Jeremías
23 “¡Aij ñuca michina qꞌuihuacunamanta caita chaita cachashpa ñuca ovejacunata tucuchij michijcunalla!” ninmi Jehová Diosca.
2 Jehová Dios, israelitacunapaj Diosca paipaj pueblota michijcunapaj contrami: “Cancunaca ñuca ovejacunatami caita chaita cacharcanguichij. Chaita ruranataca mana saquircanguichijchu. Paicunataca mana cuidarcanguichijchu” nin.
“Chaimantami cancunapaj mana alli ruraicunamanta cancunataca castigasha” ninmi Jehová Diosca.
3 “Chai qꞌuipami saquirij ñuca ovejacunataca caita chaita cachashca tucui allpacunamanta tandachishpa paicunata michina qꞌuihuacunaman cutin tigrachimusha. Chaipimi mirarishpa achcacuna tucunga. 4 Paicunata michichunca alli michijcunatami churasha. Chai michijcunataca mana manchangacunachu, mana chujchungacunachu. Shujllapish mana faltangachu” ninmi Jehová Diosca.
5 “Ricuichij, punllacunaca cꞌuchuyamucunmi” ninmi Jehová Diosca. “Chai punllacunapica Davidmanta cashcata ruraj retoño* llujshichunmi saquisha. Paica shuj rey shinami mandanga, alli yachaita charishcatami ricuchinga. Allpa pachapica cashcatami ruranga, allitami ruranga. 6 Pai mandacui punllacunapica Judaca quishpichishcami canga. Israelpish imata mana manchashpami causanga. Paitaca: Jehová Diosmi Ñucanchijpajca Cashcata Ruraj nishpami rijsingacuna”.
7 Jehová Diosca cashnatajmi nin: “Punllacunaca cꞌuchuyamucunmi. Chai punllacunapica gentecunaca: ‘¡Causaj Jehová Diospaj shutipimi jurani. Paimi israelitacunataca Egipto llajtamanta llujshichirca!’ mana ningacunachu. 8 Ashtahuanpish paicunaca: ‘Causaj Jehová Diospaj shutipimi jurani. Paimi Israelpaj huahua huahuacunataca janaj lado allpamanta, caita chaita cachashca tucui allpacunamanta llujshichishpa pushamushca’ ningacunami. Paicunaca paicunapaj propio allpapimi causangacuna” ninmi.
9 Profetacunamanca caitami nini:
Ñuca shunguca pꞌaquirishcamari.
Ñuca tucui tullucunaca chujchucunmari.
Jehová Diosmanta, paipaj jucha illaj shimicunamantami
machashca runa shina,
yuyai chingaringacama vinota ubyashca runa shina cani.
10 Cai allpaca huainayajcunahuan jundamari.
Allpaca maldicishcamantami llaquilla can.
Chaquishca pambapi* tiyaj michina qꞌuihuacunapish chaquirishcamari.
Paicunaca mana allitamari rurancuna, poderta charishcamantamari llaquichincuna.
11 “Profetapish, sacerdotepish mapami saquirishcacuna.*
Paicuna millaita rurashcataca ñuca huasipipishmi japishcani” ninmi Jehová Diosca.
12 “Shinaca paicunapaj ñanca lluchcarinalla, amsami canga.
Paicunata tꞌangashpa shitajpica urmangacunallami.
Castigana huatapimi
paicunataca llaquichisha” ninmi Jehová Diosca.
13 “Samariamanta profetacunapica millanana ruraicunatami ricushcani.
Paicunaca Baalpaj profetacunami,
ñuca pueblo Israeltami pandachincuna.
14 Jerusalenmanta profetacunapica millai ruraicunatami ricushcani.
Paicunaca huainayancunami, llullacunatami nincuna.
Millai runacunatami ayudancuna,
paicunapaj millai ruraicunamantaca mana arrepintirincunachu.
Ñuca ñaupajpica tucui paicunaca Sodoma shinami.
Cai llajtapi causajcunapish Gomorra shinami”.
15 Chaimantami jahua pacha soldadocunata mandaj Jehová Diosca profetacunapaj contra caita nin:
“Jerusalenmanta profetacunaca tucui cai llajtapimi gentecunataca ñucapaj contra tucuchun yachachishcacuna.
Chaimantami paicunamanca ajenjota caragrini,
venenashca yacutapishmi ubyachigrini”.
16 Jahua pacha soldadocunata mandaj Jehová Diosca caitami nin:
“Cancunaman huillacuj profetacuna nishcataca ama uyaichijchu.
Cancunataca inquitacuncunami.
Muscuipi shina ricushcataca paicunapaj shungupi yuyashcallamantami huillacuncuna.
Jehová Dios paipaj shimihuan nishcataca mana huillacuncunachu.
17 Ñucata mana respetajcunamanca: ‘Jehová Diosca:
“Cancunaca sumaj causaitami charinguichij” ninmi’ nishpami catincuna.
Cutin paicunapaj rumi shungu nishcata catijcunamanca:
‘Cancunataca ima llaqui mana japingachu’ nishpami catincuna.
18 ¿Pai nishca shimicunata uyangapaj, intindingapajca
pitaj Jehová Diospaj alli amigocunapurapi cashcari?
¿Pitaj pai nishca shimicunataca alli uyashcari?
19 ¡Ricuichij! Jehová Dios yallitaj pꞌiñarishcaca sinchi huaira shinami jataringa.
Millaicunapaj jahuamanmi shuj acapana shina uriyanga.
20 Jehová Diosca paipaj shungupi yuyashcata
pajtachingacamami yallitaj pꞌiñarishca catinga.
Cancunaca tucuri punllacunapimi chaitaca alli intindinguichij.
21 Profetacunataca mana cacharcanichu, pero paicunaca callpashpami rircacuna.
Paicunahuanca mana parlarcanichu, pero paicunaca imalla tucunatami huillarcacuna.
22 Pero paicuna ñuca alli amigocunapurapi cashca cashpaca
ñuca nishca shimicunata ñuca pueblo uyachunmi ayudanman carcacuna.
Ñuca pueblo mana alli ñanta saquichun, paicunapaj mana alli ruraicunata saquichunmi ayudanman carcacuna”.
23 “¿Ñucaca cancunapaj cꞌuchupi cashpallachu Dios cani? ¿Manachu cancunamanta carupi cashpapish Dios cani?” ninmi Jehová Diosca.
24 “¿Shuj runaca ñuca maipi mana ricushcapi miticui tucunchari?” ninmi Jehová Diosca.
“¿Manachu jahua pachatapish, cai pachatapish tucuita ricui tucuni?” ninmi Jehová Diosca.
25 “Ñuca shutipi llullacunata huillacuj profetacunataca ‘¡Shuj muscuitami charishcani! ¡Shuj muscuitami charishcani!’ nicujtami uyashcani. 26 ¿Profetacunaca ima horacamataj paicunapaj shungupica llullacunata huillana yuyailla cangari? Chai profetacunaca paicunapaj shungupi tiyashca llullacunallatami huillancuna. 27 Paicuna muscushcata caishuj chaishuj parlanacushpami ñuca pueblo ñuca shutita cungarichun munancuna. Paicunapaj yayacunapish Baalta adorashpami ñuca shutita cungarircacuna. 28 Shuj profeta imata muscushpaca chaita parlachun. Pero ñuca nishca shimicunata chasquijca mana llullashpa tucuita huillachun”.
“¿Ujshapish, granopish igualchari can?” ninmi Jehová Diosca.
29 “¿Manachu ñuca nishca shimicunaca nina shina, jatun pata rumita pꞌaquina combo shina can?” ninmi Jehová Diosca.
30 “Chaimantami ñuca mana huillashca shimicunata huillaj profetacunataca llaquichisha” ninmi Jehová Diosca.
31 “Paicunapaj cꞌalluhuan ‘¡Paica cashnatajmi nin!’ nij profetacunatami llaquichisha” ninmi Jehová Diosca.
32 “Llulla muscuicunata parlaj profetacunatami castigasha. Paicunaca paicunapaj muscuicunatami parlashpa purincuna, jatun tucushpami llullacunata nishpa ñuca pueblotaca pandachincuna” ninmi Jehová Diosca.
“Pero ñucaca paicunataca mana cacharcanichu, imata mana mandarcanichu. Paicunaca cai pueblotaca mana ayudai tucungacunachu” ninmi Jehová Diosca.
33 “Cai pueblomanta maijan runa cashpa, shuj profeta cashpa, shuj sacerdote cashpa ‘Cai huillaica Jehová Diosmanta llashaj quipimari’ nijpica canca ‘Jehová Diosca: “¡Cancunami chai llashaj quipi canguichij! Ñucaca cancunatami saquisha” ninmi’ ningui. 34 Profeta cajpipish, sacerdote cajpipish o cai pueblomanta maijan runa cajpipish ‘¡Cai huillaica Jehová Diospaj llashaj quipimi!’ nijtaca castigashami. Chai runatapish, paipaj huasipi cajcunatapish castigashami. 35 Cancunamantaca cada unomi cancunapaj projimotapish, cancunapaj huauquitapish: ‘¿Jehová Diosca imatataj cutichishcari? ¿Jehová Diosca imatataj nishcari?’ nicunguichij. 36 Jehová Dios huillashca shimicunaca llashaj quipimi can ama nichijchu. Cancuna nishca shimicunallatajmi llashaj quipi can. Cancunaca causaj Dios, jahua pacha soldadocunata mandaj ñucanchij Jehová Dios nishca shimicunatami cambiashcanguichij.
37 Profetacunamanca caitami nina cangui: ‘¿Jehová Diosca imatataj cutichishcari? ¿Jehová Diosca imatataj nishcari? 38 Cancuna “¡Cai huillaica Jehová Diospaj llashaj quipimi!” nishpa catijpica Jehová Diosca: “Ñuca ‘“Cai huillaica Jehová Diospaj llashaj quipimi” ama ninguichij’ nishpa mandajpipish cancunaca ‘Cai huillaica Jehová Diospaj llashaj quipimi’ nishpami catinguichij” ninmi’ ninami cangui. 39 Chaimantami cancunataca alzashpa ñuca ñaupajmanta caruta shitasha. Cancunatapish, cai llajtatapishmi chashna rurasha. Cai llajtataca cancunamanpish, cancunapaj ñaupa yayacunamanpishmi curcani. 40 Chashnami cancunataca pingaipi saquichisha, humillachisha. Chashna rurashcataca mana cungaringacunachu”’”.