¿Imanötaq yachatsikushwan mostradorchö publicacionkunawan?

Mësakunawan o mostradorkunawan yachatsikïqa mëtsikaq nunakunatam rasumpa kaqta reqiyänampaq yanapëkan (Juan 6:44). Tsëmi anciänukunapaq yachatsikï yarqamurqan congregacionnimpa territoriunkunachö nunakuna mas puriyanqanchö yachatsikuyänampaq. Mostradorkunawan yachatsikuyänampaqqa manam cäsi autoridäkunataraqtsu permïsuta mañakuyänan. ¿Pikunataq yachatsikuyanman? Yachëpa imatapis ruraq, cristiänunö shumaq vistikoq y yachëpa parlapäkoq publicadorkunam. Këchömi rikärishun imakunata ruranapaq y mana ruranapaq kaqta, tsë yachatsikïta publicadorkuna qatiyanqanmi yanapakunqa yachatsikïninkunachö alli rurayänampaq.

Këtam rurashwan:

Tsëpa pasaq nunakunawan yachanëllapaq kë y ima wanayanqantapis atentu kë. Jina asi asilla saludë. Pipis tsë mostrador nöpampa rikarar pasaptinqa, kënö niri: “Munarninqa mëqantapis apakïta puëdinkim”.
Allim kanman mostradorpita ichik karunchö shäranqëki. Wakin markakunachöqa, mostradorpa ichik carunchö shäkuyanqan alli yarqunqantam publicadorkuna rikäyashqa, peru höraqa manam yanapakuntsu. Tsëmi alli kanman mostradorpa ichik carunchö shäkurinqantsik publicacionnintsikkunata rikapar pipis witinqanyaq. Tsë höram parlaparnin qallëkushwan, y itsa kënö tapurishwan: “¿Imëllapis kënö tapukushqankiku?”.
Imëpis Bibliata utilicëta procurë.
Yachatsikunantsikpaq publicacionnintsikta, itsa Yachatsikun libruta o juk publicacionkunata apaptinqa, willari imanö tsë libruwan Bibliapita yachatsikunqantsikta, o ¿Imanirtaq Bibliapita yachakunkiman? nishqan vidëuta celularnikichö o tabletnikichö rikäratsi.
Pillapis Bibliapita mas yachakïta munaptinqa, jutinta y mëchö täranqanta tapuri. Y congregacionnikipa territoriunchö mana täraptinqa, Persona que mostró interés (S-43) nishqan formulariuman qellqari y congregacionpa secretariunta raslla entregari.