Juan
2 Tsëpita kima junaqtanam, Galilëa provinciachö këkaq Canä markachö casakuy fiesta mikuy karqan, y tsëchömi Jesuspa mamänimpis këkarqan. 2 Tsë casakuy fiesta mikuymanqa Jesustawan qateqninkunatapis invitashqam kayarqan.
3 Vïnu ushakëkaptinnam Jesusta maman nirqan: “Manam vïnunkuna kannatsu”. 4 Tsënam Jesusqa nirqan: “Warmi, ¿imanirtan tsëpaqqa noqantsik yarpachakunantsik?* Manaran hörä chämushqaraqtsu”. 5 Tsëpitanam mamäninqa sirwipakur këkaqkunata, “llapan niyäshunqëkita rurayë” nirqan. 6 Tsëchömi yakuta winayänampaq rumipita rurashqa joqta cantarukuna churarëkarqan. Tsëqa judïukunapa costumbrinkunamannö makinkunata yakuwan awikuyänampaqmi* karqan.+ Cada cantarum cuarenta y cuatru o sesenta y seis litrutanö tsaraq.* 7 Tsënam Jesusqa, “cantarukunaman yakuta winayë” nirqan. Tsënam pëkunaqa juntanqanyaq winayarqan. 8 Tsëpitanam, “kananqa ichikllata chaqarkur, casakuy fiesta mikuyta rikaqman apayë” nirqan. Tsënam pëkunaqa chaqarkur apayarqan. 9 Vïnuman tikrashqa yakuta casakuy fiesta mikuyta rikaq ichik upurkurqa, mëpita apayanqanta mana musyarmi (tsënö kaptimpis, yakuta chaqaq sirwipakoqkunaqa musyayarqanmi), noviuta qayëkur 10 kënö nirqan: “Wakinkunaqa mas alli kaq vïnutam puntata qarakuyan, y nunakuna macharkuyaptinnam mana alli kaq vïnullatana sirwikuyan. Peru qamqa mas alli kaq vïnutam kananyaq churarätsirqunki”. 11 Galilëa provinciachö këkaq Canä markachömi, Jesusqa tsë punta kaq milagrunta rurarqan. Tsëta rurar poderninta rikätsikuptinmi,+ qateqninkunaqa pëman markäkuyarqan o yärakuyarqan.
12 Tsëpitanam mamäninwan, wawqinkunawan+ y qateqninkunawan Capernaumman urarqan,+ peru manam atska junaqtsu tsëchö quedakuyarqan.
13 Judïukuna Pascua Fiestata+ rurayänampaq ichikllana pishikaptinmi, Jesusqa Jerusalenman witsarqan. 14 Templuchömi wäkakunata, üshakunata y palumakunata+ rantikoqkunata, y qellë cambiaqkunata täkunankunachö jamëkaqta tarirqan. 15 Tsëmi waskapita chikutita rurëkur, üshankunatawan y wäkankunatawan juntu templupita qarqurqan, y qellë cambiaqkunapa qellëninkunata y mësankunatam jitar usharqan.+ 16 Palumata rantikoqkunatam kënö nirqan: “¡Kë llapanta këpita jipiyë! ¡Amana Teytäpa wayinta mercäduman* tikratsiyëtsu!”.+ 17 Tsënam qateqninkunaqa kënö qellqarëkanqanta yarpäyarqan: “Wayikita alläpa kuyaptïmi, shonqüqa nina rupaqnöraq achachanqa”.+
18 Tsëta rikëkurnam judïukunaqa kënö tapuyarqan: “¿Ima señaltataq rikätsiyämanki+ tsëkunata ruranëkipaq derëchuyoq kanqëkita musyayänäpaq?”. 19 Tsënam Jesusqa, “kë templuta juchuratsiyë,* y kima junaqllachömi sharkatsimushaq” nirqan.+ 20 Tsënö niptinnam judïukunaqa kënö niyarqan: “Kë templutaqa cuarenta y seis watachöran rurar ushayarqan, ¿tsëtsuraq qamqa kima junaqllachö sharkatsimunki?”. 21 Peru templu nirqa, pëqa cuerpumpaqmi parlëkarqan.+ 22 Wanunqampita kawariramuptinmi qateqninkunaqa imëpis tsënö ninqanta yarpäriyarqan,+ tsëmi Diospa Palabranchö qellqarëkanqanta y Jesus ninqanta creiyarqan.
23 Pascua Fiestapaq Jerusalenchö këkar milagrukunata ruranqanta rikarmi, mëtsikaq nunakuna pëpa jutinman markäkuyarqan o yärakuyarqan. 24 Peru Jesusqa llapankunata reqirmi, pasëpaqa* pëkunaman confiakoqtsu, 25 y nunakuna shonqunkunachö imanö kayanqanta musyarmi nunakuna imanö kayanqanta musyatsiyänanta wanaqtsu.*+