Ocho gentegunallami salvarinajurca

Noé, paibu familia y tucui animalgunami arcabiga yaicunajurca. Jehová Dios arca punguda huishcashca jipami, tamiai callarirca. Yacu jatarish tamiajpimi chai arcaga yacu jahuabi tiyarish cuyuri callarirca. Asha ashami, cai allpada yacu tamiaga tucuida taparca. Arcamun na yaicushca malo gentegunaga tucuigunami huañunajurca. Pero Noé y paibu familiaga arca ucumun yaicunajushcamundami salvarinajurca. Paiguna, Jehová Diosda cazushcamundaga ashca contentollari sintirinajushca ganga.

Cuarenta funchagunada y cuarenta tutagunada ashcada tamiashca jipami tamiaga pascarirca. Tiempounga yacuga asha ashami chaquirish catirca. Chashnami arcaga shuj urcu jahuabi tiyarish saquirirca. Pero yacu chairij tiyashcamundami, Noé y paibu familia arcamundaga na llujshi pudinajurca.

Yacuga cada funchami, asha asha chaquirish catirca. Pero Noé y paibu familia arca ucubiga shuj huata yallidami causanajurca. Chai jipami Jehová Dios arcamunda ña llujshi pudina gashcada huillarca. Paiguna arca ucumunda ña llujshinajushaga, allpa diferente saquirishcadami rricunajurca. Jehová Dios paigunada salvashcamunda, agradecidos gashcada rricuchingabuga shuj ofrendada rrupachish cunajurca.

Jehová Dios chai ofrendadaga ashcadami munarca. Shinalladi cai allpa pachada manchanai tamiaun cutindi ña na tucuchishallu nishmi promitirca. Pai rrurrashca promesa fajtarina gashcada rricuchingabumi, jahua cielobi por primera vez shuj arcoirisda rricuchirca. Shuj arcoirisdaga, ¿rricushcanguillu?

Shinalladi, Noé y paibu familiadaga huahuagunada charish cai allpabi mirarillunmi Jehová Diosga mandarca.