Juan
14 “Ama shonquykikunachö yarpachakur kayëtsu.+ Teyta Diosman y noqamampis markäkuyë o yärakuyë.+ 2 Teytäpa wayinchöqa atska sitiukunam kawanapaq kan. Mana tsënö kaptinqa, qamkunata nïmanmi* karqan. Noqaqa qamkunapaq sitiuta alistaqmi ëwëkä.+ 3 Ëwakur qamkunapaq sitiuta alistamurqa, qamkunapis noqa këkanqächö kayänëkipaqmi, yapë kutimur wayichö kikï chaskiyashqëki.+ 4 Noqa ëwanqä sitiuman nänitaqa qamkunapis reqiyankim”.
5 Tomasnam,+ “Teytë, manataq musyayätsu mëta ëwanqëkita, tsëqa, ¿imanötan tsë nänita reqiyäman?” nirqan.
6 Tsënam Jesusqa nirqan: “Noqam kä näni,+ rasumpa kaq+ y kawë.+ Mana noqawanqa, manam pï nunapis Teytaman chëta puëdintsu.+ 7 Noqata reqimarqa, Teytätapis reqiyankim. Kanampitam reqiyanki, y rasumpa kaqchöqa rikashqanam kayanki”.+
8 Felïpinam, “Teytë, Teytata rikëkatsiyämë, y tsëllapaqmi kayäshaq” nirqan.
9 Tsënam Jesusqa kënö nirqan: “Felïpi, qamkunawan mëtsika tiempu këkaptïpis, ¿manaraqku reqimanki? Noqata rikämaqqa, Teytatapis rikashqam.+ ¿Imanirtan ‘Teytata rikëkatsiyämë’ nimanki? 10 ¿Manaku creinki Teytawan juknölla kanqäta, y Teyta noqawan juknölla kanqanta?+ Qamkunata ninqäkunataqa* manam kikïllapitatsu parlä,+ sinöqa noqawan juknölla këkaq Teytam rurëta munanqanta noqawan rurëkan. 11 Creiyämë Teytawan juknölla kanqäta y Teyta noqawan juknölla kanqanta ninqäta, sinöqa ruranqäkunata rikar creiyë.+ 12 Rasunllatam qamkunata nï,* noqaman markäkoqqa o yärakoqqa, noqa ruranqäkunatam ruranqa. Y Teytamanna ëwakunqächöqa,+ ruranqäpitapis mastam ruranqa.+ 13 Jutïchö imatapis mañakuyaptikiqa tsëtam rurashaq, tsënöpa Tsurirëkur Teyta alabashqa kanampaq.+ 14 Awmi, jutïchö imatapis mañakuyaptikiqa, rurashaqmi.
15 Kuyamarqa, mandakunqäkunatam cäsukuyanki.+ 16 Noqa Teytata rogakuptïmi, pëqa qamkunawan imëpis kanampaq juk mas yanapakoqta* dispunimunqa:+ 17 rasumpa kaqta musyatsikoq santu espïrituta.+ Tsëtaqa mana rikar y mana reqirmi, kë munduchö nunakuna chaskita puëdiyantsu.+ Qamkunawan y qamkunachö kaptinmi, qamkunaqa reqiyanki. 18 Manam qamkunata dejayashqëkitsu,* qamkunamanmi kutimushaq.+ 19 Ichikllachönam kë munduchö nunakunaqa rikäyämanqanatsu,+ peru noqa kawar sïguiptïmi qamkunapis kawayanki, tsëmi qamkunaqa rikäyämanki. 20 Tsë junaqmi musyayanki Teytawan juknölla kanqäta, noqawan juknölla kayanqëkita, y qamkunawan juknölla kanqäta.+ 21 Kuyamaqqa mandakunqäkunatam chaskikun y cäsukun. Kuyamaq kaqtaqa Teytäpis kuyanqam, y noqapis kuyashaqmi, y alli reqimänantam permitishaq”.
22 Tsënam mana Iscariöti kaq Jüdasqa,+ “Teytë, ¿imanirtan noqakuna alli reqiyänaqta permitinki, peru kë munduchö nunakunataqa mana?” nir tapurqan.
23 Jesusnam nirqan: “Pï nunapis kuyamarqa ninqäkunatam cäsukunqa,+ y Teytämi pëta kuyanqa, y ishkäkuna shamurmi pëwan juntu kawayäshaq.+ 24 Noqata mana kuyamaqqa, manam ninqäkunata* cäsukuntsu. Qamkunata ninqäkunaqa manam noqapatsu, sinöqa mandamaqnï Teytapam.+
25 Qamkunallawanraq këkarmi këkunata nikä.* 26 Peru noqapa jutïchö Teyta mandamunqan yanapakoq santu espïritum, llapanta yachatsiyäshunki y llapan ninqäkunata* yarpätsiyäshunki.+ 27 Kanan noqawan këkar tranquïlu kayanqëkinöllam, imëpis tranquïlu kayänëkita permitishaq.+ Kë mundu nunakunachöqa manam tsënö tranquïlu këta tariyankitsu. Ama shonquykikunachö yarpachakuyëtsu ni mantsakäyëtsu. 28 Wiyayashqankim qamkunata kënö ninqäta:* ‘Ëwakümi y yapëmi qamkunaman kutimushaq’. Kuyamarqa Teyta noqapita mas puëdeq kaptinmi, Teytaman ëwakunqäpita kushikuyanki.+ 29 Tsëkuna pasakuptin parlanqäkunata creiyänëkipaqmi, manaraq pasakuptin tsëkunata qamkunata willarqö.*+ 30 Kë munduchö nunakunapa gobernaqnin shamuptinmi,+ mastaqa qamkunawan parlashaqnatsu, peru pëqa manam dominamëta puëdintsu.*+ 31 Tsënö kaptimpis, Teytata kuyanqäta nunakuna musyayänampaqmi, Teyta mandamanqannölla llapantapis rurëkä.+ Sharkuyë,* këpita ëwakushun.