“Llapan nunakunata juntë”
1. ¿Jatun asamblëantsikkuna o atska nacionkunapaq asamblëakunaqa imachötaq igualan israelïtakuna Sinaï jirkachö juntakäyanqanwan?
1 Egiptupita Israelïtakuna yarquyanqanllachömi, Jehoväqa Moisesta mandarqan Sinaï jirkachö juntakärir Diospa Palabranta wiyayänampaq, cäsukuyänampaq y wamrankunatapis yachatsiyänampaq (Deut. 4:10-13). Tsënö juntakäyanqanqa yanaparqan Diosman mas markäkuyänampaqmi. Kë shamoq killakunachöpis Jehoväpita yachakunapaqmi jatun asamblëachö o atska nacionkunapaq asamblëachö juntakäshun. ¿Imakunataraq rurashwan tsëchö llapanta alli wiyakunapaq?
2. ¿Imatataq rurashwan jatun asamblëapaq listu këkänapaq?
2 Listu këkäshun. Jehoväqa israelïtakunata mandarqan Sinaï jirkachö juk reunionpaq alistakuyänampaqmi (Ex. 19:10, 11). Tsënöllam jatun asamblëapaqpis llapantsik puntallapitana alistakunantsik. Trabäjupitam permïsuta mañakunantsik. Nehemïas pasanqampa itsa pasëkanki. Pëqa rey Artajerjespa vïnu sirwipaqninmi karqan, y Jerusalenpa perqankunata perqaqmi ëwëta munarqan, peru musyarqanmi rey permisëta mana munanampaq kaqta. Tsëmi Diosman mañakurqan, patrunninta imanö parlapänampaq kaqta yarpachakurqan y valorta tsarirkur permisakoq ëwarqan. Reyqa permisarirqanmi y hasta trabäjuta rurayänampaqpis yanaparqanmi (Neh. 2:1-9). Permïsuta mañakurirpis, viajanëkipaq y mëchö posadakunëkipaqqa alleqmi patsätsinëki. Anciänukunaqa kushishqam yanapayäshunki. Llapan junaq tempränu chänëkipaq alistakï, tsënöpam listu këkäshun “imëpitapis mas wiyakunapaq” (Heb. 2:1, NM).
3. ¿Imataq yanapamäshun asamblëapaq shonquntsikta alistanapaq?
3 Jina shonquntsiktapis alistanantsikmi shumaq wiyakunapaq y yachakunapaq (Esd. 7:10). Juk o ishkë textukunayoq discursukunapa tïtulunkunaqa jw.org päginantsikchömi këkanqana. Tsëmi alli kanman asamblëapaq juk o ishkë semänakuna pishikaptin, Familiachö Diosta Adorana Hörachö tsë progrämapita yachakurinqantsik. Wakin publicadorkunaqa tsë progrämata imprimirirmi asamblëachö apuntayänampaq apayan.
4. ¿Imanötaq teytakunaqa jatun asamblëata provechayanman wamrankunata yachatsiyänampaq?
4 ‘Wamrëkikunata yachatsiyë.’ Israelïtakuna juntakäyanqanqa jina alläpam precisarqan wamrankunata Jehoväpita yachatsiyänampaq (Deut. 4:10). Jina tsënöllam jatun asamblëantsikpis yanapamantsik. Teytakunaqa wamrankunawanmi täkuyanman asamblëa höra y yachakuyänampaqmi yanapayanman. Tsëpitanam asamblëa ushariptin yachakuyanqampita Familiachö Diosta Adorana Hörachö parlakuriyanman.
5. ¿Imanötaq yanapamäshun jatun asamblëaman ëwanqantsik?
5 Sinaïchö israelïtakuna juntakäyanqanqa Jehoväpa markan kayanqanta mas valorayänampaqmi yanaparqan (Deut. 4:7, 8). Shamoq jatun asamblëantsikpis tsëpaqmi yanapamäshun. Tsë junaqkunaqa, Satanaspa mana alli mundumpitam rakikashqa kashun, tsëmi yanapamäshun sinchi kanapaq y cristiänu mayintsikkunawan shumaq pasarinapaq (Is. 35:7-9). Jehoväpa junaqninqa chëkämunnam, tsëmi alli provechanantsik yanaqintsikkunawan yanapanakunapaq juntakëta (Heb. 10:24, 25).