Mateu
10 Tsëpitanam döci qateqninkunata qayëkatsir poderta pëkunaman churarqan mana alli espïritukunata qarquyänampaq,+ y imëkawan sufreqkunata y qeshyëkaqkunata alliyätsiyänampaq.
2 Këkunam kayan döci apostolkunapa jutinkuna:+ Simon, pëtam Pëdru nir reqiyan,+ y wawqin Andres;+ y Zebedeupa tsurin Santiäguwan wawqin Juan;+ 3 Felïpi y Bartolomë;+ Tomas+ y impuestukunata cobraq Mateu;+ Alfeupa tsurin Santiägu; Tadeu; 4 Cananïta* niyanqan Simon, y tiempu pasariptin Jesusta traicionaq Jüdas Iscariöti.+
5 Kë döci apostolninkunatam Jesusqa këta mandarqan:+ “Ama ëwayankitsu juk nacion nunakunamanqa, y Samariapa mëqan markankunamampis ama yëkuyankitsu.+ 6 Tsëpa rantinqa, oqrakashqa üshakunanö këkaq Israel nunakunallaman ëwayë.+ 7 Kënö nir yachatsikur ëwayanki: ‘Teyta Diospa Gobiernunqa këllachönam këkan’.+ 8 Qeshyëkaqkunata alliyätsiyanki,+ wanushqakunata kawaritsiyanki, leprawan qeshyëkaqkunata alliyätsiyanki,* demoniukunata qarquyanki. Grätisllam chaskiyarqunki, y grätislla rurayë. 9 Wachakëkikunapa bolsikunchö ama apayëtsu öruta, ni plätata, ni cobrita,+ 10 ni viäjipaq mirkapata* puritsina bolsata, ni ishkë röpata,* ni juk par mas llanqita, ni juk mas tukruta apayëtsu;+ peonqa mikuynin chaskinanmi.+
11 Më markaman o caserïuman yëkurpis, wiyakuyta munaq nunakunata ashiyanki, y tsë sitiupita ëwakuyanqëkiyaq tsëchö quedakuyanki.+ 12 Wayiman yëkurqa, tsëchö këkaqkunata saludayanki.* 13 Tsë wayichö alli chaskiyäshuptikiqa, yamë kayänanta munayanqëki pëkunapaq katsun;+ peru mana chaskiyäshuptikiqa, yamë kayänanta munayanqëki qamkunaman kutimutsun. 14 Mëchöpis mana chaskiyäshuptiki ni wiyayäshuptikiqa, tsë wayipita o tsë markapita ëwakur chakikikunapita allpata tapsikuyë.+ 15 Noqam qamkunata nï,* tsë markaqa Juiciu Junaqchömi Sodömapita y Gomörrapitapis+ mas feyupa castigashqa kanqa.
16 Atoqkunapa* rurinman üshakunatanömi qamkunata mandëkä;* tsëmi culebranö alkabu alkabulla, peru palumanö manshu kayänëki.+ 17 Nunakunapita cuidakuyanki, pëkunaqa patsan cortikunamanmi chätsiyäshunki,+ y Diosta adorayänan wayinkunachömi+ astayäshunki.+ 18 Qatimaqnïkuna kayaptikim gobernadorkunaman y gobernaqkunaman apayäshunki,+ tsëchömi pëkunata y Teyta Diosta mana reqeq nunakunata noqapita musyatsiyanki.+ 19 Tsënö kaptimpis, pëkunaman chätsiyäshuptikiqa, ama imata o imanö parlayänëkipaq kaqman yarpachakuyankitsu, tsë höram imata parlayänëkipaq kaqta musyatsiyäshunki.+ 20 Manam qamkunallapitatsu parlayanki, sinöqa Teytëkikunapa santu espïritunmi parlayänëkipaq yanapayäshunki.+ 21 Y manam tsëllatsu, wawqinllam wawqinta wanutsiyänampaq o wañutsiyänampaq entreganqa, y papäninnam tsurinta wanutsiyänampaq entreganqa, y wamrakunanam papäninkunapa y mamäninkunapa contran karnin wanutsiyänampaq entregayanqa.+ 22 Qamkunataqa qatimaqnïkuna kayaptikim llapan nunakuna chikiyäshunki,+ peru ushananyaq alli tsarakoqqa salvakunqam.+ 23 Juk markachö imëkata rurar sufritsiyäshuptikiqa, juk markata ëwakuyanki.+ Noqam qamkunata nï,* Israelpa llapan markankunachö manaraq willakur ushayaptikim, Nunapa Tsurinqa chämunqa.
24 Yachakuykaqtaqa manam yachatseqnimpita mas allitsu tratayanqa, ni manam sirwipakoqtaqa patronnimpita mas allitsu tratayanqa.+ 25 Yachakuykaqqa yachatseqninnö tikranqampitam kushikun, y sirwipakoqpis, patronninnö tikranqampitam kushikun.+ Wayiyoqtapis Diablu* nikarqa,+ ¿manatsuraq wayinchö kaqkunatanäqa masraq tsënö niyanqa? 26 Tsëmi pëkunataqa mantsayänëkitsu, manam ni ima tsaparëkaqpis tsaparëkartsu quedakun, ni ima pakarëkaqpis pakarëkartsu quedakun.+ 27 Pakëllapa niyanqaqta, llapan nunakunata musyatsiyë, y rinrikikunallachö willayanqaqta, wayi janan azoteapita willakuyë.+ 28 Cuerputa wanutsirpis kawëta* mana ushakätseqkunataqa ama mantsayëtsu;+ tsëpa rantinqa, cuerputawan kawëta Gehënachö* ushakätsita puëdeqta mantsayë.+ 29 Musyayanqëkinöpis, ishkë pichuysankataran juk mana alläpa väleq qellëpaq* rantikuyan ¿aw? Tsënö kaptimpis, Teytëkikuna mana musyëkaptinqa manam ni jukllëllapis patsaman ishkintsu.+ 30 Y qamkunapatanäqa llapan aqtsëkikunatam yupashqata katsin. 31 Tsënö këkaptinqa, ama imatapis mantsayëtsu, qamkunaqa mëtsika pichuysankapitapis masmi väliyanki.+
32 Pï nunapis nunakunapa puntanchö qatimaqnï kanqanta niptinqa,+ noqapis ciëluchö këkaq Teytäpa puntanchömi qatimaqnï kanqanta nishaq.+ 33 Peru pï nunapis nunakunapa puntanchö negamaptinqa, noqapis ciëluchö këkaq Teytäpa puntanchömi pëta negashaq.+ 34 Ama pensayëtsu yamë këta apamoq kë patsaman shamunqäta; manam yamë këta apamoqtsu shamurqö, sinöqa rakikëta* apamoqmi.+ 35 Awmi, rakikëta apamoqmi shamurqö, tsëmi tsuriqa papänimpa contran kanqa, y warmi wamranam mamänimpa contran kanqa, y lumtsuynam suegrampa contran kanqa.+ 36 Awmi, familiankunallam* pipapis chikeqnin kayanqa. 37 Pï nunapis papäninta o mamäninta noqapita mas kuyaqqa, manam qatimaqnï këta puëdintsu; y pï nunapis ollqu o warmi wamranta noqapita mas kuyaqqa, manam qatimaqnï këta puëdintsu.+ 38 Pï nunapis sufrimientu qerunta* chaskikur mana qatimarqa, manam qatimaqnï kanampaqnötsu.+ 39 Vïdanta salvëta munaqqa, wanunqam o wañunqam; peru qatimaqnï kanqanrëkur wanoqqa, kawamunqam.+
40 Qamkunata chaskiyäshoqnikikunaqa noqatapis chaskimanmi, y noqata chaskimaqkunaqa, mandamaqnïtapis chaskiyanmi.+ 41 Diospa willakoqninta, Diospa willakoqnin kanqanrëkur chaskeqqa, Diospa willakoqninkuna chaskiyanqan bendiciontam chaskinqa,+ y allita ruraq nunata, allita ruraq kanqanrëkur chaskeqqa, allita ruraqkuna chaskiyanqan bendiciontam chaskinqa. 42 Y noqam qamkunata nï,* mana kaqlla këkaptimpis qatimaqnï kanqanrëkur pitapis juk väsu yakuta qarëkoqqa, manam bendicionninta oqranqatsu”.+