Amos
3 “Israel nunakuna, Egiptupita pushayämushoqniki Jehovä Dios ninqanta wiyayë. Kënömi niyäshunki:
2 ‘Patsachö mëtsika nunakuna kaptimpis qamllatam sirwimänëkipaq akrarqoq.*+
Tsëmi jutsata* rurayanqëkipitaqa cuentata mañayashqëki.+
3 ¿Manaku ishkaq nunakuna mëtapis ëwayänampaqqa, puntataqa tinkuyänampaqraq parlayan?
4 ¿Manaku Leonpis mikunampaq kaptinraq montikuna rurinchö waqan?
¿Manaku mallwa leonpis mikunampaq animalta tarir-raq machëninchö qaparin?
5 ¿Manaku pishqupis trampata churashqa kayaptinran trampaman ishkin?
¿Manaku trampapis* animal yëkuptinran saltamun?
6 ¿Manaku üshapa waqranta tocayaptinran juk markachö nunakunapis mantsakäyan?
¿Manaku Jehovä Dios munaptinraq desgraciapis juk markachö pasakun?
7 Llapanta Gobernaq Teyta Jehoväqa,
willakoqninkunata mana musyatsirqa manam imatapis ruranqatsu.+
8 ¡Leonmi qaparimushqa!*+ ¿Piraq mana mantsakanmantsu?
¡Llapanta Gobernaq Teyta Jehovämi parlamushqa! ¿Piraq mana willakunmantsu?’.+
9 ‘Asdod markapa alli murallashqa törrinkunachö y
Egiptu markapa alli murallashqa törrinkunachö willakuyë.
Kënö niyë: “Samaria jirkapa contran juntakäyë.+
Rikäyë, chikinakurlla kakuyanqanta
y nuna mayinkunata suwapäyanqanta.+
10 Pëkunaqa manam alli rurëta yachayantsu,
nuna mayinkunata maqar y ushakätsirmi imëkankunawan rïcuyäyan” ninmi Teyta Jehovä’.
11 Tsëmi Llapanta Gobernaq Teyta Jehovä kënö nin:
‘Juk chikishoqniki shamurmi nacionnikita atacanqa+
y vencishurnikim alli murallashqa törrikikunapita imëkakunata apakunqa’.+
12 Teyta Jehoväqa kënöpis ninmi:
‘Imanömi juk mitsikoq leonpa shimimpita üshapa ishkan chakinllatana o rinrinta ichikllatana sutaramun,
tsënöllam Israelpis ushakanqa.
Tsëmi pasanqa Samaria markachö alli cämachö punoqkunata y alli sïllachö* jamaqkunata’.+
13 ‘Alli wiyayë, y Jacobpa kastankunata willayë’ ninmi Llapanta Gobernaq y angelkunata mandaq Teyta Jehovä.
14 ‘Mana cäsukur+ jutsata* rurayanqampita israelïtakunata cuentata mañanqä junaqmi,
Betel markachö altarkunatapis+ ushakätsishaq.
Y esquïnankunachö waqrakunatapis pakirmi patsaman jitashaq.+
15 Tamya witsampaq y usya witsampaq rurayanqan wayinkunatapis ushakätsishaqmi.