Lücas

3 Quinci watana Tiberiu Römata gobernëkaptin, Ponciu Pilätu Judëa provinciachö gobernador këkaptin, Herödis*+ Galilëa provinciachö gobernador* këkaptin, y wawqin Filïpu Traconïtidi y Iturëa provinciakunachö gobernador këkaptin, y Lisanias Abilëni provinciachö gobernador këkaptin, 2 Anas mandakoq sacerdöti këkaptin y Caifas+ mas mandakoq sacerdöti këkaptinmi, tsunyaq sitiuchö këkaptin Zacarïaspa tsurin Juanta+ Teyta Dios parlaparqan.+

3 Tsëmi Jordan kinrëchö markankunaman ëwar, jutsankunapita* perdonta chaskiyänampaq arrepentikur bautizakuyänampaq willakurqan.+ 4 Tsëqa pasarqan Diospa willakoqnin Isaïas qellqanqan libruchö kënö ninqannömi: “Tsunyaq sitiuchömi juk nuna fuertipa kënö nikan: ‘¡Teyta Jehoväpaq* nänita alistayë! Pëpaq derëchu nänita rurayë.+ 5 Jatun zanjakunata parejayë, jatun jirkakunata y taksha jirkakunata pampatsayë. Tsënölla uchku nänikunata y feyu nänikunatapis pampatsayë. 6 Y llapankunam rikäyanqa, Teyta Dios piwan salvacionta* apamunampaq kaqta’”.+

7 Tsëmi Juanqa bautizanampaq pëman ëwaq nunakunata kënö nir qallëkurqan: “Venënuyoq culebrapa wawankuna, ¿imanirtan këchö këkäyanki? ¿Teyta Dios cöleranqan junaq salvakuyänëkipaq kaqtaku pensayanki?+ 8 Puntataqa arrepentikushqa kayanqëkita imanö portakuyanqëkichö rikätsikuyë. Ama shonquykikunachö, ‘noqakunaqa Abrahanpa kastankunam kayä’ ninakuyëtsu. Teyta Diosqa, kë rumikunapitapis Abrahanpa kastankuna kananta permitinmanmi. 9 Awmi, jatusaq plantakunata watsimpita o matsumpita* walluyänampaqmi hächaqa listuna këkan, y mana allita wayoq plantakunataqa wallurmi ninaman jitarkuyanqa”.+

10 Tsëchö mëtsikaq nunakunam, “tsëqa, ¿imatataq rurayänä?” nir tapuyaq. 11 Tsënam pëqa nirqan: “Ishkë röpëkikuna kaptinqa,* mana kapoq kaqta jukninta qarëkuyë, y mikuyänëkipaq kayäpushuptikipis tsënölla rurayë”.+ 12 Impuestuta cobraqkunapis bautizakoq ëwarmi,+ “Maestru, ¿imatataq rurayänä?” nir tapuyarqan. 13 Tsënam pëqa, “dispunishqa impuestupita mastaqa ama pitapis cobrayëtsu” nirqan.+ 14 Tsënöllam soldädu kaqkunapis, “¿imatataq noqakunaqa rurayänä?” nir tapuyarqan. Tsënam pëqa kënö nirqan: “Ama pipa imantapis* amälas apakuyëtsu, y ama pitapis mana kaqpita tumpayëtsu,+ tsëpa rantinqa pagayäshunqëkillawan* conformakuyë”.

15 Nunakunaqa Cristu chämunantam shuyëkäyarqan, tsëmi Juanpaq, “¿pëtsuraq shamoqpaq kaq Cristu?” nir pensayarqan.+ 16 Tsëmi Juanqa llapankunata cläru kënö nirqan: “Noqaqa yakuchömi bautizayaq, peru qepäta shamoqqa noqapitapis mas puëdeqmi, y noqalläqa manam llanqinkunapa watunllatapis paskapuyta puëdïtsu.+ Pëqa santu espïrituwan y ninawanmi bautizayäshunki.+ 17 Ëranta pasëpa* pitsar gränukunata churakunanman trïguta guardanampaqmi jorkitanqa makinchöna këkan, peru päjataqa upitsita mana puëdiyanqan ninawanmi ushakätsinqa”.

18 Y imëkapaq shumaq consejëkurmi alli noticiakunata nunakunata willar sïguirqan. 19 Galilëa provinciata gobernaq Herödisqa, wawqimpa warmin Herodïaswan kakunqanta, y imëka mana allikunata ruranqanta Juan nishqa kaptinmi, 20 yapë mana allita rurar Juanta prësutsirqan.+

21 Llapan nunakuna bautizakuriyaptinnam Jesuspis bautizakurqan,+ y Teyta Diosman mañakuykaptinmi ciëlu kichakärirqan.+ 22 Santu espïritum paluma niraq pëpa jananman urämurqan, y ciëlupitam kënö neq wiyakarqan: “Qammi kuyë Tsurï kanki, qampaqmi alläpa kushikü”.+