Leyeqkuna tapukuyanqan
¿Imachötan igualan Salmus 12:5 y 6 ninqan, 7 kaq versïculuchö ninqanwan?
Salmus 12:7 textuchö ninqanqa nunakunapaqmi parlëkan, tsëtaqa entiendintsik Salmus 12:5 textuchö ninqampitam.
1 a 4 versïculukunachömi gobernanti David parlan, allita ruraq nunakuna ushakäyashqa kayanqanta. Y 5 a 7 versïculukunachönam kënö nin:
“Humildi nunakunata y waktsa nunakunatam sufrikätsiyan,
y pëkunaqa waqarmi këkäyan.
Peru despreciar sufritsiyänantaqa manam dejashaqnatsu,
‘ëwëkurmi salvamushaq’.
Teyta Jehovä parlanqankunaqa alläpa limpium,
hornuchö qanchis kutipa alliyätsishqa pläta metalnöraqmi.
Teyta Jehovä,
kë mana alli nunakuna mana sufritsiyänampaqmi humildi nunakunata y waktsa nunakunata imëpis cuidanki”.
Salmus 12:5 textuchömi nin sufrikaq nunakunata salvanampaq kaqta.
Y Salmus 12:6 textuchönam kënö nin: “Teyta Jehovä parlanqankunaqa alläpa limpium, [...] alliyätsishqa pläta metalnöraqmi”. Jehoväta kuyaq cristiänukunaqa tsë textuchö ninqannöllam pensantsik (Sal. 18:30; 119:140).
Wakin Bibliakunachöqa Salmus 12:7 versïculuchöqa kënömi nin: “Qammi cuidanki”. Peru qepa kaq versïculukunachöqa Jehoväpa Palabrampaqmi parlan, tsëmi wakinkunaqa pensayan Palabranta Jehovä cuidanampaq kaqta.
Y rasumpa kaqchöqa, Teyta Jehoväqa manam permitishqatsu Palabranta ushakätsiyänanta (Is. 40:8; 1 Pëd. 1:25).
5 kaq versïculu ninqampis rasun kaqllam. Mana alli nunakunarëkur sufrikaq sirweqninkunatam Jehoväqa yanapashqa y salvashqa, tsëtaqa imëpis rurëkanqallam (Job 36:15; Sal. 6:4; 31:1, 2; 54:7; 145:20).
Peru, ¿7 kaq versïculuchöqa Palabranta Jehovä cuidanqampaqku o nunakunata cuidanqampaqku nikan?
12 kaq capïtulupa llapan versïculunkunata alli leyirqa, nunakunata cuidanqampaq parlëkanqantam entiendintsik.
Salmus 12:1 textuchöqa parlëkan nunakuna engañayanqanrëkur sufrikaq nunakunapaqmi. Y tsëpitanam Jehoväqa nin mana allita parlaq nunakunapita salvanampaq kaqta. Kë salmu ninqanwanmi entiendintsik Jehovä parlanqanqa rasumpa kaqlla kanqanta y sirweqninkunata defendinampaq kaqta.
Tsëmi 7 kaq versïculuchöqa mana alli nunakunarëkur sufrikaq humildi nunakunata Jehovä cuidanqampaq parlëkan.
Tsëqa, ¿imanirtan wakin Bibliakunachöqa 7 kaq versïculuchö “qammi cuidanki” nin? Tsënöqa nin hebreu idiömachö qellqayanqan confiakuypaq copiakunata rikëkur qellqashqa kayaptinmi. Peru Septuaginta niyanqan Bibliachöqa “pëmi cuidayämanqa” y “pëmi tsapäyämanqa” nirmi churayashqa. Y tsënö nirqa mana alli nunakuna sufritsiyanqan humildi nunakunapaqmi parlëkan, y pëkunatam Jehoväqa yanapanqa (Sal. 12:7, 8). Y hebreu idiömapita arameu idiömaman traduciyanqanchönam 7 kaq versïculuchö kënö nin: “SEÑOR qammi alli ruraq nunakunata tsapanki, qammi kë mana alli nunakunapita imëpis cuidanki”. Tsënö ninqanwanmi maslla entiendintsik Salmus 12:7 textu ninqanta. Manam Palabranta Jehovä cuidanqampaqtsu parlëkan, sinöqa nunakunata cuidanqampaqmi.
Kë versïculuchö ninqanta entiendinqantsikmi yanapamantsik sirweqninkunata Jehovä imëpis defendinampaq kaqman confiakunapaq.