Wiyar alli yachakushun
1. ¿Imanirtaq jatun asamblëakunachöqa yachatsikayämunqanta wiyakunan sasaraq o ajaraq kanman?
1 2013 watachö jatun asamblëantsikqa chäramunqanam. Entëru Patsachö nunakuna Diospita yachakïta munëkäyanqanmannö yachatsikïkunam alistakämushqa. ¿Alistakïkankinaku ni mëqan junaq asamblëata mana perdikunëkipaq? Jatun asamblëakunachöqa masran precisan atentu këkänantsik. Congregacionchö reunionkunapitapis mas jatunmi discursukuna, tsëmi shumaq wiyakunantsikqa alläpa precisan. Viajashqa kar y imarëkurpis mas utishqam o pishipashqam tsë junaqkunaqa kantsik. ¿Imaraq yanapamäshun asamblëachö llapanta wiyar alli yachakunapaq? (Deut. 31:12.)
2. ¿Imanötaq asamblëapaq shonquntsikta alistashwan?
2 Manaraq asamblea kaptin. Jatun asamblëapaq progrämata y juk ishkë textukunayoq discursukunapa tïtuluntaqa tarinki www.jw.org/que päginantsikchömi. Kë progrämata Internetchö rikanqëkim yanapashunki asamblëapaq shonqïkita alistanëkipaq (Esd. 7:10). Allichi Familiachö Diosta Adorana Hörachö imanöpis asamblea kanampaq kaqman yarpakachëkäyankiman.
3. ¿Imaraq yanapamäshun discursukunata shumaq wiyakunapaq?
3 Asamblëachö këkar. Alliqa kanqa asamblea manaraq qallaptin bäñuman ëwanqëkim. Y celularnikita upiratsi, qayayäshuptiki o mensäji chämur mana büllata ruranampaq y asamblea hora mensäjitapis mana apatsinëkipaq. Y mana upitsirqa, mana büllanampaq kaqllaman churari, tsënöpa qayayäshuptiki pipis mana mäkunqanyaqlla contestanëkipaq. Tableta electrönica nishqanta utilizarqa, wakinkunata mana mäkatsirlla utilicë. Discursukunata wiyë höraqa ama ni imata mikur ni upur këtsu (Ecl. 3:1). Discursamoqta rikarë y textukuna leimunqanta Bibliëkichö qati. Jina allim kanman precisaq kaqkunata apuntanqantsikpis.
4. ¿Imanötaq teytakuna wamrankunata yanapayanman discursukunata wiyakur shumaq yachakuyänampaq?
4 Munantsikmi wamrakunapis wiyakur shumaq yachakuyänanta. Proverbius 29:15 textum kënö nin: “Munëninta rurakunanta jaqiyanqan wamraqa mamänintam penqakatsinqa”. Tsëmi teytakunaqa wamrankunawan jamakuyanman, tsënöpam pëkunaqa yanapëta puëdiyanqa discursukunata shumaq wiyakuyänampaq, mensäjikunata apatsir o purir mana kakïkäyänampaq. Hasta pishi wamrakunatapis yachatsiyanmanmi llapan discursukunata mana entiendirpis, mana punukar y upällalla këkäyänampaq.
5. ¿Imanirtaq alläpa alli kanman yachakunqantsikkunata yarpanqantsik y imanötaq rurashwan?
5 Asamblea ushariptin. Tempränulla patsäkï alli pununëkipaq. Cada junaq yachakunqëkikunata familiëkiwan yarpäriyänëkipaq tiemputa raki, tsënöpam yachakuyanqëkikunata rasllaqa qonqariyankitsu. Amïguïkikunawan mikoq ëwarninqa, ¿imanirtaq gustayäshunqëki kaqkunapita parlariyankitsu? Apuntayanqëkikunatam rikäriyankiman. Tiempu pasariptinqa, Familiachö Diosta Adorana Hörachömi yachakuyanqëkita imanö rurayänëkipaq kaqta parlariyankiman. Tsëraq yarqamushqa publicacionkunapita yachakuyänëkipaqpis cada sëmanam tiemputa jorqayankiman.
6. ¿Imanötaq asamblëantsikta alli provechashwan?
6 Manam ni imapaqpis sirwinmantsu juk fiestachö mikïta mana kushishqalla mikurinqantsikqa. Tsënöllam pasakunman jatun asamblëachö imëka mikï cuenta Diospa yachatsikïninwampis. Alli provechashun ni mëqan junaqpis mana faltarnin, yachatsikayämunqanta shumaq wiyakurnin y yachakunqantsiknölla rurarnin.