11 KAQ YACHAKUNËKIPAQ
¿Imatataq rurankiman Bibliapita alli yachakunëkipaq?
Unëpana jitarashqa jatun chakrata muruyta munarqa capaz pensankiman barbichëta mana ushanëkipaq kaqta, peru cada junaq ichikllatapis barbichanëkipaq tiempuykita patsätsirqa ushëta puëdinkim. Tsënöllam Bibliata leyishqapis pasan, cada junaq leyirqa ushëta puëdinkim. Peru ¿imanötan leyir qallankiman? Këchömi yachakunki Bibliata imanö leyinëkipaq y estudianëkipaq kaqta.
1 KAQ: ¿Imanirtan cada junaq Bibliata leyinantsik?
Juk nuna kushishqa kanampaq y ima ruranqampis alli yarqunampaqqa “Jehovä Diospa leynintam” cada junaq leyinan (leyi Salmus 1:1-3). Ichikllatapis Bibliata cada junaq leyiptikiqa masmi gustashunki y masta leyitam munanki.
2 KAQ: ¿Bibliata leyinqantsik höra imatataq ruranantsik?
Bibliataqa manam leyinëkillatsu; alli entiendinëkipaqqa leyinqëkipita imata yachakunqëkimanmi pensanëki (Josuë 1:8). Bibliata leyinqëki höraqa këkunamanmi pensanëki: Jehoväpita imata yachakunqëkiman, imanö yanapashunqëkiman y jukkunata imanö yanapanëkipaq kaqmanmi.
3 KAQ: ¿Imanötan tiempuykita patsätsinkiman Bibliata leyinëkipaq?
Bibliata leyinapaq tiempuntsikta patsätsiqa llapantsikpaqpis manam fäciltsu. Tsëmi Bibliachö nin tiempuntsikta alli provecharnin imëpis këkänapaq (Efesius 5:16). Tsëmi cada junaq Bibliata leyinëkipaq tiempuykita rakinëki. Wakinkunaqa tempränullam Bibliata leyiyan, wakinnam almorzar jamayanqan höra, y wakinkunanam manaraq punukur. Y qamqa, ¿imë höratan Bibliata leyinkiman?
MASLLA YACHAKUSHUN
Bibliata leyi mas gustashunëkipaq y kë libruwan Bibliata estudiarnin alli yachakunëkipaq kaqtam yachakushun.
Capazchi juk mikuy gustamashwantsu, peru ichikllatapis seguïdu mikushqaqa gustamäshunmi. Tsënöllam Bibliata leyishqapis pasan, cada junaq leyishqaqa masmi gustamäshun.
4 KAQ: ¿Imatataq rurankiman Bibliata leyi gustashunëkipaq?
Ni imëpis mana mikunqantsik mikuyqa höraqa manam gustamantsiktsu, peru mikur sïguishqaqa tiempuwanqa gustamäshunmi. Tsënöllam Bibliata leyishqapis pasakun. Leyir qallananqa capaz fäciltsu kanman, peru cada junaq leyishqaqa masmi gustamäshun. Leyiyë 1 Pëdru 2:2 ima ninqanta y këpaq parlayë:
Cada junaq Bibliata leyinqëkiqa, ¿mas leyita munanëkipaq yanapashunkimantsuraq?
Bibliata leyi gustanampaq wakin jövinkunata ima yanapanqanta VIDEUCHÖ rikäyë y këkunapaq parlayë:
¿Imanirtan kë videuchö rikanqantsik jövinkunapaqqa Bibliata leyiyänan fäciltsu karqan?
¿Imatan yanaparqan Bibliata leyirnin sïguiyänampaq?
¿Imatataq rurayarqan Biblia leyita mas gustayänampaq?
Bibliata leyir qallanëkipaqqa këkunam yanapashunki:
Entiendinqëki Bibliatam leyinëki. Parlanqëki idiömachö kaptinqa Mushoq Patsachö Kawaqkunapaq Bibliata leyi.
Bibliachö willakunqankuna mas gustashunqëki kaqta leyir qallë. Tsëpaqqa “Bibliata leyinëkipaq” ninqan recuadrum yanapashunki.
Cada leyir ushanqëkita marquë. Tsëpaqqa “Leyinqëkita marcanëkipaq” ninqan recuadrum yanapashunki.
JW Libraryta utilicë®. Celularnikichö, tabletnikichö o computadörëkichö JW Libraryta katsirqa, mëchö këkarpis Bibliata leyita y wiyëta puëdinkim.
Mushoq Patsachö Kawaqkunapaq Bibliachö mäpakunata y entienditsikunqankunata utilicë.
5 KAQ: Estudiayänëkipaq kaqta preparakuy
Leyiyë Salmus 119:34 ima ninqanta y këpaq parlayë:
Bibliata manaraq leyir o estudiayänëkipaq kaqta manaraq preparakurnin, ¿imanirtan Jehoväman mañakunkiman?
Kë libruwan Bibliata cada estudiarnin alli yachakunëkipaqqa këkunatam ruranëki:
Cada estudianëkipaq kaqchö qallanan pärrafukunata leyi.
Tsëchö textukunata leyi y imata yachakunqëkiman pensë.
Yarpänëkipaq kaqta marquë, tsëmi yanapashunki estudiayanqëki höra.
¿Musyarqëkiku?
Jehoväpa testïgunkunaqa tukuyläya Bibliakunatam utilizäyarqö, peru Mushoq Patsachö Kawaqkunapaq Bibliachö Diospa jutin yuriptin y fäcil entiendina kaptinmi kananqa tsëta utilizäyä (“¿Jehoväpa testïgunkunapa Bibliankuna kanku?” ninqanta jw.org päginachö leyi).
WAKIN IMA NIYANQAN: “Bibliata leyinäpaqqa manam tiempü ni gänasnïpis kantsu”.
Y qamqa, ¿ima ninkitan?
KËTAM YACHAKURQUNKI
Bibliata leyinëkipaqmi tiempuykita alli patsätsinëki, entiendinëkipaqmi Jehoväman mañakunëki y estudiayänëki hörapaqmi alli preparakunëki.
¿Yarpankiku?
¿Imatataq rurankiman Bibliapita alli yachakunëkipaq?
¿Imë höratan cada junaq Bibliata leyinkiman y estudiankiman?
¿Imanirtan cada estudiayänëkipaq alli preparakunëki?
MASTA YACHAKUY
Bibliata leyi gustashunëkipaq imakuna yanapashunëkipaq kaqta leyi.
Bibliata imanö leyinëkipaq yachakuy.
“¿Imanötan Biblia yanapaman? Juk: Alli yachatsikuykunata ashi” (jw.org päginachö yarqamoq)
Bibliata leyi gustashunëkipaq imata ruranëkipaq kaqta yachakuy.
“¿Imanötan Biblia yanapaman? Ishkë: Bibliata leyi gustashunëkipaq” (jw.org päginachö yarqamoq)
Bibliata unëpana leyeqkuna ima niyanqanta rikë.