2 Reyes
8 Eliseoca pai causachishca huahuapaj mamataca: “Jehová Diosca cai llajtapica canchis huatacunata yaricai tiyanatami huillashca. Chaimanta cambaj tucui huasipi cajcunahuan caimanta rishpa shujtaj llajtamanta shamushca shina maipi cashpapish causagri” nircami. 2 Chaimi chai huarmica Diosta sirvij runa nishca shina paipaj familiahuan chaimanta rishpa, filisteocunapaj allpapi canchis huatacunata causashpa saquirirca.
3 Canchis huatacuna qꞌuipami chai huarmica filisteocunapaj allpamanta tigramurca. Chashna tigramushpami chai huarmica reytaca paipaj huasita, paipaj allpata tigrachichun mañarca. 4 Reyca Guehazí runahuanmi parlacurca. Guehazica Eliseotami sirvij carca. Reyca Guehazitaca: “Eliseo ima jatun cosascunata rurashcata parlapai” nircami. 5 Eliseo ima shina chai huahuata causachishcatami Guehazica reyman parlacurca. Chashna parlacujpimi chai rato chai causachishca huahuapaj mamaca paipaj huasita, paipaj allpata rey tigrachichun mañanaman shamurca. Chaita ricushpami Guehazica: “Ñuca amito rey, paimi chai huarmi can. Caimi paipaj churi can. Cai huahuatami Eliseoca causachirca” nirca. 6 Chashna nijpimi reyca chai huarmita ima pasashcata tapurca. Chaimi chai huarmica tucuita huillarca. Chaipimi reyca palaciopi achca autoridadta charij runata chai huarmita ayudachun churashpaca: “Cai huarmiman tucui imalla charishca cosascunata tigrachi. Cai llajtamanta rishca horasmanta cunancama paipaj allpapipish mashnata pꞌucushcata tigrachi” nirca.
7 Eliseoca Damascomanmi rirca. Chai tiempomi Siria llajtamanta rey Ben-Hadadca ungushca carca. Chaipimi: “Diosta sirvij runaca shamushcamari” nishpa reyman huillarcacuna. 8 Chashna huillajpimi reyca Hazaelmanca: “Diosta sirvij runapajman rishpa shuj regalota apai. Paitaca, ¿ñuca cai ungüimanta alliyashachu o manachu alliyasha? nishpa Jehová Diosta tapuchun mañai” nirca. 9 Chaimi Hazaelca regalocunata apashpa Diosta sirvij runata ricunaman rirca. Chaipica Damascomanta tucui laya alli cosascunataca 40 camellocunapimi cargacunata aparca. Hazaelca chaiman chayashpaca paipaj ñaupajpi shayarishpami: “Siria llajtata mandaj rey Ben-Hadad canta sirvijca caita tapunamanmi cacharca ‘¿Cai ungüimantaca alliyashachu o manachu alliyasha?’ nin” nirca. 10 Chashna nijpimi Eliseoca: “Paipajman rishpa caita ni ‘Canca alliyanguitajmi’. Pero Jehová Diosca rey huañunataj cashcatami ñucamanca muscuipi shina ricuchishca” nishpa cutichirca. 11 Eliseoca Hazael pingai tucungacamami ricurayashpa saquirirca. Chai huashaca Diosta sirvij runaca paita ricushpami huacai callarirca. 12 Chaimi Hazaelca: “Ñuca amito, ¿imamantataj huacangui?” nishpa tapurca. Chaimi Eliseoca: “Israel llajtapi causaj gentecunata can yallitaj llaquichina cashcatamari yachani. Paicunapaj muyundijta pircashca llajtacunatami rupachingui. Sinchi runacunatapish espadahuanmi huañuchingui. Paicunapaj huahuacunatapish huañungacamami huajtangui. Chichu huarmicunatapish huijsatamari lliquingui” nishpa cutichirca. 13 Chaimi Hazaelca: “Canta sirvij ñucaca shuj allcu shinallamari cani. Maitataj chaitaca rurai tucushayari” nirca. Pero Eliseoca: “Jehová Diosmi Siria llajtata can mandana cashcata ñucaman ricuchishca” nircami.
14 Qꞌuipaca Hazael runaca Eliseota saquishpami paipaj amopajman tigrarca. Chaipimi paipaj amoca: “¿Eliseoca imatataj nirca?” nishpa tapurca. Chashna nijpimi Hazaelca: “Canca ungüimantaca alliyanguitajmi” nishpa cutichirca. 15 Pero cayandij punllataca Hazaelca shuj cobijata japishpami yacupi satirca. Chai cobijahuanmi reypaj ñahuipi churashpa huañungacama llapirca. Qꞌuipaca Hazaelmi catij rey tucurca.
16 Judá llajtata rey Jehosafat mandacujpirajmi Judá llajtata mandaj rey Jehosafatpaj churi Jehoramca catij rey tucurca. Chai tiempopica Israel llajtata mandaj Acabpaj churi Jehorammi pichca huatacunata Israelpi mandacurca. 17 Jehoramca 32 huatacunata charishpami rey tucurca. Pusaj* huatacunatami Jerusalenpica mandarca. 18 Jehoramca Israel llajtamanta reycunapaj ejemplotami catirca. Paica Acabpaj familiapi causajcuna rurashca shinallatajmi rurarca. Acabpaj ushushimi paipaj huarmi tucushca carca. Jehoramca Jehová Diospaj ñaupajpica mana allicunatami ruraj carca. 19 Shinapish Jehová Diosca paita sirvij Davidta llaquishcamantami Judataca mana tucuchirca. Diosca paimanpish, paipaj huahuacunamanpish huiñai huiñaipaj shuj lamparata cuna cashcatami ari nishca carca.
20 Jehoram mandacui punllacunapimi Edompi causajcunaca Judapaj contra jatarishpa paicunapaj propio reyta nombrarcacuna. 21 Chaimi Jehoramca paipaj tucui carretacunahuan Zairman pasashpa rirca. Edomitacunaca Jehorampaj, carretacunata pushajcunata mandajcunapaj muyundijpimi shayarishcacuna carca. Chaimi Jehoramca tuta jatarishpa edomitacunataca misharca. Chashna rurajpimi soldadocunaca paicunapaj carpa huasicunaman miticushpa rircacuna. 22 Edompi causajcuna Judapaj contra jatarishcaca cunancamami catin. Chai tiempopica Libnapi causajcunami Judapaj contra jatarircacuna.
23 Jehorampaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun. 24 Qꞌuipaca Jehoramca huañurcami.* Paitaca paipaj ñaupa yaya Davidpaj Llajtapimi paipaj ñaupa yayacunahuan pambarcacuna. Chai qꞌuipaca paipaj churi Ocoziasmi catij rey tucurca.
25 Israel llajtata mandaj Acabpaj churi Jehoram 12 huatacunata mandacujpimi Judá llajtata mandaj rey Jehorampaj churi Ocoziasca mandai callarirca. 26 Ocoziasca 22 huatacunata charishpami rey tucurca. Jerusalenpica shuj huatatami mandarca. Paipaj mamaca Israel llajtata mandaj rey Omripaj nieta* Ataliami carca. 27 Ocoziasca Acabpaj familiapaj ejemplotami catirca. Acabpaj familia rurashca shinallatajmi paica Jehová Diospaj ñaupajpi mana allicunata ruraj carca. Paipaj yayaca Acabpaj familiamanta huarmihuanmi cazarashca carca. 28 Ocoziasca Israel llajtata mandaj rey Acabpaj churi Jehoramhuanmi, Siriamanta rey Hazaelpaj contra Ramot-Galaadpi macanacunaman rirca. Shinapish siriocunami Jehoramtaca chugrichirca. 29 Rey Jehoramca Ramá llajtapi Siria llajtamanta rey Hazaelpaj contra macanacucujpimi siriocunaca paita chugrichircacuna. Chaimi alliyangapaj Jezreel llajtaman tigrarca. Acabpaj churi Jehoram chugrichishca cashcamantami Judá llajtata mandaj rey Jehorampaj churi Ocoziasca paita ricunaman uriyarca.