1 Crónicas
21 Satanasca* Israelpaj contra tucushpami Israel llajtapi shuj censota rurachun Davidmanca yuyaita curca. 2 Chaimi Davidca Joabtapish, israelitacunata pushajcunatapish: “Beer-Sebamanta Dancama mashna israelitacuna tiyashcata yupagrichij, qꞌuipaca mashna cashcata ñuca yachangapaj huillanguichij” nirca. 3 Shinapish Joabca: “¡Jehová Dios paipaj pueblota 100 cutinhuan mirachichun! Ñuca amito reylla, ¿manachu tucui paicunaca ñuca amitota sirvijcuna can? Ñuca amito, ¿cai censotaca imamantataj rurasha ninguiyari? ¿Chashna rurajpica manachu israelitacunaca juchayujcuna tucungayari?” nircami.
4 Ashtahuanpish reyca Joab nishcacunataca mana uyasha nircachu. Joabca chaimanta rishpami tucui Israel llajtata purishpa chai qꞌuipaca Jerusalenman tigramurca. 5 Joabca tucui mashna registrashcacunatami Davidman huillarca. Tucui Israelpaj familiacunamantaca shuj millón cien mil cꞌaricunami espadacunahuan alli macanacujcuna tiyarca. Cutin Judapaj familiamantaca 470.000 cꞌaricunami espadacunahuan alli macanacujcuna tiyarca. 6 Rey mandashcaca Joabpajca manataj alli ricurircachu. Chaimantami Levipaj familiamanta, Benjaminpaj familiamanta cajcunataca mana registrarca.
7 David nishcaca Diospajca mana alli ricurircachu. Chaimantami Diosca Israel llajtata castigarca. 8 Davidca Diosmanca: “Ñucaca caita rurashpaca juchatamari rurashcani. Muspa shinami ñucaca tucushcani. Ñucaca canta sirvijmi cani. Ñuca pandarishcata quishpichihuai” nircami. 9 Gad runaca muscuipi shina ricushcacunata Davidpaj huillajmi carca. Paimanmi Jehová Diosca cashna huillarca: 10 “Davidpajman rishpaca: ‘Jehová Diosca: “Quimsa castigocunatami can agllachun cuni. Caimanta can imata rurachun munashcata agllai” ninmi’ nigri” nircami. 11 Gad runaca Davidpaj ñaupajman shamushpami cashna nirca: “Jehová Diosca caitami nin: ‘Caimantaca maijantapish agllai: 12 ¿Quimsa huatacuna yaricai tiyachunchu munangui? ¿Mana cashpaca cambaj contracuna quimsa quillacunapi, espadahuan macanacushpa canta mishashpa huañuchichunchu munangui? ¿Mana cashpaca quimsa punllacunapi Jehová Diospaj shuj ángel shamushpa, Jehová Diospaj espadahuan tucui Israel llajtapi millai ungüihuan huañuchichunchu munangui?’ ninmi. Cunanca alli yuyai. ¿Ñucata cachajmanca imatataj huillachun ningui?” nircami. 13 Chaimi Davidca Gad runamanca: “Ñucaca yallitaj llaquillami cani. Jehová Dios ñucata castigachunmi munani, paica yallitaj llaquijmi can. Shinapish pi runa ñucata castigachunca mana munanichu” nirca.
14 Chashna nijpimi Jehová Diosca Israel llajtamanca shuj millai ungüita cacharca. Chai millai ungüimantami Israel llajtapica 70.000 gentecuna huañurca. 15 Diosca Jerusalenta tucuchichunca shuj angeltami cacharca. Shinapish cai ángel chaita ruragrijta ricushpami Jehová Diosca cai gentecunamanta yallitaj llaquirishpaca, cai llajtata tucuchicuj angeltaca: “¡Ama imata ruraichu! Cambaj maquita uriyachi” nirca. Jehová Diospaj angelca jebuseocunapuramanta Ornán runapaj trillana pamba cꞌuchupimi carca.
16 David huichilla ricushpaca Jehová Diospaj ángel cielopi* cajtami ricurca. Chai angelca paipaj espadata huaquichinamanta llujshichishcahuan Jerusalén ladota señalacujtami Davidca ricurca. Davidpish, israelitacunata pushajcunapish* racu sacota* churarishpami chai rato pambacama cumurircacuna. 17 Davidca Diostaca: “Ñucami cai pueblota yupachunca mandarcani. Ñucamari juchata rurashcani, ñucami pandarishcani. Shinapish ¿cai ovejitacunaca imatataj rurashcacunayari? Ñuca Jehová Dioslla, cambaj maquihuanca ñucata, ñuca yayapaj familiapi cajcunallata castigapai. Cashna millai ungüihuanca cambaj pueblotaca ama castigapaichu” nircami.
18 Shinapish Jehová Diospaj angelca Gad runataca jebuseocunapuramanta Ornanpaj trillana pambaman huichiyashpa, Jehová Diospaj shuj altarta ruragri nishpa Davidman huillagri nishpami mandarca. 19 Gad runa Jehová Diospaj shutipi huillashca shinami Davidca chai lugarman huichiyarca. 20 Ornán runa trigota trillacushpaca, tigralla ricushpami shuj angelta ricurca. Chaimi paihuan caj chuscu churicunaca miticurcacuna. 21 Ornán runapajman David huichiyajpimi Ornanca paita ricushpa, chai rato trillana pambamanta llujshishpaca Davidpaj ñaupajpi pambacama cumurirca. 22 Chaimi Davidca Ornán runamanca: “Cambaj trillana pambapi Jehová Diospaj shuj altarta shayachingapaj ñucaman cꞌatui. Chai allpa mashna valishcapi cꞌatuilla. Chashnami Diosca gentecunata castiganata saquinga” nirca. 23 Chashna nijpimi Ornanca Davidmanca: “Tucui caicunahuan saquirilla. Ñuca amito rey, can munashca shina* rurailla. Rupachishca ofrendacunata cungapajpish cai huagracunatami cuni. Yantapajpish cai trillana tablacunatami cuni. Grano ofrendata cuchunpish cai trigotami cuni. Tucuitami canman cuni” nirca.
24 Ashtahuanpish rey Davidca Ornán runamanca: “Mana, ñucaca tucuitami canmanca chai allpamantaca pagasha. Jehová Diosman cungapajpish can cushcacunahuanca mana saquirishachu. Ñucaman convidashcacunallahuanca Diosmanca rupachishca sacrificiocunataca mana cushachu” nishpami cutichirca. 25 Chashnami Davidca Ornán runamanca 600 siclo* orota pesashpa chai allpamanta curca. 26 Chaimi Davidca Jehová Diospaj shuj altarta shayachishpa chaipi rupachishca sacrificiocunata, Dioshuan alli tucungapaj sacrificiocunatapish curca. Shinallataj Jehová Diospaj shutita nishpami mañarca. Chashna rurajpimi Diosca altar jahuapi tiyaj ofrendacunata rupachingapaj jahua pachamanta ninata cachashpa cutichirca. 27 Shinaca Jehová Diosca chai angeltaca espadata paipaj huaquichinapi churachunmi mandarca. 28 Jebuseocunapuramanta Ornanpaj trillana pambapi pai mañashcata Jehová Dios cutichijta ricushpami Davidca chaipi sacrificiocunata cushpa catirca. 29 Chai tiempopica chaquishca pambapi Moisés rurashca Jehová Diospaj carpa huasipish, rupachishca ofrendata cuna altarpish Gabaón lugarpimi adorangapaj carca. 30 Pero Davidca Jehová Diospaj ángel espadata charicujta ricushpami achcata mancharca. Chaimantami paica Diosta tapungapajca Gabaonmanca mana ri tucurca.