1 Crónicas
22 Davidca: “Caipimi Jehová Diospaj huasica canga. Caipica shuj altarpishmi tiyanga. Chaipimi israelitacunaca rupachishca ofrendacunata cunga” nircami.
2 Chai qꞌuipaca Davidca Israel llajtapi causacuj shujtaj llajtamanta shamushca runacunatami tandachichun mandarca. Chashnami paicunataca Diospaj huasita shayachingapaj rumicunata pꞌaquishpa, labrashpa trabajachun churarca. 3 Shinallataj Davidca huasi pungucunapaj clavocunatapish, bisagracunatapish rurangapajmi achca fierrota listota saquirca. Mana pesai tucuipaj achca cobretapishmi saquirca. 4 Ashtahuanpish achca cedro caspicunatami saquirca. Sidonmanta cajcuna, Tiromanta cajcunami achca cedro caspicunata Davidpajman apamushcacuna carca. 5 Davidca cashnami nirca: “Jehová Diospaj huasita shayachishcaca yallitaj alajami cana can. Tucui llajtacunapimi cai huasica sumaj, yallitaj rijsishca cana can. Shinapish ñuca churi Salomonca jovenrajmi, ima experienciata mana charinchu. Chaimi tucuita paipaj listota allichishpa saquigrini” nircami. Davidca manaraj huañushpami huasita shayachichunca tucui materialcunata listota saquirca.
6 Shinallataj paipaj churi Salomonta cayashpami, israelitacunapaj Jehová Diospaj shuj huasita shayachichun mandarca. 7 Davidca paipaj churi Salomonmanca cashnami nirca: “Ñuca shungupica Jehová Diospaj shutita jatunyachingapajmi shuj huasita shayachinata munarcani. 8 Shinapish Jehová Diosmantami cashna nishcata* chasquircani: ‘Canca jatun macanacuicunapi macanacushpami achca gentecunata huañuchishcangui. Canca cai allpapica ñuca ñaupajpimi achca gentecunata huañuchishcangui. Chaimi ñuca shutita jatunyachingapajca canca shuj huasita mana shayachingui. 9 ¡Ricui! Canca shuj churitami charigringui. Paica sumajta causaj* runami canga. Paitaca paipaj muyundijpi caj contracunamantami samachisha. Paipaj shutica Salomonmi* canga. Pai causacui punllacunapica Israel llajtapica sumaj, tranquilo causaitami cusha. 10 Paimi ñuca shutita jatunyachingapajca shuj huasita ruranga. Paica ñuca churimi canga, ñucaca paipaj yayami casha. Shinallataj Israel llajtata huiñai huiñaita mandachunmi pai mandashpa tiyarinatapish sinchita chaipi churasha’ nircami.
11 Cunanca ñuca huahualla, Jehová Dios canhuan cachun. Jehová Diospaj huasita shayachinapipish alli llujshichunmi munani. Canmanta Dios nishca shina pajtarichun. 12 Ashtahuantajca Jehová Dios Israel llajtata mandachun autoridadta canman cushpaca paillatajmi alli yuyaita, intindinata cunga. Chashnami ñucanchij Jehová Diospaj leyta cazungui. 13 Jehová Diosca Moisesmanmi israelitacunaman mandashcacunata, imallata rurachun nishcacunata curca. Chai mandashcacunata, imallata rurachun nishcacunatapish can alli pajtachijpica tucui can rurashcami alli llujshinga. Chaimanta sinchi, mana manchaj cai, imatapish ama manchaichu, ama chujchuichu. 14 Achcata esforzarishpami Jehová Diospaj huasipajca 100.000 talento* orota, shuj millón talento cullquita saquini. Shinallataj mana pesai tucuipaj achca cobretapish, fierrotapishmi saquini. Caspicunata, rumicunatapish tucuitami listota saquini. Shinapish canca chaitapish yallimi ashtahuan mirachina cangui. 15 Canca achca trabajadorcunatami charingui: rumita pꞌaquijcunata, albañilcunata, carpinterocunata, tucui laya trabajocunata alli rurajcunatami charingui. 16 Oropish, cullquipish, cobrepish, fierropish mana yupaipajmi can. Cunanca rurai callarilla, Jehová Dios canhuan cachun” nircami.
17 Davidca Israel llajtata mandajcunatami paipaj churi Salomonta ayudachun mandarca. Chaimi cashna nirca: 18 “¿Manachu ñucanchij Jehová Diosca cancunahuan? ¿Manachu cancunamanca tucui ladocunapi paica sumaj causaita cushca? Paimi cai llajtapi caj gentecunata mishachunca ñucata ayudashca. Chaimi cai llajtaca Jehová Diospaj, paipaj gentecunapaj maqui ucupi can. 19 Cunanca cancunapaj tucui shunguhuan, cancunapaj tucui almahuan* ñucanchij Jehová Diosta mashcanata agllaichij. Shinallataj Jehová Diospaj huasitapish shayachichij. Chashnami Jehová Dioshuan ari ninacushca arcatapish, Diospaj chꞌicanyachishca cosascunatapish cai huasiman apamunguichij. Shinallataj Jehová Diostapish alabanguichij” nircami.