Jacobmi herenciata chaskirqan

Isaacqa 40 watayoq këkarmi Rebëcawan casakurqan, y alläpam kuyarqan. Tiempu pasariptinqa ishkë ollqu wamrankunam karqan, y ishkanmi juntu yuriyarqan.

Punta yureq kaqpa jutinqa Esaümi karqan y qepa kaqpanam Jacob karqan. Esaütaqa chakrakunachö libri purïmi gustaq, y animalkunata wanutsitaqa allim yachëkoq. Peru Jacobtaqa wayichö këmi gustaq.

Tsë tiempuqa, papäninkuna wanukuptin mayor kaqmi mas atska chakrata y mas atska qellëta chaskeq, tsëtam herencia niyaq. Peru Isaacpa familianchöqa, juk herencia mastam chaskiyänan karqan, y tsë herenciaqa karqan Abrahanta Jehovä äninqankunam. Esaüqa manam tsë änikuykunata alläpa valoraqtsu, peru Jacobpaqqa alläpa väleqmi karqan.

Juk tardim Esaüqa animalkunata wanutseq ëwanqampita wayinman alläpa utishqa o pishipashqa chärirqan. Tsënam Jacob rurëkanqan mikuyta munapar kënö nirqan: “¡Mallaqëwanmi kallpäpis ushakärishqa! ¡Jinan höra tsë cocinëkanqëki puka mikuyta ichikllata sirwiramë!”. Tsënam Jacobqa kënö nirqan: “Puntataqa mayor kanqëkipita derëchuykitaraq rantikëkamë”. Esaünam kënö nirqan: “Mallaqëpitapis wanurïnam, ¿imapaqtaq tsë derëchüqa sirwiman? Munarqa katsikuypis. Noqaqa mikuytam munä”. Esaü ruranqanqa mana allim karqan. Juk plätu mikuyllawanmi alläpa väleq herencianta cambiarirqan.

Isaac awkinyärirqa mayor kaq tsurin Esauta jukllana bendicikuytam munarqan. Peru Jacobta Isaac bendicinampaqmi Rebëcaqa yanaparqan. Tsëta musyëkurmi Esaüqa cölerar wanuritapis munarqan, y wawqinta wanuratsitam munarqan. Tsënam Isaacwan Rebëcaqa imapis pasëkunanta mantsar Jacobta kënö niyarqan: “Tiyuyki Labanpa wayinman ëwakuy. Y wawqikipa cöleran pasanqanyaq juk tiempupa tsëchö quedakamuy”. Tsënam Jacobqa papäninta y mamäninta cäsukur, wawqin mana wanutsinampaq qeshpir ëwakurqan.