Jeremïas
17 “Judäpita nunakuna jutsata* rurayanqanqa,
fiërrupita y diamantipita herramientanwanmi*
shonqunkunachö y altarninkunapa waqranchö qellqarëkan.
2 Tsëyaqmi tsurikikunaqa, santukunapaq rurayanqëki altarkunata,
Tsëkunataqa rurayarqunki, mëtsika rämayoq montipa o qerupa lädunchö, jatusaq jirkakunapa jananchö+
3 y pampakunachö këkaq jirkakunachömi. Markëkikunachö imëka mana allikunata rurayanqëkipitam,+
llapan kapuyäshunqëkita, väleq cösasnikikunata
y santukunata adorayänëki sitiukunata chikiyäshoqnikikunapa makinman entregashaq.+
4 Kikikikuna munarmi herenciatanö entreganqä markakunatapis dejayanki.+
Alläpa cöleratsiyämaptikim mana reqiyanqëki markakunachö
chikiyäshoqnikikunata sirwiyänëkita permitishaq.+
Y ninanöraq këkaq cöleräqa manam imëpis pasarinqatsu”.+
5 Teyta Jehovämi këta nin:
“Noqa Jehoväta dejaramar nuna mayinman confiakoq
y nuna mayimpa kallpanman+ confiakoq nunaqa*
maldicishqam kanqa.+
6 Y tsunyaq sitiuchö japallan këkaq plantanömi kanqa.
Ima alli pasakuptimpis manam rikanqatsu,
sinöqa mana imapis kanqan tsunyaq sitiukunachö y mëtsika kachi kaptin
mana ni pï kawëta puëdinqan sitiukunachömi imëpis kawanqa.
7 Peru noqa Jehoväman confiakoq nunaqa.*
Awmi, noqa Jehoväman llapan shonqunwan confiakoq nunaqa mëtsika bendiciontam chaskinqa.+
8 Y yaku kuchunchö plantarëkaq plantanömi kanqa.
Watsimpis o matsumpis* mëtsëpam yaku këkanqanyaq ëwanqa.
Mëtsika achachëpis manam imananqatsu,
y imëpis mëtsika rämayoqmi kanqa.+
Usya witsampis manam llakipëpaqtsu* këkanqa,
sinöqa imëpis wayuykanqallam.
9 Nunapa shonqunqa imapitapis mas traicionakoqmi* y imatapis rasmi o sasmi munarin.*+
Tsëqa, ¿piraq reqita puëdinman?
Tsëtaqa rurä, imanö portakuyanqanta
y imakunata rurayanqanta rikëkur pëkunapaq imatapis ruranäpaqmi.+
Tsë tarinqankunataqa kallpanllachöraq këkarmi oqranqa,
y tsëchömi upa kanqan cläru musyakanqa”.
12 Qallanampitam Teyta Diospa shumaq gobernar täkunanqa respetashqa kashqa,
y tsëqa noqantsik këkanqantsik sagrädu sitium.+
13 Israel nunakuna confiakuyanqan Teyta Jehovä,
llapan dejayäshoqnikikunam penqakuychö quedayanqa.+
14 Qammi Teyta Jehovä, alabanqä Dios kanki.
Jampimaptikiqa jampishqam kashaq,
y salvamaptikiqa salvashqam kashaq.+
15 Wakinkunaqa,
“¿imanirtan Teyta Jehovä ninqankuna cumplikantsu?+
¡Juklla cumplikätsun ari!” niyämanmi.
16 Peru noqaqa, juk mitsikoqnömi qepëkichö purita dejarqätsu,
y manam ushakë junaq chämunanta shuyararqätsu.
Qamqa allim musyanki imakunata willakunqäta,
y tsë llapantaqa rikënikichömi rurarqö.
17 ¡Ama mantsakätsillämëtsu!
Qamqa llakikuy tiempuchömi següru sitiunö noqapaq kanki.
18 Qatikachämaqkuna penqakuychö ushayaptimpis,+
ama noqataqa penqakätsiyämätsuntsu.
Pëkuna mantsakätsishqa kayaptimpis,
ama noqataqa mantsakätsiyämätsuntsu.
Ushakë junaq pëkunaman chänanta permitïkullë,+
llapankunata ushakätsi.
19 Tsënam Teyta Jehoväqa kënö nimarqan: “Judächö gobernaqkuna yëkuyanqan y yarquyanqan, markapa tsurinkuna nir reqiyanqan punkunman ëwar tsëman churakë. Tsënölla Jerusalenchö wakin punkukunamampis churakë.+ 20 Y pëkunata kënö nï: ‘Qamkuna, kë punkukunapa yëkoqkuna, Judächö gobernaqkuna y Judäpita y Jerusalenpita nunakuna, Teyta Jehovä ninqanta wiyakuyë. 21 Teyta Jehovämi këta nin: “Cuidädu kayë, Jerusalenman imatapis yëkatsita munarqa, säbadu junaqchö mana yëkatsiyänëkipaq.+ 22 Ama säbadu junaqchöqa wayikikunapita imatapis jipiyankitsu,+ y ama imachöpis trabajayankitsu. Unë kastëkikunata mandanqänölla säbadu junaqpaq mandakunqäta respetayë.+ 23 Peru unë kastëkikunaqa, manam ninqäkunata wiyakuyarqantsu ni cäsukuyarqantsu. Awmi, kutin kutinmi cäsukuyta munayarqantsu, y manam correginqäta chaskikuyarqantsu”’.+
24 ‘Teyta Jehoväqa kënöpis ninmi: “Tsënö kaptimpis, llapan mandakunqäkunata cäsukuyaptiki, y säbadu junaqchö kë markapa punkunkunapa imatapis mana yëkatsiyämuptiki y säbadu junaqpaq mandakunqäta respetar imachöpis mana trabajayaptikiqa,+ 25 David gobernar täkunqampita gobernaqkuna y dirigeqkunam,+ carrëtankunachö y cawallunkuna montashqa kë markapa punkunkunapa yëkayämunqa. Awmi, gobernaqkuna, dirigeqkuna y Judäpita y Jerusalenpita nunakunam,+ kë markaman yëkayämunqa. Peru kë markachöqa imëpis nunakuna kanqam. 26 Y Judä kinrëpita, Jerusalenpa amänumpita, Benjamin kinrëpita,+ Sefelä kinrëpita,*+ jirkakunapita y sur läduchö Nëgueb kinrëpitam nunakuna shayämunqa. Y rupatsina qarëkunata,+ gränupita rurashqa qarëkunata,+ yuraq inciensuta, agradecikur apayämunqan qarëkunata y mas qarëkunatam noqa Jehoväpa wayïman apayämunqa.+
27 Peru ninqäkunata mana cäsukuyaptiki, säbadu junaqpaq mandakunqäta mana respetayaptiki y säbadu junaqchö Jerusalenpa punkunkunapa imatapis yëkatsiyämuptikiqa, tsë punkukunatam ninawan ushakätsishaq. Tsë ninaqa Jerusalenpa alli murallashqa törrinkunatam ushakätsinqa,+ y manam imapis upitsinqatsu”’”.*+