Jehovämi poderninwan Sansonta yanaparqan

Mëtsika israelïtakunam santukunata yapë adorar qallëkuyarqan, tsëmi Jehoväqa permitirqan israelïtakunata filisteu nunakuna sufritsiyänanta. Peru wakin israelïtakunaqa Manöahwan warminnömi Jehoväta kuyayaq y respetayaq. Manöahpaqa manam wamran kapurqantsu. Juk kutim juk angelta Jehovä mandarqan Manöahpa warminta kënö ninampaq: “Wamrëkim kapushunki, y pëmi filisteu nunakunapita israelïtakunata salvanqa. Pëqa nazareum kanqa”. ¿Y pikunatataq nazareu nir reqiyaq? Tsënöqa reqiyaq pëllatana sirwinampaq Jehovä akranqan nunakunatam, y pëkunaqa manam aqtsankunata rutukuyaqtsu.

Tiempu pasariptinmi Manöahpa wamran yuririrqan, y Sanson nirmi jutin churayarqan. Jatunyäriptinmi Jehoväqa kallpasapata tikraratsirqan, tsëmi ¡leontapis fäcil-lla wanuratseq! Juk kutichömi japallan këkar 30 filisteu nunakunata wanuratsirqan. Tsëmi filisteu nunakunaqa chikiyaq, y imanö wanutsiyänampaq kaqmanmi pensayarqan. Juk kutim Gäza niyanqan markaman chärir, juk wayichö Sanson punuykarqan. Tsëmi filisteukunaqa patsa waräriptinllam wanuratsishun nir tsë markapa entërunman churanakuyarqan. Peru Sansonqa pullan paqas sharkurmi tsë markaman yëkuna jatun punkuta entëruta sutarirqan. Y matankarkurmi Hebron markapa frentinchö këkaq jirka puntanyaq aparqan.

Tsënam filisteu nunakunaqa Sansonpa novian Dalïlata kënö niyarqan: “Imanöpa kallpasapa kanqanta, y imanö venciyänäpaq, y dominayänäpaq kaqta yachëllapa tapumuy, tsëta ruraptikiqa atska qellëtam pagayashqëki”. Tsënam Dalïlaqa qellëpaqrëkur pëkunata änirirqan. Sansonqa manam Dalïlata willarqantsu imanir kallpasapa kanqanta. Peru kutin kutin tapupaptinmi, imanö këtapis mana puëdir, kënö nirqan: “Nazareu karmi ni imëpis aqtsäta rutukurqötsu. Aqtsäta ruturayämuptinqa kallpämi ushakärinman”. Sansonqa mana allitam rurarqan Nazareu kanqanta Dalïlata willarnin.

Tsënam Dalïlaqa filisteu nunakunata kënö nirqan: “¡Shayämuy musyänam imanir kallpasapa kanqanta!”. Nïkurmi Sansonta mellqaninchö punukäratsir aqtsanta ruturatsirqan. Tsëpitanam fuertipa kënö nirqan: “¡Sanson, filisteu nunakunam këchö këkäyan!”. Tsënam Sansonqa pununqampita sharkamur kallpan ushakärishqa kanqanta cuentata qokurirqan. Tsënam filisteu nunakunaqa Sansonta prësuskir nawinkunata oqtiriyarqan y carcelayarqan.

Juk kutim, mëtsika filisteu nunakuna Dagon niyanqan santunkunata adorayänampaq juk templuchö juntakäyarqan. Y fuertipam kënö niyaq: “Makintsikmanmi chikimaqnintsikta diosnintsik churamushqa. Sansonta apayämuy asitsimänapaq”. Y ishkë columnakunapa chowpinman churëkurmi pëpita asikur kayarqan. Tsënam Sansonqa fuertipa kënö nirqan: “Llapanta Gobernaq Teyta Jehovä, kë kutilla yarpëkallämë kallpä yapë yurinampaq”. Tsë witsampaqqa aqtsanqa winarishqanam karqan, tsëmi templupa ishkan columnankunata fuertipa kuyuratsirqan. Tsënam janankunaman juchur llapankunata ushakäratsirqan, y tsëchömi Sansonpis wanurqan.