Kʼi pwaq tajin ksach chrij ri chʼoj | ¿Jas kʼax ukʼamom loq?

Sibʼalaj kʼi pwaq ksach pa taq ri chʼoj.

• «Cho ronojel ri uwach Ulew ri e qʼatal taq tzij kisachom más che 2,2 billones dólares pa taq ri chʼoj che tajin kebʼanik. Kʼo ta ni jumul sachom wajun pwaq riʼ pa jun junabʼ» (The Washington Post, 13 re febrero 2024).

Are kʼu xaq xiw taj ksachachex kʼi pwaq pa taq ri chʼoj xaneʼ xuqujeʼ kʼo chi nikʼaj kʼax kuya. Chojchomanampeʼ chrij ri chʼoj che taqem pa Ucrania.

• Ri ajchʼojabʼ. Kbʼixik che weneʼ más che 500,000 ajchʼojabʼ e kaminaq o e soktajinaq rumal ri chʼoj, che kebʼ junabʼ chik uchʼijom.

• Ri e winaq. Ri Naciones Unidas kubʼij che weneʼ más che 28,000 winaq e kaminaq o e soktajinaq. Y jun achi nim ubʼanik pa ri ONU, xubʼij: «Sibʼalaj nim ri kʼax ubʼanom ri chʼoj pa kikʼaslemal ri winaq».a

Sibʼalaj e kʼi winaq kkiriq kʼax pa taq ri chʼoj cho ronojel ri uwach Ulew.

• 114 millones. Are waʼ ri kajilabʼal ri winaq che xeʼel bʼi pa ri kachoch o pa ri kitinamit rumal ri chʼoj, wariʼ umajim lo pa septiembre 2023.

• 783 millones. Are waʼ ri kajilabʼal ri winaq ri kʼo ta kkitijo. «Ri chʼoj tajin kubʼano che más knimataj ri wiʼjal pa ronojel ri uwach Ulew y ri 70% chke ri winaq che kʼo ta kkitijo, are ri e kʼo pa taq ri lugares jawiʼ kʼo wi chʼoj» (Programa Mundial de Alimentos).

¿La kopan na jun qʼij che kʼo ta chi chʼoj? ¿La qas kqariq na jamaril? ¿La kopan na jun qʼij che ri e winaq kkiriq ta chi kʼax rumal ri wiʼjal y ri mebʼaʼil? ¿Jas kubʼij ri Biblia chrij wariʼ?

Tiempo re chʼoj

Ri Biblia xukoj jun ajkej y jun kej che ukʼutik ri kʼi taq chʼoj che kekʼulmataj na pa ronojel ri uwcha Ulew.

• «Xel uloq jun kej chik, kaq rij. Ri tʼuyul chrij, xyaʼ chuqʼabʼ che chi karesaj bʼik ri jamaril chkixoʼl ri winaq cho ri uwach ulew, kakikamisalaʼ kʼu kibʼ. Xyaʼ kʼu jun nimalaj chʼichʼ re chʼoj che» (Apocalipsis 6:4).

Chrij wajun kej riʼ e teren chi lo e kebʼ, ri e kebʼ riʼ kkikʼutunisaj ri tajin kkʼulmataj kamik pa ri uwach Ulew: ri wiʼjal y ri kamikal rumal jun yabʼil o rumal jun chi jastaq (Apocalipsis 6:5-8). Rech kawetaʼmaj más chrij wajun profecía riʼ y we qas tajin ktzʼaqat kamik, chawilaʼ ri kʼutunem «¿Qué representan los jinetes del Apocalipsis?».

Tiempo re jamaril

Xa jubʼiqʼ chik kraj, y ri qʼinomal re ri uwach Ulew kkoj ta chi che chʼoj, ¿jachin kbʼanow wariʼ? Ri Biblia kubʼij:

• Ri Dios kukʼis «kitzaʼm ri chʼoj kʼa pa ri kʼisbʼal ujutzʼ ri uwach ulew» (Salmo 46:9).

• Ri Dios kusukʼumaj na ronojel ri kʼax che uyaʼom ri chʼoj. «Kusuʼ na ronojel ri uwaʼl kiwach ri e oqʼinaq. Man kʼo ta chi kamikal. Man kʼo ta chi bʼis, man kʼo ta chi kuraq uchiʼ rumal kʼax, mawi kʼo chi qʼoxowem. Xeʼokʼow kʼut ri nabʼe taq jastaq» (Apocalipsis 21:4).

• Ri Dios kubʼan na che qonojel kqariq jamaril. «Ri nutinamit kjeqiʼ na pa jun kʼolbʼal aj jamaril, pa taq ja ri ko e jeqelik, pa taq kʼolbʼal ri man kʼo ta wi elem chʼuʼj» (Isaías 32:18).

Ri profecías che kubʼij ri Biblia kukʼutu che ri e chʼoj y ri nikʼaj chi kʼax che tajin kekʼulmataj kamik are jun etal che naqaj chi kʼo wi ri qʼij che kqariq na ri jamaril.

¿Jas kubʼan na ri Dios rech kqariq jamaril? Kukoj na ri Uqʼatbʼal tzij che resaxik ri chʼoj y kuya jamaril chqe (Mateo 6:10). Rech kawetaʼmaj jas riʼ ri Uqʼatbʼal tzij ri Dios y ri tewchibʼal che kariq na rumal, chawilaʼ jun alaj vide ubʼiʼ: ¿Jas riʼ ri Rajawbʼal ri Dios?