Exodu
23 Ama mana rasun kaqta parlar puriyankitsu.+ Ama mana alli nunakunata yanaparnin mana kaqta parlayankitsu.+ 2 Ama atskaq nunakuna rurayanqanta* qatirllaqa, ima mana allitapis rurayankitsu; ni atskaq nunakunawan alli quedëta munarllaqa, ima juiciuchöpis mana rasumpa kaqtaqa parlayankitsu. 3 Juk waktsa nuna piwampis pleytuchö kaptinqa, ama waktsa kanqanrëkurllaqa favornin yarquyankitsu.+
4 Chikishoqnikikunapa oqrakashqa törunta o ashnunta tarirqa, kutitsipuyänëkim.+ 5 Chikishoqnikikunapa ashnunta cargan nitiptinqa,* manam pasakuyänëkitsu, tsëpa rantinqa ashnunta shäritsirmi yanapayänëki.+
6 Juk waktsa nuna pleytuchö kaptinqa, wakimpaqnöllam pëpaqpis justiciata rurayänëki.+
7 Pï nunapis mana culpayoqta o allita ruraq nunata wanutsiptinqa, manam libritsu dejarishaq.* Tsëmi pitapis mana kaqpita tumpayaptinqa, tsë asuntuman mëtikuyänëkitsu, tsënöpa tsë nunata wanutsiyaptin culpayoq mana kayänëkipaq.+
8 Pipapis favornin yarquyänëkipaq ama imatapis* chaskipakuyankitsu. Tsënö chaskipakurqa, rasun kaqllata parlaq nunakunapis mana alli kaqtam parlariyanman, y juezkunapis justiciata rurayänampa rantinmi, mana alli kaqta rurariyanman.+
9 Egiptuchö forastëru kashqa karninmi qamkunaqa alli musyayanki forastëru kë imanö kanqanta, tsëmi forastërukunataqa ni imanöpapis sufritsiyänëkitsu.+
10 Joqta watallapam chakrëkikunata murur cosechayänëki.+ 11 Peru qanchis kaq wataqa manam muruyänëkitsu, jamanampaqmi dejayänëki. Tsënöllam rurayänëki üvas y olïvus plantaraq chakrëkikunawampis. Tsë wataqa waktsakunam chakrëkikunachö wayunqanta cosechayänan, y quedanqantanam chukaru animalkuna mikuyanqa.
12 Joqta junaqpam trabajayänëki, peru qanchis kaq junaqqa manam trabajayänëkitsu, tsënöpa töruykikunapa, ashnuykikunapa, sirwiyäshoqniki warmikunapa wamrankunapa y qamkunapaq trabajaq forastërukunapa kallpankuna yapë kanampaq.+
13 Llapan mandakunqäkunatam cumpliyänëki.+ Y manam mëqan santupa jutintapis parlayänëkitsu, ni manam jutinkuna shimikikunapita yarqunantsu.+
14 Cada watam noqapaq kima fiestata rurayänëki.+ 15 Qamkunaqa abib* killachömi Egiptupita yarqayämurqëki, tsëmi tsë killachö Levadürannaq Tantata Mikuna Fiestata rurayänëki,+ y mandakunqänöllam qanchis junaqpa levadürannaq tantata mikuyänëki.+ Y manam ni pï noqaman jinëllaqa shamunantsu.+ 16 Tsënöllam punta cosëcha witsan, Cosëcha Qallanan* Fiestata rurayänëki.+ Y wata ushë cosëchachönam, Cosëcha Ushanan* Fiestata rurayänëki.+ 17 Watachö kima kutim llapëki ollqukuna Teyta Jehoväpa rikëninman juntakäyänëki.+
18 Noqapaq qarëta apamurqa, ama animalkunapa yawarnintawan levadürayoq tantata juntayankitsu. Y noqapaq rurayanqëki fiestakunachö pishtayanqëki animalkunapa wirantaqa, manam warënin junaqyaq dejayänëkitsu.
19 Punta mas alli cosëchëkikunataqa, noqa Jehovä Diospaqmi apayämunëki.+
Malta cabrapa ëtsantaqa, manam mamampa lichinchö yanuyänëkitsu.+
20 Qamkunapa puntëkikunata ëwarnin nänichö cuidayäshunëkipaq, y alistanqä sitiuman pushayäshunëkipaqmi+ juk angelnïta mandamushaq.+ 21 Tsëmi pëta wiyakur niyäshunqëkita rurayänëki. Pëqa noqapa jutïchömi shamunqa, tsëmi pëpa contranqa imatapis rurayänëkitsu, tsëta rurayaptikiqa manam perdonayäshunkitsu.+ 22 Peru llapan niyäshunqëkita rurayaptiki y llapan ninqäkunata cäsukuyaptikiqa, chikiyäshoqniki kaqkunataqa noqapis chikishaqmi, y qamkunawan pelyaq shamoqkunawanmi qamkunarëkur pelyashaq. 23 Angelnïmi qamkunapa puntëkikunata ëwanqa, amorreukunapa, hitïtakunapa, perizïtakunapa, cananeukunapa, heveukunapa y jebuseukunapa markankunamanmi pushayäshunki, y noqam llapankunata ushakätsishaq.+ 24 Manam santunkunata adorayänëkitsu ni sirwiyänëkitsu, y manam tsë nunakunapa costumbrinkunata qatiyänëkitsu.+ Tsëpa rantinqa, santunkunata y adorayanqan postinkunatam llapanta ushakätsiyänëki.+ 25 Noqa Jehovä Diosllatam sirwiyämänëki,+ tsëqa manam mikuyta ni yakuta qamkunapaq faltatsimushaqtsu,+ y manam imawampis qeshyayankitsu.+ 26 Markëkichö qeshyaq warmikunapis manam llullunkunata jitariyanqatsu* ni qolloqtsu kayanqa,+ y atska watapam kawayanki.
27 Markankunaman manaraq chäyaptikim nunakunaqa noqapita wiyar alläpa mantsakäyanqa,+ y chäyanqëki markakunachö kawaqkunaqa mantsakarmi imanö këtapis puëdiyanqatsu, y chikishoqnikikunaqa qeshpirmi ëwakuyanqa.+ 28 Manaraq chäyaptikim chikishoqnikikunaqa alläpa mantsakäyanqa,*+ y mantsakarmi heveu, cananeu y hitïta nunakunapis qeshpir ëwakuyanqa.+ 29 Tsënö kaptimpis, chikishoqnikikunataqa manam juk watallachötsu qarqushaq, tsënöpa tsë markakuna tsunyaq mana quedarinampaq, y chukaru animalkuna mirar mana imanäyäshunëkipaq.+ 30 Sinöqa ichikllapa ichikllapam pëkunata qarqushaq, mirarnin tsë markakunapa duëñun tikrayanqëkiyaq.+
31 Puka lamarpita filisteukunapa lamarninyaq, y tsunyaq sitiupita Eufratis mayuyaqmi*+ qamkunapaq kanqa. Y tsë markakunachö kawaqkunata venciyänëkipaqmi yanapayashqëki, y tsënöpam pëkunata qarqur markankunapa duëñun tikrayanki.+ 32 Peru manam pëkunawan ima acuerdutapis rurayänëkitsu ni santunkunata adorayänëkipaq änikuyänëkitsu.+ 33 Y manam qamkunawan juntu kawayänantsu, tsënöpa jutsaman* mana ishkitsiyäshunëkipaq. Santunkunata adorarninqa, imëka mana alli rurëkunamanmi chäyanki”.+