11 KAQ YACHATSIKÏ

Gänas gänaslla yachatsikï

Romänus 12:11

KËPAQMI PARLAN: Yachatsinqëkimannö rurëta munayänampaq, llapan shonqïkiwan yachatsikï.

Llapan shonqïkiwan yachatsikunëkipaq preparakï. Preparakunqëki höram pensanëki tsë yachatsikunqëki imanir alläpa precisanqanman. Y següru parlakunëkipaq alli yachakï.
Wiyëkaqkunaman yarpë. ¿Imanöraq yanapanqa tsëta ninqëki o leyinqëki? Tsëmanmi alli pensanëki. Jinamampis allim yarpachakunëki imanö yachatsinëkipaq kaqman, alli entiendiyänampaq y yachakuyanqanta yarpäyänampaq.
Rasumpa pasëkanqantanö rikäyänampaq yachatsikï. Shonqupita patsë parlë. Qaqllëkichö y makikita o maskunata imanö kuyutsinqëkichömi rikakänan imapaq parlanqëki, kushikïpaq kaqkunata o llakikïpaq kaqkunata o maskunata.

Imapaqmi parlëkanki, tsëmannömi makikitapis kuyutsinëki. Peru mana precisëkaptin makikita cada rätu kuyutsiptikiqa, makikillatam masqa rikäyanqa y manam yachëkätsinqëkita shumaqtsu wiyakuyanqa. Gänas gänaslla y sinchipam precisaq yachatsikïkunata o imata rurayänampaq kaqta willakunëki. Peru yachatsikur ushanqëkiyaq sinchipa parlaptikiqa, wiyëkaqkunam utiriyanqa o ajayäriyanqa.