13 KAQ YACHAKUNËKIPAQ
Jacobwan Esaüqa amishtayarqanmi
Abrahanta y Isaacta cuidanqannölla pëtapis cuidanampaq kaqtam Jehoväqa Jacobta änirqan. Jacobqa Haran markachömi takurqan, tsëchömi casakurqan y mëtsikam wamrankuna karqan. Y kapoqyoq nunam tikrarqan.
Tiempu pasariptinnam, Jehoväqa Jacobta nirqan, “unë kastëkikunapa markanchö kawaq familiëkikunaman kutikuy”. Tsëmi Jacobwan familianqa viajar qallëkuyarqan. Y ëwëkäyaptinmi puntata ëwaq sirweqninkuna pëman kutirir kënö niyarqan: “Wawqiki Esaü kaqtam ëwayarqö, y 400 nunakunawanmi qam kaqman shamuykan”. Tsënam Jacobqa pëtawan familianta ima mana allipis pasëkunanta pensar alläpa mantsakarqan. Tsëmi Jehoväman kënö mañakurqan, “wawqïpita salvëkallämë”. Y waränin junaqqa atska üshakunata, cabrakunata, wäkakunata, camëllukunata y ashnukunata juntëkurmi Esaüpaq qarënin apatsirqan.
Tsë paqasmi Jacobqa japallan këkar juk angelta rikärirqan, y tsë angelwanmi patsa waranqanyaq tsaränakur kayarqan. Nanatsikuykarpis Jacobqa tsarararmi sïguirqan, tsënam angelqa “patsapis waranqanam, amana tsarämënatsu” nirqan. Peru Jacobqa kënömi nirqan: “Bendicimaptikiran dejashqëki”.
Tsënam angelqa Jacobta bendicirqan, tsënömi Jacobqa musyarqan wawqin Esaüpita Jehovä salvanampaq kaqta.
Waränin junaqqa 400 nunakunawan Esaü shamuykaqtam Jacobqa rikärirqan. Tsëmi Esaüwan tinkuyänampaq familiampa puntanta ëwarqan, y rikëkurmi frentinchö siëti kuti patsayaq puktirqan o umpurqan. Tsënam Esaüqa cörripa ëwarnin Jacobta waqukurkurqan o makallakurkurqan. Ishkanmi waqayarqan y amishtayarqanmi. ¿Jehoväta gustarqantsuraq Jacob ruranqan?
Tsëpitaqa wayintam Esaü kutikurqan, y Jacobnam viajar sïguirqan. Jacobpa tsurinkunaqa döcim kayarqan y këkunam jutinkuna karqan: Ruben, Simeon, Levï, Judä, Dan, Neftalï, Gad, Aser, Isacar, Zabulon, Josë y Benjamin. Tiempu pasariptinqa, Josëwanmi Jehoväqa sirweqninkunata salvarqan. ¿Musyëta munankiku imanö salvanqanta? Tsëtam qateqnin kaqchö yachakushun.
“Chikiyäshoqnikikunata kuyayë, y imëkata rurar sufritsiyäshoqnikikunapaq mañakuyë. Tsënöpam ciëluchö këkaq Teytëkikunapa tsurinkuna kayanqëkita musyayanqa” (Mateu 5:44, 45).