¿Imanirtan Jehoväpa jutinta alläpa valorashwan?

1, 2. ¿Imanötan musyantsik Jesusqa Teytan Jehoväpa jutinta alläpa valoranqanta?

JESUSQA Teytan Jehoväpa jutinta alläpam valorarqan, tsëmi tukuynöpa respetatsirqan. Y punta kaq yachatsikuychö yachakunqantsiknöpis, Teytan Jehoväpa jutin respetashqa kanampaqmi wanurqan (Mar. 14:36; Heb. 10:7-9). Y Mil Watapa gobernar usharirpis, Jehoväpa jutinta alläpa valorarmi tsë Gobiernuta Teytanta entreguëkunqa (1 Cor. 15:26-28). Jesusqa llapan ruranqankunawan y ruranampaq kaqkunawanmi cläru rikätsikun Teytan Jehoväpa jutinta alläpa valoranqanta.

² Jesusqa Teytampa jutinchömi kë Patsamampis shamurqan (Juan 5:43; 12:13). Tsëmi Jehoväpa jutinta qateqninkunata yachatsirqan (Juan 17:6, 26). Y tsë jutitam wakin nunakunatapis yachatsirqan y Jehoväpa jutinchömi milagrukunatapis rurarqan (Juan 10:25). Y qateqninkunapaq mañakurmi Jehoväta kënö nirqan: “Pëkunata musyatsinqä jutikirëkur, [...] cuidëkullë” (Juan 17:11). Yachakurinqantsiknömi, Jesusqa Teytan Jehoväpa jutinta alläpa valorarqan. Peru wakin nunakunaqa “cristiänum kä” o “Jesuspa qateqninmi kä” nirpis manam Jehoväpa jutinta musyayantsu.

3. ¿Imatataq këchö yachakushun?

³ Jesuspa rasumpa qateqninkunaqa Jesus ruranqantam qatintsik. Tsëmi noqantsikpis Jehoväpa jutintaqa alläpa valorantsik (1 Pëd. 2:21). Tsëmi këchöqa yachakushun “Diospa Gobiernumpita” yachatsikoqkunaqa Jehoväpa jutimpa reqishqa kanqantsikta (Mat. 24:14). Tsënöllam yachakushun, Jehoväpa jutinta imanir valoranqantsikta.

“JUTINTA APAYÄNAMPAQ” AKRASHQA

4. (1) Jesus ciëluta kutikunanna këkarnin, ¿ima nirqantan qateqninkunata? (2) ¿Imatataq këchö yachakushun?

⁴ Ciëluta kutikunanna këkarmi Jesusqa qateqninkunata kënö nirqan: “Santu espïrituta chaskirmi poderyoq tikrayanki, Jerusalenchö, entëru Judëa provinciachö, Samariachö, y patsapa mas karu kuchunyaqmi testïgükuna kayanki” (Hëch. 1:8). Alli noticiakunataqa manam Israel-llachötsu willakuyänan karqan. Tiempuwanqa mëtsë nacionchö nunakunam Jesuspa qateqninkuna tikrayänan karqan (Mat. 28:19, 20). Peru Jesusqa kënömi nirqan: “Testïgükuna[m] kayanki”. Tsënö nirqa, ¿Jesuspa testïgunkunalla kayänampaqku nikarqan, o Jehoväpitapis yachakuyänanku karqan? Tsëta entiendinapaqmi Hëchus librupa 15 kaq capïtulun yanapamäshun.

5. ¿Imanötan Jerusalenchö apostolkuna y anciänukuna cuentata qokuyarqan Jehoväpa jutinta musyayänan alläpa alli kanqanta? (Dibüjuta rikäri).

⁵ ¿Imatataq mana judïu nunakuna rurayänan karqan cristiänu tikrayänampaq? Tsëta parlayänampaqmi 49 watachö apostolkunawan anciänukuna Jerusalenchö juntakäyarqan. Y tsë reunionchömi Jesuspa wawqin Santiägu kënö nirqan: “Symeonqa [o Pëdruqa] shumaqmi willakamushqa, juk nacion nunakunata yarpar, pëkunapita wakin nunakunata jutinta apayänampaq Teyta Dios imanö akrar qallanqanta”. ¿Pipa jutimpaqtan parlëkarqan? Tsë jutipaq parlarmi Amos ninqanta kikin Santiägulla kënö nin: “Quedaq nunakunaqa, llapan nacionkunachö jutïpa reqishqa kaqkunawan juntu[m], llapan shonqunkunawan Teyta Jehoväta sirwiyanqa. [...] Teyta Jehovämi tsënö nin” (Hëch. 15:14-18). Tsëmi cristiänu tikraqkunaqa Jehoväpa jutinllatatsu musyayänan karqan, sinöqa Jehoväpa jutimpam reqishqa kayänan karqan y tsë jutitam wakin nunakunata musyatsiyänan karqan.

6, 7. (1) ¿Imanirtan Jesusqa kë Patsaman shamurqan? (2) ¿Imapaq mastan Jesus kë Patsaman shamurqan?

⁶ Jesus jutiqa, “Jehovämi Salvakoqqa” ninanmi. Y tsë juti ninqannömi, Jehoväqa Jesusta utilizarqan, llapan markäkoq o yärakoq nunakunata salvanampaq. Jesusmi vïdanwan pagakur mëtsikaqta salvanampaq kë Patsaman shamurqan (Mat. 20:28). Vïdanwan Jesus pagakuriptinmi llapan nunakuna jutsankunapita perdonashqana kayarqan y imëyaqpis kawakuyta tarita puëdiyänan karqan (Juan 3:16).

⁷ Peru ¿imanirtan Jesusqa vïdanwanraq pagakunan karqan? Tsëta musyanapaqqa Eden huertachö pasakunqanta yarpärishun. Juk kaq yachatsikuychömi yachakurqantsik Adanwan Ëva Jehoväpa contran churakäyanqanta, y tsënöpa imëyaqpis kawakuyta perdiriyanqanta (Gen. 3:6, 24). Peru Eden huertachöqa manam Jehoväpa contranllatsu churakäyarqan, sinöqa Jehoväpa jutimpaqmi mana allita Satanas parlashqa karqan (Gen. 3:4, 5). Tsëmi Jesusqa vïdanwan nunakunata salvanampaq shamurpis, masqa shamurqan Jehoväpa jutinta respetatsinampaq. Jesusqa Jehoväpa jutinchömi kë Patsaman shamurqan y Jehoväpa jutin respetashqa kanampaqmi yanapakurqan.

8. Jesuspa qateqnin tikraqkunaqa, ¿imatataq entiendiyänan karqan salvakuyänampaq?

⁸ Judïu kar o mana judïu karpis, ¿imatataq Jesuspa qateqnin tikraqkuna entiendiyänan karqan? Salvakuyänampaq Jehoväraq permitinqantam (Juan 17:3). Tsënöllam entiendiyänan karqan Jesuspa qateqnin tikrarqa, Jesusnöpis Jehoväpa jutimpa reqishqa kayänampaq kaqta y Jehoväpa jutinta respetatsiyänampaq kaqta. Tsëraqmi salvakuytaqa puëdiyänan karqan (Hëch. 2:21, 22). Tsëmi Jesuspa qateqnin tikraqkunaqa, yachakuyänan karqan Jehoväpita y Jesuspita. Tsëmi Jesusqa Teytanman mañakur usharnin, Juan librupa 17 kaq capïtulunchö kënö nirqan: “Noqata kuyamanqëkinölla pëkunapis kuyanakuyänampaq y noqa pëkunawan juknölla kanäpaqmi, jutikita pëkunata musyatsirqö y musyatsishaqran” (Juan 17:26).

“QAMKUNAQA TESTÏGÜKUNAM KAYANKI”

9. ¿Imanötan rikätsikushwan Jehoväpa jutinta alläpa valoranqantsikta?

⁹ Yachakurinqantsiknömi, cristiänukunaqa Jehoväpa jutinta alläpa valoranantsik y respetatsinantsik (Mat. 6:9, 10). Noqantsikqa ima jutipitapis masmi Jehoväpa jutinta valoranantsik. Y valoranqantsiktaqa ruranqantsikkunawanmi rikätsikunantsik. Peru ¿imanötan Jehoväpa jutinta respetatsishwan y imanötan rikätsikushwan Jehoväpa jutimpaq Satanas parlanqan mana rasumpa kanqanta?

10. ¿Imapaqtan parlëkan Isaïas librupa 42 a 44 capïtulunkuna? (Isaïas 43:9; 44:7-9; dibüjukunawan fötukunata rikäri).

¹⁰ Isaïas librupa 42 a 44 capïtulunkunachömi parlan Teyta Jehoväpa jutin respetashqa kanampaq imanö yanapakunqantsikta. Tsë capïtulukunaqa parlan, rasumpa kaq Dios pï kanqanta rikätsikuyänampaq Jehoväwan nuna ruranqan santukuna juk juiciuchönö këkäyanqantam. Jehovämi tsë santukunata nin, rasumpa kaq Dios kayanqanta pruëbakunawan rikätsikuyänampaq y testïgunkunapis defendiyänampaq. Peru manam ni pipis tsë santukunata defendintsu (leyi Isaïas 43:9; 44:7-9).

11. Isaïas 43:10 a 12 ninqannö, ¿imatataq sirweqninkunata Jehovä tapun?

¹¹ (Leyi Isaïas 43:10-12). Jehovämi sirweqninkunata kënö nin: “Qamkunaqa testïgükuna[m] kayanki y noqam Dios kä”. Tsëpitanam sirweqninkunata kënö tapun: “¿Noqapita masqa Dios kanku?” (Is. 44:8). Tsënö tapumanqantsiktaqa contestantsik parlakunqantsikwan, ruranqantsikkunawan, Jehovälla rasumpa kaq Dios kanqanta willakurnin y pëpa jutinwan ima jutipis mana igualanqanta yachatsikurninmi. Jehoväta rasumpa kuyanqantsiktaqa rikätsikuntsik, pë munanqannö kawarnin y imëka trampata Satanas churamuptimpis Jehoväta mana dejarninmi. Tsënömi yanapakunantsik Jehoväpa jutin respetashqa kanampaq.

12. ¿Imanötan cumplikarqan Isaïas 40:3 y 5 ninqan?

¹² Diospa willakoqnin Isaïasmi nirqan “Jehoväpaq nänita” juk nuna alistanampaq kaqta o limpianampaq kaqta (Is. 40:3; nöta). ¿Imanötan Isaïas ninqan cumplikarqan? Bautizakoq Juanmi imëka nänita limpiaq cuenta o alistaq cuenta Jesus shamunampaq kaqta willakurqan. Y Juan willakunqannömi Jesusqa Jehoväpa jutinchö shamurqan y jutimpaq willakurqan (Mat. 3:3; Mar. 1:2-4; Lüc. 3:3-6). Isaïasqa kënöpis nirqanmi: “Llapankunam Teyta Jehovä alläpa puëdeq kanqanta rikäyanqa y musyayanqa” (Is. 40:5). ¿Y imanötan tsënö ninqanqa cumplikarqan? Kë Patsaman Jesus shamurmi llapan ruranqankunawan rikätsikurqan, Jehovä Diosnintsik imanö kanqanta. Juk parlakuychöqa, kikin Jehovä kë Patsachö këkaqnömi karqan (Juan 12:45).

13. ¿Imanötan Jesus ruranqanta rurashwan?

¹³ Jehoväpa jutinta respetatsirqa, Jesus ruranqantam rurëkantsik. Noqantsikpis Jesusnömi Jehoväpa testïgun kantsik. Tsëmi Jehoväpa jutimpa reqishqa kantsik y llapan ruranqankunapitam nunakunata parlapantsik. Peru ¿imanötan Jehoväpa testïgun kanqantsikta alli cumplishwan? Jehoväpa jutinta respetatsir Jesus llapan ruranqankunata y ruranampaq kaqkunata musyatsikurninmi (Hëch. 1:8). Jesusmi Jehoväpa mas punta kaq testïgun, y Jesus ruranqanllatam qatintsik (Apo. 1:5). Peru ¿imanö mastan Jehoväpa jutinta valoranqantsikta rikätsikushwan?

¿IMANÖ MASTAN JEHOVÄPA JUTINTA VALORANQANTSIKTA RIKÄTSIKUSHWAN?

14. Salmus 105:3 ninqannö, ¿imanirtan Jehoväpa jutinta musyatsikuntsik?

¹⁴ Llapan shonquntsikwan Jehoväpa respetashqa jutinta willakushun (leyi Salmus 105:3). Jehovätaqa alläpam gustan pëpita y jutimpaq nunakunata kushishqa willakushqa (Jer. 9:23, 24; 1 Cor. 1:31; 2 Cor. 10:17). Jehovämi Diosnintsik, y pëpa jutinta kushishqa willakurqa, Diosnintsik kanqampita orgullösu sientikunqantsiktam rikätsikuntsik. Noqantsikpaqqa alläpa shumaqmi Jehoväpa jutinta respetatsi y limpiu kanampaq yanapakuyqa. Tsëmi Jehoväpa testïgun kanqantsikta willakuytaqa penqakunantsiktsu ni trabäjuchö, ni escuëlachö, ni markantsikchö, ni mëchö këkarpis. Diabluqa manam munantsu Jehovä Diosnintsikpa jutinta musyatsikunata (Jer. 11:21; Apo. 12:17). Diabluwan yanapaqnin nunakunaqa manam munayantsu Jehoväpa jutinta nunakuna musyayänanta (Jer. 23:26, 27). Peru noqantsikqa alläpam Jehoväpa jutinta kuyantsik, tsëmi Patsa waranqampita alabantsik (Sal. 5:11; 89:16).

15. ¿Imakunatataq rurantsik Jehoväpa jutinman confiakurnin?

¹⁵ Jehoväpa jutinmanmi confiakuntsik (Joel 2:32; Rom. 10:13, 14). Jehoväpa jutinman confiakurqa, manam Diosnintsikpa jutin ima kanqanllatatsu musyantsik. Tsëpa rantinqa, Diosnintsik imanö kanqantam musyantsik, pëmanmi confiakuntsik, yanapamänapaqmi mañakuntsik y consëjunkunatam cäsukuntsik (Sal. 20:7; 99:6; 116:4; 145:18). Tsënöllam Jehoväpa jutinman confiakurqa, tsë jutita llapan nunakunata musyatsintsik, Diosnintsik imanö kanqanta entienditsintsik y Diosnintsikpa amïgun kayänampaq y arrepentikuyänampaq yanapantsik (Is. 12:4; Hëch. 2:21, 38).

16. ¿Imanötan rikätsikushwan Satanas ulikoq o llullakoq kanqanta?

¹⁶ Jehoväpa jutinrëkurmi imëka mana allikunapa pasarpis alli tsarakuntsik (Sant. 5:10, 11). Jehoväta kuyanqantsikrëkur mana allikunapa pasarnin alli tsarakurqa, Satanas ulikoq o llullakoq kanqantam rikätsikuntsik. Job kawanqan tiempuchömi Satanasqa Jehoväpa sirweqninkunapaq kënö nirqan: “Vïdanta salvananrëkurqa, pï nunapis imëkata[m] ruranqa” (Job 2:4). Juk parlakuychöqa, alli kanqantsik höralla Jehoväta sirwinqantsikta, peru problëmakunapa pasarqa Jehoväta dejarinantsikpaq kaqtam nikarqan. Peru Jobqa alli tsarakurmi rikätsikurqan Satanas ninqanqa mana rasumpa kanqanta. Jobnömi noqantsikpis, imëka problëmata o imëka sufrimientuta Satanas churamuptimpis, Jehovä Diosnintsiktaqa dejashuntsu. Llapan shonquntsikwanmi confiakuntsik Diosnintsikqa jutinrëkur cuidamänantsikpaq kaqta (Juan 17:11).

17. 1 Pëdru 2:12 ninqannö, ¿imanötan Jehoväpa jutinta alabantsik?

¹⁷ Jehovä Diosnintsikpa jutintam respetantsik (Prov. 30:9; Jer. 7:8-11). Noqantsikqa Jehovä Diospa jutimpam reqishqa kantsik y pëpa jutinchömi yachatsikuntsik, tsëmi alli portakunantsikpaq kallpachakuntsik (leyi 1 Pëdru 2:12). Jutinta mana allichö mana quedatsita munarmi parlakunqantsikkunawan y ruranqantsikkunawan Jehoväta alabanapaq kallpachakuntsik. Jutsasapa karpis, Diosnintsikpa jutin alabashqa kanampaqmi yanapakuntsik.

18. ¿Imanö mastan rikätsikuntsik Diosnintsikpa jutinta alläpa valoranqantsikta? (Nötata leyi).

¹⁸ Noqantsikpita nunakuna burlakuyaptimpis, Jehoväpa jutin respetashqa kanantam masqa munantsik (Sal. 138:2). Noqantsikqa Jehovä Diosnintsikpa jutintam alläpa kuyantsik, tsëmi Diosnintsik munanqankunata ruranapaq kallpachakuntsik. Peru höraqa tsëta rurashqam nunakuna burlakuyan y mana allikunata parlamantsik.a Tsëmi Jesustapis pasarqan. Peru pëqa Diosnintsikpa jutin alabashqa kanantam munarqan, tsëmi delincuenti nunatanö sufritsir wanutsiyänampaq listu këkarqan. Hebrëus 12:2 a 4 textuchömi Jesuspaq nin, ‘penqakuytapis mana kaqpaq churanqanta’, juk parlakuychöqa, kikimpaq yarpachakunampa rantinmi masqa yarpachakurqan Diosnintsikpa voluntäninta rurëta (Mat. 26:39).

19. ¿Qamqa Jehoväpa jutinta valorankiku? ¿Y imanirtan valoranki?

¹⁹ Jehoväpa jutintaqa llapan shonquntsikwanmi kuyantsik y Testïgunkunanö reqishqa kanqantsikpitam alläpa kushikuntsik. Tsëmi nunakuna noqantsikpita burlakuyaptin o rimamashqapis cäsupantsiktsu. Kikintsikllaman pensanantsikpa rantinmi Jehovä Diosnintsikpa jutin alabashqa kananta masqa munantsik. Tsëmi imëka sufrimientupa pasarpis o imëka trampata Satanas churamuptimpis, Jehovä Diosnintsikpa jutinta alabëtaqa ni imëpis dejashuntsu. Tsëta rurarmi Jesusnöpis, Jehovä Diosnintsikpa jutinta alläpa valorëkantsik.