Imanirtaq nunakunaman imëpis kutintsik
1. ¿Imatataq tapukuntsik willapäkïnintsikpita?
1 Wakin markakunachöqa territoriota willapäkur rasllam usharintsik. Manam wiyëta munätsu nimashqapis, kutikantsik-raqmi wayinkunaman. Tsëqa, ¿imanirtaq imëpis kutikantsik-raq?
2. ¿Imanirtaq kananyaq willapäkïkantsik?
2 Jehovata, nuna mayintsiktawan kuyar. Jehovata kuyarninmi hawkaraq willapäkikantsik. Llapan shonquntsikwanmi munëkuntsik Diosnintsikpita willapäkïta (Luc. 6:45). Jehovata kuyarmi leyninkunata wiyakuntsik, y nuna mayintsikkunatapis yanapantsik pëkunapis tsënölla rurayänampaq (Pro. 27:11; 1 Juan 5:3). Manam nunakuna wiyamashqaraqtsu willapäkïnintsikcho alleq tsarakuntsik. Punta cristianokunata mëlaya chikikäyaptimpis manam willapäkïta haqiyarqantsu (Hech. 5:42). Mana ni pï wiyamashqapis, mana qepäkushpam hawkaraq willapäkïkantsik, tsënöpam Jehovata rikätsintsik kuyëkanqantsikta y adorëkanqantsiktapis.
3. ¿Imanötaq kuyakïnintsik yanapamantsik imëpis willapäkunapaq?
3 Hina nuna mayintsikta kuyarmi hawkaraq willapäkïkantsik (Luc. 10:27). Jehovaqa manam munantsu ni pï ushakänanta (2 Ped. 3:9). Territoriontsikcho willapäkunapaq atska kuti ewarpis, tarintsik-ran Jehová servita munaq nunakunata. Alleq käyirinapaq, Guadalupe nishqan islachömi 56 nunakunapita huk Jehovapa testigon, y pasaq watachönam bautizakuyarqan 214 mushoq cristianokuna. Y Cristopa wanïnin Yarpëmanqa ewayarqan veinte mil nunakunapitapis masmi, tsë ninanqa, 22 nunakunapitam huk ewarqan.
4. ¿Imanötaq willapäkunantsik territorio cambiakan?
4 Territoriochö nunakuna cambiayanmi. Willapäkunantsik territorioqa imëpis cambianmi. Puntakunachö mana wiyamashqantsik wayikunaman kutishqaqa, itsa tsë familiapita wakin kaqna shumaq chaskiramashwan, mana ni imëpis wiyakushqa karnin. Itsa huk markapita chäyämunman täranqantsik territorioman y yachakïta munayanman. Hina wakinkunachoqa teyta mamankunallam Reinopita wiyakïta munayantsu. Y wambrakuna poqurirnin wayipita ewkurnenqa, itsa munayanman wiyakïta.
5. ¿Imakuna pasaptintaq nunakuna wiyakïta munariyanman?
5 Nunakunapis cambiakäyanmi. Apóstol Pablopis huk tiempochö “mana allita parlaq, chikikur qatikachäkoq, orgulloso nunam” karqan (1 Tim. 1:13). Tsënö kaqllam, wakin Jehovata servikaqkunapis alli noticiapita manam wiyakïta munayarqantsu, y willapäkïtapis chikiyarqanmi. Tiempokunaqa tumareqllam, puntata willapäkïnintsikta mana chaskikurpis o wiyakïta mana munarpis, itsa kananqa wiyakïta munayanmanna. Itsa wakinkunaqa sasa kawëkunata pasarnin wiyakïta munariyanman, kastankuna wanushqa kaptin, uryanqampita qarquriyaptin, mana qellë kaptin o qeshyapäkurnimpis.
6. ¿Imanirtaq willapäkushwan kushishqa?
6 Këllachönam mana alli nunakuna ushakäyanan tiempo, hina alli noticiapita willapäkïnintsik y yachatsikïnintsikpis rasllam llapanman chëkan (Isa. 60:22). Tsënö kaptinmi kushishqa imëpis willapäkikantsik y ashikantsik-raq wiyakï munaqkunata. Itsa yapë kaqcho parlapashqa wiyaramashwan. Imanö kaptimpis, manam haqinantsiktsu willapäkïtaqa. ‘Këta rurarmi salvakushun noqantsik y wiyamaqnintsikkunapis.’ (1 Tim. 4:16.)