Jeremías
41 Séptimo quillapica reypaj huahua huahuacunamanta Ismaelca chunga runacunahuanmi Mizpá llajtapi Ahicampaj churi Guedaliasta ricunaman chayarca. Ismaelca Netaniaspaj churimi carca. Netaniasca Elisamapaj churimi carca. Ismaelca rey churashca punta pushajcunamanta shujmi carca. Mizpá llajtapi tandalla micucushpami 2 Netaniaspaj churi Ismaelca paihuan rij chunga runacunandij jatarishpaca Safanpaj nieto, Ahicampaj churi Guedaliastaca espadahuan huañuchirca. Chashnami Ismaelca llajtata mandachun Babiloniamanta rey churashca mandajta huañuchirca. 3 Ismaelca Mizpá llajtapi Guedaliashuan caj tucui judiocunatami huañuchirca. Shinallataj chaipi caj caldeocunapaj soldadocunatapishmi huañuchirca.
4 Guedaliasta huañuchishca cayandij punlla, manaraj pi yachaj chayajpimi 5 Siquemmanta, Silomanta, Samariamanta 80 runacuna shamurca. Chai runacunaca paicunapaj barbastaca rasurarishcacunami carca, paicunapaj churanatapish lliquirishcacunami carca, paicunapaj cuerpotapish cuchurishcacunami carca. Shinallataj paicunapaj maquipica Jehová Diospaj huasiman apangapajmi olibanota, grano ofrendacunatapish charicurcacuna. 6 Cutin Netaniaspaj churi Ismaelca Mizpá llajtamanta llujshishpami paicunata tupanaman rirca. Ñantaca huacaihuanmi rirca. Paicuna maipi cashcaman chayashpaca: “Ahicampaj churi Guedaliasta ricunaman shamuichij” nircami. 7 Pero llajtaman yaicushpaca Netaniaspaj churi Ismaelpish, paihuan caj runacunapish chai shamuj runacunataca huañuchishpami jutcupi shitarcacuna.
8 Pero chunga runacunaca Ismaeltaca: “Ñucanchijtaca ama huañuchipaichu. Ñucanchijca trigota, cebadata, aceiteta, mieltapishmi campopi pacashpa charicunchij” nircacunami. Chaimi paicunapaj huauquicunata huañuchishca shina paicunataca mana huañuchirca. 9 Ismaelca pai huañuchishca runacunataca shuj jatun jutcupimi shitarca. Chai jutcutaca rey Asami Israel llajtamanta rey Baasahuan macanacucushpa rurashca carca. Netaniaspaj churi Ismaelca pai huañuchishca runacunapaj cuerpocunahuanmi chai jutcuta jundachirca.
10 Ismaelca Mizpá llajtapi saquirij gentecunatami prezuta shina aparca. Reypaj ushushicunatapish, Mizpá llajtapi saquirij tucui gentecunatapishmi aparca. Guardiacunata mandaj Nebuzaradanca chai gentecunata cuidachunmi Ahicampaj churi Guedaliasta churashca carca. Chai gentecunatami Netaniaspaj churi Ismaelca prezuta shina apashpa ammonitacunapaj allpaman rirca.
11 Careahpaj churi Johananpish, paihuan caj soldadocunata tucui mandajcunapish Netaniaspaj churi Ismael tucui mana allicunata rurashcatami yachaj chayarcacuna. 12 Chaimi paicunaca tucui runacunandij Netaniaspaj churi Ismaelhuan macanacunaman rircacuna. Ismaeltaca Gabaonpi caj achca yacu* cꞌuchupimi japircacuna.
13 Ismaelhuan caj tucui gentecunaca Careahpaj churi Johanantapish, soldadocunata mandajcunatapish ricushpaca achcatami cushicurcacuna. 14 Chaimi Mizpá llajtamanta prezuta shina Ismael apashca tucui gentecunaca Careahpaj churi Johananhuan tigrarcacuna. 15 Pero Netaniaspaj churi Ismaelca paihuan caj pusaj* runacunandijmi Johanán runamanta miticushpa ammonitacunapaj allpaman rirca.
16 Careahpaj churi Johananpish, paihuan caj soldadocunata tucui mandajcunapish Mizpá llajtapi saquirij gentecunatami paicunahuan pusharcacuna. Chai gentecunataca Ahicampaj churi Guedaliasta Netaniaspaj churi Ismael huañuchishca qꞌuipami quishpichircacuna. Gabaón llajtamantaca cꞌaricunata, soldadocunata, huarmicunata, huahuacunata, palaciopi achca autoridadta charijcunatapishmi pusharcacuna. 17 Paicuna rishpaca Belén cꞌuchullapi caj Kimham runapaj samarina huasipimi saquirircacuna. Paicunaca Egipto llajtaman chayanata yuyashpami chaipi saquirircacuna. 18 Caldeocunata manchashpami chaipi saquirircacuna. Babiloniamanta reyca Ahicampaj churi Guedaliastami llajtata mandachun churashca carca. Pero Netaniaspaj churi Ismaelca paitami huañuchishca carca.