¿Kë Patsa ushakanqatsuraq?
Itsachi Bibliachö leyishqanki “kë patsapis [...] ushakanqam” neqta (1 Juan 2:17, Teyta Diospa Willakïnin). Tsënö nirqa, ¿llapan nunakuna ushakäyänampaq kaqtaku nikan? ¿Kë Patsa tsunyaqtsuraq quedanqa o chipyëpatsuraq ushakanqa?
BIBLIACHÖQA MANAM NINTSU PATSA NI NUNAKUNA USHAKÄYÄNAMPAQ KAQTA.
¿Imakunatan mana ushakanqatsu?
NUNAKUNA
¿Ima nintan Bibliachöqa? Teyta Diosqa “manam [Patsataqa] manakaqpaqtsu kamashqa, sinöqa nunakuna täräyänanpaqmi” (ISAÏAS 45:18).
PATSA
¿Ima nintan Bibliachöqa? “Wamrakuna yuriyan y nunakunapis wanuyan, peru kë patsaqa manam imëpis ushakanqatsu” (ECLESIASTES 1:4, TNM).
¿IMA NINANTAN TSËQA? Kë Patsa mana imëpis ushakänampaq kaqta y tsëchö nunakuna täräyänampaq kaqtam Bibliachöqa nin. Tsëqa, “Patsa ushakanqam” nirqa ¿imapaqtan parlëkan?
KËMAN PENSË. Bibliachö “Patsam ushakanqa” nirqa Noëpa tiempunchö pasanqanwanmi igualatsin. Tsë tiempuchöqa nunakuna alläpa mana allikunallatam rurakuyaq (Genesis 6:13). Tsëmi Teyta Diosqa, jirkakunata yaku tsapanqanyaq tamyatsir llapan mana alli ruraqkunata ushakätsirqan. Peru Noëtaqa cäsukoq kaptinmi Teyta Diosqa familiantawan salvarqan. Tsëpaqmi Bibliachö kënö nin: “Kë patsata[m] diluviuwan ushakätsirqan” (2 Pëdru 3:6, Teyta Diospa Willakïnin). Tsë tiempuchöqa manam Patsatsu ushakarqan, sinöqa mana alli nunakunam. Bibliachö “Patsam ushakanqa” nirqa manam kë Patsa ushakänampaqtsu nikan, sinöqa mana alli nunakuna ushakäyänampaq kaqtam.
¿Imakunatan ushakanqa?
PROBLËMAKUNA Y MANA ALLIKUNA
¿Ima nintan Bibliachöqa? Kënömi nin: “Prontunam mana alli nunakunaqa ushakäriyanqa. Mëläya ashirpis manam tarinkitsu. Alli shonquyuqkunam sï [...] alli kawakuyanqa. Pëkunaqa alli pasakïchömi kawakuyanqa” (SALMUS 37:10, 11).
¿IMA NINANTAQ TSËQA? Diluviuwanqa manam llapan mana allikunatsu chipyëpa ushakarqan. Tsëmi Diluviu pasariptinqa nunakuna yapë mana allikunata rurar qallëkuyarqan. Peru ichikllachönam Teyta Diosqa llapan mana allikunata ushakätsinqa. Salmus libruta qellqaq nuna ninqannömi, ‘prontuna mana alli nunakuna ushakäyanqa’. Awmi, Teyta Diosqa ciëluchö patsätsinqan Gobiernunwanmi llapan mana allikunata ushakätsimunqa y pëta cäsukoqkunallanam mandädunchö kayanqa.
KËMAN PENSË. Kanan witsan gobiernukunawanqa, ¿imatan pasakunqa? ¿Diospa Gobiernuntatsuraq yanapayanqa? Manam. Bibliachöqa nin Diospa Gobiernumpa contran churakäyänampaq kaqtam (Salmus 2:2). Tsëmi Teyta Diosqa llapan gobiernukunata ushakäratsir pëllana entëru Patsata gobernamunqa (Daniel 2:44). Y nunakunaqa, ¿imanirtan gobernayämunqanatsu?
NUNAKUNAQA manam gobernëta puëdiyantsu
¿Ima nintan Bibliachöqa? “Manam nunaqa kikinllapitaqa kawëninta dirigillatapis puëdintsu” (JEREMÏAS 10:23, TNM).
¿IMA NINANTAQ TSËQA? Teyta Diosqa manam nunakunata nuna mayinta gobernanampaqtsu kamashqa. Manam alli gobernëta puëdiyantsu, y problëmakunatapis altsëta manam puëdiyantsu.
KËMAN PENSË. Britannica Academic libruchömi nin, ni mëqan nacionpita gobiernukunapis ‘waktsa këta, mallaqëta, qeshyakunata, desgraciakunata, guërrakunata, suwakoqkunata y maqakoqkunata ushakätsita mana puëdiyänampaq kaqta’. Y këtapis nirqanmi: “Wakinqa creiyan[...] juk gobiernulla entëru Patsachö karqa kë llapan mana allikunata altsëta puëdinampaq kaqtam”. Peru entëru Patsapita gobiernukuna juntakarpis manam problëmakunata altsëta puëdiyanmantsu. Nunapaqa manam tsëta ruranampaq podernin kantsu, y llapampis jutsa ruraqmi kayan. Diospa Gobiernunllam entëru Patsachö llapan problëmakunataqa altsëta puëdin.
Bibliachö ninqankunam rikätsimantsik mana alli kaqkunalla ushakäyänampaq kaqta, tsëmi tsë ushakë tiempu chämunantaqa mantsashwantsu. Mana allikuna ushakäriptinqa Diosnintsik änimanqantsik juk shumaq Patsachömi kawakushun. ¡Tsëta musyanqantsikqa alläpa kushikuypaqmi!
¿Imëraq tsëkuna pasakunqa? Qateqnin kaqchömi Biblia ima ninqanta rikärishun.