2 Reyes
7 Eliseoca: “Jehová Dios ima nishcata uyaichij. Jehová Diosca: ‘Caya punlla cai horasca Samaria mercadopica casi iscun* libra* alli* harinaca shuj siclomi* valinga. Shinallataj 17 libra yalli* cebadaca shuj siclomi valinga’ ninmi” nircami. 2 Caita uyashpami tucuita alli pajtachij reyta ayudaj runaca Diosta sirvij runamanca: “Jehová Dios jahua pacha pungucunata pascajpipish, chaica* maitataj pajtari tucungayari” nishpa cutichirca. Chashna cutichijpimi Eliseoca: “Cambaj ñahuicunallahuantajmari ricungui. Pero canca imata mana micunguichu” nirca.
3 Shinallataj Samaria llajta pungu yaicunpica lepra ungüita charij chuscu runacunami tiyarca. Paicunapuraca caitami ninacurcacuna: “Caipica maitataj huañui japingacamaca tiyacushunllayari. 4 Cai llajtaman yaicushpapish jatun yaricai tiyashcamantami huañushun. Caipi tiyacushpallapish huañushunllatajmi. Shinaca sirio soldadocunapaj carpa huasicunaman jacuchij. Paicuna huañuchijpica huañushunllami. Pero paicuna mana huañuchijpica causashpa catishunllami” ninacurcacunami. 5 Chaimantami paicunaca ña tutayacujpi jatarishpaca siriocunapaj carpa huasicunaman chayarcacuna. Paicunaca siriocunapaj carpa huasicuna canlla ladoman chayashpaca mana pi tiyashcatami ricurcacuna.
6 Jehová Diosca siriocunamanca paicunapaj carpa huasicunapi macanacuna carretacuna, caballocuna, achca soldadocuna shamucujtami uyachirca. Chaimantami sirio soldadocunaca paicunapura: “¡Ricuichij! ¡Israel llajtamanta reyca hititacunamanta reycunata, Egiptomanta reycunatami ñucanchijpaj contra macanacunaman shamuchun ayudata mañashca!” nircacuna. 7 Chashna ninacushpami ña tutayacujpica jatarishcahuan chaimanta miticushpa rircacuna. Paicunapaj carpa huasicunatapish, caballocunatapish, burrocunatapishmi saquishpa rircacuna. Shinallataj paicunapaj carpa huasicunatapish ima shinami shayachircacuna chashnallatajmi saquishpa paicunapaj causaita quishpichingapaj miticushpa rircacuna.
8 Lepra ungüihuan caj runacunaca siriocunapaj carpa huasicuna canllamanmi chayarcacuna. Chaiman chayashpaca chai carpa huasicunamanta shuj huasiman yaicushpami chaipi micurcacuna, ubyarcacuna. Chai ucumantapish cullquita, orota, ropata apashpami pacanaman rircacuna. Chai qꞌuipaca cutin tigramushpami shujtaj carpa huasiman yaicurcacuna. Chaimantapish imalla tiyashca cosascunata apashpami pacarcacuna.
9 Chai qꞌuipaca paicunapurami: “Ñucanchij ruracushcaca mana allichu. ¡Cunan punllaca alli huillaicunata huillana punllamari can! Caya pacaringacama mana huillashpa upalla saquirishpaca achca problemacunatami charishun. Chaipaj randica ima tucucushcata reypaj huasipi huillagrishun” ninacurcacuna. 10 Chashnami paicunaca llajtapaj punguta cuidajcunata cayashpaca: “Siriocunapaj carpa huasimanmi yaicurcanchij. Chaipica ni pita mana ricurcanchijchu, ni imata mana uyarcanchijchu. Caballocuna, burrocunallami huatashcacuna carca. Chai carpa huasicunapish shitashcami carca” nircacuna. 11 Chai ratomi punguta cuidajcunaca caparishpa chai noticiata huillarcacuna. Chai noticiaca reypaj huasicamami uyarirca.
12 Reyca chai rato tuta jatarishpami paita sirvijcunamanca: “Siriocuna imata ruranata yuyacushcata ñuca huillasha. Paicunaca ñucanchij yaricaihuan cashcata yachashpami paicunapaj carpa huasicunata saquishpa campopi miticunaman rishcacuna. Siriocunaca: ‘Israelitacunaca paicunapaj llajtamantami llujshingacuna, paicunataca causajtami japishun, paicunapaj llajtamanpishmi yaicushun’ nishpami llujshircacuna” nirca. 13 Paipaj shuj sirvijca: “Huaquin cꞌaricuna llajtapi saquirij pichca* caballocunata apashpa cai llajtamanta richun saquihuai. ¡Ricui! Israel llajtapi huañushca gentecuna layallatajmi paicunaca huañungacuna. Ima tucushcata paicuna yachamuchun cachashunchij” nircami. 14 Chaimi paicunaca ishqui carretacunata caballocunahuan apashpa rircacuna. Reyca paicunataca siriocunapaj carpa huasicunaman cachashpaca: “Richij, ima tucushcata ricunaman” nircami. 15 Paicunaca siriocunataca Jordán jatun yacucamami mashcashpa rircacuna. Tucui chai ñanpica ropacuna, cosascunami shitashca siricurca. Siriocunaca manchaimantami tucuita ñanpi shitashpa miticunaman rishcacuna carca. Chaitami huillajcuna tigramushpaca reyman huillarcacuna.
16 Chaimi chai llajtapi causaj tucui gentecunaca siriocunapaj carpa huasicunamanta tucui cosascunata apanaman llujshircacuna. Chashnami Jehová Dios nishca shimicunaca pajtarirca. Casi iscun libra alli harinaca shuj siclomi valirca. Shinallataj 17 libra yalli cebadaca shuj siclomi valirca. 17 Reyca tucuita alli pajtachij paita ayudaj runatami chai llajtapaj punguta cuidachun churashca carca. Pero chai runataca gentecunaca pungu cꞌuchupimi sarushpa huañuchircacuna. Chashnami Diosta sirvij runa reyman huillashcaca tucui pajtarirca. 18 Diosta sirvij runa reyman nishca shinami pajtarirca. Paica: “Caya punllaca cai horallatajmi casi iscun libra alli harinaca shuj siclo valinga. Shinallataj 17 libra yalli cebadaca shuj siclomi Samaria pungupica valinga” nishcami carca. 19 Pero tucuita alli pajtachij reyta ayudaj runaca Diosta sirvij runamanca: “Jehová Dios jahua pacha pungucunata pascajpipish, chaica maitataj pajtari tucungayari” nishcami carca. Chashna cutichijpimi Eliseoca: “Cambaj ñahuicunallahuantajmari chaitaca ricungui. Pero canca imata mana micunguichu” nirca. 20 Cai shimicunaca pai nishca shinallatajmi pajtarirca. Gentecunaca chai runataca pungu cꞌuchupimi sarushpa huañuchircacuna.