¿Listuku këkantsik cambiukunata ruranapaq?
1. Entëru Patsachö imëka cambiukuna këkaptinqa, ¿imataraq rurashwan?
1 Televisionchö actuaq nunakuna imëpis cambiëkäyaqnöllam, tiempuntsikpis cambiëkan. Entëru Patsachö imëka cambiukuna kaptinmi, noqantsikpis höraqa yachatsikïnintsikchö, horariuntsikchö y imanö yachatsikunqantsikchö cambiukuna rurëta wanantsik. Peru ¿tsënö cambiukunata ruranapaq listuku këkantsik?
2. ¿Imataraq rurashwan Diospa markan ëwanqanmannölla ëwanapaq?
2 Imanö yachatsikunqantsik. Cambiukuna kanqanmannömi Diospa markanqa imatapis imëpis rurashqa. Discïpulunkunata yachatsikoq mandanqanchömi, Jesusqa puntata nirqan alporjata ni qellëta mana apayänampaq (Mat. 10:9, 10). Tsënö kaptimpis, tiempuwanqa tsënö ninqantaqa cambiarirqanmi, porqui musyarqanmi chikishqa kayänampaq kaqta y llapan markakunaman yachatsikï chänampaq kaqta (Lüc. 22:36). Diospa markanqa, tiempu y watakuna pasanqanmannömi yachatsikïninkunachö tukï cambiukunata rurayashqa. Këman yarpärishun, tarjetas de testimonio nishqanwan, radiuwan, parlantiyoq cärrukunawanmi yachatsikuyarqan. Kanan witsankunachöqa wayinkunachö nunakunata tarinanqa alläpa sasam o ajam, tsëmi nunakunata tarinantsikrëkur mëchö tsëchö y cällikunachö yachatsikïqa alläpa precisan. Llapan junaq trabajaqkunata tarinantsikrëkurmi, animamarquntsik ampïrëkaq hörakuna yachatsikunapaq. Awmi, ciëluchö Jehoväpa cärrunqa rasmi ëwan y rasllam juk lädumampis tumarin. ¿Qatikantsikku y cärrun ëwanqanmannöku ëwëkantsik? (Ezeq. 1:20, 21.)
3. ¿Imataraq rurashwan yachatsikunqantsik mas alli kanampaq?
3 Imanö munatsikunapaq. ¿Imakunapaqtaq markantsikchö nunakuna yarpachakuyan? ¿Qellë asuntupaqku? ¿Familiapaqku? ¿Wanutsinakuyanqankunapaqku? Imakuna pasakunqanta y nunakuna imapita yarpachakuyanqanta musyanqantsikmi yanapamäshun revistakunata shumaq munatsikunapaq (1 Cor. 9:20-23). Wiyamaqnintsik llakikunqankunapita parlapämashqaqa, manam yachakurkur ëwanqantsikllapitatsu parlapashwan, sinöqa llakitsinqankunapitam parlapar qallëkushwan.
4. ¿Imanirtaq raslla cambiukunata ruranantsik?
4 Televisionchö actuacion ushanqannömi, ichikllachöna kë Patsachö imëka mana allikuna ushakärinqa y jatun jipakï qallarinqa. “Kë quedaq tiempuqa ichikllashqanam” (1 Cor. 7:29, NM). Tsëmi, imëpitapis mas precïsu cambiukunata ruranantsik. Tsëta rurarninllam kë ichik tiempu quedaqchö llapan puëdinqantsikta rurëta puëdishun.