¿Imataq ushakë junaq?

“Ushakë këllachönam këkan” neqta wiyarqa, ¿imamantaq pensanki? ¿Biblian tsarashqa juk nuna qaparipa yachatsikïkaqmanku? ¿Ruminö meteurïtukuna Patsawan chocanampaq kaqmanku? ¿Patsachö imëka kawë ushakänampaq kaqmanku? O ¿bombakunawan Patsa ushakänampaq kaqmanku? Tsënö pensëqa, wakintaqa mantsakätsinmi, y wakintanam imapis qokuyantsu o burlakuyan.

Diospa Palabranqa clärum kënö nin: ‘Ushakëmi chämunqa’ (Mateu 24:14, NM). Jina tsë ushakëtam Bibliaqa “Armagedon” y ‘Diosnintsikpa jatun guërran’ nin (Apocalipsis 16:14, 16). Mëtsika religionkunam ushakë junaqpaqqa tukïta yachatsikuyan, mana entiendipaq y mantsakëpaq yachatsikïkunata. Peru ¿imataq ushakë junaqpaq Biblia parlanqanqa? Kikin Bibliam tsëtaqa cläru musyatsimantsik, jina ushakë junaq këllachöna kanqanta y imanö salvakunapaq kaqtapis. Bibliapa yanapakïninwan ima ninan kanqanta yachakurishun. Tsëpitanam rikäshun ima ushakänampaq kaqta.

USHAKË JUNAQPAQ RASUMPA YACHATSIKÏKUNA

1. PATSAQA MANAM NINAWANTSU USHAKANQA

   Bibliam kënö nin: “Pëqa patsata allim takyatsishqa, y manam pipis ni imë kuyutsinqatsu” (Salmu 104:5). Kë textuchö y mas textukunachömi, Bibliaqa willakun Patsata Dios mana ushakätsinampaq kaqta y pipis ushakätsinanta mana permitinampaq kaqta (Eclesiastes 1:4; Isaïas 45:18).

2. ¿IMËTAQ USHAKË JUNAQQA KANQA?

   Ushakë imë kanampaq mana musyë kanqanta niyaptimpis, Bibliaqa willakunmi imë junaqpaq Dios dispunishqanta. Kënömi nin: ‘Ime öra o ime junaq kanampaq caqtaqa manam pipis musyantsu, ni anjelcunapis, ni Diospa tsurinpis, sinoqa Dios Yayallam musyan. Tserecur mäcoq mäcoq quecayë. Porqui manam musyayanquitsu ime kanampaq caqta’ (Marcus 13:32, 33). Clärum këkan, Diosqa musyanmi imë höra y imë junaq kanampaq kaqta.

3. USHAKËTAQA MANAM NUNATSU NI RUMINÖ METEURÏTUTSU APAMUNQA

   ¿Ima o piraq ushakë junaqta qallatsimunqa? Apocalipsis librum nin: ‘Riquecorqä sielu quicharëcaqtam. Tsechomi quecarqan yulaq cawallun montashqa. Tse montaraqpa jutinmi carqan “llapantapis Cumpleq”. Tsepitanam ricarerqä soldaduncunawan patsacho reycuna achachiwan juntu shëcayaqta. Pecunam listu quecayarqan tse yulaq cawallun montashqawan, y qatir shamicaqcunawan pelyayänanpaq’ (Apocalipsis 19:11-21). Kë textuchö ninqan juk igualatsikïlla kaptimpis, entiendintsikmi chikeqninkunata Dios ushakätsinampaqqa juk tröpa angelkunata kachamunampaq kaqta.

¿IMATAQ USHAKANQA?

1. GOBIERNUKUNAM USHAKÄYANQA

   Bibliam kënö nin: “Ciëluchö këkaq Dios[mi], mana ushakaq gobiernuta churanqa. Tsë gobiernupa rantinqa mananam jukqa yëkunqanatsu. Y chipyëpam ushakätsinqa tsë llapan gobiernukunata, y kikinllanam imëyaqpis kanqa” (Daniel 2:44). 3 kaq yachatsikïchö rikanqantsiknömi, “patsacho llapan reycuna” juntakäyanqa “yulaq cawallun montashqawan, y peta qatir shamicaqcunawan pelyayänanpaq” (Apocalipsis 19:19). Peru Diospa Gobiernunqa chipyëpam ushakätsinqa.

2. GUËRRA, MAQANAKÏ Y MANA ALLI RURËKUNAM USHAKANQA

   Diosqa entëru Patsachömi “guërrakunata ushakätsimunqa” (Salmu 46:9). Jina kënöpis änikunmi: “Alli nunakunallam patsachö kawayanqa, y jutsata mana ruraqkunallam tsëchö yachayanqa. Mana alli nunakunaqa, wallushqam kayanqa kikin patsapita; traicionërukunanam llupishqa kayanqa tsëpita” (Proverbius 2:21, 22). Y Apocalipsis libruchönam Diosqa kënö nin: ‘Llapantapis mushoqmanmi tumaratsishaq’ (Apocalipsis 21:4, 5).

3. DIOSTA Y NUNAKUNATA LLAKITSEQ RELIGIONKUNAM USHAKANQA

   Religiösutukoqkunapaq parlarmi Jeremïas libru nin: “Profëtakunaqa willakuyan mana rasumpa kaqtam, sacerdötikunapis rurëninkunawanmi mana allita yachatsikuyan. [...] ¿Imataraq rurayanqa ushakë junaq chämuptin?” (Jeremïas 5:31). ¿Imataq shuyaran tsë religiösutukoqkunata? Jesusmi nin: ‘Tsë junaqmi atscaq niyämanqa: “Teyta, Teyta, noqacunam jutiquicho yachatsicushqa cayä; jutiquichomi nunacunapita supëcunata qarquyarqä; y jutiquichomi atsca milagrucunatapis rurayarqä” nir. Tseno niyämaptinnam nishaq: “¡Qamcunataqa manam reqiyaqtsu! ¡Nopapita witicuyë!”’ (Mateu 7:21-23).

4. MANA ALLI RURËKUNATA GUSTAQ NUNAKUNAM USHAKÄYANQA

   Señor Jesucristum kikimpaq kënö nirqan: “Pëqa imeca actsi cuentam que patsaman shamorqan. Peru nunacunanam paqaschono mana alli ruraquillacho caquita munar, peta chasquiyarqantsu, porqui mana alli ruretam mas gustayarqan” (Juan 3:19). Diosman markäkoq Noë kawanqan witsanqa, Patsachö llapan mana alli nunakunatam Dios ushakätsirqan. 2 Pëdru 3:5-7, NM textuchömi kënö nin: “Unë tiempu kë patsachö kawaqkunam apäkï tamyawan ushakäyarqan. Peru kanan këkaq ciëluwan patsaqa, ninapaqmi churarëkäyan, jina juiciu junaqpaq y mana alli ruraq nunakuna ushakäyänan hörapaqmi churarëkäyan”.

Noëpa tiempunchö ushakëqa, igualan ‘juisiu junaqwan’ y ichikllachöna shamoq ushakë junaqwanmi. Peru yarpäshun, unë witsanqa manam Patsatatsu Dios ushakätsirqan, sinöqa ‘mana alli ruraq nunakunatam’, juk parlakïchöqa, chikeqninkunata. Tsënöllam shamoq tiempuchö ‘juisiu junaqpis’, mana alli rurë kuyaqkunata y contran churakaqkunata Dios ushakätsinqa. Peru Noëtawan familianta tsapanqannöllam, amïgunkunataqa tsapanqa (Mateu 24:37-42).

¡Kushishqachi kawakushun kë Patsachö imëka mana allikunata Dios ushakäratsiptin! Rasumpam, ushakë junaqpaq Biblia willakunqanqa nunakunapaq alläpa alli noticiam. Tsënö kaptimpis, itsa tapukunki ushakë imë chämunampaq kaqta y salvakunëkipaq imata ruranëkipaq kaqta. Biblia ninqanta rikärishun.