʼuʼx ri kebʼisonik y xeʼubʼan respetar e juntir (Marcos 10:13-15; Lucas 9:11).

Ri kkibʼan ri qastzij cristianos: E utz kukʼ ri winaq, kekibʼan respetar y kkibʼan ta kʼax chke (Efesios 4:29, 31, 32). Kel kikʼuʼx chke ri nikʼaj chik y kkitzukuj ri kkibʼan che kitoʼik (Gálatas 6:10).

Ri cristianos nim kkil ri kikʼulanem

Ri xubʼij ri Jesús: «Ri xa jun ubʼanom ri Dios che, yaʼtal ta che jun winaq kujach uwach» (Marcos 10:9).

Ri xubʼan ri Jesús: Paneʼ ri Jesús xkʼuliʼ taj, pero xuya consejos chke ri e kʼulanik che kkibʼan ta engañar ri kikʼulaj (Mateo 19:9). Y xubʼij chke ri kbʼanowik che kuriq kʼax ri kʼulanem (Mateo 5:28).

Ri kkibʼan ri qastzij cristianos: Ri cristianos kkibʼan ta jastaq che kubʼan kʼax che ri kikʼulaj (Hebreos 13:4). Ri e kʼulaj kkiloqʼoqʼej kibʼ y kkibʼan respetar kibʼ (Efesios 5:28, 33).