Lücas

4 Tsëpitanam Jesusqa santu espïrituta chaskir Jordanpita ëwakurqan, y tsë santu espïritum tsunyaq sitiuman pusharqan+ 2 cuarenta junaq, tsëchömi Diablu tentëta munarqan.+ Tsë junaqkuna imatapis mana mikushqa karmi Jesusqa mallaqarqan. 3 Tsënam Diabluqa, “Diospa tsurin karqa, kë rumita nï tantaman tikranampaq” nirqan. 4 Jesusnam, “qellqarëkanmi: ‘Nunaqa manam pachata mikurllatsu kawan’”+ nirqan.

5 Tsënam Diabluqa altu sitiuman apëkur patsachö llapan gobiernukunata rikätsirqan.+ 6 Tsëpitanam kënö nirqan: “Kë llapanmi makïchö këkan, y pitapis munanqätam entreguëta puëdï. Kë gobiernukunapa riquëzantam entregashqëki,+ y kë llapanta rikänëkipaqmi carguman churashqëki. 7 Puntäman qonqurikuykur juk kutilla adorëkamaptikiqa, kë llapanmi qampa kanqa”. 8 Tsënam Jesusqa nirqan, “qellqarëkanmi: ‘Teyta Jehovätam* adoranëki, y pëllatam sirwinëki’”.+

9 Tsëpitanam Diabluqa Jerusalenchö templupa mas altu kaq perqanman apëkur kënö nirqan: “Diospa tsurin karqa, mä këpita jeqarkuy,+ 10 qellqarëkanmi: ‘Angelninkunatam mandamunqa cuidayäshunëkipaq’, 11 y: ‘Pëkunam makipita janchayäshunki, ima rumichöpis chakikita mana takanëkipaq’”.+ 12 Tsënam Jesusqa, “kënöpis qellqarëkanmi: ‘Ama Jehovä* Diosnikita pruëbaman churëtsu’” nirqan.+ 13 Tsëpitanam Diabluqa Jesusta tentëta dejaskir, mas alli tiempu kanqanyaq ëwakurqan.+

14 Tsëpitanam Jesusqa santu espïritu pushaptin Galilëa provinciaman kutikurqan,+ y entëru provinciachömi pëpaq allita parlayaq. 15 Diosta adorayänan wayikunachömi yachatsikur qallëkurqan, y llapankunam pëta alabayaq.

16 Tsëpitanam täkunqan* Nazaret+ markaman ëwarqan, y säbadu junaqchö imëpis ruranqannömi Diosta adorayänan wayiman+ yëkur leyinampaq shäkurirqan.* 17 Tsënam Diospa willakoqnin Isaïas qellqanqan rölluta makyayarqan, y tsë rölluta kicharmi kënö qellqarëkaqta tarirqan: 18 “Teyta Jehoväpa* santu espïritunmi noqachö këkan. Pëqa waktsa nunakunata alli noticiakunata willanäpaqmi akramashqa. Pëmi mandamashqa sufrikaqkunata shoqashqa kayänampaq kaqta willanäpaq, wiskukunata yapë rikäyänampaq kaqta willanäpaq, mana alli tratashqa kaqkunata librina kayänampaq kaqta willanäpaq,+ 19 y Teyta Jehoväpa* rikëninchö alli këta tarina tiempu kanqanta willakunäpaq”.+ 20 Tsëpitanam rölluta wankurkur Diosta adorayänan wayichö sirwipakoqta kutïkatsir jamakurirqan, y llapan tsëchö këkaqkunam pëta rikarëkar quedakuyarqan. 21 Tsënam Jesusqa, “kananmi kë leyimunqä cumplikärin” nirnin nunakunata parlapar qallëkurqan.+

22 Llapankunam Jesuspaq allita parlayaq, y shumaq parlanqanta wiyarmi espantakur,+ “¿manaku pëqa Josëpa tsurin?”+ niyaq. 23 Tsëpitanam pëqa nirqan: “Qamkunaqa kënöchi niyämanki: ‘Doctor karqa, kikikita jampikuy’. Kënöpis niyämankichi: ‘Capernaumchö imëkata ruranqëkipaq wiyayanqänölla kë markëkichöpis ruramuy’”.+ 24 Y kënöpis nirqanmi: “Rasuntam qamkunata nï,* Teyta Diospa mëqan willakoqnintapis manam markanchöqa chaskiyantsu.+ 25 Yarpäyë, Elïaspa tiempunchö kima wata pullan mana tamyamuptin y tsë kinrëchö alläpa mallaqë kanqan witsanqa, mëtsika viudakunam Israelchö karqan.+ 26 Tsënö kaptimpis, Elïastaqa manam tsë warmikunamantsu Teyta Dios mandarqan, sinöqa Sidonchö Sarepta markapita viudallamanmi.+ 27 Diospa willakoqnin Eliseupa tiempunchöpis, mëtsikaq nunakunam Israelchö lepra qeshyayoq kayarqan, tsënö kaptimpis, manam mëqampis alliyäyarqantsu,* sinöqa Siria nacionpita Naamanllam”.+ 28 Tsëkunata wiyëkurnam Diosta adorayänan wayichö këkaqkunaqa alläpa cölerayarqan.+ 29 Tsëmi juklla sharkur* qarqurnin markankuna këkanqan jirkapa jananyaq apayarqan, tsëpita jitarkuyänampaq. 30 Jesusqa chowpinkunapa* pasarmi ëwakurqan.+

31 Tsëpitanam Galilëa provinciachö Capernaum markaman urarqan, y säbadu junaqkunam nunakunata yachatsir karqan.+ 32 Imanö yachatsikunqanta wiyarmi nunakunaqa alläpa espantakuyaq.+ Pëqa Teyta Diospita carguta chaskishqa nunanömi pëkunata yachatseq. 33 Tsë höram Diosta adorayänan wayichö mana alli espïrituyoq o demoniuyoq nuna këkarqan, pëmi fuertipa kënö nirqan:+ 34 “¡Jä! ¿Imatataq noqakunapita munanki Nazaret markapita Jesus?+ ¿Ushakätsiyämaqnïku shamurqunki? Noqaqa allim musyä, qamqa Diospa Limpiu Tsurin kanqëkita”.+ 35 Tsënam Jesusqa demoniuta fuertipa qayapar, “¡upälla kë, y pëpita yarquy!” nirqan. Tsënam demoniuqa nunakunapa chowpinchö* nunata ishkiratsir mana imanarlla pëpita yarquskirqan. 36 Tsëta rikëkurnam nunakunaqa alläpa mantsakar kikinkunapura kënö ninakuyarqan: “¡Imanö allim parlëkun! ¡Autoridäwan y poderwanmi mana alli espïritukunatapis mandan! ¡Y pëkunaqa nunakunapitam yarquyan!”. 37 Tsënömi pëpaq willakuyanqanqa entëruman charqan.

38 Diosta adorayänan wayipita yarqurirnam Jesusqa Simonpa wayinman ëwarqan. Y Simonpa suegran alläpa fiebriwan kaptinmi yanapëkunampaq rogayarqan.+ 39 Tsënam pëpa lädunman witïkur fiebrita qayapëkuptin fiebrin pasarirqan, tsënam pëqa tsë höra sharkur llapankunata atiendir qallëkurqan.

40 Inti o rupay jeqëkaptinnam imëkawan qeshyëkaqkunata pëman apayarqan, y cada ünuman makinta churarmi llapankunata alliyätsirqan.+ 41 Y mëtsika nunakunapita demoniukuna yarqurmi fuertipa, “qamqa Diospa Tsurinmi kanki”+ niyaq. Peru Cristu kanqanta musyayaptinmi,+ Jesusqa fuertipa qayapar parlayänanta dejaqtsu.+

42 Patsa waräriptinnam yarqur tsunyaq sitiuman ëwakurqan.+ Peru mëtsika nunakunam ashir pë këkanqanman chäriyarqan, y ëwakunantam michëta tïrayarqan. 43 Tsënam Jesusqa nirqan: “Diospa Gobiernumpita alli noticiakunataqa juk markakunachöpis willakunämi, tsëpaqmi Teyta Dios mandamashqa”.+ 44 Tsënömi Judëa provinciachö Diosta adorayänan wayikunachö willakur karqan.