Marcus
6 Tsëpita yarqurnam markanta ëwakurqan,+ y qateqninkunapis pëwanmi ëwayarqan. 2 Säbadu junaqnam Diosta adorayänan wayichö yachatsikurqan, y cäsi llapan wiyaqkunam alläpa espantakur kënö niyarqan: “¿Mëchötan kë nunaqa tsëkunata yachakushqa?+ ¿Imanir-raq tsënö yachaq tikrashqa, y espantëpaq milagrukunata rurëta puëdin?+ 3 Pëqa Marïapa wawan,+ y Santiägupa,+ Josëpa, Jüdaspa y Simonpa+ wawqin carpintëru+ nunam, ¿aw? Y paninkunapis kë markantsikchömi kawayan, ¿aw?”. Tsënö nirmi pëman creita munayarqantsu. 4 Tsënam Jesusqa nirqan: “Diospa willakoqnintaqa mëchöpis respetayanmi, peru markanchö, kastankunachö y wayinchöqa manam”.+ 5 Tsëmi tsëchöqa milagrukunata rurarqantsu, sinöqa, juk ishkë qeshyëkaqkunallatam makinta churar alliyätsirqan. 6 Y mana markäkoq o yärakoq kayanqampitam alläpa espantakurqan. Tsëpitanam tsë kinrë caserïukunachö yachatsikur purirqan.+
7 Döci apostolninkunata qayëkurmi ishkaq ishkaq ëwayänampaq mandarqan,+ y mana alli espïritukunata qarquyänampaqmi poderta pëkunaman churarqan.+ 8 Tsëpitanam viäjipaq imatapis mana apayänampaq nirqan, ni tantata, ni mirkapa* puritsina bolsata ni qellëta* mana apayänampaq, sinöqa juk tukrullata apayänampaqmi mandarqan.+ 9 Tsënöllam, llanqiräyanqan llanqillawan y vistiräyanqan röpallawan ëwayänampaq* nirqan. 10 Y kënöpis nirqanmi: “Më wayimampis yëkurqa, tsë sitiupita ëwakuyanqëkiyaq tsëchö quedakuyanki.+ 11 Mëchöpis mana chaskiyäshuptiki ni wiyayäshuptikiqa, mana alli këkäyanqanta musyayänampaq, tsëpita ëwakur chakikikunapita allpata tapsikuyë”.+ 12 Tsëpita ëwakurnam, nunakuna arrepentikuyänampaq willakuyarqan,+ 13 mëtsika demoniukunata qarquyarqan+ y aceitiwan llushir qeshyëkaqkunata alliyätsiyarqan.
14 Wakchö këchö Jesuspaq parlayaptinmi, gobernaq Herödispis tsëta musyarirqan. Nunakunaqa kënömi niyaq: “Bautizaq Juanmi wanunqampita kawarimushqa, tsëmi milagrukunata rurëkan”.+ 15 Peru wakinnam, “Elïasmi” niyaq, y wakinnam, “pëqa Diospa willakoqninmi, unë witsan willakoqkunanö” niyaq.+ 16 Jesuspaq parlayanqanta Herödis wiyarnam, “kunkanta mututsinqä Juanmi kawarimushqa” nirqan. 17 Herödisqa wawqin Filïpupa warmin Herodïaswan casakushqa karmi, Herodïaspa culpan Juanta cadenarkatsir carcelatsishqa karqan.+ 18 Juanqa kutin kutinmi, “manam allitatsu rurëkanki wawqikipa warminta katsirnin” nishqa karqan.+ 19 Tsëmi Herodïasqa chikipaq y wanutsita munaq, peru manam ima rurëtapis puëdirqantsu 20 Juanta Herödis respetaptin. Alli ruraq nuna y limpiu shonquyoq kanqanta musyarmi,+ Herödisqa imata rurëkuyänampitapis Juanta cuidaq. Juan parlapanqantaqa kushishqam wiyakoq, peru manam ima rurëtapis musyaqtsu.
21 Peru Herödispa cumpleäñun+ junaqmi Herodïaspaq alli tiempu karirqan. Tsë tardim Herödisqa alli carguyoq nunakunapaq, soldädukunapa comandantinkunapaq y Galilëa provinciachö reqishqa nunakunapaq mikuyta ruratsirqan.+ 22 Tsëchö Herodïaspa warmi wamran tushunqanmi Herödista y pëwan mikuykaqkunata alläpa gustarqan, tsëmi gobernaqqa shipashta kënö nirqan: “Munanqëkita mañamë, y entregashqëkim”. 23 Y jurarmi kënö nirqan: “Imatapis mañamanqëkitam entregashqëki, gobernanqäpita pullan kaqtapis”. 24 Tsënam pëqa yarqurnin, “¿imatataq mañaküman?” nir mamanta tapurqan. Y mamannam, “Bautizakoq Juanpa peqanta o umanta mañakuy” nirqan. 25 Tsë höram shipashqa gobernaqman cörripa ëwar kënö nirqan: “Bautizakoq Juanpa peqanta o umanta jatun plätuchö jinan höra entreguëkamë”.+ 26 Tsëta mañakunqan alläpa llakitsiptimpis, jurar äniqanrëkur y invitädunkunarëkurmi, gobernaqqa mañakunqanta neguëta puëdirqantsu. 27 Tsëmi gobernaqqa cuidaqninkunapita juk soldäduta mandarqan Juanpa peqanta jinan höra apamunampaq. Tsënam pëqa ëwar carcelchö këkaq Juanpa peqanta o umanta mutuskir 28 jatun plätuchö apamurqan. Entregariyaptinnam shipashqa mamäninta entregarqan. 29 Juanpa qateqninkuna tsëta musyëkurnam, shamur ayanta apakur sepultüraman churayarqan.
30 Tsëpitanam apostolkunaqa Jesuspa puntanman juntakëkur, llapan rurayanqanta y yachatsikuyanqanta willayarqan.+ 31 Tsënam pëqa apostolninkunata nirqan: “Aku tsunyaq sitiuta ëwashun, ichikllapis jamariyänëkipaq”.+ Tsënöqa nirqan, mëtsika nunakuna shamur y ëwar kayaptin mikuyänanllapaqpis tiempunkuna mana kaptinmi. 32 Tsëmi japallankunalla kayänampaq tsunyaq sitiuta barcuwan ëwakuyarqan.+ 33 Peru mëtsikaq nunakunam ëwakuyanqanta rikäyarqan, y mëtsikaqmi tsëta musyariyarqan. Tsëmi llapan markakunapita nunakuna cörripa ëwar puntankunata chäyarqan. 34 Barcupita yarqur mëtsika nunakunata mitseqninnaq üshakunatanö rikëkurnam,+ alläpa llakipar*+ imëkata yachatsirqan.+
35 Alläpa tardina kaptinmi, qateqninkunaqa Jesusman witïkur kënö niyarqan: “Kë sitiuqa karuchömi këkan, y alläpa tardinam.+ 36 Estanciakunachö wayikunaman y caserïukunaman ëwar mikuyninkuna rantiyänampaq kë nunakunata despachëkuyna”.+ 37 Peru Jesusqa, “qamkuna imallatapis qarayë” nirqanmi. Tsënam pëkunaqa, “¿doscientus denariupa* tantata rantïkamur qarayänätaku munanki?” nir tapuyarqan.+ 38 Pënam, “¿ëka tantataq kapuyäshunki? Ëwar rikärayämuy” nirqan. Tsënam pëkunaqa rikaq ëwaskir, “pitsqa tanta y ishkë pescädukunam kan” niyarqan.+ 39 Tsëpitanam verdirëkaq qewa jananman grüpu grüpu jamakuyänampaq nunakunata mandarqan.+ 40 Tsëmi cien cien y cincuenta cincuenta jamakuyarqan. 41 Tsëpitanam pitsqa tantata y ishkë pescäduta aptarkur, ciëluman rikëkur Teyta Diosman mañakurqan.+ Y tantakunata pakirkurmi nunakunata qarayänampaq qateqninkunata entregarqan, y tsënöllam ishkan pescädutapis llapankunapaq rakirqan. 42 Llapankunam pacha junta mikuyarqan. 43 Sobraq tantaqa döci canasta juntam karqan, y pescädukunapis sobrarqanmi.+ 44 Tsë tantataqa cincu mil ollqukunam mikuyarqan.
45 Tsëpitanam ëwakuyänampaq nunakunata ninqanyaq, qateqninkunata nirqan qochapa juknin lädunchö Betsaida markaman barcuwan tsimparëkäyänampaq.+ 46 Nunakunata ëwakuyänampaq nïkurnam, Teyta Diosman mañakoq jirkaman ëwarqan.+ 47 Ampirkuptinnam o tsakäriptinnam,* barcuqa qochapa chowpinchöna* këkarqan, peru Jesusqa tsaki patsachömi japallan këkarqan.+ 48 Y alläpa vientuptin qateqninkuna barcuta avanzatsita mana puëdiyanqantam rikarqan. Tsëmi madrugäda hörana* yaku janampa purir pëkunaman Jesus ëwarqan, peru lädunkunapa pasakuytam pensarqan.* 49 Yaku janampa ëwëkaqta rikëkurnam, qateqninkunaqa, “¡achachï! ¡Imachi shamuykan!” nirnin qaparir qayarëkuyarqan. 50 Awmi, rikëkurmi llapankuna alläpa mantsakäyarqan. Peru pëqa tsë höram, “¡ama mantsakäyëtsu! Noqam kä” nirqan.+ 51 Pëkuna këkäyanqan barcuman yëkuriptinmi vientu pärarirqan. Tsëta rikëkurnam pëkunaqa alläpa espantakuyarqan. 52 Tsënöqa pasarqan, tantawan milagruta rurar imata rikätsikunqanta mana entiendishqa kayaptinmi, pëkunaqa chukru shonqullaraq karmi imatapis entiendiyarqanraqtsu.
53 Qochata tsimpar Genesaretman chëkurnam, mana ëwakunampaq amänunllaman barcuta segurayarqan.+ 54 Peru barcupita yarquykäyaptinllam nunakunaqa Jesusta reqiriyarqan. 55 Y cörripa ëwarmi tsë kinrëchö nunakunata willayarqan. Llapankunam mëchöpis këkanqanman qeshyëkaqkunata kirmawan apayaq. 56 Më caserïuman, markaman o chakrachö wayikunaman yëkuptimpis, rantikuyänan pampakunamanmi qeshyëkaqkunata churayaq, y janan kaq röpampa kuchunta yatayänampaqmi rogakuyaq,+ y llapan yataqkunam alliyäyarqan.