Mateu

12 Tsë witsanmi trïgu kuchumpa säbadu junaqchö Jesus pasëkarqan. Y qateqninkunaqa mallaqarmi espïgakunata kipchurnin gränuta uchur qallëkuyarqan.+ 2 Tsëta rikëkurnam fariseukunaqa kënö niyarqan: “¡Rikë! Qatiräyäshoqnikikunaqa säbaduchö mana ruranatam rurëkäyan”.+ 3 Pënam nirqan: “¿Manaku qamkunaqa leyishqa kayanki David y pëwan këkaqkuna mallaqar imata rurayanqanta?+ 4 ¿Manaku David, y pëwan këkaqkunaqa, Teyta Diospa wayinman yëkuyarqan y Teyta Diospaq kaq tantata mikuyarqan?+ Pëkunaqa manam tsëta rurayänampaq derëchuyoqtsu kayarqan. Tsëtaqa sacerdötikunallam mikuyta puëdiyan.+ 5 ¿O manaku Leychöpis leyiyarqunki templuchö sacerdötikunaqa säbadu junaqchö trabajëkarpis y säbadupaq Ley ninqanta mana respetëkarpis culpannaq kayanqanta?+ 6 Noqam qamkunata nï,* templupitapis mas väleqmi këchö këkan.+ 7 ‘Llakipäkoq* kayänëkitam munäqa,+ manam noqapaq animalkunata pishtayämunëkitatsu’+ ninqan ima ninan kanqanta alli entiendirqa, manam culpannaq kaqkunata juzgayankimantsu karqan. 8 Nunapa Tsurinqa, säbaduchö imata rurayänampaqmi mandakuyta puëdin”.+

9 Tsë sitiupita ëwakurnam, Teyta Diosta adorayänan wayiman yëkurqan. 10 ¡Tsëchömi juknin makin wanushqa o wañushqa nuna këkarqan!+ Tsëmi Jesusta imallapitapis acusayänampaq kënö tapuyarqan: “¿Alliku kanman säbadu junaqchö pitapis alliyätsi?”.+ 11 Tsënam pëqa nirqan: “¿Mëqëkitan säbadu junaqchö jukllëlla üshëkikuna jatun uchkuman jeqarkuptin sutarkuyankimantsu?+ 12 Musyayanqëkinöpis, ¡nunaqa üshapitapis masmi välin! Tsëmi säbadu junaqchö allita rurëqa allilla”. 13 Tsënam tsë nunata, “makikita kamämuy” nirqan. Y kamarkuptinmi makinta alliyäratsipurqan, juknin makinnömi sänu tikraskirqan. 14 Peru fariseukunaqa tsëpita yarqurirmi wanutsiyänampaq yachatsinakuyarqan. 15 Tsëta musyëkurnam Jesusqa tsëpita ëwakurqan, y atskaqmi qepanta ëwayarqan,+ y llapan qeshyëkaqkunatam alliyätsirqan. 16 Peru clärum nirqan pï kanqanta mana willakuyänampaq.+ 17 Tsënöqa nirqan Diospa willakoqnin Isaïas kënö willakunqan cumplikänampaqmi:

18 “¡Rikäyë! Pëmi akranqä kuyë sirwimaqnï,+ pëqa rikënïchömi alli këkan.*+ Pëtaqa podernïwanmi yanapashaq,+ y llapan nacionpita nunakunatam alli kaqta rurë imanö kanqanta musyatsinqa. 19 Pëqa manam plëtunqatsu+ ni fuertipa parlanqatsu, y manam reqishqa cällikunachö parlar purinqatsu. 20 Llapankunapaq justiciata ruranqanyaqmi, pakinëkaq shoqushtaqa pakinqatsu ni upinëkaq* mëchata upiratsinqatsu.+ 21 Awmi, jutinman markäkurmi o yärakurmi llapan nacionpita nunakuna shuyaräyanqa”.+

22 Tsëpitanam demoniuyoq karnin wiskuyashqa y müduyashqa* nunata Jesusman apayämurqan, y alliyaskatsiptinmi tsë müdu nunaqa parlar y rikar qallëkurqan. 23 Tsënam nunakunaqa alläpa espantakur, “¿manatsuraq pëqa Davidpa Tsurin?” niyarqan. 24 Tsëta wiyëkurnam fariseukunaqa kënö niyarqan: “Kë nunaqa demoniukunata gobernaq Diablu* yanapaptinmi demoniukunata qarqun”.+ 25 Tsënam imata pensëkäyanqanta musyar Jesusqa kënö nirqan: “Mëqan gobiernuchöpis pelyar rakikarqa, mana allichömi ushayanqa, y mëqan markachöpis o familiachöpis mana acuerdu karqa, mana allichömi ushayanqa. 26 Tsënöllam Diablupis* kikimpa demoniunkunata qarqurqa, kikimpa contranlla këkan, y tsënö karqa, ¿imanöraq gobiernun tsarakunman? 27 Y Diablu* yanapamaptin demoniukunata qarquptïqa, ¿pï yanapaptintaq qatiräyäshoqnikikunaqa demoniukunata qarquyan? Tsëmi qatiräyäshoqnikikunalla qamkunata juzgayäshunki. 28 Peru Diospa santu espïritun yanapamaptin demoniukunata qarquptïqa, Diospa Gobiernunmi janëkikunachöna këkan.+ 29 ¿O imanöraq pillapis kallpayoq nunapa wayinman yëkur, imëkantapis apakunman tsë kallpayoq nunata manaraq chakipita makipita watarqa? Tsë nunata watar-ran imëkantapis apakuyta puëdinqa. 30 Noqaman mana qaqämoqqa conträmi këkan, y noqawan mana juntaqqa nunakunatam rakikätsin.+

31 Tsëmi qamkunata nï,* jutsa* rurayanqampita y pitapis insultayanqampitaqa nunakuna perdonashqam kayanqa, peru Teyta Diospa santu espïritunta insultaqqa manam perdonashqatsu kanqa.+ 32 Musyayänëkipaq, Nunapa Tsurimpa contran pï nunapis mana allita parlarqa, perdonashqam kanqa;+ peru santu espïritupa contran mana allita parlaqqa, manam kanan ni shamoq tiempuchöpis perdonashqatsu kanqa.+

33 Qamkuna alli planta karqa, allitam wayuyanki, peru mana alli planta karqa, mana allitam wayuyanki, imata wayunqampitam plantataqa reqintsik.+ 34 Venënuyoq culebrapa wawankuna,+ mana alli nunakuna këkarqa, ¿imanöraq allikunata parlayankiman? Imatapis pensëkanqantam nunaqa parlan.+ 35 Alli nunaqa, shonqunchö allikuna kaptinmi allikunata parlan, peru mana alli nunaqa, shonqunchö mana allikuna kaptinmi mana allikunata parlan.+ 36 Këtam qamkunata nï,* mana allita parlaq nunakunaqa,+ Juiciu Junaqchömi juzgashqa kayanqa. 37 Imata parlanqëkipitam allita ruraqnö rikashqa o condenashqapis kanki”.

38 Tsënam wakin Ley qellqaqkuna y fariseukunaqa, “Maestru, ninqëkikuna rasumpa kanqanta musyayänäpaq ima milagrullatapis ruramuy” niyarqan.+ 39 Tsëta contestarnam Jesusqa kënö nirqan: “Teyta Diosta dejareq mana alli nunakunam milagruta rikëta munayan, peru manam ni ima milagrutapis rikäyanqatsu, sinöqa Teyta Diospa willakoqnin Jonasta pasanqan milagrullatam.+ 40 Imanömi Jonaspis jatun pescädupa pachanchö kima junaq y kima paqas karqan,+ tsënöllam Nunapa Tsurimpis patsa rurinchö* kima junaq y kima paqas kanqa.+ 41 Juiciu Junaqchö kanan witsan nunakunawan kawarimurmi, Nïnivi nunakunaqa pëkunata condenayanqa. Nïnivi nunakunaqa Jonas willakunqanta cäsukurmi arrepentikuyarqan.+ Peru ¡rikäyë!, Jonaspitapis mas mejormi këchö këkan.+ 42 Säbata* gobernaq reinapis Juiciu Junaqchö kawarimurmi kanan witsan nunakunata condenanqa. Pëqa patsapa mas karu kuchumpitam Salomon+ yachaq kanqanta wiyaq shamurqan. Peru ¡rikäyë!, Salomonpitapis mas mejormi këchö këkan.+

43 Mana alli espïritu nunapita yarqurirqa, jamanampaq sitiuta ashirmi tsaki sitiukunapa pasan, peru manam tarintsu.+ 44 Tsënam, ‘dejamunqä wayïman kutikushaq’ nin, y tsë wayiman charqa, pitsashqata y shumaq churapakushqatam tarin, y manam ni pï kantsu. 45 Tsënam ëwar kikimpitapis mas mana alli qanchis espïritukunata tsë wayiman pushamun, y yëkuykurmi llapankuna tsëchö kawar quedakuyan; y tsë nunaqa punta kanqampitapis mas peormi tikraskin.+ Tsënömi kanan witsan mana alli nunakunatapis pasanqa”.

46 Nunakunata parlapëkaptinnam, Jesuswan parlëta munar+ mamänin y wawqinkuna waqtachö shuyëkäyarqan.+ 47 Tsënam juk nuna Jesusta kënö nirqan: “Mamëkiwan wawqikikunam waqtachö këkäyan, y qamwan parlëtam munayan”. 48 Tsënam Jesusqa willaqnin nunata nirqan: “¿Pitan mamänï y pikunatan wawqïkuna kayan?”. 49 Qateqninkunata señalarmi kënö nirqan: “¡Rikë! ¡Pëkunam mamänï y wawqïkunaqa kayan!+ 50 Awmi, ciëluchö këkaq Teytä munanqanta ruraq kaqmi, wawqï, panï y mamänïqa”.+