Marcus
10 Tsëpita ëwakurnam Jordan mayupa wak tsimpanchö Judëa provinciapa kuchunman chärirqan, y mëtsikaq nunakuna lädunman yapë juntakäriyaptinmi, imëpis ruranqannölla pëkunata yachatsir qallëkurqan.+ 2 Tsënam fariseukunaqa mana alliman chätsita munar pëman witïkur, juk nuna warmimpita divorciakuyta puëdinqanta o mana puëdinqanta tapuyarqan.+ 3 Pënam, “¿imatataq Moises mandayäshurqëki?” nir contestarqan. 4 Tsënam kënö niyarqan: “Moisesqa permitirqanmi divorciu papelnin entreguëkur pï nunapis warmimpita divorciakunanta”.+ 5 Jesusnam nirqan: “Chukru shonqu kayaptikim+ Moisesqa tsë mandakuyta qellqarqan.+ 6 Peru nunakunata kamar qallanqampitam, Teyta Diosqa ‘ollquta y warmita kamarqan’+ 7 y ‘tsëmi ollquqa papäninta y mamäninta dejanqa,+ 8 y ishkanmi jukllëllana kayanqa’,+ tsëmi ishkaqnatsu kayan, sinöqa jukllëllana.* 9 Tsënö këkaptinqa, Teyta Dios juntanqantaqa,* ama ni pï rakitsuntsu”.+ 10 Wayichö yapë këkäyaptinnam qateqninkunaqa tsë asuntupaq tapuyarqan. 11 Tsënam pëqa nirqan: “Pï nunapis warmimpita divorciakur jukwan casakoqqa, jukwan oqllanakuy jutsata* rurarmi punta warminta traicionëkan.+ 12 Y imëllapis juk warmi qowampita o runampita* divorciakur jukwan casakurqa, jukwan oqllanakuy jutsatam* rurëkan”.+
13 Tsëpitanam nunakunaqa wamrakunata bendicinampaq Jesusman apamur qallëkuyarqan, peru qateqninkunaqa qayapäyarqanmi.+ 14 Tsëta rikëkurnam Jesusqa cölerar kënö nirqan: “Wamrakuna noqaman shayämunanta dejayë, ama michäyëtsu, Teyta Diospa Gobiernunqa pëkunanö kaqkunapaqmi.+ 15 Noqam qamkunata nï,* Teyta Diospa Gobiernunta wamrakunanö mana chaskikurqa, manam ni pï tsë Gobiernuman yëkunqatsu”.+ 16 Y wamrakunata mellqarkurmi pëkunaman makinta churar bendicirqan.+
17 Nänipa ëwëkaptinnam, juk nuna cörripa shamur puntanman qonqurikuykur, “Alli Maestru, ¿imatataq ruranä mana wanurna kawakunäpaq?” nir tapurqan.+ 18 Tsënam Jesusqa kënö nirqan: “¿Imanirtan Alli Maestru nimanki? Manam pillapis alliqa kantsu, sinöqa jukllaqllam, Teyta Dioslla.+ 19 Qamqa reqinkim kë mandamientukunata: manam nuna mayikikunata wanutsiyänëkitsu,+ mana majëkikunawanqa manam oqllanakuyänëkitsu,+ manam suwakuyänëkitsu,+ ama mana kaqtaqa pitapis tumpayankitsu,+ ama nuna mayikikunata engañayankitsu+ y papänikikunata y mamänikikunatam kuyar respetayänëki”.+ 20 Tsë nunanam, “Maestru, jövin kanqäpitam tsë llapanta cäsukurqö” nirqan. 21 Tsënam Jesusqa kuyëpa rikëkurnin kënö nirqan: “Jukta ruranëkim pishin: ëwar llapan imëkëkita rantikuykur tsë qellëta waktsakunata qarëkuy, tsëqa ciëluchömi imëka väleqkuna kapushunki. Tsëpitana qepäta shamur qatimaqnï kë”.+ 22 Tsënö contestaptinnam tsë jövinqa alläpa llakikurqan, y imëkayoq karmi llakishqa ëwakurqan.+
23 Wakpa këpa rikachakuskirmi Jesusqa qateqninkunata kënö nirqan: “¡Atska qellëyoq nuna Diospa Gobiernunman yëkunampaqqa alläpa difïcilmi kanqa!”.+ 24 Tsënö niptinmi qateqninkunaqa alläpa mantsakäyarqan. Tsënam Jesusqa kënö nirqan: “Wamralläkuna, ¡Diospa Gobiernunman yëkunanqa alläpa difïcilmi kanqa! 25 Rïcu nuna Teyta Diospa Gobiernunman yëkunampitaqa, mas fäcilmi awjapa uchkumpa juk camëllu pasarinman”.+ 26 Tsëta wiyëkurnam qateqninkunaqa mas mantsakar, “tsëqa, ¿pillanaraq salvakuyta puëdinman?” niyarqan.*+ 27 Tsënam Jesusqa pëkunata defrenti rikëkur kënö nirqan: “Nunakunapaq mana puëdipaqnö kaptimpis, Diospaqqa manam tsënötsu, pëpaqqa llapampis puëdikanmi”.+ 28 Tsënam Pëdruqa, “noqakunaqa llapan imëkäkunata dejëkurmi qamta qatiyarqoq” nirqan.+ 29 Jesusnam kënö nirqan: “Noqam qamkunata nï,* qatimaqnï kanqanrëkur y alli noticiakunarëkur wayinta, wawqinkunata, paninkunata, papäninta, mamäninta, wamrankunata o chakrankunata dejashqa kaqqa,+ 30 imëkata rurar sufritsiyaptimpis kanan witsanchömi cien kuti masta chaskinqa, wayikunata, wawqikunata, panikunata, mamakunata, wamrakunata y chakrakunata,+ y shamoq tiempuchönam* imëyaqpis kawëta tarinqa. 31 Peru atskaq puntachö kaqkunam, qepachö kayanqa; y qepachö kaqkunanam, puntachö kayanqa”.+
32 Tsëpitanam llapankuna Jerusalenman witsaq nänipa ëwëkäyarqan. Jesusmi puntata ëwëkarqan, y qateqninkunaqa espantashqam qepanta ëwayarqan, y pëkunapa qepankunata ëwaqkunapis mantsakashqam këkäyarqan. Tsënam döci apostolninkunata yapë juk läduman qayëkur ichikllachöna imakunapa pasanampaq kaqta yarpätsir+ 33 kënö nirqan: “Rikäyë, Jerusalenmanmi witsëkantsik, tsëchömi Nunapa Tsurinta mandakoq sacerdötikunaman y Ley qellqaqkunaman entregayanqa. Pëkunanam wanutsiyänampaq o wañutsiyänampaq condenayanqa, y mana judïu nunakunatam entregayanqa, 34 pëpita burlakuyänampaq, toqapuyänampaq, astayänampaq y wanutsiyänampaq, peru kima junaqtam kawarimunqa”.+
35 Tsënam Zebedeupa+ ishkan tsurinkuna Santiäguwan Juanqa pëman witïkur, “Maestru, mañakuyanqaqtam noqakunapaq ruramunëkita munayä” niyarqan.+ 36 Pënam, “¿qamkunapaq imata ruramunätataq munayanki?” nir tapurqan. 37 Tsënam pëkunaqa kënö niyarqan: “Gobernanqëki witsan juknï derëcha läduykiman, y juknï izquierda läduykiman täkayämunäpaq änïkayämë”.+ 38 Jesusnam nirqan: “Qamkunaqa manam musyayankitsu imata mañakuyanqëkita. ¿Puëdiyankiku upuykanqä cöpapita upuyta o bautizashqa këkanqä bautismuwan bautizashqa këta?”.+ 39 Tsënam pëkunaqa, “puëdiyämi” niyarqan. Jesusnam nirqan: “Awmi, upuykanqä cöpäpitaqa qamkunapis upuyankim, y bautizashqa këkanqä bautismuwanmi qamkunapis bautizashqa kayanki.+ 40 Peru derëcha lädüman o izquierda lädüman pï täkunampaq kaqtaqa manam noqatsu dispunï, tsëkunaqa Teytä akranqan kaqkunapaqmi”.
41 Tsëta musyëkurnam chunka qateqninkunaqa, Santiägupaq y Juanpaq alläpa cölerakuyarqan.+ 42 Peru Jesusqa llapankunata juntëkurmi kënö nirqan: “Qamkunaqa musyayankim nacionkunata gobernaqkunaqa munayanqanmannö nunakunata gobernayanqanta, y autoridäkunaqa nunakunata mandädunchö katsiyanqanta.+ 43 Peru qamkunaqa manam tsënötsu kayänëki. Tsëpa rantinqa, mëqëkipis mas carguyoq këta munarqa, wakinkunapa sirweqninkunam kayänëki,+ 44 y mëqëkipis puntachö këta munarqa, wakinkunapa sirweqninkunam kayänëki. 45 Kikin Nunapa Tsurimpis manam sirwiyänampaqtsu shamushqa, sinöqa nunakunata sirwinampaq+ y vïdanwan pagakur mëtsikaqta salvanampaqmi”.+
46 Tsëpitanam Jericöman chäriyarqan. Jesuswan qateqninkuna y mëtsika nunakuna Jericöpita yarquykäyaptinnam, Timeupa tsurin Bartimeu jutiyoq limushnata mañakoq wisku o qapra nuna näni kuchunchö tëkarqan.+ 47 Nazaretpita Jesus tsëpa pasëkanqanta wiyëkurnam fuertipa kënö nirqan: “¡Davidpa Tsurin+ Jesus, llakipëkallämë!”.*+ 48 Tsënam nunakunaqa qayapar upälla kanampaq niyarqan, peru pëqa kutin kutinmi mas fuertiparaq, “¡Davidpa Tsurin, llakipëkallämë!”* nirqan. 49 Jesusqa shäkurirmi,* “këman shamunampaq niyë” nirqan. Tsënam pëkunaqa tsë wisku o qapra nunata, “¡kallpata tsari! Sharkuy, qayëkäshunkim” nir qayayarqan. 50 Y janan kaq röpanta juklla jipirkurmi, saltëpa sharkur Jesusman ëwarqan. 51 Tsënam Jesusqa, “¿qampaq imata ruramunätataq munanki?” nirqan. Tsë wisku nunanam, “Maestru,* yapë rikëtam munä” nirqan. 52 Tsënam Jesusqa, “ëwakuy, markäkurmi o yärakurmi qeshyëkipita alliyarqunki”+ nirqan. Tsë höram tsë nunaqa yapë rikar qallëkurqan,+ y Jesuspa qepantam nänipa ëwar qallëkurqan.