7 KAQ
¿Imatataq rurashwan Bibliata alli entiendinapaq?
“¿Imatan Leychö qellqarëkan? ¿Imatataq tsëchö leyirqunki?” (LÜC. 10:26).
97 KAQ CANCION Palabrëkipita yachakïtam wanayä
¿IMATATAQ YACHAKUSHUN?a
1. ¿Imanötan musyantsik Diospa Palabranta Jesus alläpa valoranqanta?
¿IMËLLAPIS pensarqunkiku Jesus imanö yachatsikunqanta? Pëqa Diospa Palabrampitam imëpis dememoria yachatsikoq. Tsëtaqa musyantsik bautizakurirlla y manaraq wanukur parlanqankunachömi (Deut. 8:3; Sal. 31:5; Lüc. 4:4; 23:46).b Kima wata pullan yachatsikunqanchöqa, Jesusqa Diospa Palabrantam alli leyeq, yachatsikoq y entienditsikoq (Mat. 5:17, 18, 21, 22, 27, 28; Lüc. 4:16-20).
Jesusqa Teyta Diospa Palabrantam kuyaq y yachakunqannömi kawaq. (Rikäri 2 kaq pärrafuta).
2. ¿Imatan Jesusta yanaparqan Diospa Palabranta alli musyanampaq? (Rikäri jana qaranchö këkaq dibüjuta).
2 Yachatsikur manaraq qallaptinmi, Jesustaqa Diospa Palabran leyita gustaq. Leyiyaptin y parlayaptimpis kushishqam wiyakoq. Diospa Palabrampita Marïawan Josë parlayaptimpis kushishqachi wiyakoq (Deut. 6:6, 7).c Y seguïduchi Diosta adorayänan wayimampis wiyakoq ëwaq y Diospa Palabranta leyiyaptinqa allichi wiyakoq (Lüc. 4:16). Y tiempuwanqa, kikinmi Diospa Palabranta leyir qallëkurqan. Tsëmi Jesustaqa yanaparqan Diospa Palabranta kuyanampaq y yachakunqannö kawanampaq. Tsënö kanqantaqa musyantsik 12 watayoqllaraq këkaptin, templuchö pasakunqanwanmi. Tsëchömi Moises qellqanqan Leyta yachatsikoqkuna alläpa espantakuyarqan “imëkatapis alli entiendinqanta y imanö contestanqanta wiyar” (Lüc. 2:46, 47, 52).
3. ¿Imapitataq yachakushun?
3 Noqantsikpis Diospa Palabranta cada junaq leyirqa, allim musyashun y kuyashun. Peru ¿imatan yanapamäshun Bibliata leyirnin alli entiendinapaq? Tsëpaqqa yanapamäshun Ley qellqaqkunata, fariseukunata y saduceukunata Jesus ninqampita yachakunqantsikmi. Pëkunaqa Diospa Palabranta alli leyirpis manam entiendiyaqtsu. Jesusmi pëkunata nirqan Diospa Palabranta leyirnin imakunata mana rurashqa kayanqanta. Pëkunata Jesus ninqampita yachakunqantsikmi noqantsiktapis yanapamäshun, 1) leyirnin alli entiendinapaq, 2) maskunata yachakunapaq, y 3) Diospa Palabran ninqanmannö kawakunapaq.
LEYINQANTSIKTA ENTIENDISHUN
4. ¿Imanötan Lücas 10:25 a 29 willakunqan yanapamantsik Bibliata leyir alli yachakunapaq?
4 Bibliata leyinqantsik yanapamänata munarqa, manam leyinanllaqa leyinantsiktsu. Tsëta entiendinapaq yarpärishun, ‘Leyta alli reqeq nunawan’ Jesus parlanqanta (leyi Lücas 10:25-29). Tsë nunaqa imëyaqpis kawakuyta logranampaq imata ruranampaq kaqtam musyëta munarqan, tsëmi Jesusqa Diospa Palabranwan yanaparqan. Kënömi nirqan: “¿Imatan Leychö qellqarëkan? ¿Imatataq tsëchö leyirqunki?”. Tsë nunaqa allim contestarqan. Nirqanmi Diosta y nuna mayinta kuyanan alläpa precisanqanta (Lev. 19:18; Deut. 6:5). Peru tsëpitam kënö tapurqan: “Cläru parlakuychöqa, ¿pitan nuna mayï?”. ¿Imanirtan tsënö tapurqan? Diospa Palabranta leyirpis mana entiendishqa karmi. Tsëmi imata ruranampaq kaqtaqa musyarqantsu.
Leyinqantsiktaqa llapantsikmi entiendita puëdintsik
5. ¿Imanötan Diosnintsikman mañakunqantsik y apurädu mana leyinqantsik yanapamantsik Bibliata alli entiendinapaq?
5 Bibliata leyirnin alli entiendinapaqqa, këkunatam ruranantsik: puntataqa, manaraq leyirninmi Diosnintsikman mañakunantsik, santu espïritunwan mana yanapamashqaqa, manam entiendishuntsu; tsëpitanam leyinantsik, peru manam apuräduqa leyinantsiktsu, despacium entiendinapaq leyinantsik. Tsëmi yanapamäshun leyinqantsik höra pasakuykanqankunata rikëkaqnö kanapaq, mana qonqanapaq y leyinqantsikkuna shonquntsikman chänampaq (Jos. 1:8). Y leyir usharirqa, ¿imatataq ruranantsik? Palabrampitam Diosnintsikta agradecikunantsik y leyinqantsikmannö ruranapaq yanapëkamänapaqmi mañakunantsik.
¿Imanirtan yachakunqantsikkunata qellqanqantsikqa yanapamantsik Bibliata mas entiendinapaq y yarpänapaq? (Rikäri 6 kaq pärrafuta).
6. ¿Imanötan tapukunqantsik y qellqanqantsik yanapamantsik Bibliata leyirnin alli entiendinapaq? (Rikäri fötukunata).
6 ¿Ima mastan yanapamäshun Bibliata leyir alli entiendinapaq? Këkunatam tapukunantsik: “¿Pipaqtan parlëkan?, ¿pitan parlëkan?, ¿pitataq parlapëkan y imanir?, ¿mëchötan këkäyan y imëtan pasakuykan?”. Kë tapukuykunaman pensanqantsikmi leyinqantsikta alli entiendinapaq yanapamäshun. Yachakunqantsikkunata apuntanqantsikpis yanapamäshunmi. Apuntarninqa, imata qellqanapaq kaqtam pensashun. Tsënömi cuentata qokushun leyinqantsikta entiendishqa kanqantsikta o mana entiendishqa kanqantsikta y manam qonqashuntsu. ¿Y imakunatataq qellqashwan? Tapukunqantsikkunata maslla yachakunqantsikta, imapaq parlanqanta, yachakunqantsikkunata imanö utilizänapaq kaqta o yachakurnin imanö sientikunqantsiktam. Bibliata leyirnin tsëkunata rurarqa, Jehovä parlapëkämanqantsiktanömi sientishun.
7. Biblia ninqankunata alli yachakunapaqqa, ¿imatan yanapamäshun, y imanir? (Mateu 24:15).
7 Jesusmi nirqan Biblia ninqankunata alli yachakunapaqqa, alli entiendeq kanqantsik yanapakunqanta (leyi Mateu 24:15). ¿Imatataq entiendinantsik? Tsë yachakuykanqantsik imachö igualanqanta y imachö jukläya kanqantam entiendinantsik. Y fäcil entiendina kaqkunallawanqa manam conformakunantsiktsu, tsëpa rantinqa maskunata yachakunapaqmi alli pensanantsik. Y Jesus ninqannömi alli entiendeq kanqantsikqa yanapamäshun Bibliata leyinqantsik höra alli entiendinapaq.
8. ¿Imatataq rurashwan Bibliata leyirnin alli entiendinapaq?
8 Sirweqninkunataqa Jehovämi yanapan entiendeq kayänampaq. Tsëmi noqantsikpis yanapëkamänapaq Jehoväman mañakunantsik (Prov. 2:6). Peru manam mañakunantsikllatsu, sinöqa alli entiendinapaqmi despaciu yachakunantsik y tsë yachakuykanqantsik puntata musyanqantsikkunawan imanö igualanqanmanmi pensanantsik. Tsëpaqqa, publicacionkunam yanapamäshun. Jukqa, Jehoväpa testïgunkuna yachakur ashinapaq neq follëtum. Tsë publicacionmi yanapamäshun Biblia ninqankunata maslla entiendinapaq y Biblia mandakunqannö kawakunapaq (Heb. 5:14). Bibliata tsënö yachakurqa, masmi entiendishun.
BIBLIAPITA MASLLATA YACHAKUSHUN
9. ¿Imatataq saduceukuna entiendishqatsu kayänaq?
9 Saduceukunaqa Bibliachö këkaq punta kaq pitsqa librukuna ninqantaqa allim yachayaq, peru wanushqakuna kawariyämunampaq kaq yachatsikuykunataqa manam entiendiyänaqtsu. Wanushqakuna kawariyämunan asuntupaq parlarmi, Jesusta mana allichö quedatsita munayarqan. Tsëmi Jesusqa, pëkunata kënö nirqan: “¿Manaku leyiyashqanki rawrëkaq o lunyëkaq kashapaq Moises qellqanqanchö Teyta Dios kënö ninqanta: ‘Noqam Abrahanpa Diosnin, Isaacpa Diosnin y Jacobpa Diosnin kä’?” (Mar. 12:18, 26). Tsë versïculukunataqa saduceukuna mëtsika kutiraq leyishqa kayarqan, peru Jesus tapunqanwanmi musyantsik wanushqakuna kawariyämunqan asuntupaq mana entiendishqa kayanqanta (Mar. 12:27; Lüc. 20:38).d
10. Bibliata leyirqa, ¿imakunatataq entiendita procuranantsik?
10 Jesus tsënö ninqanqa yanapamantsik Bibliata leyirninqa, cada versïculu imapaq parlëkanqanta alli entiendita procuranapaqmi. Bibliata leyirqa, imëka öruta asheqnö, tsë versïculukunachö tarinqantsik consëjukuna imakunachö yanapamänantsikpaq kaqman alli pensashun.
11. 2 Timoteu 3:16 y 17 ninqannö, ¿imanötan Bibliapita mas alli yachakushwan?
11 Bibliata leyir alli entiendinapaqqa, 2 Timoteu 3:16 y 17 (leyiri) ninqanmi yanapamäshun. Tsëchömi nimantsik ‘llapan qellqarëkaqkunaqa’ kë chuskunchö yanapamänapaq kaqta: alli yachatsikunapaq, pitapis correginapaq, imatapis correginapaq y alli kanqanmannö pitapis yachatsinapaq. Y tsëpaqqa, Bibliachö këkaq alläpa mana leyinqantsik librukunapis yanapamäshunmi. Bibliata leyishqaqa Jehoväpita, ruramunampaq kaqpita o consëjunkunapitam yachatsimantsik. Bibliata leyirninqa, cuentatam qokunantsik imanö corregikämanqantsikta. Y mana alli pensëkunata y mana alli munëkunatam corregikunantsik, tsënöpam mana dejëpa Jehoväta sirwishun. Tsënöllam yanapamäshun yachatsikushqa nunakuna nimanqantsikkunata correginapaq. ¿Y imatan yanapamäshun alli yachakunapaq? Bibliata leyirqa, Jehovä pensanqantam entiendita procuranantsik. Kë chuskunta cuentachö katsirqa, Biblia ninqankunata allim entiendishun.
BIBLIA MANDAKUNQANNÖ KAWASHUN
12. ¿Imanirtan Jesusqa fariseukunata, “manaku qamkunaqa leyishqa kayanki” nir tapurqan?
12 Fariseukunaqa musyëta munarllam Diospa Palabranta leyiyaq. Tsënö kayanqanqa musyakarqan Jesus kënö tapunqanwanmi: “¿Manaku qamkunaqa leyishqa kayanki?” (Mat. 12:1-7).e Tsë kutichöqa, Jesuspa qateqninkunatam fariseukuna acusëkäyarqan “säbaduchö mana ruranatam rurëkäyan” nir. Tsëtanam Jesusqa Diospa Palabranwan contestarqan y Osëas librupa juk versïculumpitam parlarqan. Tsënömi Jesusqa rikätsikurqan fariseukuna Leyta mana entiendishqa kayanqanta y mana llakipäkoq kayanqanta. Pëkunaqa orgullösum kayaq, tsëmi Diospa Palabranta leyirpis entiendiyaqtsu, wakinkunata juzgayänanllapaqmi leyiyaq. Shonqunkunachö mana alli karmi, leyiyanqankunataqa entiendiyaqtsu (Mat. 23:23; Juan 5:39, 40).
13. Bibliata leyirqa, ¿imanö këpitataq cuidakunantsik, y imanir?
13 Jesus ninqanqa yachatsimantsik fariseukunanö mana kanapaqmi. Teyta Diospa Palabranta leyirqa, rasumpa yachakuyta munarmi leyinantsik y Jehovä yachatsimänatam permitinantsik y humildim kanantsik. Santiägu 1:21 textum kënö nin: “Yanapayäshuynikita puëdeq palabrata, Teyta Dios shonquykikunachö patsakätsinanta dejayë”. Humildi karqa, Diosnintsikpa Palabran shonquntsikman chänantam permitishun. Manam orgullösu kanantsiktsu y manam wakinkuna pantayanqankunamanqa yarparäkunantsiktsu. Tsëkunata mana rurarqa, Teyta Diosnintsik llakipäkoq y kuyakoq kanqantam entiendishun.
¿Imanötan musyashwan Diospa Palabran yanapëkämanqantsikta? (Rikäri 14 kaq pärrafuta).f
14. ¿Imanötan musyashwan Biblia yanapëkämanqantsikta o mana yanapëkämanqantsikta? (Rikäri fötukunata).
14 Wakinkunata imanöpis tratanqantsikwanmi musyashun Biblia yanapëkämanqantsikta o mana yanapëkämanqantsikta. Fariseukunaqa mana alli karmi Diospa Palabran yanapananta permitiyaqtsu, y culpannaq nunakunatam condenayaq (Mat. 12:7). Tsëmi noqantsikpis alli rikäkunantsik imanö këkanqantsikta. Kënömi tapukunantsik: “¿Allitaku wakinkunapaq parlä, o imachöpis pantayanqankunapitaku masqa parlä? ¿Perdonäku ofendimaqnïkunata, o chikiparku rimar purï?”. Kë tapukuykunata imanöpis contestanqantsikwanmi musyashun imatapis alli pensanapaq y ruranapaq Biblia yanapëkämanqantsikta o mana yanapëkämanqantsikta (1 Tim. 4:12, 15; Heb. 4:12).
BIBLIATA LEYIRQA KUSHISHQAM KASHUN
15. ¿Imanirtan nintsik Teyta Diospa Palabranta Jesus kuyanqanta?
15 Jesusqa, Teyta Diospa Palabranta alläpam kuyarqan. Tsëmi Salmus 40:8 ninqan pëchö cumplikarqan. Kënömi nin: “Teyta Dios, qam munanqëkita rurarmi kushishqa kä, leynikikunatapis shonqüchömi yarparëkä”. Teyta Diospa Palabranta kuyanqanmi yanaparqan kushishqa kanampaq y mana dejëpa Jehoväta sirwinampaq. Noqantsikpis pënöllam cada junaq Diospa Palabranta leyirnin y kuyarninqa, Jehovä Diosnintsikta mana dejëpa kushishqa sirwishun (Sal. 1:1-3).
16. Bibliata leyir maslla entiendinëkipaqqa, ¿imata ruranëkipaqtan pensëkanki? (Rikäri “Jesus ninqankunam leyinqantsikta entiendinapaq yanapamantsik” neq recuadruta).
16 Jesus ninqankuna y ruranqankunam yanapamantsik Bibliata cada junaq leyinapaq y alli yachakunapaq. Biblia ninqankunata alli yachakunapaqqa Jehovä Diosnintsikmanmi mañakunantsik, despacium leyinantsik, tapukuykunatam rurakunantsik y yachakunqantsikkunatam apuntanantsik. Alli entiendinapaqqa, Biblia ninqankunata alli yachakuyta procurashun y publicacionkunachö masllata yachakushun. Biblia willakunqankunata maslla yachakunapaqqa, cada versïculuta maslla entiendita procurashun y alläpa mana leyinqantsik librunkunata leyishun. Y Bibliata leyinqantsik yanapamänapaqqa, humildim kanantsik. Tsëkunata rurarqa, Bibliata leyir allim yachakushun y Jehoväpa amïgunmi tikrashun (Sal. 119:17, 18; Sant. 4:8).
95 KAQ CANCION Aktsiqa mas y masnam atsikyan
a Jehoväpa sirweqninkunaqa llapan junaqkunam Bibliata leyita procurantsik. Wakin nunakunapis leyiyanmi, peru manam entiendiyantsu. Jesuspa tiempunchöpis tsëmi pasakurqan. ¿Ima nirqantan Jesus Diospa Palabranta leyeqkunata? Y ¿imatataq rurashwan Bibliata leyirnin alli entiendinapaq? Tsëkunapita yachakurishun.
b Jesusqa capazchi bautizakurir y santu espïrituwan Diosnintsik akrariptin ciëluchö kawanqanta yarpärirqan (Mat. 3:16).
c Marïaqa allim yachaq Diospa Palabran ninqanta y atska kutim tsëpita parlarqan (Lüc. 1:46-55). Capazchi Marïawan Josëqa qellëninkuna mana kaptin Diospa Palabran qellqarëkaq copiakunata rantita mana puëdir, adorayänan wayikunachö leyiyanqanta atentu wiyakuyaq tsëpita parlakuyänampaq.
d Rikäri 2013 wata 1 de marzu, Täpakoq revistachö “Diosman witi: Pëqa ‘cawagcagcunapa Diosninmi’” neq yachatsikuyta.
e Mateu 19:4 a 6 textuchöpis Jesusqa tsënöllam fariseukunata tapurqan. Pëkunaqa Dios kamanqankunapaq leyishqa karpis, casädu këpaq Dios pensanqantaqa mana kaqpaqmi churayarqan.
f FÖTUKUNATA MASLLA ENTIENDINAPAQ: Diosta Adoranantsik Wayichömi juk wawqi computadörata manejëta atska kuti pantan. Peru wawqikunaqa pantanqankunallata rikäyänampa rantinmi felicitäyan.