Ushakë junaq, ¿chëkämunnaku?

Nunakunapa kawëninqa peligruchömi këkan kikinkunapa culpankunarëkur. ¿Diosqa permitinqatsuraq gobernar sïguiyänanta? Manam. Rikanqantsiknöpis, nunakunapa gobiernunta, waktsa kawakïta y nunapa dominakïnintaqa ushakätsinqanam. Y tsë llapanta musyanatam Kamakoq Diosnintsikqa munan. ¿Imanötaq tsë llapanta musyatsimantsik?

Viäjipa ëwanëkipaq kaqman pensari. Puntataqa, mäpataraqchi rikärinki y tsë sitiuman imanö ëwanëkipaq kaqtaraqchi musyapakunki. Y viajëkarna rikanki mäpachö ninqannö y musyapakunqëkinölla tsë näni kanqanta. Tsëmi cläru rikätsishunki ëwanqëki sitiuman allipa ëwëkanqëkita. Tsë mäpatanöllam, Diospis Palabran Bibliata qomarquntsik. Tsëchömi willamantsik ushakë junaq manaraq chämuptin entëru Patsachö imakuna pasakunampaq kaqta. Tiempu pasanqanmannömi rikantsik llapan pasakïkanqankunaqa Biblia willakunqannölla kanqanta. Tsëmi cläru rikätsimantsik ushakë junaqqa këllachöna kanqanta.

Bibliaqa willakun ushakë manaraq chämuptin nunakunapaq imëpitapis mas sasa tiempu chämunampaq kaqtam. Tsë tiempuchömi entëru Patsachö nunakuna rikäyänan karqan, mana imëpis pasakunqankunata. Rikärishun imakuna kanampaq kaqta.

1. ENTËRU PATSACHÖ IMËKA MANA ALLIKUNA Mateu librupa 24 kaq capïtulunchömi imakuna pasakunampaq kaq willakïkuna këkan. Tsëchömi nin, “më tsëchö imëkapis imanö këkanqampa ushënin” tiempuqa ushakärinqa “ushakë” junaqchömi (versïculukuna 3 y 14, NM). Tsë señalchöqa kanan karqan, jatun guërrakuna, mallaqëkuna, më tsëchö Patsa kuyïkuna, maqanakïkuna, suwanakïkuna, imëka mana allikuna, chikinakïkuna y engañakoq religiösukunam (versïculukuna 6-26, NM). Awmi, tsëkunaqa imëpis pasakushqallam. Peru ushakë junaq chämunampaq ichikllana pishikaptinmi, kë llapan tsë tiempullachö pasakunan karqan. Jinamampis, kë qateq kima willakïkunam cumplikänan karqan.

2. KUYAKÏWAN RESPËTUM USHAKËKAN Bibliaqa nin kë ushanan junaqkunachöqa kuyakïwan respëtu ushakänampaq kaqtam. Tsëchömi nin nunakuna kënö tikrakuriyänampaq kaqta, ‘codisiosu, qellellapaq locuyäcoq, orgullosu, musyaq tucoq, Teyta Diospa contran parlaq, papänintapis mamanintapis mana cäsoq, agradesiquita mana yachaq, mana ancupäcoq, cuentusteru, llutan rurecunata mana teqñaq, alli rurecuna mana gustaq, amiguncunata lebantar ranticoq, allapa lisu, Diosnintsic munashqanta mana cäsushpa quiquincunapa munenincunallata ruracoq’ (2 Timoteu 3:1-4). Rasunmi, tsënö portakïqa unëpitam kashqa, peru ushanan junaqkunachöqa mas mana allimanmi chänan karqan. Bibliapis tsëtam nin: “Allapa sasa cawaqui tiempucuna” kanampaq kaqta. Kanan witsan nunakunaqa, ¿manaku tsënö portakuyan?

3. PATSATA USHAKËKÄTSIYAN Bibliaqa nin: ‘Patsata ushaquecatseqkunata’ Dios ushakätsinampaq kaqtam (Apocalipsis 11:18). ¿Imanötaq Patsata ushakëkätsiyan? Noëpa tiempunchönöllam. Tsë tiempuchöqa: “Diospa rikënimpaqqa patsa pasëpa mana allimanmi tikrarirqan, y patsachöqa pasëpa mana alli rurëkunam juntarirqan. Dios patsata rikëkuptinnam, ¡rikë!, pasëpa mana alli këkarqan”. Tsë nunakunapaqmi, Noëta Dios kënö nirqan: “Patsatawan juntum ushakätsishaq” (Genesis 6:11-13). ¡Kanan witsampis chipyëpa mana allichömi kawëkantsik! Mana imëpis rikanqantsikkunam pasakïkan. Rurayanqan armakunaqa Patsata y nunakunata ushakäratsita puëdinmi. Jinamampis, nunakunaqa juknöpapis Patsata ushakëkätsiyanmi, Patsachö kawë kanampaq kaqkunatam ichikllapa ichikllapa ushakëkätsiyan: vientuta, lamarkunata, plantakunata, animalkunata y maskunatapis.

Këman pensari: Pasaq pachak watakuna qepamanqa, ¿nuna puëdinmantsuraq karqan mëtsika nuna mayinta raslla ushakäratsita? Manam. Peru kananqa puëdinmi. Mëtsika armamentukuna y Patsata malogrëkäyanqanmi tsëta rikätsikun. Y mas llakikïpaqqa, peligruchö këkanqantsikta nunakuna mana entiendiyanqan y tukï y imëkapaq mushoq mäquinakuna yarqamoqta mana controlëta puëdiyanqanmi. Peru kushikïpaqqa, Patsa imachö ushanampaq kaqqa manam nunapa makinchötsu këkan. Diosqa änikun Patsata manaraq ushakätsiyaptin, tsë ushakëkätseqkunata ushakätsinampaqmi.

4. ENTËRU PATSACHÖ DIOSPITA YACHATSIKUYANQAN Mateu libru willakunqan señalchöqa, mana imëpis rurayanqan rurëpis pasakunanmi karqan. “Kë gobiernupa alli willakïnintaqa jinantin patsachömi yachatsikuyanqa, llapan markachö nunakuna musyayänampaq; tsënam ushakë chäramunqa” (Mateu 24:14, NM). Llapan iglesiakuna yachatsikuyanqampitapis alläpa jukläyam kanan karqan. Juk precisaq yachatsikïpitam yachatsikuyänan karqan, Diospa ‘Gobiernumpita alli willakïta’. ¿Mëqan religiontaq yachatsikïkan Diospa Gobiernumpa alli willakïninta ‘jinantin patsachö’?

Jehoväpa testïgunkunapa internetchö jw.org päginankunaqa, Diospa ‘Gobiernumpa alli willakïninta’ musyatsikunampaq rurashqam. Tsëchömi, 700 idiömakunapitapis maschö publicacionkuna kë yachatsikïpita willakuyan. ¿Mëqan religiontaq Diospa Gobiernumpita yachatsikunampaq tsëläya kallpachakun? Manaraq Internetpis kaptinmi, Jehoväpa testïgunkunaqa, Diospa ‘Gobiernumpita alli willakïta’ yachatsikuyanqäpita reqishqa kayä. 1939 watapita patsëmi, Täpakoq revistachö “Jehovä Diospa Gobiernumpita willakoq” neq willakï yarqamun. Religionkunapaq parlaq juk librum yachatsikuyanqäpaq kënö nin: “Yachatsikurnin mëyaq chäyanqantaqa manam pipis igualantsu”. Alli willakïkunata yachatsikuyanqächöqa, jina willakuyä Diospa Gobiernun mana alli nunakunata ushakätsinampaq kaqtawanmi.

NUNAKUNAPAQ IMËPITAPIS MAS SASA TIEMPU

¿Kë yachatsikïchö parlanqantsik willakïkuna cumplikaqta rikarqunkiku? Pasaq pachak watapanam kë revistaqa entëru Patsachö pasakïkanqankunata willakamushqa y leyeqninkunaqa rikäyashqam ushanan junaqkunapaq Biblia ninqan cumplikëkanqanta. Tsëta mana creeq nunakunaqa, ardëlla tsë llapan willakïkuna kanqanta y entëru Patsachö pasakïkanqanqa imëpis tsënölla kashqa kanqantam niyan. Jina kanan witsan pasakunqankunataqa, noticiakunapa musyatsikayämunqanrëkur raslla imëkatapis musyarinqantsiktam niyan. Tsënö nikäyaptimpis, pimampis mana qaqaq yachaq nunakunaqa imëpitapis mas sasa tiempuchö kawëkanqantsiktam cuentata qokuyashqa.

Tsëtaqa musyantsik, nunakuna peligruchö këkäyanqampaq cientïficu nishqan wakin nunakuna, juk libruchö kënö niyashqa kayaptinmi: “Ima peligrukuna këkanqanta alleq rikëkurmi, këta niyä: Tukï y imëkapaq mushoq mäquinakuna yarqamunqanrëkurmi, nunakunaqa imë karpis ushakäyänampaq këkäyan”. Tsënö niyanqankunam mëtsikaq nunakunata, kë revista ruramoqkunata y leyeqninkunata cuentata qokatsin ichikllachöna ushakë junaq chämunampaq kaqta. Peru manam mantsakänantsiktsu, sinöqa kushikunantsikmi. ¿Imanirtaq tsëta nintsik? Porqui salvakïtam puëdishun.