Ezequiel

18 Jehová Diosca cutinllatajmi ñucamanca cai shimicunata nirca: 2 “Israel llajtapica cancunaca: ‘Yayacunami jayaj uvacunata micurcacuna. Pero churicunapaj quirucunami chꞌahuanyarca’* ninatami yachanguichij. ¿Chaica imatataj nisha ninyari?

3 ‘Ñuca causacushca shinallatajmi jurani’ ninmi Tucuita Mandaj Amito Jehová Diosca. ‘Israelpica ña mana chaita ninguichijchu. 4 Ricuichij, tucui almacunaca* ñucapajmi can. Yayapaj almapish, churipaj almapish ñucapajmi can. Juchata ruraj almaca* huañungatajmi.

5 Shuj runachari cashcata ruraj, allita ruraj can. 6 Paica urcucunapi rurashcalla dioscunaman cushca sacrificiotaca mana micunchu. Israelitacunapaj millanana rurashcalla dioscunatapish mana mañanchu. Shujtaj runapaj huarmihuanpish mana huainayanchu.* Quilla ungüihuan caj huarmihuanpish mana chayarinchu. 7 Chai runaca ni pita mana llaquichinchu. Ashtahuanpish paica shuj dibij runa garantiata paiman saquishcatami tigrachin. Pita mana shuhuanchu. Ashtahuanpish yaricaihuan cajmanmi paipaj micunata caran. Ropata mana charijmanpishmi churachin. 8 Paica interesta cobranaraiculla, imata japinaraicullaca mana mañachinchu. Ashtahuanpish paica cashcata rurajmi. Ishqui runacunapura ima problemata charijpipish paica cashcata rurashpami juzgan. 9 Paica siempremi ñuca leycunata catin, allita rurangapajmi ñuca imallata rurachun nishcacunatapish cazun. Chaita ruraj runaca cashcata rurajmi can. Paica manataj huañungachu’ ninmi Tucuita Mandaj Amito Jehová Diosca.

10 ‘Pero chai runaca shuhuaj o huañuchij, mana cashpaca cai laya shujtaj juchacunata ruraj churitachari charinga 11 (yaya caicunata mana rurashca cajpipish). Chai churica urcucunapi rurashcalla dioscunaman cushca sacrificiotami micun. Shujtaj runapaj huarmihuanpishmi huainayan, 12 imata mana charij runata, pobre runatami llaquichin, shuhuan, garantiata cushcatapish mana tigrachinchu. Paica millanana rurashcalla dioscunatami mañan, millanana ruraicunatapishmi ruran. 13 Paica interesta cobranaraiculla, imata japinaraicullami mañachin. Chai churica mana causashpa catingachu. Pai tucui millanana ruraicunata rurashcamantaca huañungatajmi. Paipaj culpallamantatajmi huañunga.*

14 Shuj runachari shuj churita charinga. Chai churica paipaj yaya tucui juchacunata rurashcatachari ricun. Chai churica chaita ricushpapish paipaj yaya shinaca mana ruranchu. 15 Paica urcucunapi rurashcalla dioscunaman cushca sacrificiota mana micunchu. Israelitacunapaj millanana rurashcalla dioscunatapish mana mañanchu. Shujtaj runapaj huarmihuanpish mana huainayanchu, 16 paica mana pita llaquichinchu, garantía shina cushcatapish mana paipaj japinchu, mana imata shuhuanchu. Yaricaihuan cajmanpish paipaj micunatami cun, ropata mana charijmanpish churachinmi, 17 pobre runataca mana llaquichinchu, interesta cobranaraicullaca mana mañachinchu, imata japinaraicullaca mana mañachinchu. Paica ñuca imallata rurachun nishcacunatapish pajtachishpami ñuca leycunatapish catin. Chaita ruraj runaca paipaj yayapaj juchamantaca mana huañungachu. Paica causashpami catinga. 18 Cutin paipaj yayaca umashpa quichuna yuyailla causashcamanta, paipaj huauquita shuhuashcamanta, paipaj llajta gentecunapurapi mana allita rurashcamantami paipaj juchamantaca huañunga.

19 Pero cancunaca: “¿Imamantataj churica paipaj yayapaj juchamantaca mana culpayuj canyari?” ninguichijmi. Churica cashcata rurashcamanta, allita rurashcamanta, ñuca leycunatapish cazushcamanta, alli pajtachishcamantami causashpa catinga. 20 Juchata ruraj almaca* huañungatajmi. Shuj churica paipaj yayapaj juchacunamantaca mana castigashcachu canga. Shinallataj yayaca paipaj churipaj juchacunamantaca mana castigashcachu canga. Cashcata ruraj runaca cashcata ruraj shinallatajmi juzgashca canga. Millai runaca millaita ruraj shinallatajmi juzgashca canga.

21 Shinapish maijan millai runa pai rurashca tucui juchacunata saquishpa, ñuca leycunata cazushpa, cashcata rurashpa, allita rurashpaca causangatajmi. Mana huañungachu. 22 Pai rurashca juchacunaca mana yuyarishcachu canga. Paica cashcata rurashcamantami causashpa catinga’.

23 ‘¿Millai runa huañujpica ñucaca cushicunichu?’ ninmi Tucuita Mandaj Amito Jehová Diosca. ‘¿Manachu ñucaca chai runa paipaj mana alli ruraicunata saquishpa causashpa catichun munani?’.

24 ‘Ashtahuanpish cashcata ruraj runa cashcata ruranata saquishpa mana allita rurashpa, millai runa shina tucui millanana ruraicunata rurashpaca, ¿causashpa catingachu? Paipaj ima alli ruraicunaca shujllapish mana yuyarishcachu canga. Paica mana cazushcamanta, juchata rurashcamantami huañunga.

25 Pero cancunaca: “Jehová Diospaj ñanca mana allichu can” ninguichijmi. ¡Israelitacunalla, uyapaichij! ¿Ñuca ñanchu mana alli can? ¿Manachu cancunapaj ñancuna mana alli can?

26 Cashcata ruraj runa cashcata ruranata saquishpa, mana allita rurashpaca paillatajmi huañunga. Paillataj mana alli ruraicunata rurashcamantami huañunga.

27 Pero shuj millai runa mana allita ruranata saquishpa, cashcata rurashpa, allita rurashpaca causashpami catinga. 28 Shinallataj pai tucui juchacunata ruracushcata cuentata cushpa chaicunata ruranata saquishpaca paica causashpami catinga. Mana huañungachu.

29 Pero israelitacunaca: “Jehová Diospaj ñanca mana allichu can” ningacunami. Israelitacunalla, ¿ciertotajchu ñuca ñancunaca mana alli can? ¿Manachu cancunapaj ñancuna mana alli can?’.

30 ‘Israelitacunalla, cancunataca cada uno imallata rurashca shinallatajmi juzgasha’ ninmi Tucuita Mandaj Amito Jehová Diosca. ‘Chaimanta arrepintirishpa cancunapaj tucui juchacunata saquichij. Chashnami juchapica mana urmanguichij, mana castigashca canguichij. 31 Israelitacunalla, tucui cancunapaj juchacunata saquishpa cancunapaj shungutapish, yuyaitapish mushujyachichij. ¿Cancunaca imamantataj huañuna canguichijyari?’.

32 ‘Maijan runa huañujpica ñucaca mana cushicunichu. Shinaca ñucapajman tigrarichij, causanguichijmi’ ninmi Tucuita Mandaj Amito Jehová Diosca” nircami.